‘మూడు నెలల పసిబిడ్డతో షూటింగ్‌కు వచ్చారు.. ఫస్ట్‌నైట్ సీన్‌లో నటించి బంధువులకు కొంతకాలం దూరమయ్యారు’

షావుకారు ఆమె ఇంటిపేరు కాదు, న‌టించిన తొలి సినిమా. కానీ షావుకారు జాన‌కి అంటేనే ఆమెని గుర్తు ప‌డ‌తారు.

ఎమ్జీఆర్ భార్య జాన‌కి (కొంత కాలం త‌మిళ‌నాడు ముఖ్య‌మంత్రిగా చేశారు) అప్ప‌టికే సినీ రంగంలో వుండ‌డంతో శంక‌ర‌మంచి జాన‌కిని షావుకారు చేశారు.

పేరుకి ముందు రిచ్‌నెస్‌ని (షావుకారు) జీవితమంతా మోసిన జాన‌కి నిజానికి పేద‌రికంతో సినిమాల్లోకి వ‌చ్చారు. మూడు నెల‌ల ప‌సిబిడ్డ‌తో షూటింగ్‌కి వ‌చ్చిన జాన‌కి ఇల్లు గ‌డ‌వ‌డం కోస‌మే సినిమాల్లో న‌టించారు.

1931లో రాజ‌మండ్రిలో పుట్టిన జాన‌కి తండ్రి ఒక పేప‌ర్ మిల్లు ఉద్యోగి. ఆరుగురు సంతానం. జాన‌కికి ఇద్ద‌రు చెల్లెళ్లు. ఒక‌రు ప్ర‌ముఖ న‌టి కృష్ణ‌కుమారి. జాన‌కి రేడియో నాటిక‌ల్లో న‌టించేవారు.

ఆమె గొంతు విన్న బీఎన్ రెడ్డి అవ‌కాశం ఇవ్వాల‌ని ఉత్సాహ‌ప‌డ్డారు. గుణ‌సుంద‌రి క‌థ సినిమా వెతుక్కుంటూ వ‌చ్చింది. అయితే సాంప్ర‌దాయ కుటుంబం ఒప్పుకోలేదు. ఎందుకైనా మంచిద‌ని హ‌డావుడిగా పెళ్లి చేశారు.

‘బుచ్చమ్మ పాత్రలో ఇమిడిపోయి....’

జాన‌కి అత్త‌గారి ఆస్తి ఏదో గొడ‌వ‌ల్లో ప‌డింది. భ‌ర్త ఈజీ గోయింగ్‌. జాన‌కికి న‌ట‌న త‌ప్ప ఇంకేదీ రాదు. ఇల్లు గ‌డ‌వాలి. బీఎన్ రెడ్డి సాయం కోరితే షావుకారులో సుబ్బులు పాత్ర లభించింది. 73 సంవ‌త్స‌రాల న‌టనా జీవితానికే అదే పునాది. ఇంత సుదీర్ఘ కాలం న‌టించిన వాళ్లు అరుదు, బ‌తికిన వాళ్లు అరుదు.

అన్ని భాష‌ల్లోనూ 300 సినిమాల‌కి పైగా న‌టించిన షావుకారు జాన‌కి అంద‌రి హీరోల‌తోనూ ప‌నిచేశారు. ఎన్టీఆర్‌, ఎమ్జీఆర్‌, జ‌య‌ల‌లిత‌ల‌తో సుదీర్ఘ అనుబంధం వుంది. హీరోయిన్‌గా న‌టిస్తున్న కాలంలో కూడా ఆమె ఎప్పుడూ చిత్ర‌సీమ‌ని ఏలింది లేదు, సినిమా ఆమెని మ‌రిచింది లేదు. ఇచ్చిన ప్ర‌తిపాత్ర‌లో ఒదిగిపోయారు.

క‌న్యాశుల్కంలో బుచ్చ‌మ్మ‌గా ఇంకెవ‌రినీ ఊహించ‌లేం. అమాయ‌క‌త్వం ఆమె సొంతం. చివ‌రి వ‌ర‌కూ జీవితంలో కూడా ఆ అమాయ‌క‌త్వాన్ని కాపాడుకున్నారు. డ‌బ్బు కోసం అంద‌రూ ప‌రుగెడుతున్న‌ప్పుడు ఆమె త‌న‌కి ద‌క్కిందే చాల‌నుకున్నారు. ఒక ప‌క్షిలాగా గుప్పెడు గింజ‌ల‌కి మించి ఆశించ‌లేదు. రోజులు మారాయి సినిమా నాటికి ముగ్గురు పిల్ల‌లు. వాళ్ల కోస‌మే న‌టించారు, బ‌తికారు.

2022లో తమిళ‌నాడు కోటాలో ప‌ద్మ‌శ్రీ

భ‌ర్త‌తో విడాకులు త‌ర్వాత మ‌ళ్లీ పెళ్లి చేసుకోవాల‌ని అనుకున్నారు. కానీ మారుటి తండ్రి త‌న పిల్ల‌ల్ని స‌రిగా చూస్తాడో లేడో అనే భ‌యంతో వ‌ద్ద‌నుకున్నారు. ఇద్ద‌రు ఆడ‌పిల్ల‌లు, ఒక కొడుకు. అమెరికాలో ఉన్న కొడుకు త‌న‌ను చూడ‌డానికి ఎప్పుడో త‌ప్ప‌ రాడ‌ని ఈ మ‌ధ్య ఒక ఇంట‌ర్వ్యూలో బాధ‌ప‌డ్డారు.

జాన‌కి ప్ర‌త్యేక‌త ఏమంటే ప్రొడ‌క్ష‌న్ భోజ‌నం ఎప్పుడూ తిన‌లేదు. ఇంటి నుంచి క్యారియ‌ర్ తెచ్చుకునేవాళ్లు. నిర్మాత‌ల‌కి అద‌నంగా ఒక్క రూపాయి కూడా భారం మోప‌ని న‌టీమ‌ణుల్లో ఆమె ఒక‌రు.

భార‌తీయ సినిమాని మ‌హారాణిలా ఏలిన శ్రీ‌దేవిని సిఫార్సు చేసింది జాన‌కే. శ్రీ‌దేవి త‌ల్లి రాజేశ్వ‌రితో ఉన్న స్వ‌ల్ప ప‌రిచ‌యంతో, నిర్మాత‌ని జాన‌కి ఒప్పించారు. మొద‌టి రోజే శ్రీ‌దేవి అద్భుతంగా న‌టించేస‌రికి జానకి ఆశ్చ‌ర్య‌పోయార‌ట‌.

చిన్న‌త‌నంలో మ‌హాత్మాగాంధీకి సేవ‌లు చేశారు. నెహ్రూ , ఇందిరాగాంధీ ఆమెకి తెలుసు. ముగ్గురు ముఖ్య‌మంత్రుల‌తో ప‌రిచ‌యం ఉన్న ఆమె ఏనాడూ అవార్డులు, ప‌ద‌వులు కోరుకోలేదు. 2022లో తమిళ‌నాడు కోటాలో ప‌ద్మ‌శ్రీ వ‌చ్చింది.

‘ఫస్ట్ నైట్ సీన్‌లో యాక్ట్ చేసినందుకు దూరం పెట్టిన బంధువులు’

అక్కాచెల్లెలు సినిమాలో ఫ‌స్ట్ నైట్ సీన్‌లో యాక్ట్ చేసినందుకు ఆమె బంధువులెవ‌రూ మాట్లాడేవారు కాద‌ట‌. చెప్పుకోక‌పోయినా చిన్న‌త‌నం నుంచే తీవ్ర‌మైన ఫెమినిస్ట్ భావాలున్న మ‌హిళ‌. ఆర్థిక స్వాతంత్ర్యం వుంటే అన్ని స్వాతంత్ర్యాలు మ‌హిళ‌కి ఉన్న‌ట్టే అని అనేవారు.

ప్ర‌స్తుతం మాతృత్వం విష‌యంలో అమ్మాయిలు అనుస‌రిస్తున్న ధోర‌ణిని కొన్ని ఇంట‌ర్వ్యూల్లో ఆమె విమ‌ర్శించేవారు. మాతృత్వం అతిపెద్ద వ‌రం, అది భారం అనుకోకూడ‌ద‌నే వారు.

అద్భుత‌మైన ఇంగ్లీష్ మాట్లాడే పాత త‌రం హీరోయిన్ల‌లో జాన‌కి మొద‌టివారు. ఆమె త‌ర్వాత జ‌య‌ల‌లిత మాత్ర‌మే. జాన‌కి తండ్రి కొంత‌కాలం ఇంగ్లండ్‌లో వుండ‌డంతో ఇంట్లో అల‌వాటైంది. ఆయ‌న గువాహటిలో కూడా కొంత‌కాలం ప‌నిచేశారు.

దేవ‌దాసులో పార్వ‌తి పాత్ర‌కి మొద‌ట జానకి ఎంపిక‌య్యారు. త‌ర్వాత ఏం జ‌రిగిందో కానీ సావిత్రి న‌టించారు. మొద‌ట జానకిని అనుకున్నార‌ని అక్కినేనికి కూడా తెలియ‌దు.

సావిత్రి బ‌యోఫిక్ తీయ‌కుండా వుండాల్సింద‌ని జాన‌కి అభిప్రాయం.

చివ‌రి రోజుల్లో చెల్లెలు కృష్ణ‌కుమారితో క‌లిసి బెంగ‌ళూరులోని ఒక ఎస్టేట్‌లో నివ‌సించారు. కృష్ణ‌కుమారి మృతి ఆమెకి తీర‌ని లోటు. వాకింగ్‌కి వెళ్లిన‌ప్పుడ‌ల్లా ఎక్క‌డికెళ్లావ్ కృష్ణా అని రోదించేవార‌ట‌!

జాన‌కి మూడు మేజ‌ర్ స‌ర్జ‌రీలు చేయించుకున్నారు. అందులో గుండె ఆప‌రేష‌న్ ఒక‌టి.

వంట‌లు గొప్ప‌గా చేస్తూ , మంచి భోజ‌న ప్రియులుగా ఉత్సాహంగా చివ‌రి వ‌ర‌కూ జీవించారు.

ఒక‌రిద్ద‌రు మిన‌హా పాత త‌ర‌మంతా వెళ్లిపోయారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)