‘ఆడుకుంటున్న కొడుకు అనుకోకుండా తండ్రి వృషణాలపై తన్నాడు, వారం రోజులైనా నొప్పి తగ్గలేదు.. చివరకు అదే ఆయన ప్రాణాలనే కాపాడింది’

బెన్ లిడ్జీ తన నాలుగేళ్ల కొడుకుతో గార్డెన్‌లో ఆడుకుంటున్న సమయంలో ప్రమాదవశాత్తు ఆయన వృషణాలపై కొడుకు తన్నారు. అయితే, అదే ఘటన బెన్ ప్రాణాలను కాపాడి ఉండొచ్చని ఇప్పుడు తెలుస్తోంది.

వారం గడిచినా ఇంకా నొప్పి తగ్గకపోవడంతో బెన్ వైద్య పరీక్షలు చేయించుకున్నారు. అప్పుడే ఆయనకు వృషణాల క్యాన్సర్ (టెస్టికులర్ క్యాన్సర్) ఉందని తేలింది.

స్వచ్ఛంద సంస్థ మూవెంబర్ తాజా రిపోర్ట్ ప్రకారం, వేల్స్‌లో ప్రతి ముగ్గురు పురుషుల్లో ఒకరు 75 ఏళ్లు నిండకముందే మరణిస్తున్నారు.

పురుషుల ఆరోగ్యం కోసం ప్రత్యేక ప్రణాళిక రూపొందించాలని మూవెంబర్ వేల్స్ ప్రభుత్వాన్ని కోరింది.

పురుషులు ఎదుర్కొంటున్న కొన్ని సవాళ్లను పరిష్కరించేందుకు ఆత్మహత్యల నివారణ, స్వీయ హాని, మానసిక ఆరోగ్యం, క్యాన్సర్‌ అంశాలపై ఇప్పటికే అమల్లో ఉన్న వ్యూహాలు పనిచేస్తున్నాయని వేల్స్ ప్రభుత్వం తెలిపింది.

బెన్ లిడ్జీ కార్డిఫ్ ప్రాంతానికి చెందినవారు. తన కుమారుడు తన్నిన తర్వాత తన వృషణం 'క్రికెట్ బాల్‌'లా అనిపించిందని ఆయన చెప్పారు. అయితే నొప్పి దానంతట అదే పోతుందని భావించి డాక్టర్‌ని సంప్రదించలేదని బెన్ వెల్లడించారు.

"ఏదైనా జరిగినప్పుడు దానంతట అదే నయం అవుతుందిలేనని భావిస్తాం కదా?. అంతేకాకుండా కుటుంబంతో బిజీగా ఉన్నాను, ఇద్దరు చిన్న పిల్లలున్నారు.. ఇంకా ఎన్నో విషయాలు చూసుకోవాల్సి ఉండేది" అని బెన్ చెప్పారు.

క్యాన్సర్ నుంచి కోలుకున్నాక కొత్త సమస్య..

క్యాన్సర్ నుంచి కోలుకున్న తర్వాత బెన్ మరో సమస్యను ఎదుర్కొన్నారు.

"నేను బాగానే ఉన్నా అనుకున్నా. కానీ, ఐదేళ్ల తర్వాత నాలో ఏదో సమస్య ఉందని, ఎవరినైనా సంప్రదిస్తే మంచిదని నా భార్య నాతో చెప్పింది. నేను మునుపటి కంటే మౌనంగా మారడం, ఎక్కువగా వాదించడం, ఇతరులపై ఓపిక తగ్గడం ఆమె గమనించింది. నేను గతంలో ఉన్నట్లుగా లేనని ఆమె గుర్తించింది" అని బెన్ తెలిపారు.

కౌన్సెలింగ్ తీసుకున్న తర్వాత బెన్‌లో పురోగతి కనిపించింది. పురుషులు, బాలల ఆరోగ్యంపై అవగాహన కల్పించేందుకు ఇప్పుడు ఆయన చురుకుగా పనిచేస్తున్నారు.

శారీరక, మానసిక ఆరోగ్య సమస్యల కోసం సహాయం కోరేందుకు పురుషులు వెనకాడటం వారు సాధారణంగా తక్కువ వయసులోనే మరణించడానికి ఒక కారణంగా తరచూ చెబుతుంటారు.

మూవెంబర్ రిపోర్ట్ ప్రకారం, 2024లో వేల్స్‌లో దాదాపు 7,000 మంది పురుషులు 75 ఏళ్లు నిండకముందే మరణించారు. మహిళల్లో ముందస్తు మరణాల రేటు 28 శాతం ఉండగా, పురుషులతో పోలిస్తే అది చాలా తక్కువ. పలు రకాల క్యాన్సర్‌లు, గుండె, ఊపిరితిత్తులు, లివర్‌కి సంబంధించి ముందస్తుగానే చికిత్స చేసుకోకపోవడం లేదా నివారించదగిన అనారోగ్య పరిస్థితుల వల్లే పురుషులు చనిపోతున్నారు.

"ముఖ్యంగా యువకులు శారీరకంగా ప్రమాదకరమైన పనులు చేయడం వల్ల గాయపడటం, మరణించే ప్రమాదం ఎక్కువగా ఉంటుంది. శారీరకంగా బలంగా ఉండాలనే అంచనా కూడా దీనికి ఒక కారణం" అని కార్డిఫ్ యూనివర్సిటీలో సోషల్ కేర్ ప్రొఫెసర్ జోనాథన్ స్కౌర్‌ఫీల్డ్ అన్నారు.

సామాజిక సంబంధాలను పెంచుకోవడం ఎంత ముఖ్యమో కొంతమంది పురుషులు పట్టించుకోకపోవచ్చని, ఆ బాధ్యతను మహిళా భాగస్వామిపై వదిలేస్తున్నారని ఆయన చెప్పారు.

"భార్యను కోల్పోయినప్పుడో లేదా ఉద్యోగం నుంచి రిటైర్ అయినప్పుడో వారు ఒంటరితనంతో ఇబ్బంది పడతారు" అన్నారు.

పోషకాహారం తీసుకోకపోవడం, మద్యాన్ని పురుషత్వంగా చూడటమూ ప్రమాదకరమే అని జోనాథన్ పేర్కొన్నారు.

వృషణాల క్యాన్సర్ లక్షణాలు ఏమిటి?

ఈ లక్షణాలు ఇతర అనారోగ్య సమస్యల వల్ల కూడా కనిపించవచ్చు. అయినప్పటికీ శరీరంలో ఏవైనా మార్పులు కనిపిస్తే వైద్యుడిని సంప్రదించి పరీక్షలు చేయించుకోవడం ముఖ్యం.

"సమస్య తీవ్రమయ్యే వరకు చూడకుండా శారీరక, మానసిక ఆరోగ్య సమస్యలకు సహాయం కోరేలా పురుషులను ప్రోత్సహిస్తూ, నివారణ, ముందస్తు జోక్యంపై ఇప్పటికే దృష్టి సారిస్తున్నాం. ఇందులో మానసిక ఆరోగ్య సేవలను ముందుగానే అందించడం, క్యాన్సర్ స్క్రీనింగ్‌కు వచ్చే వారి సంఖ్యను పెంచడం కూడా ఉన్నాయి" అని వేల్స్ ప్రభుత్వ ప్రతినిధి తెలిపారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)