లైవ్ , ఒడిశాలోని గోపాల్‌పూర్ సమీపంలో తీరం దాటుతున్న అక్వాన్ తుపాను

పశ్చిమ మధ్య బంగాళాఖాతంలో కొనసాగుతున్న తీవ్ర తుపాను ‘అక్వాన్’ తీరం దాటే ప్రక్రియ కొనసాగుతోంది. మధ్యాహ్నం సమయానికి ప్రక్రియ పూర్తి అవుతుందని వాతావరణ శాఖ తెలిపింది.

సారాంశం

  • పశ్చిమ మధ్య బంగాళాఖాతంలో కొనసాగుతున్న తీవ్ర తుపాను 'అక్వాన్' శుక్రవారం ఒడిశాలోని గోపాల్‌పూర్ సమీపంలో తీరం దాటుతోందని వాతావరణ శాఖ తెలిపింది.
  • ప్రస్తుతం కళింగపట్నానికి 110 కి.మీ., విశాఖపట్నానికి 170 కి.మీ. , గోపాల్‌పూర్‌కు 170 కి.మీ., పూరీకి 250 కి.మీ , నరసాపురానికి 370 కిలోమీటర్ల దూరంలో కేంద్రీకృతమై ఉంది.
  • వెల్లింగ్టన్ వేదికగా భారత్‌తో జరుగుతున్న తొలి టెస్టు తొలి ఇన్నింగ్స్‌లో న్యూజీలాండ్ జట్టు 368 పరుగులకు ఆలౌటైంది.
  • కివీస్ బ్యాటర్ హెన్రీ నికోల్స్ 175 పరుగులతో నాటౌట్‌గా నిలిచాడు.
  • భారత బౌలర్లలో జస్‌ప్రీత్ బుమ్రా 4, ఆకాశ్ దీప్ 3, అన్షుల్ కాంబోజ్ రెండు, ప్రసిద్ధ్ కృష్ణ ఒక వికెట్ తీశారు.

లైవ్ కవరేజీ

  1. ఒడిశాలోని గోపాల్‌పూర్ సమీపంలో తీరం దాటుతున్న అక్వాన్, అమరేంద్ర యార్లగడ్డ, బీబీసీ ప్రతినిధి

    అక్వా తుపాను
    ఫొటో క్యాప్షన్, అక్వాన్ తుపాను గత ఆరు గంటల్లో గంటకు 21 కిలోమీటర్ల వేగంతో కదిలిందని వాతావరణ శాఖ తెలిపింది.

    పశ్చిమ మధ్య బంగాళాఖాతంలో కొనసాగుతున్న తీవ్ర తుపాను ‘అక్వాన్’ శుక్రవారం ఉదయానికి ఒడిశాలోని గోపాల్‌పూర్ సమీపంలో తీరం దాటే ప్రక్రియ ప్రారంభమైందని వాతావరణ శాఖ తెలిపింది.

    అక్వాన్ తుపాను గత ఆరు గంటల్లో గంటకు 21 కిలోమీటర్ల వేగంతో కదిలిందని తెలిపింది. ప్రస్తుతం కళింగపట్నానికి 110 కిలోమీటర్లు, విశాఖపట్నానికి 170 కిలోమీటర్లు, గోపాల్‌పూర్‌కు 170 కిలోమీటర్లు, పూరీకి 250 కిలోమీటర్లు, నరసాపురానికి 370 కిలోమీటర్ల దూరంలో కేంద్రీకృతమై ఉందని తెలిపింది.

    తుపాను ప్రభావంతో ఇవాళ శ్రీకాకుళం జిల్లాలో భారీ వర్షాలు కురిసే అవకాశం ఉందని ఏపీఎస్‌డీఎంఏ ఎండీ, ఆర్టీజీఎస్ సీఈవో ప్రఖర్ జైన్ తెలిపారు. ఉత్తరాంధ్ర జిల్లాల్లో తేలికపాటి నుంచి మోస్తరు వర్షాలు కురిసే సూచనలు ఉన్నాయని చెప్పారు. శ్రీకాకుళం జిల్లా ప్రజలు అప్రమత్తంగా ఉండాలని సూచించారు.

    ఇప్పటికే శ్రీకాకుళం జిల్లాలోని ఇచ్ఛాపురం, కవిటి, సోంపేట, కంచిలి, మందస, పలాస, వజ్రపుకొత్తూరు మండలాల్లో వర్షాలు కురుస్తున్నాయి. ఇచ్ఛాపురం మండలంలో అత్యధికంగా 16 సెంటీమీటర్ల వర్షపాతం నమోదైంది. కంచిలి, కవిటిలో 10 సెంటీమీటర్లు, పలాసలో 9.9 సెంటీమీటర్లు, సోంపేటలో 9.2 సెంటీమీటర్లు, వజ్రపుకొత్తూరులో 4.9 సెంటీమీటర్ల వర్షపాతం నమోదైనట్లు ప్రఖర్ జైన్ వెల్లడించారు.

  2. గుడ్ మార్నింగ్

    బీబీసీ న్యూస్ తెలుగు లైవ్ పేజీ అప్‌డేట్లకు స్వాగతం.

    నేను బీబీసీ ప్రతినిధి వద్ది ప్రభాకర్. మధ్యాహ్నం 3 గంటల వరకు ముఖ్యమైన వార్తలను మీకు అందిస్తాను.

    నిన్నటి లైవ్ పేజీ కోసం ఈ లింక్‌ను క్లిక్ చేయండి.