తెల్లకాగితం రివ్యూ: సందేశాత్మక టీనేజ్ లవ్ స్టోరీ మెప్పించిందా?

'కోర్టు' సినిమాతో ఆకట్టుకున్న హర్ష్ రోషన్ ప్రధాన పాత్రలో నటించిన 'తెల్లకాగితం' సినిమా విడుదల ముందే ఆసక్తికర పరిణామాలతో వార్తల్లో నిలిచింది.

ప్రభాస్, దిల్ రాజు లాంటి ప్రముఖులు ప్రమోషన్స్‌లో భాగం కావడం, అలాగే సినిమాకి సంబంధించిన కొన్ని దృశ్యాలు సోషల్ మీడియాలో లీక్ అవ్వడంతో చర్చనీయంశంగా మారింది.

మరి ఇంతకీ ఈ సినిమా ఎలా ఉంది? నిజ జీవిత సంఘటనల ఆధారంగా వచ్చిన ఈ టీనేజ్ లవ్ స్టోరీలో కొత్తదనం ఏమిటి?

పశ్చిమ గోదావరి జిల్లాలో 2006 నాటి ఘటనల నేపథ్యంతో సాగే కథ ఇది. రాము (హర్ష్ రోషన్), ఆశ (నక్షత్ర) ఒకే పాఠశాలలో పదో తరగతి చదువుతుంటారు. అక్కడే వారి మధ్య ప్రేమ చిగురిస్తుంది.

ఇంటర్‌లో చేరాక ఆశ మరో అబ్బాయితో చనువుగా మాట్లాడటం చూసి రాము అసూయ పడతాడు. ఆమె తనకు దక్కదేమోనని భయపడతాడు.

సంఘటన సరే.. కథ ఏదీ?

ఆ క్రమంలో తనకు వరుసకు మావయ్య (రాజ్ కుమార్ కసిరెడ్డి) ఇచ్చిన ఒక సలహాతో ఓ తొందరపాటు నిర్ణయం తీసుకుంటాడు. ఏమిటా నిర్ణయం? దానివల్ల రాము, ఆశల జీవితాలు ఎలాంటి మలుపులు తిరిగాయి అనేదే మిగతా కథ.

వార్తాపత్రికల్లో వచ్చే కథనాల నుంచి స్ఫూర్తి పొంది సినిమాలు తీయడం కొత్తేమీ కాదు. మణిరత్నం రూపొందించిన 'రోజా', 'అమృత' వంటి చిత్రాలు కూడా పత్రికల్లో వచ్చిన కథనాల ఆధారంగా రూపుదిద్దుకున్నవే. కాకపోతే అలాంటి ఐడియాను రెండున్నర గంటల సినిమా నిడివికి విస్తరించి, జనరంజకంగా చెప్పే నేర్పు, బలమైన కథనం ఉండాలి. 'తెల్లకాగితం' విషయంలో ఆ కథనమే బలహీనతగా మారింది.

దర్శకుడి వద్ద ఒక నిజ జీవిత ఘటన ఉంది. అది నిజంగానే మనసును కలిచివేసే, మంచి సామాజిక సందేశం ఉన్న ఘటనే. కానీ ఆ ఒక్క ఘటన మాత్రమే ఒక పూర్తి స్థాయి సినిమాకు సరిపోదు. ఆరంభం, ప్రయాణం, అందులోని మలుపులు ప్రేక్షకుడిని ఆకట్టుకున్నప్పుడే చివర్లో వచ్చే సందేశం మనసును తాకుతుంది. లేకపోతే అదంతా బలవంతంగా రుద్దినట్లే ఉంటుంది. ఈ సినిమాలోనూ అదే జరిగింది.

ఎంతకీ రాని ప్లాట్ పాయింట్

ఒక ప్రేమకథలో నాయకానాయికలు కలవడం సహజం. అయితే వారు ఎలా ప్రేమలో పడ్డారు? వారి లక్ష్యాలేంటి? ఆ ప్రేమకథలో ఎదురైన తొలి అడ్డంకి ఏంటి? దాన్ని వారు ఎలా ఎదుర్కొన్నారు? అనే ప్రాథమిక అంశాల ఆధారంగానే ప్రేక్షకుడు కథతో ప్రయాణిస్తాడు.

ఈ కథలో ప్రధాన కథా మలుపు ఇంటర్వెల్ వరకు కూడా రాదు. ఒక బడి, ఇద్దరి లంచ్ బాక్స్‌లు మారడం, రెండు మాంటేజ్ పాటలు చూపించడానికే ప్రథమార్థం అంతా సరిపోయింది.

కథను కిక్ స్టార్ట్ చేసే సంఘటనను ఇంటర్వెల్ వరకు వాయిదా వేయడంతో మొదటి భాగం ఎలాంటి దిశానిర్దేశం లేకుండా సాగదీసినట్టు అనిపిస్తుంది.

మనసు బరువెక్కించే ముగింపు

ఇదొక టీనేజ్ లవ్ స్టోరీ కావడం వల్ల ఇందులో పాత్రలు తీసుకునే నిర్ణయాలు ఆ వయసుకు తగ్గట్టే అపరిపక్వంగా, అర్థరహితంగా ఉంటాయి. నాటకీయ సన్నివేశాలను ఆ వయసులోని భావోద్వేగాల కోణంలో చూస్తే కొంతవరకు పర్వాలేదనిపిస్తుంది.

నిజానికి ఈ తరహా కథలను ఆ వయసు దాటి వచ్చిన ప్రేక్షకులు కూడా ఆస్వాదించేలా మెచ్యూర్డ్‌గా రాసుకుంటే కనెక్షన్ ఇంకా బలంగా ఉండేది.

కానీ దర్శకుడు పూర్తిగా ఆ వయసు వారి ఆలోచనా ధోరణిలోనే కథనాన్ని నడిపించాడు. సన్నివేశాలు సాగే విధానం ముగింపు ఎలా ఉండబోతోందనే సంకేతాన్ని ఇస్తుంది. దానికి తగ్గట్టుగానే 'తెల్లకాగితం' క్లైమాక్స్ మనసును బరువెక్కిస్తుంది.

హర్ష్ రోషన్ నూనుగు మీసాలతో 'రాము' పాత్రకు సరిగ్గా సరిపోయాడు. అతని డైలాగ్ డెలివరీ బాగుంది, కానీ పాత్రలో కొన్నిచోట్ల మితిమీరిన అమాయకత్వం కృత్రిమంగా అనిపించింది.

నక్షత్ర: 'ఆశ' పాత్రలో అందంగా, అమాయకంగా కనిపిస్తూ సహజంగా నటించింది. తండ్రిగా అజయ్ హుందాగా చేశారు.

వదిన పాత్రలో శరణ్య ప్రదీప్ నటన బాగున్నప్పటికీ, ఆ పాత్రకు సంబంధించిన ఉపకథ మూలకథకు సరిగ్గా ఉపయోగపడలేదు. హీరో స్నేహితుడిగా చేసిన కుర్రాడు అక్కడక్కడా నవ్వించినా, కొన్నిచోట్ల 'జబర్దస్త్' పంచ్‌లను గుర్తుకు తెచ్చాడు.

'చిలకా' వినడానికి బావుంది

విజయ్ బుల్గానిన్ స్వరపరిచిన పాటల్లో 'చిలక' వినడానికి బాగుంది. నేపథ్య సంగీతం కొన్నిచోట్ల మోతాదు మించిన డ్రామాను తలపించింది. కేఏ గుహన్ ఛాయాగ్రహణం 2006 నాటి విజువల్ టోన్‌ను చక్కగా ఆవిష్కరించింది.

రచయిత నందు సంభాషణల్లో కొత్తదనం లోపించడమే కాక, చాలాచోట్ల హితబోధ ఎక్కువైంది. ఎడిటింగ్ విభాగం ఒకే తరహా భావోద్వేగాన్ని మళ్లీ మళ్లీ చూపించే సన్నివేశాలకు ఇంకాస్త పదును పెట్టాల్సింది.

ఒక సామాజిక అవగాహన కలిగించే, కలచివేసే నిజ జీవిత ఘటనను చేతిలో పెట్టుకుని, దాన్ని కేవలం ఒక షాకింగ్ క్లైమాక్స్‌కో, ముగింపు కార్డుకో మాత్రమే పరిమితం చేసి, మిగతా సినిమానంతా నిస్సారమైన, రొటీన్ టీనేజ్ లవ్ డ్రామాతో నింపేయడం నీరసం తెప్పిస్తుంది.

దర్శకుడు ఇవ్వాలనుకున్న సందేశం బాగున్నప్పటికీ, ఆ సందేశంవైపు తీసుకెళ్లే ప్రయాణం మాత్రం రొటీన్ మూసలోనే సాగింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)