అభిజిత్ దీప్కే, నేహా బోరాలను పోలుస్తున్న సోషల్ మీడియా.. దీనిపై ఆ ఇద్దరు ఎలా స్పందించారంటే...

జులై నెలలో దిల్లీలోని జంతర్ మంతర్ వద్ద ప్రారంభమైన ఉద్యమంలో ఒక పేరు ప్రత్యేకంగా నిలిచింది. ఆ ఆందోళనల తర్వాతే ఆలిండియా స్టూడెంట్స్ అసోసియేషన్ (ఏఐఎస్ఏ) అధ్యక్షురాలు నేహా బోరా బయటి ప్రపంచానికి ఎక్కువగా పరిచయమయ్యారు.

కాక్రోచ్ జనతా పార్టీ వ్యవస్థాపకుడు అభిజిత్ దీప్కే కూడా ఈ ఉద్యమం తర్వాత దేశవ్యాప్తంగా గుర్తింపు పొందారు.

ఇద్దరూ యువ నేతలే అయినా, వారి నేపథ్యాలు సంస్థలు వేర్వేరు. వీరు విడివిడిగా అనేక నిరసన కార్యక్రమాలు కూడా నిర్వహించారు.

అయితే, ఇద్దరిలో ఎవరు ఎక్కువ పరిణతి ఉన్నవారు అన్న అంశంపై సోషల్ మీడియాలో చర్చ నడుస్తోంది. వీరిద్దరినీ పోల్చే చూసే ప్రయత్నం చేస్తున్నారు యూజర్లు.

శనివారం కూడా ఇలాంటి పోస్టులు సోషల్ మీడియాలో కనిపించాయి. వీటిపై నేహా, దీప్కే స్పందించారు.

అమోక్ అనే ఎక్స్ యూజర్ నేహా బోరా ఫోటోను పోస్టు చేస్తూ "నేహా బోరా, అభిజిత్ దీప్కే కంటే ఎక్కువ ప్రతిభావంతురాలని మీరు తెలుసుకున్నప్పుడే పరిణతి అంటే ఏమిటో అర్థమవుతుంది. ఆమె నిజమైన జనరేషన్ జెడ్ ఐకాన్. ఆమెకు అద్భుతమైన స్టైల్ ఉంది" అని రాశారు. ఈ పోస్టును రీపోస్ట్ చేసిన అభిజిత్, "నేను ఒప్పుకుంటున్నా" అని రాశారు.

ఆ తర్వాత కొద్దిసేపటికే నేహా ఎక్స్‌లో స్పందిస్తూ " మేము కోరుకునేది పోటీ కాదు, సంఘీభావం. మేం కలిసి దీనిపై పోరాడుతున్నాం" అని రాశారు. దీనికి అభిజిత్, "ఇంక్విలాబ్ జిందాబాద్" అని బదులిచ్చారు.

అయితే, వీరిద్దరినీ కలిపి చూసేవారు కూడా చాలామందే ఉన్నారు. ఆర్థికవేత్త జయతీ ఘోష్ ఎక్స్‌లో స్పందిస్తూ "భారత భవిష్యత్తుపై మా ఆశలు నేహా బోరా, అభిజిత్ దీప్కే వంటి నిర్భయమైన, నిబద్ధత కలిగిన యువతపైనే ఉన్నాయి" అని రాశారు.

సౌరభ్, ఆశుతోష్ ఎవరిని లక్ష్యంగా చేసుకున్నారు?

అభిజిత్ దీప్కేను విమర్శిస్తున్న వారిపై కాక్రోచ్ జనతా పార్టీ కో కన్వీనర్ ఆశుతోష్ రంకా ఆగ్రహం వ్యక్తం చేశారు.

‘‘తమను తాము లిబరల్‌గా చెప్పుకునేవారు అభిజిత్ దీప్కేను విమర్శించడంలో చాలా యాక్టివ్‌గా మారారు. చాలాకాలం తర్వాత కోట్లాదిమంది భారతీయుల ఊహాశక్తిని, దృష్టిని ఆకర్షించడంలో ఆయన విజయం సాధించడాన్ని వారు ఓర్చుకోలేకపోతున్నారు. విచిత్రం ఏంటంటే, ఈ విమర్శించే వ్యవస్థ మొత్తం ట్విట్టర్‌లో మాత్రమే ఉంది. ప్రజాస్వామ్యాన్ని కాపాడే బాధ్యత తమదేనన్నట్లు వ్యవహరిస్తోంది’’ అని ఆయన ఎక్స్‌లో రాశారు.

ఆశుతోష్ పోస్టును రీపోస్ట్ చేసిన కాక్రోచ్ జనతా పార్టీ నేత సౌరభ్ దాస్ "ఇది చాలా పెద్ద సమస్య. కేవలం బీజేపీలోనే కాకుండా ఇతర పార్టీల్లో కూడా ఒక వర్గం భారతదేశాన్ని, రాజ్యాంగాన్ని కాపాడే బాధ్యత తమ ఒక్కరిదేనని భావిస్తోంది. తమను తాము లిబరల్స్‌గా, రాజ్యాంగానికి స్వయంప్రకటిత రక్షకులుగా భావించుకుంటున్నారు" అని రాశారు.

"ఇది చాలా విషపూరితమైన వ్యవస్థ. కొన్ని సందర్భాల్లో ఇది బీజేపీ వ్యవస్థ కంటే కూడా దూకుడుగా కనిపిస్తుంది. ఇలాంటి వ్యూహాలతో ప్రజలను విభజిస్తూ తమ ప్రభావాన్ని కొనసాగించలేరని వారు అర్థం చేసుకోవాలి. గత కొన్ని సంవత్సరాల్లో వారు చేసిన భారీ వైఫల్యాలే యువత ముందుకు వచ్చేందుకు కారణమయ్యాయి. కాబట్టి మా గురించి మాట్లాడటం ఆపి, యువతకు ఎలా మద్దతు ఇవ్వాలనే దానిపై దృష్టి పెట్టాలి. వీరంతా మూర్ఖులు" అని ఆయన పేర్కొన్నారు.

అభిజిత్ దీప్కే నేపథ్యం ఏంటి?

అభిజిత్ దీప్కే ఈ ఏడాది మేలో కాక్రోచ్ జనతా పార్టీని ప్రారంభించారు.

దేశంలోని నిరుద్యోగ యువతలో కొందరిని "బొద్దింకలు"గా పేర్కొంటూ భారత ప్రధాన న్యాయమూర్తి సూర్యకాంత్ చేసిన వ్యాఖ్యకు వ్యంగ్యంగా స్పందిస్తూ ఈ సోషల్ మీడియా ఉద్యమాన్ని ప్రారంభించారు.

అయితే, తన వ్యాఖ్యలను తప్పుగా అర్థం చేసుకున్నారని సీజేఐ స్పష్టం చేశారు.

విద్యార్థుల్లో గుర్తింపు పొందకముందు దీప్కే డిజిటల్ పొలిటికల్ మెసేజ్‌లు, కథనాల రూపకల్పన, ఆన్‌లైన్ ప్రచార వ్యూహాలు రచించే పని చేసేవారు.

పుణెలో జర్నలిజంలో బ్యాచిలర్ డిగ్రీ, బోస్టన్ యూనివర్సిటీలో రెండేళ్ల పబ్లిక్ రిలేషన్స్ మాస్టర్స్ డిగ్రీ పూర్తి చేశారు.

విద్యార్థులకు మద్దతుగా ఆన్‌లైన్‌లో కొన్నిరోజుల పాటు తన స్వరం వినిపించిన తర్వాత దీప్కే ఈ ఏడాది జూన్‌లో భారత్‌కు తిరిగి వచ్చి జంతర్ మంతర్ వద్ద కాక్రోచ్ జనతా పార్టీ తొలి నిరసనకు నాయకత్వం వహించారు.

ఆ తర్వాత ఇతర నగరాల్లో కూడా ఇలాంటి నిరసనలు జరిగాయి. అనంతరం నీట్-యూజీ ప్రశ్నపత్రం లీక్, ఇతర పరీక్షల్లో జరిగినట్లు ఆరోపణలు ఎదుర్కొంటున్న అక్రమాలపై జవాబుదారీతనం కోరుతూ కాక్‌రోచ్ జనతా పార్టీ దిల్లీలోని జంతర్ మంతర్ వద్ద భారీ నిరసన నిర్వహించింది.

విద్యాశాఖ మంత్రి ధర్మేంద్ర ప్రధాన్ రాజీనామా ప్రకటించిన తర్వాత దీపక్ ఇన్‌స్టాగ్రామ్‌లో "ఇప్పుడు నేను కాసేపు నిద్రపోబోతున్నాను. కొద్దిసేపటి తర్వాత మిమ్మల్ని కలుస్తాను" అని రాశారు.

దీప్కే ఎంతో వినయంగా ఉంటారని, సలహాలు, సూచనలు స్వీకరించేందుకు సిద్ధంగా ఉంటారని, నిరసనకారులకు తాము విద్యార్థులమని, పోరాటంలో భాగస్వాములమని అనిపించేలా చేస్తారని అప్పట్లో నేహా బోరా అన్నారు.

ప్రస్తుతం కాక్రోచ్ జనతా పార్టీ రాజకీయ ఆందోళనలను కొనసాగిస్తుందని, వివిధ వర్గాలతో తన అజెండాపై చర్చిస్తుందని దీప్కే చెబుతున్నారు. నాణ్యమైన విద్యను అందించడం, ప్రైవేట్ పాఠశాలల ఫీజులపై పరిమితి విధించడం, ప్రభుత్వ పాఠశాలల్లో సౌకర్యాలను మెరుగుపరచడం వంటి అంశాలకు ఆయన మద్దతు తెలిపారు.

నేహా బోరా ఎవరు?

జంతర్ మంతర్ దగ్గర సోనమ్ వాంగ్‌చుక్ నిరవధిక నిరాహార దీక్ష చేపట్టినప్పుడు అక్కడ ఉన్నది ఆయన ఒక్కరే కాదు. ఆలిండియా స్టూడెంట్స్ అసోసియేషన్‌కు చెందిన ముగ్గురు విద్యార్థులు కూడా ఈ దీక్షలో పాల్గొన్నారు. వారే నేహా బోరా, మనీష్ కుమార్, అమీన్ అమితోజ్‌లు. వాంగ్‌చుక్ కంటే ముందే వారి నిరాహార దీక్ష ముగిసింది.

నేహా బోరా జేఎన్‌యూలో పీహెచ్‌డీ పరిశోధకురాలు. జంతర్ మంతర్ వద్ద జరిగిన నిరసనల గురించి ఫ్రంట్‌లైన్‌కు ఇచ్చిన ఇంటర్వ్యూలో "జంతర్ మంతర్ వద్ద పెద్ద సంఖ్యలో పోస్టర్లు ఏర్పాటు చేశారు. అందులో ‘‘మీరు గాడ్సేను నమ్ముతారు, మేం భగత్ సింగ్‌ను నమ్ముతాం. ఇదే మీకు, మాకు మధ్య ఉన్న ప్రాథమిక తేడా. అందుకే మీరు తప్పుకోవాలి’’ అని రాశారు. గాడ్సేను నమ్మేవారు ఈ దేశాన్ని పాలించకూడదని ప్రజలు పదేపదే చెబుతూనే ఉన్నారు" అని అన్నారు.

ఈ ఇంటర్వ్యూలో ఆమె ఆరెస్సెస్ భావజాలం గురించి చర్చించారు. ప్రజలకు ద్రోహం చేసిందని ఆరెస్సెస్‌పై ఆరోపణలు ఉన్నాయనీ, వారు గాడ్సే వైపు నిలిచారని, మేం భగత్ సింగ్ వైపు నిలిచామని ఆమె అన్నారు.

"ప్రస్తుత పాలక వ్యవస్థ నుంచి దేశ యువత ఏం కోరుకోవడం లేదో ఈ నిరసనలు చూపించాయని నేను భావిస్తున్నా. ఈ ఉద్యమం అందించిన అనుభవం ఏంటంటే ఫాసిస్టుల నుంచి కూడా జవాబుదారీతనాన్ని రాబట్టవచ్చు’’ అని నేహా అన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)