‘ఇస్లామిక్ తీవ్రవాద భావజాల ప్రభావం’ తోనే కోపైలట్ దాడి, వెల్లడించిన ప్రధాని నెతన్యాహు

దుబయ్‌ నుంచి టెల్ అవివ్‌కు వెళ్తున్న విమానాన్ని స్వాధీనం చేసుకోవడానికి ప్రయత్నించిన వ్యక్తి 'ఇస్లామిక్ తీవ్రవాద భావజాలం'తో ప్రభావితుడయ్యాడని దర్యాప్తులో గుర్తించినట్లు ఇజ్రాయెల్ ప్రధానమంత్రి నెతన్యాహు తెలిపారు.

బుధవారం ఫ్లైదుబయ్ విమానం.. ప్రయాణం ప్రారంభమైన రెండు గంటల తర్వాత పైలట్, కోపైలట్ మధ్య ఘర్షణతో ఒక్కసారిగా 17000 (5,200మీటర్లు) అడుగులకుపైగా కిందికి దూసుకుపోయింది. అయితే కెప్టెన్‌పై దాడి చేసిన కోపైలట్‌ను ప్రయాణికులు, సిబ్బంది కలిసి అదుపులోకి తీసుకొని విమానంపై మళ్లీ నియంత్రణ సాధించారు. చివరకు సురక్షితంగా ల్యాండ్ చేయగలిగారు.

దాడి చేసింది ఒమన్‌కు చెందిన వ్యక్తి అని, విమానాన్ని కూల్చివేయాలనే ఉద్దేశంతోనే ఇలా వ్యవహరించి ఉంటాడని నెతన్యాహు ఫాక్స్ న్యూస్‌కు చెప్పారు.

ఈ ఘటనకు ఉగ్రవాద కార్యకలాపాలతో లేదా ఉగ్రవాద ఉద్దేశాలతో ఏమైనా సంబంధం ఉందో లేదో తెలుసుకునేందుకు దర్యాప్తు ప్రారంభించినట్టు యునైటెడ్ అరబ్ ఎమిరేట్స్(యూఏఈ) ప్రభుత్వ వార్తా సంస్థ వెల్లడించింది.

వైద్య బృందాలు పరీక్షించి ఆరోగ్యపరంగా ఎలాంటి సమస్యలు లేవని నిర్దరించిన తర్వాత పైలట్, కో-పైలట్‌లను గురువారం ఉదయం యూఏఈకి తిరిగి పంపించామని సౌదీ అరేబియా అంతర్గత వ్యవహారాల శాఖ తెలిపింది. సౌదీ అరేబియాలోని తబుక్ విమానాశ్రయంలోనే ప్రమాదానికి గురికాబోయిన విమానాన్ని ఎమర్జెన్సీ ల్యాండింగ్ చేశారు.

దాడి జరిగిన విమానం యూఏఈలోనే రిజిస్టర్ అయినందున ఈ ఘటనపై దర్యాప్తు చేసే అధికార పరిధి తమకే ఉందని ఆ దేశ అధికారులు గతంలో పేర్కొన్నారు.

‘‘దాడి చేసిన వ్యక్తిని ప్రయాణికులు, విమాన సిబ్బంది అదుపులోకి తీసుకొని కట్టేసిన తర్వాత నన్ను చంపేయండి, చంపేయండి అని అరిచాడు. అంటే అతను ఆత్మహత్య చేసుకోవాలనే ఉద్దేశంతో వ్యవహరించినట్టు స్పష్టమవుతుంది. ఇందులో ఎలాంటి సందేహం లేదు’’ అని నెతన్యాహు ఫాక్స్ న్యూస్‌కు చెప్పారు.

‘‘విమానంలో వందలమంది ప్రయాణికులున్న పరిస్థితిని, అలాగే అతని రాడికలైజేషన్‌కు సంబంధించిన నేపథ్యాన్ని కలిపి చూస్తే ఈ ఘటన వెనుక ఉన్న ఉద్దేశం ఏంటనే విషయంపై స్పష్టమైన సంకేతాలు లభిస్తాయి" అని ఆయన అన్నారు.

అయితే, ఈ ఘటన వెనుక ఉన్న అసలు ఉద్దేశం గురించి ఇప్పుడే ఒక నిర్ణయానికి రావడం లేదని స్పష్టం చేశారు.

ఈ ఘటన వెనుక ఇరాన్ ప్రమేయం ఉండొచ్చని అమెరికా అధ్యక్షుడు డోనల్డ్ ట్రంప్, యూఏఈ అధికారులు మీడియాకు తెలిపారు. అయితే ఈ ఘటనకు తెహ్రాన్‌నే నేరుగా బాధ్యురాలిగా వారు ప్రకటించలేదు.

ఈ దాడిలో ఇరాన్ ప్రమేయం ఉన్నట్టు తేలితే, గట్టిగా స్పందిస్తామని, ఆ దేశం తీవ్ర పరిణామాలను ఎదుర్కోవాల్సి ఉంటుందని అమెరికా అధ్యక్షుడు ట్రంప్ గురువారం విలేఖరులతో అన్నారు.

"ఇజ్రాయెల్‌తో దౌత్య సంబంధాలు లేని దేశాలకు చెందిన పైలట్లకు సాధారణంగా అక్కడికి విమానాలు నడిపే అనుమతి ఉండదు" అని నెతన్యాహు చెప్పారు. ఒమన్ పైలట్ ఆ విమానంలోకి ఎలా వచ్చాడన్న ప్రశ్నకు సమాధానంగా ఆయన ఈ వ్యాఖ్యలు చేశారు.

"ఈ వ్యవహారంలో భద్రతాపరమైన లోపం ఉన్న విషయం స్పష్టంగా కనిపిస్తోంది. దాన్ని సరిదిద్దేందుకు మేం ఇప్పటికే చర్యలు తీసుకుంటున్నాం. ఈ విషయంలో యూఏఈ ప్రభుత్వం పూర్తి సహకారం అందిస్తోందని చెప్పాలి. ఇకపై ఇలాంటి ఘటన మళ్లీ జరగకుండా చూడాలనే ఆసక్తి మాకు, యూఏఈకి ఉంది" అని నెతన్యాహు అన్నారు.

యూఏఈ మాదిరిగా ఒమన్ ఇప్పటివరకు ఇజ్రాయెల్‌తో అధికారిక దౌత్య సంబంధాలను ఏర్పరుచుకోలేదు.

ఈ ఘటనలో ఇరాన్ ప్రమేయం ఉన్నట్టు ఏమైనా సంకేతాలు కనిపిస్తున్నాయా అని అదే టెలివిజన్ నెట్‌వర్క్‌లో నెతన్యాహును ప్రశ్నించగా, "అది ఇప్పుడే చెప్పడం తొందరపాటు అవుతుంది" అని అన్నారు.

కత్తిపోటుకు గురైన భారతీయ పైలట్ కెప్టెన్‌ స్మిత్ మచ్చర్‌ను ఇజ్రాయెల్ ప్రధాని బెంజమిన్ నెతన్యాహు, భారత ప్రధాని నరేంద్ర మోదీ ఇద్దరూ ‘హీరో’గా అభివర్ణించారు.

చికిత్స పొందుతున్న కెప్టెన్ స్మిత్ మచ్చర్‌ను యూఏఈలోని భారత రాయబారి దీపక్ మిట్టల్ గురువారం పరామర్శించారు. ఈ విషయాన్ని సోషల్ మీడియాలో భారత మిషన్ వెల్లడించింది. ఆయన ఆరోగ్యంగా ఉన్నారని, త్వరగా కోలుకుంటున్నారని తెలిపింది.

ఈ ఘటనపై ఇజ్రాయెల్ నిర్వహిస్తున్న ప్రత్యేక దర్యాప్తులో ఇప్పటివరకు లభించిన ప్రాథమిక వివరాల ప్రకారం, దాడికి పాల్పడినట్టు ఆరోపణలు ఎదుర్కొంటున్న వ్యక్తి విమానాన్ని కూల్చివేయాలనే ఉద్దేశంతోనే ఉన్నట్టు సూచనలు కనిపిస్తున్నాయని ఒక ఇజ్రాయెల్ భద్రతా అధికారి బీబీసీ అరబిక్‌కి చెప్పారు.

ఈ ఘటనపై ఇజ్రాయెల్ గూఢచారి సంస్థ మొసాద్ ఆధ్వర్యంలో దర్యాప్తు జరుగుతోంది. విమానంలో అసలు ఏం జరిగిందో తెలుసుకోవడానికి టెల్ అవీవ్‌కు చేరుకున్న తర్వాత ప్రయాణికులను విచారించినట్టు ఆ అధికారి తెలిపారు.

ఫ్లైదుబయ్ విమానం ఎఫ్‌జెడ్1073 యూఏఈలోని దుబయ్ అంతర్జాతీయ విమానాశ్రయం నుంచి జీఎంటీ ప్రకారం ఉదయం 3.05గంటలకు (స్థానిక కాలమానం ప్రకారం 7.05గంటలు) బయల్దేరింది. 170 మందికిపైగా ప్రయాణికులు, సిబ్బందితో ఇజ్రాయెల్‌లోని బెన్ గురియన్ విమానాశ్రయానికి వెళ్తోంది.

రెండు గంటల తర్వాత విమానం ఎత్తు ఒక్కసారిగా తగ్గుతూ వస్తున్నట్టు కనిపించింది. 17000 అడుగుల మేర తగ్గినట్టు ఫ్లైట్‌రాడార్ 24 వెబ్‌సైట్‌లో నమోదైంది. విమానాల కదలికలను ఇది ట్రాక్ చేస్తుంటుంది. అలా ఎత్తు తగ్గుతున్న విమానం నుంచి ఎమర్జెన్సీ సూచించే కోడ్ వచ్చింది.

ఉదయం సుమారు 5.40గంటలకు కొద్దిసేపు జోర్దాన్ గగనతలంలోకి వెళ్లిన విమానం తర్వాత సౌదీ అరేబియా పరిధిలోకి వచ్చింది. అనంతరం పైలట్ల నియంత్రణలోకి వచ్చి సౌదీ అరేబియా వాయవ్య ప్రాంతంలోని తబుక్ విమానాశ్రయంలో సురక్షితంగా ల్యాండ్ అయ్యింది.

ఈ ఘటనపై అంతర్గత విచారణ జరుగుతున్నందున ఫ్లైదుబయ్ సంస్థ దుబయ్-టెల్ అవీవ్ మధ్య విమాన సేలవను తాత్కాలికంగా నిలిపివేసింది.

ప్రధాని నెతన్యాహు ఇచ్చిన ఆదేశాల మేరకు దుబయ్-టెల్ అవీవ్ మధ్య విమాన సర్వీసులు నిలిపివేసినట్టు ఇజ్రాయెల్ రవాణా శాఖ తెలిపింది.

దుబయ్‌లో చిక్కుకుపోయిన ప్రయాణికులను స్వదేశానికి తీసుకువచ్చేందుకు శుక్రవారం నుంచి ప్రత్యేక రెస్క్యూ విమానాలను నడపనున్నట్టు ఎల్ అల్, ఇస్రాయిర్, ఆర్కియా, వంటి ఇజ్రాయెల్ విమానయాన సంస్థలు ప్రకటించాయి.

అబుదాబి-టెల్ అవీవ్ మధ్య విమానాల సంఖ్యను పెంచాలని ఎతిహాద్ ఎయిర్‌వేస్‌ను కోరినట్టు ఇజ్రాయెల్ రవాణా శాఖ వెల్లడించింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)