‘లైంగిక దాడి చేశారు, ‘డాడీ’ అని పిలవమని బలవంత పెట్టారు’

"నేను మానసికంగా గాయపడ్డా, అందుకే నా కథ చెప్పడానికి వచ్చా"

సియో మి-హ్యోన్ పోలీసులకు చెప్పిన మొదటి మాట ఇది.

మేధో వైకల్యం కలిగిన సియో పెద్ద పెద్ద వాక్యాలు మాట్లాడటానికి ఇబ్బంది పడుతున్నారు. కేవలం చిన్న చిన్న పదాలు, సైగలతో మాత్రమే సంభాషించగలరు. కానీ తనపై జరిగిన వేధింపుల కారణంగా కలిగిన బాధను మాత్రం ఆమె మర్చిపోలేదు.

దక్షిణ కొరియాలోని ప్రభుత్వ సంరక్షణ కేంద్రంలో అక్కడి డైరక్టర్ లైంగిక వేధింపులకు గురైన ముగ్గురిలో ఆమె కూడా ఒకరు. ఈ ఘటన దక్షిణకొరియాను దిగ్భ్రాంతికి గురిచేయడమే కాక, వికలాంగులకు ప్రభుత్వం ఏర్పాటు చేసిన సంరక్షణపై అనేక ప్రశ్నలు లేవనెత్తుతోంది.

లైంగిక వేధింపులకు పాల్పడిన డైరెక్టర్‌కు ఈ నెల ప్రారంభంలో సియోల్‌లోని ఒక కోర్టు శిక్ష విధించింది. కిమ్ అనే ఇంటిపేరుతో మాత్రమే గుర్తింపు పొందిన ఈయనకు 15 ఏళ్ల జైలు శిక్ష విధించింది. దీనిపై కిమ్ అప్పీల్ చేసుకున్నారు.

ఆశ్రయంలోని కొంతమందితో ఆ డైరెక్టర్‌ను "నాన్న" అని పిలిచేలా ఒత్తిడి తెచ్చారని కోర్టు విచారణలో తేలింది. ఇది కిమ్‌కు ఆయన సంరక్షణలో ఉన్నవారికి మధ్య ఉన్న అధికార వ్యత్యాసాన్ని ఇది స్పష్టం చేస్తోందని ప్రాసిక్యూటర్లు వాదించారు

ప్రస్తుతం నలభైల్లో ఉన్న సియో, తనపై జరిగిన లైంగిక దాడి గురించి తొలిసారి తల్లితో చెప్పుకున్నారు. ఆ తర్వాత రెండేళ్లకు కోర్టు తీర్పు వెలువడింది.

వారి గుర్తింపును కాపాడటానికి, ఈ కథనంలో సియో పేరును, మరో బాధితురాలి పేరును మార్చాం.

'చాలా కాలం భరించా'

సియో 2016 నుంచి మేధోపరమైన వైకల్యం ఉన్నవారి కోసం నిర్వహించే సేక్‌డాంగ్‌వాన్ సంరక్షణ కేంద్రంలో ఉంటున్నారు.

ఈ సంరక్షణ కేంద్రం ఇంచియాన్ నగరంలో ఉంది. ఇది పూర్తిగా ప్రభుత్వ రాయితీలతో నడుస్తోంది. ఈ కేసును దృష్టిలో పెట్టుకొని ఈ సంరక్షణా కేంద్రాన్ని మూసివేయాలని కోరినప్పటికీ, ఇక్కడ ఇంకా 33 మంది ఆశ్రయం పొందుతున్నారు.

సియో వచ్చిన కొద్ది కాలం నుంచే వేధింపులు మొదలయ్యాయి. కిమ్ అనే వ్యక్తి రాత్రి పూట లేదా తెల్లవారుజామున ఆమె వద్దకు వచ్చి అత్యాచారం చేసేవాడు అని సియో చెప్పారు.

సియో తన లాయర్ కో యున్-యంగ్ ద్వారా మాట్లాడి, తనపై జరుగుతున్న వేధింపుల గురించి చెప్పుకోవడానికి సంరక్షణ కేంద్రంలో పెద్దవాళ్లు ఎవరూ లేరని చెప్పారు. అక్కడి ఇతర సిబ్బంది కూడా సహాయం చేయరనే భావన ఉండేదన్నారు. అయితే ఈ ఆరోపణలపై కేర్ హోమ్ ఇప్పటి వరకు స్పందించలేదు.

దాదాపు 10 ఏళ్లు అలానే గడిచిపోయింది. ఫిబ్రవరి 2025న సియో తలకు గాయమైన తర్వాత విషయం వెలుగులోకివచ్చింది.

కిమ్‌ తనపై లైంగిక దాడికి ప్రయత్నించినప్పుడు ఒకసారి ఈ ఘటన జరిగిందని ఆమె వివరించారు. ఆ సమయంలో తన చేతులతో అడ్డుకోవడానికి ప్రయత్నించిన సియోపై ఆయన గ్లాసు విసిరేశారు.

తలకు గాయం - తెలిసిన నిజం

గాయపడిన సియోను ఆసుపత్రికి తీసుకెళ్లి తలకు కుట్లు వేసిన తర్వాతే ఘటన గురించి ఆమె తల్లికి చెప్పారని ఆమె తరఫున న్యాయవాది కోర్టుకు తెలియజేశారు.

సియో ఎలా గాయపడ్డారో తెలుసుకోడానికి సంరక్షణ కేంద్రంలోని సీసీటీవీ ఫుటేజ్‌ను ఆమె తల్లి అడిగారు. అయితే ఆ అధికారం తమకు లేదని ఆమె అభ్యర్థనను సంస్థ తిరస్కరించిందని న్యాయవాది వెల్లడించారు.

దీంతో ఆమె తన బిడ్డ సియో ఇంటికి తీసుకు వెళ్లాలని నిర్ణయించుకున్నారు. తాను ఇకపై సంరక్షణ కేంద్రానికి రానవసరం లేదని గ్రహించిన తర్వాతే లైంగిక వేధింపుల గురించి సియో తన తల్లికి చెప్పారు. ఆ తర్వాత వాళ్లు పోలీసులకు ఫిర్యాదు చేశారు.

"సేక్‌డాంగ్‌వాన్‌కు వెళ్లాల్సిన అవసరం లేదని చెప్పిన తర్వాతే మాట్లాడటం మంచిదని భావించాను" అని సియో తన న్యాయవాది ద్వారా బీబీసీకి తెలిపారు.

ఇన్ని సంవత్సరాలు ఒంటరిగా దీన్ని ఎలా నెట్టుకొచ్చారని ప్రశ్నించినప్పుడు, "నేను కేవలం భరించాను" అని మాత్రం సమాధానం ఇచ్చారు.

సియో అందించిన వివరాలపై దర్యాప్తు చేసిన పోలీసులు తర్వాత విచారణను విస్తరించారు.

లీ మి-నా మరో ఇద్దరు మహిళలు కూడా కిమ్ తమపైనా అత్యాచారం చేశారని పోలీసులకు వివరించారు.

ముగ్గురు బాధితుల వాంగ్మూలాలు విశ్వసనీయమైనవిగా న్యాయమూర్తి ఈ నెల మొదట్లో తేల్చారు.

లీ, సియోపై అత్యాచారం చేసిన కిమ్‌కు15 ఏళ్ల జైలు శిక్ష విధించారు. ప్రాసిక్యూటర్స్ కోరిన శిక్ష కంటే ఇది ఐదేళ్లు తక్కువ. తనపై వచ్చిన అన్ని ఆరోపణలను ఖండించిన ఆయన తీర్పుపై అప్పీల్‌కు వెళ్లారు.

మూడో బాధితురాలి విషయంలో కిమ్‌ను తక్కువ తీవ్రత కలిగిన నేరానికి దోషిగా తేల్చింది. "ప్రతిఘటించలేని స్థితిలో ఉన్న బాధితురాలిపై బలప్రయోగం లేదా బెదిరింపులకు పాల్పడ్డారు" అని చెప్పేందుకు సరైన ఆధారాలు లేకపోవడంతో ఆమెపై ఉన్న అత్యాచార ఆరోపణను ఉపసంహరించుకుంటున్నట్టు న్యాయమూర్తి తెలిపారు.

వికలాంగుల హక్కుల సంఘాలు, ఇతర పౌర సమూహాలతో ఏర్పడిన కమిటీ ఈ తీర్పును విమర్శించింది. బాధితురాలు దాడిని ఎంతవరకు ఎదిరించిగలిగందనే అంశం, ఆమె కేసులో వచ్చే తీర్పుపై ప్రభావం చూపకూడదని ఆ కమిటీ పేర్కొంది.

విచారణ ప్రక్రియను కూడా కమిటీ తప్పుపట్టింది. మరింత మంది బాధితులను గుర్తించడంలో విఫలమయ్యారని విమర్శించింది.

‘మరింత మంది బాధితులు ఉండే అవకాశం’

సేక్‌డాంగ్‌వాన్‌పై గత నవంబర్‌లో ఆరోపణలు రావడంతో మరింత లోతుగా విచారణ జరపడానికి వూసుక్ యూనివర్శిటీ నుంచి ఒక బృందాన్ని గాంఘ్వా కౌంటీలోని అధికారులు నియమించారు.

ఈ నివేదికను కోర్టులో సాక్ష్యంగా సమర్పించారు. కనీసం పది మంది బాధితులు కిమ్‌ వేధింపుల బారిన పడి ఉండొచ్చనే ఆధారాలు ఉన్నట్టు అందులో పేర్కొన్నారు. కానీ విచారణ సమయంలో కోర్టు ఆ విషయాన్ని పట్టించుకోలేదు.

సంరక్షణ కేంద్రంలో ఉన్న వారు చాలా మంది తీవ్రమైన వైకల్యం కలిగి ఉన్నారు. మాట్లాడటంలో వారికి ఉన్న ఇబ్బందులు కారణంగా విషయాన్ని సరిగా చెప్పలేకపోయారు. దీని వల్ల వేధింపులు జరిగినట్టు నిర్థరించడానికి పోలీసులు చాలా కష్టపడాల్సి వచ్చిందని స్థానిక మీడియా పేర్కొంది. కొందరు ప్రశ్నలకు సంబంధం లేని సమాధానాలు చెబితే, మరికొందరు అసలు స్పందించనే లేదని సమాచారం.

ఇంకా ఎక్కువ మందిని వేధించి ఉంటారనే ఆరోపణలపై కిమ్ స్పందించలేదు.

"జరిగిన దాడి గురించి స్పష్టంగా వివరించగలిగిన వారి వాంగ్మూలాలను మాత్రమే పరిగణనలోకి తీసుకున్నారు" అని పూసుక్‌ పరిశోధన బృందానికి నాయకత్వం వహించిన ప్రొఫెసర్ జియోన్ జి-సు బీబీసికి చెప్పారు.

అయితే బాధితుల వాంగ్మూలంపైనే ఎక్కువ ఆధారపడటం వల్ల, మాట్లాడటంలో ఇబ్బంది పడ్డ వారిని బాధితులుగా గుర్తించడంలో పోలీసులు విఫలయ్యారని ఉద్యమకారులు ఆరోపిస్తున్నారు.

"బాధితులంతా తమ అనుభవాలను మనం ఊహించిన లేదా ఆశించిన విధంగా కాకుండా వేరే రీతిలో వ్యక్తం చేస్తే వారి గొంతు వినేందుకు ప్రభుత్వం మరింత ప్రయత్నం చేయకూడదా? "అని వైకల్యాలున్న లైంగిక హింస బాధితుల కోసం పనిచేసే కౌన్సెలింగ్ కేంద్రమైన హన్సాహోకు చెందిన బేక్ ఇన్-సియోంగ్ అన్నారు.

"వ్యక్తిగత కేసుల దర్యాప్తులో లోపాలు ఉండవచ్చు, అయితే వాటిని మొత్తం దర్యాప్తు ప్రక్రియకు ఆపాదించకూడదు" అని పోలీసులు చెబుతున్నారు.

కిమ్‌కు మద్దతుగా పిటిషన్లు

కిమ్‌కు క్షమాభిక్ష కోరిన ఇతరుల తీరును కూడా హక్కుల సంఘాలు తప్పుబడుతున్నాయి.

కిమ్‌కు క్షమాభిక్ష కోరుతూ మొత్తం 13 పిటిషన్లు కోర్టులో దాఖలయ్యాయి. వాటిలో ఒకటి, ఓ సామాజిక సంక్షేమ సంస్థ నుంచి వచ్చింది. "నిందితుడు సంక్షేమ రంగానికి చేసిన సేవను" పరిగణలోకి తీసుకోవాలని కోర్టును ఆ సంస్థ కోరింది.

ఈ పిటిషన్లు దాఖలు చేసిన సంస్థలను సంక్షేమ న్యాయవాద బృందం గ్యోల్ ఖండించారు. "సంక్షేమ రంగంలో గతంలో చేసిన సేవ ఎవరినీ జవాబుదారీతనం నుంచి మినహాయించదు" అని పేర్కొంది.

కిమ్‌ను దోషిగా నిర్థరిస్తూ, న్యాయమూర్తి ఇచ్చిన తీర్పులో, ఆయన చేసిన నేరం 'అత్యంత ఖండించదగినది' అని పేర్కొన్నారు. ఎందుకంటే ' బాధితుల హక్కులు, ప్రయోజనాలను కాపాడటం, వారికి మద్దతు ఇవ్వడం, దుర్వినియోగాన్ని అడ్డుకోవడం ఆయన వృత్తిపరమైన బాధ్యత అయినప్పటికీ తనకు ఉన్న అధికారంతో బాధితులను లైంగికంగా వేధించడానికి ఉపయోగించుకున్నారు' అని తీర్పులో వెల్లడించారు.

తనిఖీలు చేసినా ఉపయోగం లేదు

ఈ కేసు దక్షిణ కొరియాలో చాలా మందిని దిగ్భ్రాంతికి గురి చేసింది. ఈ దుర్వినియోగాన్ని ఎందుకు నివారించలేకపోయారనే ప్రశ్నలు లేవనెత్తింది. వికలాంగులను లైంగిక వేధింపుల నుంచి రక్షించడానికి చట్టాలను బలోపేతం చేసేందుకు 2011లో ఒక నిర్ణయం తీసుకున్నప్పటికీ ఇది జరగడం మరింత ఆందోళన కలిగిస్తోంది.

ఆ ఏడాదిలోనే బధిర పిల్లల పాఠశాలలో జరిగిన వేధింపుల నిజ జీవిత కథ ఆధారంగా రూపొందించిన 'దోగాని' అనే చిత్రం విడుదలైంది. తీవ్రమైన ప్రజా ఆందోళనలతో సదరు పాఠశాలను మూసివేసి, దాని ఫలితంగా కఠినమైన చట్టాలను తీసుకొచ్చారు.

ఇందులో వికలాంగులపై జరిగే లైంగిక నేరాలకు ప్రత్యేక విభాగాలను ఏర్పాటు చేయడం, సంరక్షణ కేంద్రాల డైరెక్టర్లు, సిబ్బంది చేసిన నేరాలకు మరింత కఠినైన శిక్షలు విధించడం, అలాగే వికలాంగ బాధితులపై జరిగిన కొన్ని అత్యాచార కేసుల్లో కాలపరిమితి నిబంధనను తొలగించడం వంటి మార్పులు చేశారు.

అయితే సేక్‌డాంగ్‌వాన్‌ కేసులో, ఆ కేంద్రాన్ని పర్యవేక్షించే బాధ్యత ఉన్న స్థానిక సంస్థ గంగ్వా కౌంటీ అధికారులు తరచూ తనిఖీలు నిర్వహించారు. అయినా అక్కడ వేధింపులు కొనసాగుతూనే ఉన్నాయని తేలింది.

ఇక్కడ చేసే తనిఖీలు ఎక్కువగా పేపర్ వర్క్‌పైనే దృష్టి పెట్టాయని, నిర్దిష్టమైన సమస్య ఉన్నప్పుడు మాత్రమే అక్కడ ఉండే వారితో మాట్లాడేవారని కౌంటీలో ఉండే ఒక అధికారి బీబీసీకి తెలిపారు.

బయట నుంచి ఒక బృందం ఆ కేంద్రాన్ని పర్యవేక్షించేదని ఆ అధికారి చెప్పారు. అయితే సిబ్బంది నుంచి వారికి కూడా ఎలాంటి ఫిర్యాదులు అందలేదని తెలిపారు. అక్కడి అధికారుల పరిస్థితిని మరింత లోతుగా అధ్యయనం చేయకపోవడంపై విచారం వ్యక్తం చేశారు.

ఆ కేంద్రంలో వేధింపులు జరుగుతున్నాయని కొన్ని కుటుంబాలు అనుమానించాయని, అయితే వ్యక్తపరచలేకపోయినట్టు తనతో చెప్పినట్టు ఒక కౌన్సెలింగ్ సెంటర్‌కు చెందిన జాతీయ ప్రతినిధి జోహో వివరించారు. సేక్‌డాంగ్‌వాన్‌ బాధితులలో కొందరికి ఈ సెంటర్ అండగా నిలిచింది.

మరో చోటు దొరకదని బెంగ

ఈ కేంద్రం నుంచి వెళ్లిపోతే మరో కేంద్రం వెతకడం కష్టంగా మారుతుంది. దీంతో దివ్యాంగుల పూర్తి బాధ్యతలు కుటుంబమే చూసుకోవాలి.

సంరక్షణ కేంద్రాల్లో ఉన్న తల్లిదండ్రులతో కూడిన జాతీయ సంఘం ఒక సర్వే నిర్వహించింది. ఇలాంటి సంరక్షణ కేంద్రంలో చోటు పొందిన వారిలో సుమారు 10 మందిలో ఆరుగురు మూడేళ్లు ఎదురు చూడాల్సి వచ్చింది. సరైన సంరక్షణ సేవలను పొందడం ఎంత కష్టమో ఇది తెలియజేస్తుంది.

ఇలాంటి సంరక్షణ కేంద్రాలు అక్కడ ఉండే వారిపై విస్తృత నియంత్రణ కలిగి ఉంటాయని వూసుక్ విశ్వవిద్యాలయం కాగ్నిటివ్ సైన్స్ ఇన్‌స్టిట్యూట్ ప్రొఫెసర్ కిమ్ యూన్-టే అన్నారు. వారు ఏం తినాలి, ఎక్కడ పడుకోవాలి, వైద్య సేవలు ఎలా పొందాలి, బయటకు వెళ్ళడానికి అనుమతి ఇవ్వాలా వద్దా అనే విషయాల వరకు అన్నింటినీ కేంద్రాలే నిర్ణయిస్తాయని పేర్కొన్నారు.

దుర్వినియోగం జరిగిన పరిమాణం, అది చాలా కాలంపాటు కొనసాగిన కారణంగా సేక్‌డాంగ్‌వాన్‌ కేసు ఒక మైలురాయి కేసుగా నిలిచిందని జో తెలిపారు. అయితే ఇది ఒక్కటే ప్రత్యేక ఘటన కాదని అభిప్రాయపడ్డారు.

యోంగ్‌చియాన్‌లోని ఒక సంరక్షణ కేంద్రంలో మేధో వైకల్యం ఉన్న ఇద్దరు మహిళలపై అత్యాచారం లేదా లైంగిక దాడికి పాల్పడిన ఒక కార్మికుడికి విధించిన 8 ఏళ్ల జైలు శిక్షను ఒక అప్పీల్ కోర్టు 2023లో సమర్థించింది.

ఆన్‌సియోంగ్‌లోని ఒక ప్రత్యేక కేసులో, 2022లో వైకల్యం ఉన్న ఒక మహిళపై పదే పదే అత్యాచారం చేసినందుకు ఒక సంరక్షణ కేంద్ర కార్మికుడికి ఇటీవల ఆరేళ్ల జైలు శిక్ష విధించారు.

"వైకల్యం ఉన్న మహిళలు అనుభవించే హింస ఒక వ్యక్తిగత సమస్యకాదు" అని జో అన్నారు. "ఇది లింగం, వైకల్యం, సంరక్షణ కేంద్రాల్లో నివసించాల్సిన పరిస్థితి, పేదరికం, సామాజిక ఒంటరితనం వంటి అనేక అంశాలు ఒకదానితో ఒకటి కలిసిపోయి ఏర్పరచిన వ్యవస్థాగత హింస" అని ఆయన అన్నారు.

'ప్రశాంతంగా జీవించాలనుకుంటున్నాం'

ఈ కేసు వెలుగులోకి వచ్చిన తర్వాత, దక్షిణ కొరియా ప్రధానమంత్రి పలు ప్రభుత్వ శాఖలు కలిసి పని చేసే ఒక ప్రత్యేక ప్రతిస్పందన బృందాన్ని ఏర్పాటు చేయాలని ఆదేశించారు. "ఇది దేశ ఉనికికే ప్రశ్నార్థం కలిగించే ఒక తీవ్రమైన విషయం" గా అభివర్ణించారు.

దేశవ్యాప్తంగా 1507 దివ్యాంగ సంరక్షణ కేంద్రాల్లో తనిఖీలు చేసి 33 అనుమానిత వేధింపుల కేసులు గుర్తించినట్టు ఏప్రిల్‌లో ప్రభుత్వం ప్రకటించింది. ఇప్పటివరకు వాటిలో ఎనిమిదింటిపై దర్యాప్తు ప్రారంభించారు.

ప్రమాద సూచనలు ఉన్న కేంద్రాలను లక్ష్యంగా చేసుకుని మరింత కఠినమైన తనిఖీలు నిర్వహిస్తామని ప్రభుత్వం తెలిపింది. అలాగే స్థానిక అధికారులు, పోలీసులు, వికలాంగుల హక్కుల పరిరక్షణ సంస్థలు కలిసి సంయుక్తంగా తనిఖీలు చేసే విధానాన్ని కూడా బలోపేతం చేస్తామని ప్రకటించింది.

సేక్‌డాంగ్‌వాన్‌ను మూసివేయాలని గాంఘ్వా కౌంటీ ఆదేశించింది. ఆ కేంద్రాన్ని నిర్వహిస్తున్న ఫౌండేషన్ లైసెన్స్‌ను స్థానిక ప్రభుత్వం రద్దు చేసింది.

అయితే, ఇంకా అక్కడ ఉన్న నివాసితులందరినీ ఇతర సురక్షిత ప్రదేశాలకు తరలించి, వారు స్వతంత్రంగా జీవించేందుకు అవసరమైన ఏర్పాట్లు పూర్తి అయ్యే వరకు ఆ కేంద్రాన్ని మూసివేసే నిర్ణయాన్ని వాయిదా వేశారు.

సేక్‌డాంగ్‌వాన్‌లోని మొత్తం 33 మంది నివాసితుల కోసం స్వతంత్ర జీవనానికి అవసరమైన వ్యక్తిగత సహాయ ప్రణాళికలను రూపొందిస్తామని స్థానిక ప్రభుత్వం తెలిపింది. ఆ ప్రణాళికల రూపకల్పన, అమలు ప్రక్రియ ప్రస్తుతం ఇంకా కొనసాగుతోంది.

సేక్‌డాంగ్‌వాన్‌ సంస్థ తన లైసెన్స్‌ను రద్దు చేసిన ప్రభుత్వం నిర్ణయాన్ని సవాలు చేస్తూ అడ్మినిస్ట్రేటివ్ కోర్టులో పిటిషన్ దాఖలు చేసింది. అయితే, కిమ్‌ను దోషిగా తేలుస్తూ కోర్టు ఇచ్చిన తీర్పుపై ఇంత వరకు ఆ సంస్థ స్పందించలేదు.

సేక్‌డాంగ్‌వాన్‌ విడిచిపెట్టిన తర్వాత వచ్చిన మార్పు ఏంటని అడగ్గా, "ప్రశాంతంగా అనిపిస్తోంది. నేను ప్రతి రోజూ సంతోషంగా గడుపుతున్నా"అని సియో అన్నారు.

కోరుకున్నప్పుడు తినగలగడం, నిద్రపోగలగడం మంచిదని ఆమె అన్నారు.

"డైరెక్టర్‌తో సంబంధాలను పూర్తిగా తెంచుకోవడం, ఇకపై ఆయనతో ఎలాంటి సంబంధం లేకుండా జీవించడం" తనకు కావాలని ఆమె కోరుకుంటున్నారు.

కానీ, సురక్షితంగా భావించడానికి ఒక చోటు వికలాంగులకు అవసరం ఉందనిపిస్తోందని సియో అభిప్రాయపడ్డారు.

"ఎలాంటి లైంగిక వేధింపులు లేకుండా, వికలాంగులు ప్రశాంతంగా జీవించే సదుపాయం కల్పించాలని ఆశిస్తున్నా"

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)