‘ఆర్మీ జవాన్లే లక్ష్యం’ - 1,417 కోట్ల రూపాయల మోసం ఎలా జరిగింది, బాధితులు ఏమంటున్నారు?

"ఆర్మీలో 17 ఏళ్లు పనిచేశాను. రిటైర్మైంట్ బెనిఫిట్స్ 40 లక్షల రూపాయలు వచ్చాయి. ఊళ్లో సొంతంగా ఇల్లు కట్టుకోవాలనే కల ఉండేది. ఆ ఒక్క సంస్థ వల్ల నా కల మొత్తం చెదిరిపోయింది"

తమిళనాడులోని కృష్ణగిరి జిల్లాకు చెందిన సెంథిల్ కుమార్ వ్యాఖ్యలివి. ఈరోడ్‌ ప్రాంతానికి చెందిన ఓ ప్రైవేట్ సంస్థ‌ ప్రకటించిన ఎగుమతి పథకంలో పెట్టుబడి పెట్టి మొత్తం డబ్బులు కోల్పోయినట్లు ఆయన బీబీసీతో చెప్పారు.

ఈయన లాగే 'సుమారు 35 వేల మంది నుంచి రూ. 1,417 కోట్లు మేర మోసం చేశారనే ఆరోపణలతో 'యూనిక్ ఎక్స్‌పోర్ట్స్' సంస్థకు చెందిన ఇద్దరిని అరెస్టు చేసినట్లు' అక్టోబర్ 1న ఎన్‌ఫోర్స్‌మెంట్ డైరెక్టరేట్ (ఈడీ) విడుదల చేసిన ఒక ప్రకటనలో తెలిపింది.

తమిళనాడే కాక, ఆంధ్రప్రదేశ్, కర్ణాటక, మహారాష్ట్ర, దిల్లీలలో నివసిస్తున్న ఆర్మీ జవాన్లను లక్ష్యంగా చేసుకుని ఈ మోసం జరిగినట్లు ఆరోపణలు వినిపిస్తున్నాయి. ఇంతకీ అసలేం జరిగింది?

ఈరోడ్ జిల్లా మున్సిపల్ కాలనీ ప్రాంతంలో 'యూనిక్ ఎక్స్‌పోర్ట్స్' అనే సంస్థ, నసియనూర్ రోడ్‌లో 'ఈస్ట్ వ్యాలీ ఆగ్రో ఫార్మ్స్' అనే సంస్థ కార్యకలాపాలు సాగిస్తుండేవి.2017లో ప్రారంభమైన ఈ సంస్థలకు ఈరోడ్ జిల్లాకు చెందిన నవీన్ కుమార్ అనే వ్యక్తి మేనేజింగ్ డైరెక్టర్‌గా వ్యవహరించినట్లు ఈరోడ్ జిల్లా క్రైమ్ బ్రాంచ్ ఒక ప్రకటనలో పేర్కొంది.

వ్యవసాయ ఉత్పత్తులను ఎగుమతి చేస్తే ఎక్కువ ఆదాయం వస్తుందని చెబుతూ ఈ సంస్థ పలు ఆకర్షణీయమైన పథకాలను ప్రవేశపెట్టిందని స్థానిక పోలీసులు తెలిపారు.

'భారత్‌లో కిలో ఉల్లిపాయల ధర 100 రూపాయలుంటే, విదేశాల్లో 400 రూపాయలు పలుకుతుంది. ఆ లాభాన్ని పంచుతామని' చెప్పి జనాలను చేర్పించారని ఈరోడ్‌లో నివసిస్తున్న ఆర్మీ మాజీ జవాను పళనియప్పన్ చెబుతున్నారు.

శ్రీలంక, దుబయ్, మారిషస్, అమెరికా లాంటి దేశాలకు ఉల్లిపాయలు, బంగాళదుంపలు, గోధుమలు, బియ్యం లాంటి వస్తువులను ఎగుమతి చేస్తున్నట్లు 'యూనిక్ ఎక్స్‌పోర్ట్స్' సంస్థ యజమాని తెలిపారని పళనియప్పన్ పేర్కొన్నారు.

"ఎగుమతులకు సంబంధించిన పత్రాలను చూపించడంతో వాటిని నమ్మి డబ్బులు కట్టారు. ప్రారంభంలో కొంత లాభం రావడంతో అదే మొత్తాన్ని మళ్లీ మళ్లీ పెట్టుబడిగా పెట్టారు" అని పళనియప్పన్ బీబీసీతో చెప్పారు.

పళనియప్పన్ జాతీయ మాజీ సైనికుల పార్టీ కేంద్ర కార్యదర్శిగా బాధ్యతలు నిర్వర్తిస్తున్నారు. 'యూనిక్ ఎక్స్‌పోర్ట్స్' సంస్థ బాధితులను ఒకచోట చేర్చి పోలీసులకు ఫిర్యాదు చేసిన వారిలో ఆయన కూడా ఒకరు.

"పదవీ విరమణ చేయబోయే మాజీ సైనికులు డబ్బును పెట్టుబడిగా పెడతారని బాగా పసిగట్టి మోసం చేశారు" అని పళనియప్పన్ చెప్పారు.

"బయట వచ్చే వడ్డీ కంటే ఎక్కువ వస్తుందనే ఆశతో చాలామంది అప్పు తెచ్చి మరీ పెట్టుబడి పెట్టారు. ఇప్పుడు తీసుకున్న అప్పులకు వడ్డీ కట్టలేక ఇబ్బంది పడుతున్నారు" అన్నారు.

'చనిపోయే వరకు 50 వేలు'

"తమిళనాడులోనే కాకుండా అనేక ప్రాంతాలకు చెందిన మాజీ సైనికులను లక్ష్యంగా చేసుకుని ఆర్థిక మోసానికి పాల్పడ్డారు" అని మాజీ సైనికుడు సెంథిల్ కుమార్ చెబుతున్నారు.

కృష్ణగిరి జిల్లాకు చెందిన ఈయన, 2021 డిసెంబర్‌లో ఆర్మీ నుంచి పదవీ విరమణ చేశారు.

"నాకు ఇలాంటి పథకాల్లో చేరాలనే ఆసక్తి లేదు. 40 లక్షల రూపాయలు పెట్టుబడి పెడితే 60 లక్షల రూపాయలు వస్తాయని ఓ మిత్రుడు చెప్పారు. నా చేతిలో డబ్బులు ఉండటంతో, నా దగ్గర అప్పు తీసుకుని నా పేరు మీద పెట్టుబడి పెట్టి పారిపోయారు. మొత్తం డబ్బులన్నీ పోయాయి" అని సెంథిల్ కుమార్ అన్నారు.

"అధిక వడ్డీ వస్తుందని ఎలా నమ్మగలిగారు?" అని అడిగినప్పుడు,

"వాళ్లు ప్రకటించిన పథకాలు కూడా ఒక కారణం. 25 లక్షల రూపాయలు పెట్టుబడి పెడితే చనిపోయే వరకు నెలకు 50 వేల రూపాయలు ఇస్తామన్నారు. పదవీ విరమణ చేసిన సైనికులు చాలామంది దీన్ని నమ్మేశారు" అని సెంథిల్ కుమార్ చెప్పారు.

ఎన్‌ఫోర్స్‌మెంట్ డైరెక్టరేట్ (ఈడీ) విడుదల చేసిన పత్రికా ప్రకటనలో, 'యూనిక్ ఎక్స్‌పోర్ట్స్' సంస్థ ప్రవేశపెట్టిన పథకాల జాబితాను పొందుపరిచారు.

'మోసానికి పాల్పడేందుకు పథకాలు'

యుఎన్ఐ, ఎఫ్ఎన్‌బి, ఎఫ్ఏబి, యుఎన్ఆర్ అనే పేర్లతో నాలుగు రకాల పెట్టుబడి పథకాలను మోసానికి పాల్పడేందుకు ఉపయోగించినట్లు ఎన్‌ఫోర్స్‌మెంట్ డైరెక్టరేట్ (ఈడీ) తెలిపింది.

ఈరోడ్‌లో 'యూనిక్ ఎక్స్‌పోర్ట్స్' సంస్థ కార్యకలాపాలు సాగించినప్పటికీ, అక్కడి నుంచి తమకు కొన్ని ఫిర్యాదులే వచ్చాయని ఈరోడ్ జిల్లా ఆర్థిక నేరాల నిరోధక విభాగం డీఎస్పీ రవికుమార్ తెలిపారు.

"ధర్మపురి, కృష్ణగిరి, తిరుపత్తూర్, వేలూరు ప్రాంతాల్లోనే ఎక్కువ మంది ప్రజలు మోసపోయారు" అన్నారు.

'ఆందోళనలు చేసినా ఫలితం లేదు'

ఆర్మీలో 17 ఏళ్లు కష్టపడి కూడబెట్టిన డబ్బు పోయిందని కృష్ణగిరికి చెందిన సెంథిల్ కుమార్ అంటున్నారు.

"ప్రస్తుతం సెక్యూరిటీ గార్డుగా పని చేస్తున్నా. సొంత ఇల్లు కట్టుకోవాలనుకున్నా. అది సాధ్యం కాకపోవడంతో నెలకు ఐదు వేల రూపాయల అద్దె ఇంట్లో నివసిస్తున్నాను" అని ఆయన చెప్పారు.

డబ్బు పెట్టుబడి పెట్టిన వారిలో కొందరు చనిపోయారని అన్నారాయన.

"జిల్లా కలెక్టర్ కార్యాలయం, డీజీపీ కార్యాలయాల వద్ద ఆందోళనలు చేశాం. అయినా ఎలాంటి ఫలితం దక్కలేదు" అని సెంథిల్ కుమార్ అన్నారు.

2022లో ఈరోడ్ జిల్లా క్రైమ్ బ్రాంచ్‌లో బాధితులు ఫిర్యాదు చేశారు. ఆ సమయంలో 440 మంది ఫిర్యాదు చేశారు. దీని ఆధారంగా నమోదైన ఎఫ్ఐఆర్‌ను.. ఎన్‌ఫోర్స్‌మెంట్ డైరెక్టరేట్ ప్రస్తుతం దర్యాప్తు కోసం స్వీకరించింది. దీనికి కొనసాగింపుగా నవీన్ కుమార్, అతని అనుచరులకు సంబంధించిన తొమ్మిది ప్రదేశాల్లో గత జూన్ 16, 17 తేదీల్లో ఎన్‌ఫోర్స్‌మెంట్ డైరెక్టరేట్ సోదాలు నిర్వహించింది.

'నలుగురికి రూ. 390 కోట్ల జీతం'

'యూనిక్ ఎక్స్‌పోర్ట్స్, దానికి సంబంధించిన ఇతర సంస్థలు చెప్పుకోదగ్గ స్థాయిలో ఎలాంటి ఎగుమతులూ చేయలేదు' అని ఎన్‌ఫోర్స్‌మెంట్ డైరెక్టరేట్ (ఈడీ) విడుదల చేసిన పత్రికా ప్రకటనలో పేర్కొంది.

కానీ, ఎగుమతుల ద్వారా వచ్చే లాభాలతో అధిక ఆదాయం ఇస్తామని మభ్యపెట్టి, పెట్టుబడిదారుల నుంచి పెద్ద ఎత్తున డబ్బు వసూలు చేసినట్లు విచారణలో తేలిందని వెల్లడించింది.

ఈ క్రమంలో, 35,759 మంది పెట్టుబడిదారుల నుంచి రూ. 1,417 కోట్లు మోసం చేసినట్లు ఈడీ తెలిపింది. మోసపూరిత పథకాలను రూపొందించడంలో, పెట్టుబడిదారులను ఆకర్షించడంలో ముత్తుసెల్వం కీలక పాత్ర పోషించారని పేర్కొంది.

పెట్టుబడిదారుల నుంచి డబ్బు వసూలు చేసినందుకు ప్రతిఫలంగా ముత్తుసెల్వం రూ. 12.72 కోట్లను ఆదాయంగా పొందినట్లు విచారణలో వెల్లడైంది. తన వ్యక్తిగత బ్యాంక్ ఖాతాలతో పాటు, ఇతర సంస్థల పేర్ల మీదుగా ఆయన ఈ నిధులను స్వీకరించినట్లు ఈడీ తెలిపింది.

"యూనిక్ ఎక్స్‌పోర్ట్స్ సంస్థ యజమాని నవీన్ కుమారే ఈ పెట్టుబడి పథకాలకు సూత్రధారిగా వ్యవహరించారు. ఈ సంస్థలో నలుగురు మాత్రమే పని చేస్తున్నట్లు చూపించి, వారికి సుమారు రూ. 390 కోట్లను జీతంగా చెల్లించినట్లు రికార్డుల్లో నమోదు చేశారు" అని ఈడీ పేర్కొంది.

అంతేకాకుండా, వ్యవసాయ ఉత్పత్తులను అసలు కొనుగోలు చేయకుండానే.. ఉల్లిపాయలు, ఇతర సరకులను కొన్నట్లుగా సుమారు రూ. 79 కోట్లకు తప్పుడు లెక్కలు రాశారు. వ్యాపార ఖర్చుల పేరుతో పెట్టుబడిదారుల సొమ్మును పక్కదారి పట్టించేందుకే వీటన్నింటినీ వినియోగించినట్లు ఈడీ వెల్లడించింది.

సంస్థ యజమాని ఏమన్నారు?

సెప్టెంబర్ 29న నవీన్ కుమార్, ముత్తుసెల్వంలను ఎన్‌ఫోర్స్‌మెంట్ డైరెక్టరేట్ (ఈడీ) అరెస్టు చేసింది. వీరిద్దరినీ ప్రత్యేక న్యాయస్థానంలో హాజరుపరచగా, 15 రోజుల పాటు జ్యుడీషియల్ కస్టడీకి తరలించాలని న్యాయమూర్తి ఆదేశించారు.

తనపై వచ్చిన ఆరోపణల గురించి 2024 ఫిబ్రవరిలో నవీన్ కుమార్ మాట్లాడిన ఒక వీడియో సామాజిక మాధ్యమాల్లో చక్కర్లు కొడుతోంది.

"కరోనా సమయం వరకు అంతా సక్రమంగానే సాగింది. జనవరి నుంచే నాపై సమస్యలను మళ్లించారు. ఈ వ్యవహారంలో భయపడి పారిపోవాలనుకోవడం లేదు. ఆరు నెలల్లో అన్ని సమస్యలూ సమసిపోతాయి" అని ఆయన మాట్లాడుతున్న దృశ్యాలు ఆ వీడియోలో ఉన్నాయి.

కానీ, బాధితులకు తాము కోల్పోయిన సొమ్ము ఇప్పటివరకు తిరిగి రాలేదు. వారు పలు పోరాటాలు, ఆందోళనలు చేశారు.

"ఈ మోసం కేసులో ఛార్జిషీటు దాఖలు చేశాం. కోయంబత్తూరులోని ఆర్థిక నేరాలను విచారించే న్యాయస్థానంలో (టీఎన్‌పీఐడీ) ఈ కేసు పెండింగ్‌లో ఉంది" అని ఈరోడ్ జిల్లా ఆర్థిక నేరాల నిరోధక విభాగం డీఎస్పీ రవికుమార్ తెలిపారు.

"బాధితులు కోల్పోయిన డబ్బు వారికి తిరిగి వచ్చే అవకాశం ఉందా?" అని డీఎస్పీని బీబీసీ ప్రశ్నించగా, "యూనిక్ ఎక్స్‌పోర్ట్స్ సంస్థను మూసివేశాం. వారి భూములను స్వాధీనం చేసుకున్నాం. కేసు విచారణ దశలో ఉంది. విచారణ ముగిశాక దీనిపై ఒక స్పష్టత వస్తుంది" అని బదులిచ్చారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)