'பாம்பின் தலையை துண்டிக்கிறோம்' - இந்திய ஐடி நிறுவனங்கள் மீது அமெரிக்கா நடவடிக்கை - இந்தியா கூறியது என்ன?

திறன் வாய்ந்த வெளிநாட்டுப் பணியாளர்கள் அமெரிக்காவில் நிரந்தரக் குடியுரிமை பெறுவதற்கு உதவும் முக்கியத் திட்டத்திலிருந்து, இந்தியாவைச் சேர்ந்த பல முன்னணி தகவல் தொழில்நுட்ப நிறுவனங்களுக்கு அமெரிக்கா தடை விதித்துள்ளது

மோசடி நடந்ததாகக் கூறப்படுவதையும், அமெரிக்கப் பணியாளர்களுக்குக் கிடைக்க வேண்டிய வேலைவாய்ப்புகள் வெளிநாட்டுப் பணியாளர்களுக்கு வழங்கப்பட்டதாகக் கூறப்படுவதையும் டிரம்ப் நிர்வாகம் இதற்குக் காரணமாகக் குறிப்பிட்டுள்ளது.

அமெரிக்க தொழிலாளர் துறைச் செயலர் கீத் சாண்டர்லிங், "உலகின் மிகப்பெரிய தகவல் தொழில்நுட்ப சேவை நிறுவனங்களில் சிலவற்றை நிரந்தரத் தொழிலாளர் சான்றளிப்புத் திட்டத்திலிருந்து (பெர்ம்) இடைநீக்கம் செய்கிறேன். அவை காக்னிசன்ட், இன்ஃபோசிஸ், டாடா, விப்ரோ, ஹெச்சிஎல் மற்றும் கேப்ஜெமினி ஆகிய நிறுவனங்கள்" என்று தெரிவித்தார்.

"பல தசாப்தங்களாக இந்த முறைகேடுகள் நடைபெறுவதற்கு இந்த நிறுவனங்கள் வழிவகுத்துள்ளன. எனவே, அவற்றை பெர்ம் திட்டத்திலிருந்து இடைநீக்கம் செய்கிறேன். மேலும், தற்போது நடைபெற்று வரும் பல்வேறு விசாரணைகள் காரணமாக, மைக்ரோசாஃப்ட் மற்றும் அடோப் நிறுவனங்களையும் இந்தத் திட்டத்திலிருந்து அமெரிக்க தொழிலாளர் துறை இடைநீக்கம் செய்கிறது" என்று சாண்டர்லிங் கூறினார்.

இந்த அறிவிப்பின்போது பேசிய கீத், "அமெரிக்கப் பணியாளர்கள்தான் உலகிலேயே அதிகத் தகுதியும் திறமையும் கொண்டவர்கள் என்பதை டிரம்ப் நிர்வாகம் அறிந்துள்ளது. அமெரிக்கர்களிடமிருந்து பறிக்கப்பட்ட இந்த வேலைகள் முதலில் அமெரிக்கர்களுக்கே வழங்கப்பட்டிருக்க வேண்டும். இனியும் அவை வெளிநாட்டினருக்கு அல்ல. அமெரிக்கர்களுக்கே முன்னுரிமை அளித்து வழங்கப்படும். இன்று, அதிபர் டிரம்ப், துணை அதிபர் மற்றும் பணிக்குழுவின் உதவியுடன், பாம்பின் தலையைத் துண்டிக்கிறோம்" என்று தெரிவித்தார்.

வெளிநாட்டுப் பணியாளர்களுக்கான H-1B விசா திட்டத்தையும், அவர்களை அமெரிக்காவில் நிரந்தரக் குடியிருப்பாளர்களாக மாற்றுவதற்கான தொடர்புடைய நடைமுறையையும் பயன்படுத்தி மைக்ரோசாஃப்ட் உள்ளிட்ட நிறுவனங்கள் மோசடியில் ஈடுபடுவதாக அமெரிக்கத் துணை அதிபர் ஜே.டி. வான்ஸ் வியாழக்கிழமை குற்றஞ்சாட்டினார்

அமெரிக்காவின் மிக மதிப்புமிக்க நிறுவனங்களில் ஒன்றான மைக்ரோசாஃப்ட், அமெரிக்கப் பணியாளர்களுக்குப் பதிலாக வெளிநாட்டுப் பணியாளர்களை அடிமைகளைப் போலப் பணியமர்த்தி வருவதாக வான்ஸ் குற்றஞ்சாட்டினார்.

கீத் ஆங்கிலத்தில் பயன்படுத்திய "We are cutting off the head of the snake" என்ற சொற்றொடருக்கு, "பிரச்சினையின் அடிப்படை அல்லது மூலத்தையே ஒழிக்கிறோம்" என்பது பொருள்.

ஆனால், இந்தியாவில் பலர் இதை நேரடிப் பொருளில் எடுத்துக்கொண்டு, இழிவுபடுத்தும் வகையில் கூறப்பட்டதாக தெரிவித்தனர்.

'பாம்பின் தலையைத் துண்டிக்கிறோம்' கருத்தால் சர்ச்சை

ஹிந்துஸ்தான் டைம்ஸ் நாளிதழின் சர்வதேசப் பிரிவு ஆசிரியர் ரெசால் ஹசன் லஸ்கர், கீத் சாண்டர்லிங்கின் கருத்து குறித்து எக்ஸ் தளத்தில், "இந்தியாவுடன் தொடர்புடைய ஒரு விஷயம் 'பாம்பின் தலை' என்று அழைக்கப்பட்டதை இதற்கு முன்பு கடைசியாக எப்போது கேட்டேன் என்பது நினைவில்லை" என்று பதிவிட்டார்.

அமெரிக்காவில் பிறந்து வளர்ந்த இந்திய வம்சாவளித் தொழில்முனைவோரான விவேக் வாத்வா, டிரம்ப் நிர்வாகத்தின் அறிவிப்பு குறித்து, "வரலாற்றிலேயே அதிக லாபத்தை அமெரிக்கா இலவசமாகப் பெற்றுள்ளது. திறமையான வெளிநாட்டுப் பணியாளர்கள் தங்களது திறமையின் அடிப்படையில் அமெரிக்காவுக்கு வந்தனர். ஆனால், இப்போது சிறந்த மற்றும் அதிகத் திறமையானவர்களை வெளியேற்றுவதன் மூலம், தனது வெற்றியைத் தோல்வியாக அமெரிக்கா மாற்றிக்கொள்கிறது.'' என்று கூறினார்.

கீத் சாண்டர்லிங்கின் 'பாம்பின் தலையைத் துண்டிக்கிறோம்' என்ற கருத்துக்குப் பதிலளித்த ஐ.நா. அமைதிப் படையில் பணியாற்றிய ஓய்வுபெற்ற மேஜர் ஜெனரல் யாஷ் மோர், "இது மிகவும் கீழ்த்தரமான தாக்குதல். இத்தகைய மொழியை ஏற்றுக்கொள்ள முடியாது. இதற்கு வலுவான பதில் கிடைக்கும் என்று நம்புகிறோம். இது இந்தியத் தகவல் தொழில்நுட்பத் துறை மற்றும் நமது பொருளாதாரத்தின் மீதான நேரடித் தாக்குதல்" என்று தெரிவித்தார்.

டிரம்ப் நிர்வாகத்தின் இந்த நடவடிக்கை, அமெரிக்காவில் இந்த நிறுவனங்களில் பணியாற்ற விரும்பும் இந்தியத் தொழில்நுட்ப வல்லுநர்களுக்குப் பெரும் பின்னடைவாகக் கருதப்படுகிறது. பெர்ம் திட்டம், இத்தகைய பணியாளர்கள் அமெரிக்காவில் நிரந்தரக் குடியிருப்பாளர்களாக மாறுவதற்கான ஒரு வழியாகும். இதன் மூலம் பொதுவாகக் கிரீன் கார்டு பெற முடியும். அது அவர்களுக்கு அமெரிக்காவில் காலவரையின்றித் தங்கிப் பணியாற்ற அனுமதி அளிக்கிறது.

"அமெரிக்காவில் எந்த நிறுவனமும் மைக்ரோசாஃப்ட் அளவுக்கு இந்த முறையை (பெர்ம்) தவறாகப் பயன்படுத்தவில்லை என்பது துரதிர்ஷ்டவசமானது" என்று வான்ஸ் கூறினார்.

விசா திட்டங்களைப் பயன்படுத்துவது தொடர்பான தனது நடைமுறைகளை மைக்ரோசாஃப்ட் நிறுவனம் ஓர் அறிக்கையில் ஆதரித்தது. மேலும், அமெரிக்க அரசுக்கு கூடுதல் தகவல்களை வழங்கத் தயாராக இருப்பதாகவும் தெரிவித்தது.

அமெரிக்காவில் எச்-1பி விசாவில் பணியாற்றும் வெளிநாட்டினர் நிரந்தரக் குடியுரிமை பெறுவதற்கான நடைமுறையைத் தடுத்து நிறுத்தும் அமெரிக்க அரசின் முயற்சி, இந்தியத் தகவல் தொழில்நுட்பச் சேவை நிறுவனங்களுக்கு அதிக பாதிப்பை ஏற்படுத்தாமல் இருக்கலாம் என்று மின்ட் நாளிதழ் வெளியிட்டுள்ள செய்தியில் தெரிவிக்கப்பட்டுள்ளது.

''இதற்குக் காரணம், இந்த வழியில் நிரந்தரக் குடியுரிமை பெறுவதற்கான நடைமுறை ஏற்கெனவே பெருமளவில் முடங்கியிருந்ததுதான்.

பெர்ம் விண்ணப்பத்தைச் சமர்ப்பிக்கும்போது, நிறுவனங்கள் வேலைவாய்ப்பு குறித்து விளம்பரம் செய்ய வேண்டும். விண்ணப்பிக்கும் நபர்களைப் பரிசீலிக்க வேண்டும். தகுதியுள்ள அமெரிக்கப் பணியாளர்கள் ஏன் தேர்ந்தெடுக்கப்படவில்லை என்பதற்கான ஆவண ஆதாரங்களையும் வழங்க வேண்டும்.

மேலும், வெளிநாட்டுப் பணியாளரைப் பணியமர்த்துவதால் அமெரிக்கப் பணியாளர்களின் ஊதியம் அல்லது வேலை நிலைமைகள் பாதிக்கப்படாது என்பதையும் நிரூபிக்க வேண்டும்.''

அமெரிக்க தொழிலாளர் துறையின் தரவுகளின்படி, 2024 அக்டோபர் முதல் 2025 செப்டம்பர் வரையிலான காலகட்டத்தில், மொத்தம் 1,17,849 பெர்ம் விண்ணப்பங்கள் சமர்ப்பிக்கப்பட்டன. அவற்றில் 1,400-க்கும் குறைவான விண்ணப்பங்களே, அதாவது 2 சதவீதத்துக்கும் குறைவானவை, இந்தியத் தகவல் தொழில்நுட்ப நிறுவனங்களைச் சேர்ந்தவை. இதுவே தற்போது கிடைக்கும் சமீபத்திய தரவாகும்.

எச்எஃப்எஸ் ரிசர்ச் நிறுவனத்தின் தலைமைச் செயல் அதிகாரி பில் ஃபர்ஸ்ட், மின்ட் நாளிதழிடம், "உடனடியாக எந்த நெருக்கடியும் ஏற்படும் என்று நான் எதிர்பார்க்கவில்லை. பெர்ம் நடைமுறை என்பது எச்-1பி அல்லது பிற வேலை விசாக்களைப் போன்றது அல்ல. எனவே, கிரீன் கார்டு வழங்கும் நடைமுறை இடைநிறுத்தப்படுவதால், ஏற்கெனவே பணியாற்றி வரும் ஊழியர்களின் வேலை செய்யும் உரிமை திடீரென முடிவுக்கு வந்துவிடாது" என்று தெரிவித்தார்.

இந்திய அரசு கூறியது என்ன?

''பெர்ம் திட்டம் என்பது எச்-1பி விசா திட்டத்திலிருந்து வேறுபட்டது என்பதை கவனத்தில் கொள்ள வேண்டும். பெர்ம் விண்ணப்பங்கள் இடைநிறுத்தப்படுவதால், ஏற்கெனவே வழங்கப்பட்டுள்ள எச்-1பி விசாக்களின் செல்லுபடித்தன்மையோ, அந்த விசா வைத்திருப்பவர்களின் நிலை அல்லது அவர்களைச் சார்ந்திருப்பவர்களின் நிலைமையோ பாதிக்கப்படாது. இருப்பினும், பாதிக்கப்பட்ட நிறுவனங்களில் பணியாற்றும் தகுதியுள்ள ஊழியர்கள் நிரந்தரக் குடியுரிமை அல்லது கிரீன் கார்டு பெறும் நடைமுறையில் சில பாதிப்புகள் ஏற்படலாம்.'' என இந்திய வெளியுறவுத்துறை வெளியிட்ட அறிக்கையில் தெரிவிக்கப்பட்டுள்ளது.

''திறமையானபணியாளர்களின் சர்வதேசப் புலப்பெயர்வு இரு நாடுகளின் பொருளாதாரங்களுக்கும் மதிப்பைச் சேர்க்கிறது. இது இந்தியர்களுக்கு வேலைவாய்ப்புகளை உருவாக்குவதுடன், அமெரிக்க நிறுவனங்களுக்குத் துறைசார் முன்னணி திறமையாளர்களைப் பெறவும் உதவுகிறது. எனவே, இரு நாடுகளுக்கும் மிகுந்த பரஸ்பரப் பலன்களை அளிக்கும் துறையாக இது உள்ளது. அமெரிக்கா தற்போது அறிவித்துள்ள நடவடிக்கைகள், இரு நாடுகளும் பகிர்ந்துகொள்ளும் இலக்குகளை முன்னெடுத்துச் செல்வதாக இல்லை.''

''இந்த விவகாரம் தொடர்பாக அமெரிக்கத் துணை அதிபர் தெரிவித்த சில கருத்துகளையும் நாங்கள் கவனித்துள்ளோம். இத்தகைய வர்ணனைகள் தேவையற்றவை என்று நாங்கள் கருதுகிறோம். அமெரிக்காவின் பொருளாதாரத்துக்கும் புத்தாக்கச் சூழலுக்கும் இந்தியத் தொழில்முறை வல்லுநர்கள் உயர்கல்வியும் திறமையும் கொண்டவர்களாகப் பங்களித்து வருகின்றனர் என்ற உண்மையை இந்தக் கருத்துகள் புறக்கணிக்கின்றன.

பல தலைமுறைகளாக அமெரிக்காவுக்கு வந்த புலம்பெயர்ந்தோரின் உழைப்பு, தொழில்முனைவு மற்றும் புத்தாக்கம் ஆகியவை அந்நாட்டின் வளர்ச்சிக்கும் செழிப்புக்கும் பங்களித்துள்ளன. வேதனையான வரலாற்றுப் பின்னணியையும் காலனித்துவ மரபையும் நினைவூட்டும் சொற்களைப் பயன்படுத்துவது மிகுந்த மனவேதனையை ஏற்படுத்துகிறது.'' எனவும் இந்திய வெளியுறவுத்துறை கூறியுள்ளது.

- இது பிபிசிக்காக கலெக்டிவ் நியூஸ்ரூம் வெளியீடு