சாட்ஜிபிடி மூலம் 1980-கள் போன்ற தோற்றத்தை பெற நீங்கள் கொடுத்த விலை என்ன தெரியுமா?

அடர்த்தியாகத் தூக்கிச் சீவப்பட்ட தலைமுடி, புள்ளி புள்ளியாகத் தெரியும் புகைப்படங்கள், பிரகாசமான நியான் நிறங்கள், வணிக வளாகங்களின் புகைப்பட ஸ்டுடியோக்களின் பின்னணி. உங்கள் சமூக வலைத்தளப் பக்கங்கள் 1980-களின் குடும்பப் புகைப்பட ஆல்பம் போலக் காட்சியளிக்கக் கூடும்; நீங்களும் கூட இந்த அலையில் இணைந்து பங்கெடுத்திருக்கக் கூடும்.

இன்று உலகம் முழுவதிலும் உள்ள கோடிக்கணக்கான மக்கள், சாட்ஜிபிடி மற்றும் பிற செயற்கை நுண்ணறிவு கருவிகளைப் பயன்படுத்தித் தங்களது 'செல்ஃபி' புகைப்படங்களை ரெட்ரோ பாணி பழங்கால நினைவுகளை மீட்டெடுக்கும் புகைப்படங்களாக மாற்றி வருகின்றனர். இதில் அந்த காலத்துத் தலைமுடி வடிவமைப்பு, ஆடை முறைகள் மற்றும் பழங்கால புகைப்பட விளைவுகள் ஆகியவை இடம்பெறுகின்றன.

சாட்ஜிபிடியின் புகைப்பட உருவாக்கக் கருவியில் உள்ள ஆலோசனையைப் பயன்படுத்தி, பயனர்கள் தங்களது சொந்தப் படங்களைப் பதிவேற்றுவதன் மூலம் உருவாக்கப்படும் இந்த ஏஐ புகைப்படங்கள், வியக்கத்தக்க வகையில் உண்மையானவை போன்றும், பிறருடன் எளிதில் பகிரக்கூடிய வகையிலும் இருப்பதால், இன்ஸ்டாகிராம், டிக்டாக் மற்றும் எக்ஸ் ஆகிய தளங்களில் இந்த டிரெண்ட் மிக வேகமாகப் பரவி வருகிறது.

ஆனால், இந்த ரெட்ரோ நினைவுகளுக்குப் பின்னால், பயனர்கள் தங்களை அறியாமலே தங்களைப் பற்றிய பல தகவல்களைப் பகிர்ந்து வரக்கூடும் என்று நிபுணர்கள் எச்சரிக்கின்றனர்.

'தரவுகளுக்கு விலையாக கிடைக்கும் பொழுதுபோக்கு'

1980-களின் தோற்றத்துக்கு மக்களை மாற்றும் இந்த டிரெண்டின் பிரபலம், உற்பத்திசார் செயற்கை நுண்ணறிவு பயன்பாட்டில் ஏற்பட்டுள்ள மிகப்பெரிய மாற்றத்தைப் பிரதிபலிக்கிறது.

சில ஆண்டுகளுக்கு முன்புவரை, செயற்கை நுண்ணறிவைப் பயன்படுத்தி புகைப்படங்களை உருவாக்கும் கருவிகள் பெரும்பாலும் தொழில்நுட்ப ஆர்வலர்கள் மற்றும் தொழில்நுட்ப அறிவு கொண்ட பயனர்களிடம் மட்டுமே பிரபலமாக இருந்தன. ஆனால், இன்று சமூக வலைதள டிரெண்டுகள் தொடங்கி அலுவலகக் கருவிகள், அன்றாடப் பயன்பாட்டுச் செயலிகள் வரை பல்வேறு தளங்களில் அவை இடம்பெற்று, மக்களின் அன்றாட வாழ்க்கையின் ஒரு பகுதியாகிவிட்டன.

தனிப் பயனாக்கப்பட்ட சிறுவயதுப் புகைப்படங்களை உருவாக்குதல், கற்பனைப் பாத்திரங்களாகத் தங்களை மாற்றிக்கொள்ளுதல், பண்டிகைக் காலக் கொண்டாட்டங்களைக் கொண்ட படங்களை உருவாக்குதல் எனப் பல்வேறு ஏஐ டிரெண்டுகள் ஏற்கெனவே பிரபலமாகியுள்ளன. அவற்றைத் தொடர்ந்து வந்துள்ள சமீபத்திய டிரெண்ட்தான் இந்த 1980-களைப் போன்ற தோற்ற மாற்றம்.

செயற்கை நுண்ணறிவு அறவியல் நிபுணரான கதரீனா டோரியா கூறுகையில், இதுபோன்ற பரவலாகப் பேசப்படும் டிரெண்டுகள் புதிய பயனர்களை ஈர்ப்பதோடு மட்டுமல்லாமல், அவர்கள் தங்களது தனிப்பட்ட தரவுகளையும் பகிர்ந்துகொள்ள வழிவகுக்கின்றன.

"செயற்கை நுண்ணறிவு நிறுவனங்களுக்குப் பயனளிக்கும் என்பதற்காக மட்டுமே இதுபோன்ற டிரெண்டுகள் உருவாக்கப்படுகின்றன என்று சொல்ல முடியாது. ஆனால், அவை மக்களைப் பற்றியும், அவர்களைச் சுற்றியுள்ளவர்களைப் பற்றியும் அதிகளவில் புகைப்படங்களைப் பதிவேற்ற ஊக்குவிக்கின்றன" என்று அவர் கூறுகிறார்.

இதனால் ஏற்படக்கூடிய விளைவுகளைப் பற்றி முழுமையாகச் சிந்திக்காமல், பொழுதுபோக்கிற்காகத் தங்களது தனிப்பட்ட தகவல்களைப் பகிர்ந்துகொள்ளும் இந்தப் போக்கை டோரியா "தரவுகளுக்கு விலையாக கிடைக்கும் பொழுதுபோக்கு" என்று குறிப்பிடுகிறார்.

ஆக்ஸ்ஃபோர்டு பல்கலைக்கழகத்தின் 'செயற்கை நுண்ணறிவு அறவியல் நிறுவனத்தில்' தத்துவவியல் இணைப் பேராசிரியராக இருக்கும் கரிசா வேலிஸ், ஏஐ அமைப்புகளுடன் தனிப்பட்ட தகவல்களைப் பகிர்ந்துகொள்வதற்கு முன்பு பயனர்கள் கவனமாகச் சிந்திக்க வேண்டும் என்கிறார்.

"நீங்கள் ஏஐ தளத்தில் ஒரு புகைப்படத்தைப் பதிவேற்றும்போது, நீங்கள் மிகுந்த முக்கியத்துவம் கொண்ட சில தரவுகளையே வழங்குகிறீர்கள்" என்று அவர் கூறுகிறார்.

"புகைப்படங்களில் இருப்பிடம் உள்ளிட்ட முக்கியத்துவம் வாய்ந்த 'மெட்டாடேட்டா' பெரும்பாலும் இடம்பெற்றிருக்கும். அதுமட்டுமல்லாமல், உங்களது உயிரளவியல் தரவுகளையும் நீங்கள் பகிர்ந்துகொள்கிறீர்கள்."

முகத்தின் அமைப்பு உள்ளிட்ட தகவல்கள் மிகவும் முக்கியத்துவம் வாய்ந்தவை. ஏனெனில், அவை திருடப்பட்டாலோ அல்லது முறைகேடாகப் பயன்படுத்தப்பட்டாலோ, அவற்றை எளிதில் மாற்ற முடியாது.

"யாராவது உங்கள் கடவுச்சொல்லைத் திருடிவிட்டால், அதை நீங்கள் மாற்றிவிடலாம். ஆனால், உங்கள் முகத்தை மாற்ற முடியாது" என்று வேலிஸ் கூறுகிறார்.

இன்ஸ்டாகிராம், ஃபேஸ்புக் போன்ற வழக்கமான சமூக வலைதளங்கள் அல்லது மேட்ச்சிங் மற்றும் டேட்டிங் செயலிகளுடன் ஒப்பிடும்போது, ஏஐ தளங்களில் ஏற்படக்கூடிய அபாயங்கள் இன்னும் அதிகமாக இருக்கலாம் என்று டோரியா கூறுகிறார். காரணம், பயனர்கள் தங்களது முகம் தெளிவாகத் தெரியும் வகையில் எடுக்கப்பட்ட உயர்தர புகைப்படங்களை அதிகளவில் பதிவேற்றுகின்றனர்.

வேலை, தனிப்பட்ட உறவுகள் மற்றும் தங்களது விருப்பங்கள் தொடர்பான உரையாடல்களின் போது, பல பயனர்கள் விரிவான தனிப்பட்ட தகவல்களை ஏஐ சாட்பாட்களுடன் பகிர்ந்துகொள்வதையும் அவர் சுட்டிக்காட்டுகிறார்.

புகைப்படங்களுடன் இதுபோன்ற தகவல்களும் இணைந்தால், ஒரு நபரைப் பற்றிய மிக விரிவான சுயவிவரத்தை உருவாக்குவதற்கான தரவுகள் திரட்டப்படக்கூடும்.

இலக்கு வைக்கப்பட்ட விளம்பரங்கள்

ஆனால், தரவுத் தனியுரிமை மட்டுமே இங்கு கவலைக்குரிய விஷயம் அல்ல. இன்று பகிரப்படும் தரவுகள் எதிர்காலத்தில் எவ்வாறு பயன்படுத்தப்படலாம் என்பது குறித்த தெளிவின்மையும் கவலை அளிப்பதாக நிபுணர்கள் எச்சரிக்கின்றனர்.

"டிஜிட்டல் யுகத்தின் மிகப்பெரிய சிக்கல்களில் ஒன்று, உங்கள் தரவு எதிர்காலத்தில் எவ்வாறு பயன்படுத்தப்படும் என்பது குறித்து நமக்கு எந்தத் தெளிவும் இல்லாததுதான்" என்று வேலிஸ் கூறுகிறார்.

"அந்தத் தரவுகள் இறுதியில் எங்கு சென்று சேரும் என்பதுகூட நமக்குத் தெரியாது. ஏனெனில், ஏராளமான நிறுவனங்கள் அவற்றை எவ்வாறு பயன்படுத்துகின்றன என்பது குறித்து போதிய கட்டுப்பாடுகள் இல்லை."

சில ஆண்டுகளுக்கு முன்புவரை கணிப்பதே கடினமாக இருந்த தொழில்நுட்பங்கள் இன்று எவ்வாறு வளர்ச்சியடைந்துள்ளன என்பதற்கு, ஏஐ மூலம் உருவாக்கப்படும் 'டீப்ஃபேக்' தொழில்நுட்பத்தின் அதிவேக வளர்ச்சியை டோரியாவும் வேலிஸும் உதாரணமாகச் சுட்டிக்காட்டுகின்றனர்.

இன்று எந்தவித ஆபத்தும் இல்லாமல், வெறும் பொழுதுபோக்கிற்காகப் பதிவேற்றப்படும் புகைப்படங்கள், எதிர்காலத்தில் மேலும் மேம்பட்ட ஏஐ அமைப்புகளை உருவாக்கப் பயன்படுத்தப்படலாம் என்று அவர்கள் எச்சரிக்கின்றனர்.

"ஐந்து அல்லது ஆறு ஆண்டுகளுக்கு முன்பு, இப்படி நடக்கும் என்று நாம் நினைத்துக்கூடப் பார்த்திருக்க மாட்டோம்" என்று சமீபத்திய ஏஐ புகைப்படத் தொழில்நுட்பத்தின் வளர்ச்சியைக் குறிப்பிட்டு டோரியா கூறுகிறார்.

"நாம் எதைப் பற்றியும் பெரிதாகச் சிந்திக்காமல், மகிழ்ச்சியாகப் புகைப்படங்களை இணையத்தில் பதிவேற்றிக்கொண்டிருந்தோம்."

பயனர்களின் தகவல்களைச் சேகரித்து அவர்களைப் பற்றிய சுயவிவரக் குறிப்புகளை உருவாக்குவது, அத்துடன் இலக்கு வைக்கப்பட்ட விளம்பரங்களை வழங்குவது குறித்தும் கவலைகள் உள்ளன.

தொழில்நுட்ப நிறுவனங்கள் சேகரிக்கும் தரவுகள், பயனர்களின் விருப்பங்கள், பழக்கவழக்கங்கள் மற்றும் நடத்தைகள் குறித்து விரிவான சுயவிவரக் குறிப்புகளை உருவாக்க உதவுகின்றன. இதன் மூலம் விளம்பரதாரர்களும் பிற அமைப்புகளும் குறிப்பிட்ட நபர்களைத் துல்லியமாக இலக்கு வைத்து விளம்பரங்களை வழங்க முடியும்.

எதிர்கால ஏஐ மாடல்களை மேம்படுத்துவதற்குப் பயனர்களின் தரவுகள் பயன்படுத்தப்படுவதைத் தடுக்க அல்லது கட்டுப்படுத்துவதற்கான அமைப்புகள் உள்ளிட்ட பல்வேறு தனியுரிமைக் கட்டுப்பாடுகள் பயனர்களுக்கு வழங்கப்பட்டுள்ளதாக முன்னணி ஏஐ நிறுவனங்கள் தெரிவிக்கின்றன.

தங்களது தயாரிப்புகளில் நம்பகத்தன்மைக்கும் தனியுரிமைக்கும் முக்கியத்துவம் அளிப்பதாக 'ஓபன்ஏஐ' நிறுவனம் பிபிசியிடம் தெரிவித்துள்ளது. பயனர்கள் தங்களது தகவல்களை நீக்குவதற்கான வசதியுடன், தங்கள் தரவுகள் மீது முழுமையான கட்டுப்பாட்டையும் கொண்டிருப்பதாக அந்நிறுவனம் கூறுகிறது.

'தற்காலிக சாட்' பயன்முறையைத் தேர்வு செய்வதன் மூலம், பயனர்களின் உரையாடல்கள் சேமிக்கப்படாது, நினைவகத்தில் வைக்கப்படாது அல்லது ஏஐ மாடல்களை மேம்படுத்துவதற்குப் பயன்படுத்தப்படாது என்றும் ஓபன்ஏஐ தெரிவித்துள்ளது.

'தனியுரிமையே வலிமை'

1980-களைப் போன்ற தோற்ற மாற்றம் போல் இணையத்தில் வேகமாகப் பரவும் டிரெண்டுகளில் பங்கெடுப்பதை மக்கள் தவிர்க்க வேண்டும் என டோரியா பரிந்துரைக்கிறார். இருப்பினும், பெரும்பாலான தனியுரிமை நிபுணர்கள் ஏஐ கருவிகளை முற்றிலுமாகத் தவிர்க்குமாறு மக்களுக்கு அறிவுறுத்துவதில்லை. மாறாக, எந்தத் தகவல்களை, எவ்வாறு பகிர்ந்துகொள்கிறோம் என்பதில் கவனமாக இருக்குமாறு அவர்கள் வலியுறுத்துகின்றனர்.

அன்றாட வாழ்க்கையில் ஏஐ கருவிகளின் பயன்பாடு தொடர்ந்து அதிகரித்து வரும் நிலையில், அவற்றைப் பயன்படுத்துவதன் நன்மைகள் மற்றும் சாத்தியமான பாதிப்புகளைப் புரிந்துகொள்வதே மிகப்பெரிய சவாலாக இருக்கும் என்று நிபுணர்கள் கூறுகின்றனர்.

"தனியுரிமை என்பது ஒரு வலிமை. ஏனெனில், அது அதிகாரத்தைத் தவறாகப் பயன்படுத்துவதிலிருந்து உங்களைப் பாதுகாக்கிறது" என்று வேலிஸ் கூறுகிறார்.

- இது பிபிசிக்காக கலெக்டிவ் நியூஸ்ரூம் வெளியீடு