'வெற்றிப் பயணம்': தமிழ்நாட்டில் பெண்கள் எந்தெந்த பேருந்துகளில் இலவசமாக பயணிக்கலாம்?
தமிழ்நாட்டில் அரசுப் பேருந்துகளில் மகளிர் இலவசமாக பயணம் செய்யக் கூடிய 'வெற்றிப் பயணம்' திட்டம் அக்டோபர் 2-ம் தேதி தொடங்கி வைக்கப்பட்டுள்ளது.
இத்திட்டத்தின் கீழ் ஒரு பெண் அல்லது திருநர் 80 கி.மீ வரை இலவசமாக பயணம் செய்ய முடியும்.
அப்படி என்றால் ஒருவர் பல பேருந்துகள் மாறி மாறி , எவ்வளவு கிலோமீட்டர் தூரம் வரை வேண்டுமானாலும் இலவசமாக பயணம் செய்ய முடியுமா என்ற கேள்வி எழுகிறது.
'ஆம்' என்பதே அதற்கான பதில்.
80 கி.மீ மட்டுமே பயண தூரம் கொண்ட பேருந்துகள்
'வெற்றிப் பயணம்' திட்டம் 80 கி.மீக்குள் செல்லக் கூடிய பேருந்துகளுக்கு மட்டுமே பொருந்தும். உதாரணமாக சென்னையிலிருந்து ஒருவர் 75 கி.மீ தூரத்தில் உள்ள காஞ்சிபுரம் வரை செல்ல வேண்டுமானால், இத்திட்டத்தின் கீழ் இயக்கப்படும் பேருந்துகளில் இலவசமாக செல்லலாம்.
ஆனால் 80 கி.மீ தூரத்துக்கு மேல் இருக்கும் இடங்களுக்கு இத்திட்டம் பொருந்தாது. உதாரணமாக சென்னையிலிருந்து சுமார் 100 கி.மீ தூரத்தில் உள்ள செய்யாறு அல்லது சுமார் 150 கி.மீ தூரத்தில் உள்ள வேலூர் உள்ளிட்ட இடங்களுக்கு இலவசமாக பயணம் செய்ய முடியாது. அதே நேரம் சென்னையிலிருந்து காஞ்சிபுரம் சென்று, பின்னர் காஞ்சிபுரத்திலிருந்து வேலூர் என இரு பேருந்துப் பயணங்கள் வாயிலாக அதனை செய்ய முடியும்.
எனினும், வெற்றிப் பயணம் திட்டத்தின் கீழ் பெண்கள் இலவசமாக பயணம் செய்ய, குறிப்பிட்ட அந்த பேருந்தின் மொத்த பயண தூரமே 80 கி.மீக்குள் இருக்க வேண்டும் என விதிக்கப்பட்டுள்ளது.
அதாவது சென்னையிலிருந்து வேலூர் செல்லக் கூடிய பேருந்தில் ஒரு பெண் ஏறி, 75 கி.மீ மட்டும் பயணம் செய்து காஞ்சிபுரத்தில் இறங்குவதாக இருந்தாலும், டிக்கெட் கட்டணம் வசூலிக்கப்படும். ஏனென்றால் நீங்கள் ஏறும் பேருந்து சென்னை முதல் வேலூர் வரை 150 கி.மீ தூரம் செல்கிறது.
சென்னையிலிருந்து புதுச்சேரிக்கு இலவசப் பயணம் செல்ல ஒருவர் விரும்பினால் தாம்பரம், செங்கல்பட்டு, திண்டிவனம், புதுச்சேரி என நான்கு பேருந்துகள் அவர் மாற வேண்டும்.
"இந்த வெயிலில் மாறிமாறி செல்ல அலுப்பாக உள்ளது. எனவே நேரடியாக செல்லும் பேருந்திலேயே சென்று விடலாம் என்று காத்திருக்கிறேன்." என்கிறார் சென்னை கோயம்பேடு பேருந்து நிலையத்திலிருந்து புதுச்சேரி செல்லவிருக்கும் செல்வி.
பயணி ஏறும் இடமோ அல்லது இறங்கும் இடமோ அண்டை மாநிலம் அல்லது யூனியன் பிரதேசமாக இருந்தால் இத்திட்டம் பொருந்தாது.
அரசு பேருந்து ஓட்டுநர் ஆனந்த் கூறுகையில், "சென்னையிலிருந்து புதுச்சேரி செல்லும் பேருந்தில் வெற்றிப் பயணம் திட்டம் செல்லாது. புதுச்சேரி செல்லும் பேருந்தில் கிண்டி வரை செல்ல வேண்டுமானால் கூட பெண்கள் கட்டணம் செலுத்த வேண்டும்" என்கிறார்.
அரசு வழிகாட்டுதல்கள் கூறுவது என்ன?
'வெற்றிப் பயணம்' திட்டம் குறித்து தமிழக அரசு வெளியிட்டிருக்கும் வழிகாட்டுதல்களின் படி,
- இத்திட்டம் மாநிலம் முழுவதுமே ஏ.சி. பேருந்துகளுக்கு பொருந்தாது.
- அரசு விரைவு போக்குவரத்து கழக பேருந்துகளுக்கும் இத்திட்டம் பொருந்தாது.
- சென்னையில் சென்னை மாநகர போக்குவரத்து கழகம் இயக்கும் பேருந்துகள் (ஏசி பேருந்துகள் தவிர) அனைத்திலும் இத்திட்டம் பொருந்தும்.
- மாவட்டங்களில் நகர எக்ஸ்பிரஸ்/எல்.எஸ்.எஸ். /டீலக்ஸ் மொஃபசல் மற்றும் காட் ஆர்டினரி சேவைகளில் இத்திட்டத்தின் கீழ் இலவசமாக பயணம் செய்யலாம். அவர்களுக்கு இலவச பயணத்திற்கென (Zero ticket) டிக்கெட் வழங்கப்படும். அதில் அவர்கள் புறப்படும் இடம் மற்றும் சேரும் இடம் கட்டாயமாக பதிவு செய்யப்படும்.
- அண்டை மாநில பயணங்களை பொருத்தவரை, பயணியின் ஏறும் இடமும் இறங்கும் இடமும் தமிழ்நாட்டுக்குள் இருந்தால் மட்டுமே வெற்றிப் பயணம் திட்டம் பொருந்தும். வழித்தடத்தின் இடையில் அண்டை மாநிலமோ, யூனியன் பிரதேசமோ இருந்தாலும் இத்திட்டத்தின் கீழ் பெண்கள் பலன் பெறலாம். பெண்கள் அந்த பேருந்தில் தொடர்ந்து இலவசமாக பயணம் செய்யலாம். ஆனால் பயணியின் ஏறும் இடம் அல்லது இறங்கும் இடம் அண்டை மாநிலம் அல்லது யூனியன் பிரதேசமாக இருந்தால், இத்திட்டம் பொருந்தாது.
- 'வெற்றிப் பயணம்' திட்டம் பொருந்தக் கூடிய பேருந்துகளில் அதற்கான ஸ்டிக்கர் ஒட்டப்படும்.
வரவேற்பும் விமர்சனமும்
இத்திட்டம் தொடங்கிய சில நாட்களே ஆன நிலையில், இதற்கு வரவேற்பும் விமர்சனமும் ஒருசேர இருப்பதை காண முடிந்தது.
பிபிசி தமிழிடம் பேசிய சென்னையைச் சேர்ந்த வாசன், "இது மிகவும் வரவேற்கத்தக்க திட்டம். இது நாள் வரை வீட்டிலிருந்த பெண்கள் இனி சொந்தங்களை காண செல்ல வாய்ப்பு ஏற்படுத்தி தரப்பட்டுள்ளது. எனினும் 80 கி.மீ என்பதை 120 அல்லது 150 கி.மீ என நீட்டித்திருக்கலாம். அப்போது தான் சென்னையிலிருந்து விழுப்புரம், திருச்சி, போன்ற மைய பகுதிகளுக்கு ஒருவரால் செல்ல முடியும். அங்கிருந்து ஓய்வு எடுத்து விட்டு பிற இடங்களுக்கு செல்ல முடியும்" என்கிறார்.
அரசு பேருந்து ஓட்டுநர் ஆனந்த், "இத்திட்டம் குறித்த விவரங்கள் மக்களுக்கு தெளிவாகவில்லை என்பதால், பலரும் இத்திட்டம் தங்களுக்கு ஏன் பொருந்தாது என கேள்வி எழுப்புகின்றனர்" என்கிறார்.
"நீண்ட தூரம் செல்ல இளம் பெண்கள் பேருந்து மாறிமாறி செல்ல தயாராக இருக்கலாம். ஆனால் வயதானவர்கள் அப்படி செல்ல இயலாது. எனவே இத்திட்டத்தை சரி என்றும் சொல்ல முடியாது, தவறு என்றும் சொல்ல முடியாது" என்றார் மணிமேகலை.
எனினும் பயணம் மேற்கொள்ள பண வசதி இல்லாதவர்களுக்கு இத்திட்டம் மிகவும் பயனுள்ளதாக அமையும் என்றும் கருத்துகள் தெரிவிக்கப்பட்டன.
பிபிசி தமிழிடம் பேசிய சென்னையைச் சேர்ந்த வசந்தி, "ஏழைகளுக்கும் பிறருக்கும் இத்திட்டம் கண்டிப்பாக உதவியாக இருக்கும்" என்றார்.
- இது, பிபிசிக்காக கலெக்டிவ் நியூஸ்ரூம் வெளியீடு
