சௌதியில் 40,000 பாகிஸ்தான் வீரர்களா? இருநாட்டு ராணுவ ஒத்துழைப்பு பற்றிய ஒரு பார்வை

செளதி அரேபியாவுக்கு எதிராக ஹூத்தி கிளர்ச்சியாளர்கள் நடத்தும் தாக்குதல்களின் மத்தியில், மெக்கா ஒப்பந்தத்தை அமல்படுத்துவதற்கான நடவடிக்கைகள் தொடங்கியுள்ளன. இதையடுத்து, செளதி அரேபியாவுடன் பாகிஸ்தான் நீண்டகாலமாக மேற்கொண்டு வரும் ராணுவ ஒத்துழைப்பு மீண்டும் விவாதப் பொருளாகியுள்ளது.

பாதுகாப்பு தொடர்பாக சமீபத்தில் அளிக்கப்பட்ட உறுதிப்பாடுகள், இரு நாடுகளுக்கிடையேயான பழைய பாதுகாப்பு உறவுகளின் பின்னணியில்தான் புரிந்துகொள்ளப்பட வேண்டும் என்று பாகிஸ்தானின் மூத்த ராணுவ மற்றும் அரசுத் தலைவர்கள் கூறுகின்றனர்.

பாகிஸ்தான் மற்றும் செளதி அரேபியாவுக்கிடையே ராணுவப் பயிற்சி, ஆலோசனை வழங்குதல், படை நிலைநிறுத்தம் மற்றும் பிற பாதுகாப்பு விஷயங்கள் தொடர்பாக ஏற்கனவே பல பாதுகாப்பு ஒப்பந்தங்கள் உள்ளன.

இந்த ஒப்பந்தங்களின் மூலம் இரு நாடுகளின் பாதுகாப்பு உறவுகள் தொடர்ந்து விரிவடைந்துள்ளன. இதன் விளைவாக, இந்த பிராந்தியத்தில் செளதி அரேபியாவின் மிகவும் நெருக்கமான பாதுகாப்பு கூட்டாளிகளில் ஒன்றாக பாகிஸ்தான் மாறியுள்ளது.

தற்போதைய நிலை: என்ன நடந்துள்ளது?

அக்டோபர் 5 அன்று ரியாத்தில் நடைபெற்ற மெக்கா கூட்டணிக் கூட்டத்திற்குப் பின்னர், பாகிஸ்தான் மற்றும் செளதி அரேபியாவின் ராணுவ ஒத்துழைப்பு குறித்து விவாதம் தொடங்கியது.

இந்தக் கூட்டணியில் பாகிஸ்தான், செளதி அரேபியா மற்றும் துருக்கி ஆகிய நாடுகள் இடம்பெற்றுள்ளன.

அந்தக் கூட்டத்தில், "பரஸ்பர ஒப்புதலின் அடிப்படையில் தீர்மானிக்கப்படும் படைகள் மற்றும் ராணுவத் திறன்களை வழங்க தேவையான நடவடிக்கைகளை எடுப்பதற்கும்", அவற்றை செளதி அரேபியாவில் "விரைவாக நிலைநிறுத்தப்படுவதை உறுதி செய்வதற்கும்" மூன்று நாடுகளும் ஒப்புக்கொண்டன.

செளதி அரேபியாவுக்கு எதிராக ஹூத்திகளின் தாக்குதல்கள் தொடரும் சூழலில் இந்த முடிவு எடுக்கப்பட்டது.

இந்த படை நிலைநிறுத்தம் குறித்து ஊகங்கள் அதிகரித்தபோது, பாகிஸ்தான் பாதுகாப்பு அமைச்சர் கவாஜா ஆசிஃப், பாகிஸ்தானும் துருக்கியும் ஏற்கனவே அப்பகுதியில் இருப்பதாகக் கூறினார்.

இரு நாடுகளும் கண்காணிப்பு மற்றும் பிற பணிகளில் செளதி அரேபியாவுக்கு உதவி செய்து வருகின்றன என்று அவர் தெரிவித்தார்.

அக்டோபர் 5 அன்று ஜியோ நியூஸ் தொலைக்காட்சிக்கு அவர் அளித்த பேட்டியில், "இரு நாடுகளின் இருப்பும் இங்கே உள்ளது. ஆனால் போரில் ஈடுபடுவது செளதி அரேபிய ராணுவம்தான். நாங்கள் இங்கு இருக்கிறோம்; அவர்களுக்கு எந்த வகையான உதவி தேவைப்பட்டாலும் அதை வழங்கி வருகிறோம்."

இதற்கிடையில், பாகிஸ்தான் ராணுவத்தின் செய்தித் தொடர்பாளர் லெப்டினன்ட் ஜெனரல் அகமது ஷரீஃப் சௌத்ரி, அக்டோபர் 7 அன்று சிஎன்என்னுக்கு அளித்த பேட்டியில், பாகிஸ்தான் வீரர்கள் பல தசாப்தங்களாக செளதி அரேபியாவில் இருந்து "பல்வேறு வகையான பொறுப்புகள் மற்றும் பணிகளை" மேற்கொண்டு வருவதாகக் கூறினார்.

மெக்கா ஒப்பந்தம் குறித்து கேட்கப்பட்டபோது, இந்த ஏற்பாடு திடீரென தோன்றிய ஒன்றல்ல என்று அவர் தெரிவித்தார்.

பாகிஸ்தான், செளதி அரேபியா மற்றும் துருக்கி ஆகிய நாடுகளுக்கிடையே நீண்ட காலமாக இருந்து வரும் அரசியல், ராணுவ மற்றும் தூதரக உறவுகளின் விளைவாகவே இது உருவாகியுள்ளது என்றும் அவர் கூறினார்.

பின்னர் பாகிஸ்தானின் பல ஊடகங்களும் அவரது இந்தக் கருத்துகளை வெளியிட்டன.

'பாகிஸ்தான் டுடே' நாளிதழ், பாகிஸ்தான் ராணுவத் தலைமையகம் முதல் முறையாக பொதுவெளியில் விரிவாக, பாகிஸ்தான் வீரர்கள் ஏற்கனவே செளதி அரேபியாவில் இருந்துகொண்டு "பல்வேறு வகையான பணிகளை" செய்து வருகிறார்கள் என்பதை உறுதிப்படுத்தியுள்ளதாக எழுதியது.

பாகிஸ்தான் - செளதி பாதுகாப்பு ஒத்துழைப்பு எப்படிப்பட்டது?

பாகிஸ்தான் மற்றும் செளதி அரேபியா பல தசாப்தங்களாக பாதுகாப்புத் துறையில் இணைந்து செயல்பட்டு வருகின்றன.

இரு நாடுகளுக்கிடையேயான ஒப்பந்தங்களின் கீழ், பாகிஸ்தான் ராணுவப் பணியாளர்கள் செளதி அரேபியாவில் பயிற்சி அளித்தல், ஆலோசனை வழங்குதல் மற்றும் பிற உதவிப் பணிகளில் தொடர்ந்து ஈடுபட்டு வருகின்றனர்.

இரு நாடுகளும் முதலாவது பாதுகாப்பு ஒத்துழைப்பு ஒப்பந்தத்தை 1967 ஆம் ஆண்டில் மேற்கொண்டன.

1982 ஆம் ஆண்டில் மற்றொரு பாதுகாப்பு ஒப்பந்தத்தின் மூலம் இந்த ஒத்துழைப்பு மேலும் வலுப்படுத்தப்பட்டது. அதன் கீழ் "'செளதி – பாகிஸ்தான் ஆயுதப் படைகள் அமைப்பு' உருவாக்கப்பட்டது.

ஊடக அறிக்கைகளின்படி, அந்த காலத்தில் 20,000-க்கும் மேற்பட்ட பாகிஸ்தான் வீரர்கள் செளதி அரேபியாவில் நிலைநிறுத்தப்பட்டிருந்தனர்.

அதன்பிறகும் பல்வேறு வடிவங்களில் இந்த ஒத்துழைப்பு தொடர்ந்தது.

பாகிஸ்தானின் முன்னாள் ராணுவத் தளபதி ஜெனரல் ரஹீல் ஷரீஃப் தற்போது செளதி அரேபியா தலைமையிலான பயங்கரவாத எதிர்ப்பு இஸ்லாமிய ராணுவக் கூட்டணியை வழிநடத்தி வருகிறார். இந்தக் கூட்டணி 2015 ஆம் ஆண்டில் உருவாக்கப்பட்டது.

செளதியும் பாகிஸ்தானும் எப்போது பாதுகாப்பு ஒத்துழைப்பை அதிகரித்தன?

2025 செப்டம்பரில், பாகிஸ்தானின் முக்கிய ஆங்கில நாளிதழ்களுள் ஒன்றான 'டான்', 1979 ஆம் ஆண்டு மெக்காவின் கிராண்ட் மசூதி ஆயுதம் ஏந்தியவர்களால் கைப்பற்றப்பட்ட சம்பவத்திற்குப் பின்னர் இரு நாடுகளின் பாதுகாப்பு ஒத்துழைப்பு குறிப்பிடத்தக்க வகையில் அதிகரித்ததாகத் தெரிவித்தது.

அந்தச் செய்தியின்படி, மசூதியை மீட்கும் நடவடிக்கையில் பாகிஸ்தானின் சிறப்புப் படைகள் செளதி வீரர்களுக்கு உதவியிருந்தன.

2018 பிப்ரவரியில், மேலும் ஒரு படைப்பிரிவை செளதி அரேபியாவுக்கு அனுப்புவதாக பாகிஸ்தான் அதிகாரப்பூர்வமாக உறுதிப்படுத்தியது.

அந்த வீரர்கள் அங்கு "பயிற்சி மற்றும் ஆலோசனை வழங்குவதற்காக" அனுப்பப்படுவதாக அதிகாரிகள் தெரிவித்தனர்.

ஜியோ நியூஸ் இணையதளத்தின் தகவலின்படி, அப்போது பாகிஸ்தான் ராணுவத்தின் ஊடகப் பிரிவு, இந்த நிலைநிறுத்தம் ஏற்கனவே செயல்பாட்டில் இருந்த இருதரப்பு பாதுகாப்பு ஒத்துழைப்பின் ஒரு பகுதியாகும் என்று தெரிவித்தது.

பாகிஸ்தான் வீரர்கள் செளதி அரேபியாவுக்கு வெளியே எந்த இடத்திலும் நிலைநிறுத்தப்பட மாட்டார்கள் என்றும் கூறப்பட்டது.

'தி நியூஸ்' நாளிதழ், அப்போதைய பாதுகாப்பு அமைச்சர் குர்ரம் தஸ்தகீர் கூறியதை மேற்கோள் காட்டி, இந்த நடவடிக்கையின் நோக்கம் ராணுவப் பயிற்சி மற்றும் ஒத்துழைப்பு மூலம் செளதி அரேபியாவின் தற்காப்புத் திறனை மேம்படுத்துவதாகும் எனத் தெரிவித்தது.

அப்போது வெளியான ஊடக செய்திகளின்படி, நடைமுறையில் இருந்த ஒப்பந்தங்களின் கீழ் ஏற்கனவே 1,000-க்கும் அதிகமான பாகிஸ்தான் ராணுவப் பணியாளர்கள் செளதி அரேபியாவில் இருந்தனர்.

'எக்ஸ்பிரஸ் டிரிப்யூன்' பாதுகாப்பு வட்டாரங்களை மேற்கோள் காட்டி 2018 பிப்ரவரியில் வெளியிட்ட செய்தியில், இந்த நிலைநிறுத்தலில் "புதிதாக எதுவுமில்லை" என்று கூறப்பட்டது.

அந்த செய்தியின்படி, இரு நாடுகளின் பாதுகாப்பு ஒத்துழைப்பு 1982 ஆம் ஆண்டின் ஒப்பந்தத்தை அடிப்படையாகக் கொண்டது. இந்த ஒப்பந்தத்தின் கீழ் பாகிஸ்தான் வீரர்கள் செளதி அரேபியாவில் பயிற்சி வழங்கவும், ஆலோசனை கூறவும், பணியாற்றவும் ஏற்பாடு செய்யப்பட்டிருந்தது.

அந்தச் செய்தியின்படி, 2018 ஆம் ஆண்டில் சுமார் 1,379 பாகிஸ்தான் ராணுவப் பணியாளர்கள் செளதி அரேபியாவில் இருந்தனர். இதில் தரைப்படை, விமானப்படை மற்றும் கடற்படை உறுப்பினர்களும் அடங்கினர்.

பின்னர் அனுப்பப்பட்ட கூடுதல் படைப்பிரிவில் 1,000-க்கும் மேற்பட்ட வீரர்கள் இடம்பெற்றிருந்ததாக செய்திகள் தெரிவித்தன.

சௌதியில் 40,000 பாகிஸ்தான் வீரர்களா?

'எக்ஸ்பிரஸ் டிரிப்யூன்' வெளியிட்ட மற்றொரு செய்தியின்படி, அப்போதைய பிரதமர் ஷாஹித் காகான் அப்பாசி, செளதி அரேபியாவில் பணியாற்றி வந்த பாகிஸ்தான் வீரர்கள் அந்நாட்டின் படைகளுக்கு பயிற்சி அளித்து வந்ததாக பின்னர் உறுதிப்படுத்தினார்.

சமீப ஆண்டுகளில் இந்தப் பிராந்தியத்தில் பதற்றம் அதிகரித்ததையடுத்து, இரு நாடுகளின் பாதுகாப்பு ஒத்துழைப்பும் வலுவடைந்துள்ளது.

2025 செப்டம்பரில், பாகிஸ்தானும் செளதி அரேபியாவும் மூலோபாய பரஸ்பர பாதுகாப்பு ஒப்பந்தத்தில் கையெழுத்திட்டன.

இந்த ஒப்பந்தத்தில், இரு நாடுகளிலொன்றின் மீது நடத்தப்படும் தாக்குதல், இரு நாடுகளின் மீதுமான தாக்குதலாகக் கருதப்படும் என்று குறிப்பிடப்பட்டுள்ளது.

இந்த ஒப்பந்தத்தின் கீழ் பாகிஸ்தான் வீரர்களும் ராணுவ விமானங்களும் செளதி அரேபியாவை வந்தடைந்துள்ளதாக செளதி பாதுகாப்பு அமைச்சகம் 2026 ஏப்ரலில் தெரிவித்தது.

சமீபத்திய ராய்ட்டர்ஸ் செய்தியின்படி, 2025 முதல் பாகிஸ்தான் செளதி அரேபியாவில் "30,000 முதல் 40,000 வீரர்கள் வரை" நிலைநிறுத்தியுள்ளது என்று கூறப்படுகிறது.

மெக்கா ஒப்பந்தம் கையெழுத்தான பிறகு, பாகிஸ்தான் செளதி அரேபியாவுக்கு ராணுவ உபகரணங்களையும் வழங்கியுள்ளது என்றும் அந்த செய்தி கூறியது.

ஆனால் அக்டோபர் 6 அன்று, பாகிஸ்தான் தகவல் அமைச்சகம் இந்தக் கூற்றுகளை "ஊகங்களை அடிப்படையாகக் கொண்டவை" என்று நிராகரித்தது.

பகிரப்பட்ட பாதுகாப்பு அமைப்பை அமல்படுத்துவதுடன் தொடர்புடைய ராணுவ நடவடிக்கைகள் குறித்த தகவல்கள் ரகசியமானவை என்றும் அமைச்சகம் தெரிவித்தது.

அக்டோபர் 7 அன்று 'தி ஃபிரைடே டைம்ஸ்' இதழில் வெளியான கட்டுரையில், பாகிஸ்தானின் மீது செளதி அரேபியா அதிகமாக சார்ந்திருப்பது, இரு நாடுகளின் ஒத்துழைப்பு இப்போது ராணுவப் பயிற்சியைத் தாண்டி நேரடி பாதுகாப்பு நடவடிக்கைகளுக்கே நகர்ந்துவிட்டதை காட்டுகிறது என்று கூறப்பட்டது.

அந்தக் கட்டுரையில் "செளதி அரேபியாவுக்கு இன்னும் பாகிஸ்தான் ராணுவத்தின் தேவை உள்ளது" என்று வலியுறுத்தப்பட்டது.

பாகிஸ்தானுக்கு நன்மையா, தீமையா?

செளதி அரேபியாவுடனான நெருங்கிய உறவு பாகிஸ்தானுக்கு மூலோபாய மற்றும் பொருளாதார நன்மைகளை வழங்குகிறது.

பாகிஸ்தான் பொருளாதார நெருக்கடிகளை சந்தித்த போதெல்லாம் செளதி அரேபியா அதற்கு நிதி உதவி அளித்துள்ளது.

மெக்கா ஒப்பந்தத்தை அமல்படுத்துவதற்கான சமீபத்திய முயற்சிகளை முன்னிட்டு, அரசு மற்றும் ராணுவம் மிகுந்த எச்சரிக்கையுடன் செயல்பட வேண்டும் என்று பாகிஸ்தானின் முக்கிய ஊடகங்கள் அறிவுறுத்தியுள்ளன.

பாகிஸ்தான் எந்த பெரிய போரிலும் சிக்கிக் கொள்ளக் கூடாது என்றும் அவை கூறியுள்ளன.

'தி ஃபிரைடே டைம்ஸ்' கட்டுரை,"செளதி அரேபியாவின் பாதுகாப்பில் பாகிஸ்தானின் பங்கு, 2015 ஆம் ஆண்டில் அது இணைய மறுத்த போருக்கு அதை மேலும் நெருக்கமாக இட்டுச் செல்லக்கூடும்"என்று எச்சரித்தது.

ஏமனில் நடைபெற்று வரும் உள்நாட்டுப் போரைச் சுட்டிக்காட்டியே இந்தக் கருத்து தெரிவிக்கப்பட்டது.

அந்தக் கட்டுரையில் மேலும், "இந்த உறவுகளின் எதிர்காலம், செளதி அரேபியாவில் எத்தனை பாகிஸ்தான் வீரர்கள் உள்ளனர் என்பதைக் காட்டிலும், செளதி அரேபியாவை பாதுகாப்பது எங்கு முடிகிறது மற்றும் அதன் சார்பில் போராடுவது எங்கு தொடங்குகிறது என்ற விவகாரத்தில் ரியாத் மற்றும் இஸ்லாமாபாத் எவ்வளவு காலம் ஒருமித்த கருத்தில் இருக்கின்றன என்பதையே அதிகமாக சார்ந்திருக்கும்" என்று கூறப்பட்டுள்ளது.

அக்டோபர் 7 அன்று 'டான்' நாளிதழ், மெக்கா ஒப்பந்தம் இரு நாடுகளுக்கிடையே பல தசாப்தங்களாக இருந்து வரும் பாதுகாப்பு உறவுகளை "மேலும் வலுப்படுத்தும் ஒரு நடவடிக்கை" என்று விவரித்தது.

எனினும், பாகிஸ்தான் வேறு எந்தப் போரிலும் நேரடியாக ஈடுபடாமல் இருக்க வேண்டும் என்றும் அந்த நாளிதழ் ஆலோசனை வழங்கியது.

வெளிப்புறத் தாக்குதல்களிலிருந்து செளதி அரேபியாவைப் பாதுகாப்பதற்கான முயற்சிகளுக்கு அது ஆதரவு தெரிவித்தது.

ஆனால், "பாகிஸ்தான் வீரர்களை தரைப் போரில் ஈடுபட ஏமனுக்கு அனுப்புவதைத் தவிர்க்க வேண்டும்" என்றும் அது குறிப்பிட்டது.

- இது, பிபிசிக்காக கலெக்டிவ் நியூஸ்ரூம் வெளியீடு