சிறுநீர் வெளியேற தாமதம், கழித்த பிறகும் முழுமையடையாத உணர்வு போன்ற அறிகுறிகள் உள்ளனவா? ஆண்களுக்கான 8 முக்கிய விஷயங்கள்

வயது அதிகரிக்கும்போது புரோஸ்டேட் சுரப்பி பெரிதாகி, அதன் காரணமாக சிறுநீர் கழிப்பதில் பிரச்னைகள் ஏற்படுவதாகப் பல ஆண்கள் நம்புகின்றனர். ஆனால், சிறுநீர் வெளியேற்றம் குறைவதற்கு புரோஸ்டேட் சுரப்பி பெரிதாவது மட்டுமே காரணம் அல்ல. சிறுநீர்க்குழாய் குறுகுவது, சிறுநீர்ப்பைத் தசைகள் வலுவிழப்பது, சில மருந்துகளின் தாக்கம் அல்லது நரம்பியல் பிரச்னைகள் போன்ற பிற காரணங்களாலும் சிறுநீர் வெளியேற்றம் குறையலாம்.

சிறுநீர் வெளியேற்றம் குறைவது, சிறுநீர் கழிக்கத் தொடங்க தாமதமாவது, இரவில் அடிக்கடி சிறுநீர் கழிக்க எழுவது போன்ற பல அறிகுறிகள் கண்டுகொள்ளப்படாமல் விடப்படுகின்றன. பெரும்பாலான நேரங்களில், இது வயது அதிகரிப்பதால் இயல்பாக ஏற்படுவது என்று நினைத்து பலர் மருத்துவரிடம் செல்வதைத் தவிர்க்கின்றனர்.

ஆனால், ஆண்களுக்கு ஏற்படும் சிறுநீர் தொடர்பான அறிகுறிகள் புரோஸ்டேட் சுரப்பி பெரிதாகியிருப்பதற்கான அறிகுறி மட்டுமல்ல என மருத்துவ நிபுணர்கள் கூறுகின்றனர். சிறுநீர்ப்பாதையில் அடைப்பு, புரோஸ்டேட் சுரப்பியில் தொற்று அல்லது அழற்சி, சிறுநீர்ப்பை செயலிழப்பு, நீரிழிவு, நரம்பியல் கோளாறுகள் அல்லது சில சமயங்களில் தீவிரமான நோய்கள்கூட இத்தகைய அறிகுறிகளுக்குக் காரணமாக இருக்கலாம். எனவே, "உடலில் ஆற்றல் குறைவது புரோஸ்டேட் பிரச்னைதான்" என்று எளிதாகக் கருதுவது ஆபத்தானதாக இருக்கலாம்.

சுவாரஸ்யமாக, புரோஸ்டேட் சுரப்பி பெரிதாக இல்லாதபோதும்கூட சில ஆண்களுக்கு சிறுநீர் கழிக்கத் தொடங்க நீண்ட நேரம் ஆகலாம். சிறுநீர் கழிக்கும்போது இடையிலேயே நின்றுவிடலாம், சிறுநீர்ப்பை முழுமையாகக் காலியாகவில்லை என்ற உணர்வு ஏற்படலாம் அல்லது அடிக்கடி கழிவறைக்குச் செல்ல வேண்டியிருக்கலாம். மறுபுறம், புரோஸ்டேட் சுரப்பி பெரிதாக இருந்தாலும் பல ஆண்களுக்கு அதிக அறிகுறிகள் இல்லாமல் இருக்கலாம். எனவே, பிரச்னைக்கான சரியான காரணத்தைக் கண்டறிய முறையான மருத்துவப் பரிசோதனை அவசியம்.

சிறுநீரில் ரத்தம் வருவது, திடீரென சிறுநீர் கழிக்க முடியாமல் போவது, அடிக்கடி சிறுநீர்ப்பாதைத் தொற்று ஏற்படுவது அல்லது வலி இல்லாமல் சிறுநீர் கழிக்கும் முறையில் தொடர்ந்து மாற்றம் ஏற்படுவது போன்றவையும் முக்கியமான அறிகுறிகளாகும். இவற்றைப் புறக்கணிப்பது பின்னர் பெரும் பாதிப்பை ஏற்படுத்தக்கூடும்.

அப்படியானால், ஆண்களுக்கு சிறுநீர் தொடர்பான பிரச்னைகள் ஏற்படுவதற்கான முக்கிய காரணங்கள் என்ன? புரோஸ்டேட் சுரப்பி பெரிதாவது, சிறுநீர்க்குழாய் குறுகுவது, புரோஸ்டேட் தொற்று மற்றும் சிறுநீர்ப்பை நோய் ஆகியவற்றை மருத்துவர்கள் எவ்வாறு வேறுபடுத்திக் கண்டறிகின்றனர்? உடனடியாக மருத்துவ ஆலோசனை பெற வேண்டிய அறிகுறிகள் எவை? இதுகுறித்து மருத்துவ நிபுணர்கள் கூறுவதைப் பார்ப்போம்.

1. புரோஸ்டேட் என்றால் என்ன?

புரோஸ்டேட் என்பது ஆண்களின் பிறப்புறுப்புப் பகுதியில் அமைந்துள்ள ஒரு சிறிய சுரப்பியாகும்.

இது சுமார் வால்நட் அளவில் இருக்கும். ஆண் பிறப்புறுப்புக்கும் சிறுநீர்ப்பைக்கும் இடையில், சிறுநீர்க்குழாயின் அருகே இது அமைந்துள்ளது.

இந்தச் சுரப்பியின் முக்கியப் பணி, விந்தணுக்களுடன் கலந்து விந்துவை உருவாக்கும் ஒரு வகையான வெள்ளை நிற திரவத்தை உற்பத்தி செய்வதாகும்.

2. யாருக்கு புரோஸ்டேட் சுரப்பி இருக்கும்?

3. புரோஸ்டேட் சுரப்பி பெரிதாவதற்கும் சிறுநீர் கழிப்பதற்கும் உள்ள தொடர்பு என்ன?

புரோஸ்டேட் சுரப்பியின் அளவுக்கும் சிறுநீர் தொடர்பான அறிகுறிகளுக்கும் எப்போதும் நேரடியான தொடர்பு இருப்பதில்லை.

ஒப்பீட்டளவில் சிறிய அளவிலான புரோஸ்டேட் சுரப்பிகூட, அதன் எந்தப் பகுதி பெரிதாகியுள்ளது, சிறுநீர்ப்பாதையின் எந்தப் பகுதியை அது பாதிக்கிறது என்பதைப் பொறுத்து சிறுநீர்ப்பாதையில் குறிப்பிடத்தக்க அடைப்பை ஏற்படுத்தலாம். அதே நேரத்தில், புரோஸ்டேட் சுரப்பி கணிசமாகப் பெரிதாக இருந்தாலும் சில ஆண்களுக்கு மிகக் குறைவான அறிகுறிகளே இருக்கலாம்.

எனவே, புரோஸ்டேட் சுரப்பியின் அளவை மட்டும் வைத்து பிரச்னையின் தீவிரத்தைத் தீர்மானிக்காமல், அறிகுறிகளையும் சிறுநீர் கழிக்கும் செயல்பாட்டையும் மதிப்பிடுவது முக்கியம்.

இதன் பொருள், புரோஸ்டேட் சுரப்பியின் அளவு ஒப்பீட்டளவில் சிறியதாக இருந்தாலும் சிலருக்கு சிறுநீர் தொடர்பான பிரச்னைகள் ஏற்படலாம்.

சில ஆண்களுக்கு சிறுநீர்ப்பை முழுமையாகக் காலியாகவில்லை என்ற உணர்வு ஏற்படும். மீண்டும் சிறுநீர் கழிக்க வேண்டும் என்றும் தோன்றும். சிறுநீர் கழித்த பிறகும் சிறுநீர்ப்பையில் சிறிதளவு சிறுநீர் மீதமிருந்தால் இத்தகைய உணர்வு ஏற்படலாம்.

இதற்கும் புரோஸ்டேட் சுரப்பியால் ஏற்படும் அடைப்பு ஒரு காரணமாக இருக்கலாம். ஆனால், சிறுநீர்ப்பைத் தசைகள் வலுவிழப்பது, சிறுநீர்க்குழாய் குறுகுவது மற்றும் சில நரம்பியல் பிரச்னைகள் ஆகியவையும் இதற்குக் காரணமாக இருக்கலாம்.

இந்த உணர்வு தொடர்ந்து இருந்தால், சிறுநீர் கழித்த பிறகு சிறுநீர்ப்பையில் எவ்வளவு சிறுநீர் மீதமிருக்கிறது என்பதைக் கண்டறிய மருத்துவர் தேவையான பரிசோதனைகளை மேற்கொள்ளலாம்.

புரோஸ்டேட் குறித்து பல தவறான புரிதல்களும் உள்ளன. வயதான ஆண்களுக்கு ஏற்படும் ஒவ்வொரு சிறுநீர் பிரச்னைக்கும் புரோஸ்டேட் சுரப்பி பெரிதாவதே காரணம் என்பது பொதுவான தவறான கருத்தாகும். உண்மையில், சிறுநீர்ப்பை, சிறுநீர்க்குழாய், தொற்றுகள், சிறுநீரகக் கற்கள், மருந்துகள், நீரிழிவு மற்றும் பிற மருத்துவப் பிரச்னைகளாலும் சிறுநீர் தொடர்பான அறிகுறிகள் ஏற்படலாம்.

ஒரு குறிப்பிட்ட வயதுக்குப் பிறகு இத்தகைய அறிகுறிகளை சகித்துக்கொள்ள வேண்டியது இயல்புதான் என்பதும் மற்றொரு தவறான கருத்தாகும். அறிகுறிகள் நீண்ட காலமாகத் தொடர்ந்தாலோ அல்லது மோசமடைந்தாலோ, குறிப்பாக அவற்றை மருத்துவரிடம் பரிசோதித்துக்கொள்வது முக்கியம்.

மேலும், புரோஸ்டேட் சுரப்பியின் அளவை மட்டும் வைத்து அறிகுறிகளின் தீவிரத்தைத் தீர்மானிக்க முடியாது. அறிகுறிகள், மருத்துவப் பரிசோதனை மற்றும் தேவையானபட்சத்தில் சிறுநீர்ப்பாதை எவ்வாறு செயல்படுகிறது என்பதை மதிப்பிடும் பல்வேறு பரிசோதனைகளின் அடிப்படையிலேயே முறையான மதிப்பீடு செய்யப்படுகிறது.

4. இரவில் அடிக்கடி சிறுநீர் கழிக்க வேண்டியிருப்பது ஏன்?

ஆண்கள் இரவில் அடிக்கடி சிறுநீர் கழிக்க வேண்டிய நிலை ஏற்படலாம். சில நேரங்களில் இரவில் இரண்டு அல்லது மூன்று முறை எழ வேண்டியிருப்பது தூக்கத்தைப் பாதித்து, தூக்கத்தின் தரத்தைக் குறைக்கலாம்.

சிறுநீர் பிரச்னைகளுடன், போதிய தூக்கம் இல்லாததால் ஏற்படும் பாதிப்புகளையும் அவர்கள் எதிர்கொள்ள வேண்டியிருக்கும். மேலும், ஒருமுறை தூக்கத்திலிருந்து எழுந்துவிட்டால் மீண்டும் முறையாகத் தூங்குவது கடினமாக இருக்கலாம்.

ஆனால், இரவில் அடிக்கடி சிறுநீர் கழிக்க வேண்டியதற்கு புரோஸ்டேட் மட்டுமே காரணமா? இதுகுறித்து தானே, கிம்ஸ் மருத்துவமனையின் ஆலோசனை சிறுநீரக மருத்துவர் அஜித் குஜேலாவிடம் கேட்டோம்.

அஜித் குஜேலா கூறுகையில், "நாக்டியூரியா (Nocturia) என்பது இரவில் அடிக்கடி சிறுநீர் கழிக்க வேண்டிய நிலை. இதற்கு பல காரணங்கள் இருக்கலாம். மாலையில் அதிக அளவு திரவம் அருந்துவது, காஃபின் அல்லது மதுபானம் அருந்துவது, நீரிழிவு, தூக்கக் கோளாறுகள், சில மருந்துகள் மற்றும் சிறுநீர்ப்பை பிரச்னைகளும் இரவில் அடிக்கடி சிறுநீர் கழிக்கக் காரணமாக இருக்கலாம். புரோஸ்டேட் சுரப்பி பெரிதாவது அவற்றில் ஒரு காரணமாக இருக்கலாம். ஆனால், ஒவ்வொரு முறையும் புரோஸ்டேட்தான் காரணம் என்று கருதக்கூடாது," என்றார்.

மேலும், சில ஆண்களுக்கு சிறுநீரை அடக்கி வைத்துக்கொள்ளும் பழக்கம் உள்ளது. அடிக்கடி மற்றும் நீண்ட நேரம் சிறுநீரை அடக்கி வைப்பது சிறுநீர்ப்பைக்கு கூடுதல் அழுத்தத்தை ஏற்படுத்துவதுடன், சிலருக்கு சிறுநீர்ப்பையை முழுமையாகக் காலி செய்வதில் பிரச்னையை ஏற்படுத்தலாம்.

எனவே, நீண்ட நேரம் சிறுநீரை அடக்கி வைத்திருக்கும் பழக்கத்தைத் தவிர்க்க வேண்டும். இதனால் ஏற்படும் பாதிப்பு ஒவ்வொருவருக்கும் மாறுபடும். ஏற்கெனவே சிறுநீர்ப்பை அல்லது சிறுநீர்ப்பாதையில் பிரச்னைகள் உள்ளதா என்பதையும் இது பொறுத்தது.

5. பிரச்னைக்கான சரியான காரணத்தை எவ்வாறு கண்டறிவது?

புரோஸ்டேட் சுரப்பி பெரிதாவது, சிறுநீர்க்குழாய் குறுகுவது அல்லது பாதிக்கப்படுவது, புரோஸ்டேட் அழற்சி மற்றும் சிறுநீர்ப்பை பிரச்னைகள் ஆகியவை சிறுநீர் வெளியேற்றத்தை பாதிக்கக்கூடும்.

ஆனால், இவற்றுக்கு இடையிலான வித்தியாசத்தை மருத்துவர்கள் எவ்வாறு கண்டறிகின்றனர்? சரியான காரணத்தை எப்படிக் கண்டறிகின்றனர்? இதுகுறித்து கோகிலாபென் திருபாய் அம்பானி மருத்துவமனையின் ஆலோசனை சிறுநீரக மருத்துவரும் சிறுநீரக மாற்று அறுவை சிகிச்சை நிபுணருமான ஷியாம் வர்மாவிடம் கேட்டோம்.

அவர் கூறுகையில், "இந்த அனைத்து நிலைகளிலும் காணப்படும் அறிகுறிகள் ஒன்றுக்கொன்று மிகவும் ஒத்ததாக இருக்கலாம். எனவே, அறிகுறிகளை மட்டும் வைத்து நோயைக் கண்டறிய முடியாது. நோயாளியின் மருத்துவ பின்னணி முக்கியமான தகவல்களை வழங்குகிறது," என்றார்.

ஷியாம் வர்மா மேலும் கூறுகையில், "தீங்கற்ற புரோஸ்டேட் பெருக்கத்தில், வயது அதிகரிக்கும்போது அறிகுறிகள் படிப்படியாக உருவாகும். சிறுநீர் வெளியேற்றம் குறைவது, சிறுநீர் கழிக்கத் தொடங்க தாமதமாவது, சிறுநீர்ப்பை முழுமையாகக் காலியாகவில்லை என்ற உணர்வு, அடிக்கடி சிறுநீர் கழிப்பது மற்றும் இரவில் அடிக்கடி எழுவது போன்ற அறிகுறிகள் இருக்கலாம்," என்றார்.

"சிறுநீர்க்குழாய் குறுகுதல் அல்லது பாதிப்பு (Urethral stricture), குறிப்பாக இளம் ஆண்களிடமோ அல்லது முன்பு சிறுநீர்க்குழாய் வடிகுழாய் பொருத்தப்பட்டவர்கள், அறுவை சிகிச்சை செய்துகொண்டவர்கள், காயம் அல்லது தொற்று ஏற்பட்டவர்களிடமோ சந்தேகிக்கப்படுகிறது. இவர்களுக்கு சிறுநீர் வெளியேற்றம் படிப்படியாக மெலிதாகலாம் அல்லது நீர்த்தாரை தெளிப்பது போலவோ இரண்டாகப் பிரிவது போலவோ இருக்கலாம்," என்றார்.

"புரோஸ்டேட் அழற்சி ஏற்பட்டால் இடுப்புப் பகுதியில் அல்லது பிறப்புறுப்பைச் சுற்றி வலி, சிறுநீர் கழிக்கும்போது வலி, அடிக்கடி சிறுநீர் கழிப்பது அல்லது திடீரெனவும் அதிகமாகவும் சிறுநீர் கழிக்க வேண்டும் என்ற உணர்வு ஏற்படலாம். எனினும், நாள்பட்ட புரோஸ்டேட் அழற்சி எப்போதும் கடுமையான வலியை ஏற்படுத்தாது," என்றார்.

செயல்திறன் அதிகமாக உள்ள சிறுநீர்ப்பையில், திடீரெனவும் வலுவாகவும் சிறுநீர் கழிக்க வேண்டும் என்ற உணர்வும், அடிக்கடி சிறுநீர் கழிப்பதும் அதிகமாக இருக்கும். சிறுநீர்ப்பைத் தசைகள் வலுவிழந்த நிலையில், சிறுநீர் ஓட்டம் பலவீனமாக இருக்கும், சிறுநீர்ப்பை முழுமையாகக் காலியாகாது, சிறுநீர் கழித்த பிறகும் அதிக அளவு சிறுநீர் சிறுநீர்ப்பையில் தேங்கியிருக்கும்.

மிக முக்கியமாக, புரோஸ்டேட் சுரப்பியின் அளவை மட்டும் வைத்து அறிகுறிகளுக்கான காரணத்தைக் கண்டறிய முடியாது.

6. சிறுநீர் பிரச்னைகள் இருந்தால் என்னென்ன பரிசோதனைகள் செய்யப்படும்?

சிறுநீர் வெளியேற்றம் பலவீனமாக இருந்தாலோ அல்லது சிறுநீர் கழிப்பதில் சிரமம் இருந்தாலோ என்ன பரிசோதனைகள் செய்யப்படும்?

இதுகுறித்து மருத்துவர் ஷியாம் வர்மா கூறுகையில், "விரிவான மருத்துவ பின்னணி மற்றும் உடல் பரிசோதனையுடன் இந்த மதிப்பீடு தொடங்குகிறது. ஆரம்பகட்டப் பரிசோதனைகளில் சிறுநீர் பரிசோதனை, மருத்துவப் பரிசோதனை (தேவையானபட்சத்தில் புரோஸ்டேட் பரிசோதனை உட்பட), யூரோஃப்ளோமெட்ரி (Uroflowmetry), சிறுநீர்க்குழாய் மற்றும் புரோஸ்டேட் சுரப்பிக்கான அல்ட்ராசவுண்ட் பரிசோதனை, சிறுநீர் கழித்த பிறகு சிறுநீர்ப்பையில் எஞ்சியிருக்கும் சிறுநீரின் அளவை அளவிடுதல் பரிசோதனை ஆகியவை அடங்கும்," என்றார்.

7. எந்த வயதில் இருந்து கவனம் செலுத்த வேண்டும்?

இத்தகைய பிரச்னைகள் வயதான பிறகுதான் ஏற்படும் என்று பெரும்பாலான ஆண்கள் நினைக்கின்றனர். அன்றாட வாழ்க்கையின் பரபரப்பில் பல அறிகுறிகளை அவர்கள் கண்டுகொள்ளாமல் விடுகின்றனர். இதனால் பிரச்னை தீவிரமடையலாம்.

மருத்துவர் ஷியாம் வர்மா கூறுகையில், "சிறுநீர் கழிக்கும் பழக்கத்தை எந்தக் குறிப்பிட்ட வயதிலிருந்து கண்காணிக்கத் தொடங்க வேண்டும் என்ற அவசியம் இல்லை. எந்த வயதிலும் சிறுநீர் கழிக்கும் முறையில் தொடர்ந்து மாற்றம் ஏற்பட்டால் அதைக் கவனத்தில் கொள்ள வேண்டும். இருப்பினும், 40 முதல் 50 வயதுக்குப் பிறகு தீங்கற்ற புரோஸ்டேட் பெருக்கம் அதிகமாகக் காணப்படுகிறது. எனவே, இந்த வயதுப் பிரிவில் உள்ள ஆண்கள் புதிதாக ஏற்படும் அறிகுறிகளை 'இது வயது காரணமாகத்தான்' என்று புறக்கணிக்கக் கூடாது," என்றார்.

"இளம் ஆண்களுக்கு சிறுநீர் கழிப்பதில் கடுமையான சிரமம் இருந்தால், சிறுநீர்க்குழாய் குறுகுதல், சிறுநீர்ப்பையின் கழுத்துப் பகுதியில் ஏற்படும் செயலிழப்பு, தொற்று அல்லது நரம்பியல் பிரச்னைகள் ஆகியவை பரிசீலிக்கப்படுவதற்கான வாய்ப்பு அதிகம். மேலும், சிறுநீர் தொடர்பான அறிகுறிகளும் புரோஸ்டேட் புற்றுநோய்க்கான பரிசோதனையும் இரு வேறு விஷயங்கள். அறிகுறிகளின் தீவிரத்தை வைத்து புரோஸ்டேட் புற்றுநோய் இருக்கிறதா இல்லையா என்பதைத் தீர்மானிக்க முடியாது," என்றார்.

8. மதுபானம் எந்த அளவுக்குப் பாதிக்கும்?

ஆண்களுக்கு ஏற்படும் சிறுநீர் பிரச்னைகள் குறித்து மருத்துவர் அஜித் குஜேலாவிடம் மேலும் சில கேள்விகளைக் கேட்டோம். அவர் விரிவாகப் பதிலளித்தார்.

கேள்வி: காஃபின், மதுபானம் மற்றும் சில மருந்துகள் ஆண்களுக்கு அடிக்கடி அல்லது அவசரமாக சிறுநீர் கழிக்க வேண்டிய நிலையை எவ்வாறு ஏற்படுத்துகின்றன?

மருத்துவர் அஜித் குஜேலா: காஃபின் மற்றும் மதுபானம் சிறுநீர் உற்பத்தியை அதிகரிப்பதுடன், சிறுநீர்ப்பையையும் எரிச்சலடையச் செய்யலாம். இதனால் அடிக்கடி சிறுநீர் கழிக்க வேண்டிய நிலை அல்லது திடீரெனவும் அதிகமாகவும் சிறுநீர் கழிக்க வேண்டும் என்ற உணர்வு ஏற்படலாம்.

சில மருந்துகள், குறிப்பாக சிறுநீர் உற்பத்தியை அதிகரிக்கும் டையூரெடிக்ஸ் (Diuretics) மருந்துகள் அல்லது சிறுநீர்ப்பையின் செயல்பாட்டைப் பாதிக்கும் மருந்துகள், சிறுநீர் கழிக்கும் முறையில் மாற்றங்களை ஏற்படுத்தலாம்.

ஒரு மருந்தைத் தொடங்கிய பிறகு அறிகுறிகள் தோன்றினாலோ அல்லது மோசமடைந்தாலோ மருத்துவரை அணுக வேண்டும். மருத்துவரின் ஆலோசனை இல்லாமல் மருந்தைத் தானாக நிறுத்தக்கூடாது.

கேள்வி: சிறுநீர் பிரச்னைகளுக்கு சிகிச்சை பெறாமல் இருந்தால் எதிர்காலத்தில் ஏதேனும் சிக்கல்கள் ஏற்படுமா?

அஜித் குஜேலா: சில சிகிச்சை பெறாத சிறுநீர் பிரச்னைகள், குறிப்பாக சிறுநீர்ப்பாதையில் குறிப்பிடத்தக்க அல்லது நீண்டகால அடைப்பு இருந்தால், மேலும் பல சிக்கல்களுக்கு வழிவகுக்கலாம். மீண்டும் மீண்டும் சிறுநீர்ப்பாதைத் தொற்று ஏற்படுவது, சிறுநீர்ப்பையில் மாற்றங்கள், சிறுநீர் வெளியேறாமல் தேங்குவது மற்றும் தீவிரமான நிலைகளில் சிறுநீரகச் செயல்பாடு பாதிக்கப்படுவது ஆகியவை இதில் அடங்கும்.

ஒவ்வொரு சிறுநீர் அறிகுறியும் இதுபோன்ற சிக்கல்களை ஏற்படுத்தும் என்று கூற முடியாது. இருப்பினும், அறிகுறிகள் தொடர்ந்து நீடித்தாலோ அல்லது மோசமடைந்தாலோ அவற்றைப் புறக்கணிக்கக் கூடாது.

கேள்வி: அறிகுறிகள் தானாகக் குறையும் என்று காத்திருக்காமல் எப்போது சிறுநீரக மருத்துவரை அணுக வேண்டும்?

அஜித் குஜேலா: அறிகுறிகள் தொடர்ந்து நீடித்தாலோ, படிப்படியாக மோசமடைந்தாலோ அல்லது தூக்கம் மற்றும் அன்றாட வாழ்க்கையைப் பாதித்தாலோ சிறுநீரக மருத்துவரை அணுக வேண்டும்.

சிறுநீர் கழிப்பதில் சிரமம், அடிக்கடி சிறுநீர்ப்பாதைத் தொற்று, சிறுநீரில் ரத்தம், கடுமையான வலி, சிறுநீர் வெளியேறாமல் தேங்குவது அல்லது சிறுநீர் கழிக்கும் பழக்கத்தில் குறிப்பிடத்தக்க மாற்றம் போன்ற அறிகுறிகள் ஏற்பட்டால் மருத்துவ ஆலோசனை அவசியம்.

சிறுநீர் கழிக்க வேண்டும் என்ற வலுவான உணர்வு இருந்தும், சிறுநீரைச் சிறிதும் வெளியேற்ற முடியாத நிலை ஏற்பட்டால் அது அவசர மருத்துவ நிலையாகும். உடனடியாக மருத்துவ உதவியை நாட வேண்டும்.

வாழ்க்கை முறையில் குறிப்பிடத்தக்க மாற்றங்களைச் செய்வது, உணவுப் பழக்கத்தை மாற்றுவது, மருந்துகளை எடுத்துக்கொள்வது அல்லது உடற்பயிற்சியைத் தொடங்குவது போன்றவற்றுக்கு முன்பு மருத்துவர் மற்றும் தகுதியான பயிற்சியாளரின் ஆலோசனையைப் பெறுவது முக்கியம்.

உடல்நிலை மற்றும் அறிகுறிகளை மருத்துவரிடம் முறையாகப் பரிசோதித்துக்கொண்டு, அவர்களின் ஆலோசனையின்படியே வாழ்க்கை முறையில் மாற்றங்களைச் செய்வது சிறந்தது. மருத்துவரின் ஆலோசனையின்றி சுயமாக சிகிச்சை மேற்கொள்வது ஆபத்தானதாக இருக்கலாம்.

- இது, பிபிசிக்காக கலெக்டிவ் நியூஸ்ரூம் வெளியீடு