TOOS , Shiinaha, Ruushka iyo Maraykanka oo bayaan wadajir ah soo saaray kaddib kulankii saddex-geesoodka ahaa

Hadda waxaan idiin soo gudbineynaa qodobadii ugu muhiimsanaa ee ku jiray bayaanka wadajirka ah ee ku saabsan nabadda, kaas oo Shiinaha, Ruushka iyo Maraykanku soo saareen kaddib kulankoodii saddex geesoodka ahaa.

Kooban

  • Madaxweyne ku-xigeenka Maraykanka: Maraykanku ma oggolaan doono in dagaalka Iran uu isu beddelo dagaal laba sano soconaya
  • Ciraaq iyo Urdun oo mamnuucay Telegram sababo la xiriira walaac amni
  • Ronaldinho oo dib garoomada ugu soo noqday isagoo 46 jir ah
  • Shan dal oo ka mid ah waddamada Yurub ee Soomaalidu iska dhiibto oo dal Afrikaan ah kula heshiiyey inuu qaabilo qaxootiga la soo celinayo

Tebin toos ah

  1. U diyaar garowga saacadda qiyaamaha: Ma dhamaadkii dunida ayaa lagu dhawaaday?

    U diyaar garowga Qiyamaha

    Madooneysaa inaad ka mid noqoto dadka isku diyaarinaya dhammaadka adduunka? Haddii jawaabtu haa tahay, halkeed ka bilaabaysaa?

    Bishii February 2025, khubarada Jaamacadda Chicago waxay saacaddii Qiyaamaha u soo dhaweeyeen 89 ilbiriqsi uun ka hor saqda dhexe. Waa heerkii ugu halista badnaa abid ee laga digay sababtoo ah waligeed sidan uguma dhawaan waqtigii lagu tilmaamay dhammaadka.

    Sidoo kale, Janaayo 27, 2026, Alexandra Bell, oo ah madaxweynaha iyo agaasimaha guud ee Bulletin of the Atomic Scientists, ayaa ku dhawaaqay in saacada qiyaamaha (Doomsday) loo raray saqda dhexe oo dhiman 85 ilbiriqsi.

    Warsidaha wuxuu soo saaray digniintiisii ugu xoogganayd weli. Saacadda Doomsday oo loo arko calaamad cabbiraysa sida ugu dhow ee bini'aadanku ugu soo dhawaaday inay is burburiyaan tan iyo bilowgii xilligii Nukliyeerka - ayaa loo raray saqda dhexe oo dhiman 85 ilbiriqsi, waana meesha ugudhow taariikhda siddeed iyo toban sano.

    Tani looguma dhawaaqin sidii riwaayad oo kaleama war caadi ah oo keliya, laakiin sida ay u weyn tahay iyo digniinta ay bixinayso ayaa keenay in lagu degdego. Saynisyahano,siyaasad qaabeeyeyaal iyo saynisyahanno ku guulaystay abaalmarinta Nobel ayaa wakhtiga cayimay, waxayna si deggan uga hadleen khatarta sii kordhaysa ee caalamiga ah, wada shaqaynta sii xumaanaysa, iyo guul-darrooyinka hoggaamineed ee bini'aadamka oo si wadajir ah qarka ugu saaran masiibo. Waxay xusuusiyeen caalamka in saqda dhexe aysan ahayn qaddar lama huraan ah balse ay tahay digniin ay tahay in la fiirsado oo la fahmo.

  2. Muxuu yahay walaaca Ukraine iyo Yurub ka muujinayan shirka Trump, Putin iyo Xi?

    Trump, Putin and Xi

    Waxaa jira walaac, gaar ahaan dalalka Yurub, oo ku saabsan in kulanka saddex geesoodka ah ee Xi Jinping, Donald Trump iyo Vladimir Putin uu u ekaan karo shirkii Yalta ee sannadkii 1945-kii, xilli uu dagaalkii labaad ee adduunku dhammaad ku dhowaa.

    Shirkaas ayaa si weyn loogu dhaliilay go'aannadii lagu gaaray, kuwaas oo lagu qaabeeyay mustaqbalka dalal yaryar iyada oo aan dalalkaasi ka qaybgelin go'aan gaarista.

    Madaxweynaha Ukraine Volodymyr Zelensky ayaa muujiyay walaac laga qabo in kulanka saddexda hoggaamiye uu horseedi karo heshiis laga gaaro Ukraine iyada oo aan dowladda Kyiv wax talo ah ku lahayn.

    Hoggaamiyeyaal kale oo reer Yurub ah ayaa sidoo kale marar badan sheegay in aan laga wada hadli karin nabadda Ukraine iyada oo aan Ukraine lafteedu qayb ka ahayn wada-hadallada.

    Zelensky ayaa ka digay in la qabto shir uu ku tilmaamay "Yalta 2, 3 ama 4", kaas oo lagu kala qaybsanayo saamaynta siyaasadeed ee caalamka.

    Walaacyadani ma aha kuwo aan sal lahayn, marka la eego sida Trump mararka qaar uga leexdo mowqifkiisa hore iyo dhaleeceyntiisa fagaare ee Zelensky, isaga oo ku eedeeyay inuusan hore u aqbalin in dagaalka la soo afjaro.

    Horaantii toddobaadkan, ka hor inta uusan u safrin Aasiya, Trump ayaa Ukraine ku tilmaamay "mawduuca uu ugu jecel yahay", isaga oo sheegay inuu arrintaas ku soo qaadi doono wada-hadallada saddex geesoodka ah.

    Dhanka kale, magaalada Berlin, hoggaamiyeyaal ka socda daraasiin dalal ah ayaa la filayaa inay maanta kulmaan, si ay uga wada hadlaan taageerada Ukraine.

  3. Kaamirada oo qabatay Trump oo indhaha isku haya xilli madaxweynaha Shiinuhu khudbaynayey

    Trump

    Inta aan sugayno inuu billowdo kulanka Trump iyo Xi Jinping, halkan waxaa ku jira muuqaallo laga duubay maanta intii uu socday kulanka guud ee shirka APEC.

    Xilli Madaxweynaha Shiinaha Xi Jinping uu khudbad u jeedinayay hoggaamiyeyaasha caalamka ee ku sugnaa hoolka, ayaa Trump lagu arkay isaga oo aamusan oo indhihiisu xiran yihiin.

    Sheekooyinka kale ee aad sii akhrin karto:

  4. Arrin la sugayey oo Trump kala hadlay dhigiisa Shiinaha

    madaxweynayaasha Shiinaha iyo Maraykanka

    Trump ayaa sheegay in uu si kooban oo keliya ugala hadlay Xi Jinping xaaladda Jensen Huang, oo ahaa madaxa shirkadda Nvidia, intii lagu guda jiray cashadii ay hoggaamiyeyaasha shirka APEC yeesheen.

    "Arrintaas kamaanaan wada hadlin. Waxaa laga yaabaa inaan si kooban u soo hadal qaaday, maadaama ay tahay musiibo weyn. Waa musiibo. Waa nin aad u maskax badan," ayuu madaxweynaha Maraykanku ku yiri wareysi uu siiyay barnaamijka The Ingraham Angle ee telefishinka Fox News.

    Huang, oo ka mid ah shakhsiyaadka ugu muhiimsan warshadaha garaadka macmalka ah (AI), ayaa toddobaadkii hore iska casilay xilkiisii, kaddib eedeymo la xiriira xiriirro jacayl oo uu la yeeshay haween kale, oo ay ku jirto haweeney looga shakisan yahay inay tahay basaas u shaqeysa Shiinaha.

    Dad badan ayaa isha ku hayay sida dhacdadani u saameyn karto wada-hadallada Trump iyo Xi ee shirka APEC.

    "Dadka qaarkood lama beddeli karo. Huang wuxuu 10 sano ka horreeyay dadka kale," ayuu Trump ku yiri barnaamijka.

    Waxa uu intaa ku daray in inta badan wada-hadalkoodii cashada uu ku saabsanaa garaadka macmalka ah (AI).

  5. Trump oo ka hadlay kulanka uu la yeelahay Putin

    "Waxaan yeelan doonnaa kulan labaad goor dambe, sida ay u badan tahay inaad ogtihiin, balse hadda kulankan ayaan yeelanaynaa, wuxuuna noqon doonaa mid wanaagsan," ayuu yiri Trump, ka hor inta uusan mar kale Putin gacan qaadin.

    Sida aan hore u soo sheegnay, Trump iyo Putin ayaa la filayaa inay maanta goor dambe kulan saddex geesood ah la yeeshaan hoggaamiyaha Shiinaha Xi Jinping.

    Muuqaalku wuxuu ku dhammaanayaa iyadoo labada hoggaamiye ay kuraastooda fariisanayaan.

    Kulamada noocan oo kale ah, warbaahinta badanaa looma oggola inay la socoto inta ka dhiman wada-hadallada. Hase yeeshee, Maraykanka ama Ruushka ayaa laga yaabaa inay markii dambe soo saaraan warbixin kooban oo ku saabsan waxyaabihii looga hadlay kulanka.

  6. "Waxyaabo badan oo wanaagsan ayaa kulankan ka dhalan kara" – Trump oo ka hadlay kulanka Putin

    Tump iyo Putin

    Waxaan hadda helnay muuqaallo muujinaya bilowgii kulanka Trump iyo Putin.

    Markii Trump uu qolka soo galay, isaga iyo Putin ayaa isu soo dhowaaday, waxayna si diirran isu gacan qaadeen. Trump ayaa u muuqday inuu wax si hoose ugu sheegay Putin, halka hoggaamiyaha Ruushku uu gacanta ka saaray xusulka madaxweynaha Maraykanka.

    Labadooda ayaa markaas u jeestay wariyeyaasha, iyaga oo dhoolla-caddaynaya, waxaana Trump uu hadal kooban siiyay suxufiyiinta.

    " aad baad u mahadsan tihiin. Waxaan rajaynaynaa kulankeenna," ayuu yiri Trump, isaga oo intaa ku daray in isaga iyo Putin uu ka dhexeeyay "xiriir wanaagsan muddo sannado badan ah".

    "Waxaan aaminsanahay in arrimo badan oo wanaagsan ay kulankan ka dhalan karaan, ama ugu yaraan ay halkaas ka bilaaban karaan, balse waxaan filayaa inay ka dhalan doonaan," ayuu yiri.

  7. War deg deg ah, Trump iyo Putin oo hadda kulan yeeshay

    BBC

    Waxaan hadda soo warinay in Trump iyo Xi Jinping ay ku dhow yihiin inay kulmaan, balse hadda waxaa soo baxaya war sheegaya in Trump uu wada-hadal la leeyahay Vladimir Putin.

    Madaxweynaha Maraykanka iyo dhiggiisa Ruushka ayaa haatan kulan wada leh, sida ay xaqiijiyeen suxufiyiinta Aqalka Cad, waxaana kulanka lagu tilmaamay wada-hadal aan rasmi ahayn.

    Kulanka ayaa ka dhacaya isla xaruntii uu saaka ka qabsoomay shirka guud ee APEC.

    Sida ay sheegeen suxufiyiinta Aqalka Cad, warbaahinta looma oggola inay si xor ah uga qayb gasho ama ula socoto kulanka.

    Waxaan idiin soo gudbin doonnaa faahfaahin dheeraad ah marka ay soo baxaan.

  8. Trump oo sheegay in Putin iyo Xi Jinping "labaduba jecel yihiin"

    Trump

    Madaxweyne Donald Trump ayaa muujiyay inuu kalsooni ku qabo xiriirka kala dhexeeya Madaxweynaha Shiinaha Xi Jinping iyo Madaxweynaha Ruushka Vladimir Putin, ka hor kulankooda saddex geesoodka ah. Waxa uu sheegay in hoggaamiyeyaasha Shiinaha iyo Ruushka ay "labaduba jecel yihiin Trump".

    Saddexda hoggaamiye ayaa la filayaa inay ku kulmaan magaalada Shenzhen ee dalka Shiinaha, iyaga oo ka faa'iidaysanaya shirka heer gobol ee halkaas ka dhacaya.

    Shiinaha ayaa sheegay in kulanka ay hoggaamiyeyaashu isku weydaarsan doonaan aragtiyo ku saabsan arrimaha la xiriira nabadda adduunka.

    Ajandaha rasmiga ah ee kulanka weli si buuxda looma shaacin, balse waxaa la filayaa in looga hadlo dagaallada Ukraine iyo Iran, iyo sidoo kale hub ka dhigista nukliyeerka.

    Qaar ka mid ah falanqeeyayaasha reer Galbeedka ayaa walaac ka muujiyay in kulankani uu horseedi karo in dunida loo kala qaybiyo aagag ay quwado waaweyn mid walba saamayn gaar ah ku yeelato.

  9. Madaxweynaha Ruushka oo war weyn ka sheegay Shiinaha

    Putin

    Madaxweynaha Ruushka Vladimir Putin ayaa sheegay in dalkiisu weli u furan yahay dunida, isla markaana uu dhaqaalihiisu sii xoogeysanayo, sida ay baahisay wakaaladda wararka ee dowladda Ruushka ee TASS.

    Putin ayaa intaa ku daray in Ruushku uu gobolka ka geystay kaalmooyin muhiim ah, sida inuu keeno xaddi badan oo badar iyo bacriminta beeraha ah.

    Waxa uu sidoo kale sheegay in Ruushku diyaar u yahay inuu dalalka ay iskaashiga leeyihiin ee gobolka la wadaago khibraddooda ku saabsan garaadkamacmalka ah (AI) iyo tiknoolajiyadda.

    Hadalka uu ku soo xirayay kulanka, Putin waxa uu sheegay in Ruushku taageersan yahay bayaanka kama dambaysta ah ee shirka APEC.

  10. War deg deg ah, Iran oo mar kale sheegtay in ay dhulka soo dhigtay diyaarad Mareykanku leeyahay

    .

    Milatariga Iran ayaa sheegay in nidaamkooda difaaca cirka uu soo riday diyaarad aan duuliye lahayn oo nooca MQ-9 ah, taas oo ku jirtay hawada dhanka bari ee marin-biyoodka Hormuz.

    Wakaaladda wararka dowladda Iran ee IRNA ayaa sheegtay in diyaaradda lagu soo riday nidaam difaac cirka oo gudaha dalka lagu farsameeyay.

    Maalmihii u dambeeyay, milatariga Iran ayaa dhowr jeer ku dhawaaqay inay ku guuleysteen soo ridista diyaarado aan duuliye lahayn oo Mareykanku leeyahay.

    Hase yeeshee, taliska ciidamada Mareykanka ee Bariga Dhexe CENTCOM, ayaan weli ka jawaabin sheegashooyinkaas.

  11. War deg deg ah, Itoobiya iyo Eritrea oo ciidamadooda geeyay xuduudda labada dal iyo cabsi laga qabo in dagaal qarxo

    Madaxweynaha Eritrea

    Itoobiya iyo Eritrea ayaa ciidamadooda milatariga geeyay xuduudda labada dal, sida lagu sheegay warbixin ay soo saareen hay'adaha la socda colaadaha iyo dad xiriir la leh kooxaha fallaagada ah ee gobolka Tigray ee waqooyiga Itoobiya.

    Tallaabadan ayaa sare u qaadday walaaca laga qabo inuu qarxo dagaal toos ah oo dhex mara labada dal oo muddo dheer colaad soo dhex taallay.

    Hay'adaha la socda colaadaha ee ACLED iyo Xasaradaha Caalamiga ah ayaa sheegay in ciidamada Itoobiya iyo Eritrea ay hadda isku jiraan masaafo u saamaxaysa inay si toos ah isu weeraraan.

    ACLED ayaa sidoo kale sheegtay in weerarro diyaaradaha aan duuliyaha lahayn loo adeegsaday, kuwaas oo ay aaminsan tahay inay fuliyeen ciidamada Itoobiya, lagu bartilmaameedsaday askar Eritrean ah oo ku sugan gudaha dhulka Itoobiya. Si kastaba ha ahaatee, dowladda Itoobiya kama aysan hadlin weerarradaas.

    Eritrea ayaa dhankeeda beenisay eedeymaha sheegaya inay ciidamadeeda u dirtay gudaha Itoobiya, waxayna dowladda Addis Ababa ku eedeysay inay raadineyso marmarsiiyo ay ku weerarto dalka deriska ah.

    Dowladda Itoobiya ayaa sidoo kale ku eedeysay Suudaan oo uu ka socdo dagaal sokeeye, iyo Masar inay taageerayaan kooxaha fallaagada ah ee ka dagaallamaya gobolka Tigray.

    Hase yeeshee, Eritrea, Suudaan iyo Masar ayaa dhammaantood beeniyay eedeymahaas.

    Warar dheeraad ah

  12. War deg deg ah, Madaxweynihii hore ee Somaliland Muuse Biixi oo ka falceliyay hadalkii madaxweyne Xasan

    .

    Madaxweynihii hore ee Somaliland Muuse Biixi Cabdi ayaa sheegay in Somaliland ay iyaga u taallo howlahooda haddii ay qalad galaan iyo haddii ay wax sax ah smaeyaan.

    Hadalkiisa ayaa daba socda khubaddii uu shalay madaxweynaha Soomaaliya Xasan Sheekh jeediyay, taasoo ku saabsaneed eedo kulul oo u jeediyay Imaaraadka Carabta, oo uu sheegay in ay xitaa door ku leeyihiin aqoonsigii Israa’iil ee Somaliland.

    Madaxweynaha Soomaaliya Xasan Sheekh Maxamuud ayaa shalay sheegay in Imaaraadku uu arimaha gudaha Soomaaliya, faragaliyay oo heshiisyo dekedeed uu la galay maamull goboleedyo, kuwaas oo ku saabsan dekedaha Berbera, Boosaaso iyo Kismaayo. Dekedahaasi ma aha buu yiri hanti ay maamul goboleedyo gaar ahi leeyihiin.

    Warar dheeraad ah

  13. War deg deg ah, Baarlamaanka Israa'iil oo guddoomiye u doortay nin si weyn uga so horjeeda Netanyahu

    .

    Baarlamaanka Israa'iil ee Knesset ayaa markii ugu horreysay yeeshay guddoomiye cusub oo ka tirsan garabka siyaasadeed ee ka soo horjeeda ra'iisul wasaare Benjamin Netanyahu.

    Lixdan iyo lix xildhibaan oo ka tirsan 120-ka xubnood ee baarlamaanka ayaa xalay u codeeyay Matan Kahana, oo xulafo la ah taliyihii hore ee ciidamada Israa'iil, Gadi Eisenkot.

    Eisenkot ayaa haysta ilaa bisha soo socota inuu soo dhiso dowlad cusub.

    Guddi baarlamaan ayaa durba bilaabay inuu dedejiyo dhowr hindise sharciyeed oo

    Knesset ayaa la filayaa inuu codad hordhac ah ka qaado hindise-sharciyeedyada lagu doonayo in lagu buriyo sharciyo la ansixiyay xilligii Netanyahu, kuwaas oo kordhiyay saameynta siyaasiyiinta ku leeyihiin garsoorka iyo warbaahinta.

    Hindise kasta oo sharciyeed waa inuu maro dhowr marxaladood oo baarlamaanka ah, isla markaana uu helo saddex codbixin ka hor inta aan la ansixin.

    Warar dheeraad ah

  14. War deg deg ah, Dowladda Uk oo loo hanjabay iyo arrinta la isku haysto

    .

    Dowladda Mauritius ayaa ku hanjabtay inay tallaabo sharci ah ka qaadi doonto Britain haddii aan la dhammaystirin heshiiska la xiriira jasiiradaha Chagos ugu dambayn dhammaadka bisha soo socota.

    Heshiiska ayaa dhigaya in madaxbannaanida jasiiradahaasi, oo uu ku yaallo saldhig milatari oo Maraykanku leeyahay, laga wareejiyo Britain loona gacan geliyo Mauritius, iyadoo Britain ay dib uga kireysanayso.

    Dowladda Britain ayaa bishii Sebtembar dib u eegis ku samaysay qorshaha, kaddib markii madaxweyne Donald Trump uu ku tilmaamay heshiiska mid aad u xun.

    Ra'iisul wasaaraha Mauritius, Navin Ramgoolam, ayaa sheegay in inkasta oo wada-hadallada ku saabsan madaxbannaanida jasiiraduhu ay socdaan, aanu oggolaan doonin in arrintan muddo dheer la sii jiitamo.

    Britain ayaa sheegtay inay ka go'an tahay in xal diblomaasiyadeed laga gaaro khilaafka.

    Warar dheeraad ah

  15. War deg deg ah, Putin iyo Trump oo kulmay iyo wixii dhexmaray

    .

    Madaxweynaha Maraykanka Donald Trump ayaa dalka Shiinaha kula kulmay dhiggiisa Ruushka Vladimir Putin.Saddexda hoggaamiye ayaa isku goob ku sugnaa taas oo loo dhigay roogga cas ka hor casho ka dhacaysay magaalada Shenzhen, sida ay werisay wakaaladda wararka ee Reuters.

    Muuqaal ay baahisay warbaahinta madaxtooyada Ruushka ee Kremlin-ka ayaa muujinayay Donald Trump oo garab taagan dhiggiisa Shiinaha Xi Jinping iyo xaaskiisa, xilli uu goobta soo gaaray Vladimir Putin.

    Muuqaalka ayaa sidoo kale muujinayay Trump iyo Putin oo gacmaha isqabanaya, si diirranina isu salaamaya.

    Tani waa kulankoodii ugu horreeyay ee fool-ka-fool ah tan iyo shirkii ay ku yeesheen gobolka Alaska bishii Agoosto 2025.

    Saddexda hoggaamiye ayaa la filayaa inay Khamiista yeeshaan kulan rasmi ah oo saddex geesood ah, kaas oo looga hadli doono arrimaha caalamka iyo mowduucyada la xiriira nabadda adduunka.

    Warar dheeraad ah

  16. 'Ragga bidaarta leh oo halis ugu jira wadne xanuunka'

    Daraasad la sameeyay sanado kahor ayaa lagu ogaaday in ragga bidaarta leh ay halis ugu jiraan xanuunada wadnaha in ka badan ragga cayilan ee da'doodu ka hooseyso 40 jirka.

    Daraasada oo lagu sameeyay illaa 2,000 oo rag dhalinyaro ah oo Hindiya ku nool in ay badankood qabaan xanuunada wadnaha, intooda badana waa kuwa qaba bidaarta ama cirro.

    Mac-hadka xanuunada wadnaha ee Yurub ayaa daraasadan sameeyay 2017-kii, waxaana laga shaaciyay shirweynaha ururka dhaqaatiirta wadnaha ee Hindiya.

    Cilmi baarayaasha ayaa sheegay in 50% ragga qaba xanuunada wadnaha ay durba cirro kasoo baxdo iyaga oo aanan gaarin xiligii tintooda ay cirroobi lahayd.

  17. Xi Jinping oo Trump garoonka diyaaradaha ee Shenzhen ku soo dhoweeyay, una sameeyay maamuus gaar ah

    “Sawir muujinaya Trump iyo Xi Jinping.”
    Qoraalka sawirka, “Sawir muujinaya Trump iyo Xi Jinping.”

    Madaxweynaha Mareykanka, Donald Trump, ayaa gaaray magaalada Shenzhen ee dalka Shiinaha.

    Waxaa halkaas ku soo dhoweeyay madaxweynaha Shiinaha, Xi Jinping, oo ah martigeliyaha booqashadiisa.

    Daawo sawirrada muujinaya sida Trump loogu soo dhoweeyay dalka Shiinaha.

    “Sawir muujinaya Trump iyo Xi Jinping.”
    Qoraalka sawirka, “Sawir muujinaya Trump iyo Xi Jinping.”
    “Sawir muujinaya Trump iyo Xi Jinping.”
    Qoraalka sawirka, “Sawir muujinaya Trump iyo Xi Jinping.”
    “Sawir muujinaya Trump iyo Xi Jinping.”
    Qoraalka sawirka, “Sawir muujinaya Trump iyo Xi Jinping.”
  18. Diblomaasiyadda soo dhoweynta: Yaa garoonka diyaaradaha ku qaabili doona Trump marka uu Shiinaha gaaro?

    Trump
    Qoraalka sawirka, Trump

    Arrimaha sida dhow isha loogu hayn doono waxaa ka mid ah hoggaamiyaha Shiinaha ee garoonka diyaaradaha ku soo dhoweyn doona Madaxweynaha Mareykanka, Donald Trump, marka uu dalkaas gaaro.

    Go’aanka Beijing ee ku saabsan mas’uulka Shiinaha ee qaabilaya madaxweynaha Mareykanka ayaa muujin doona sida ay muhiim ugu aragto booqashadiisa.

    Intii uu Trump booqashada rasmiga ahayd ku tagay Shiinaha bishii May, hoggaanka dalkaas wuxuu garoonka diyaaradaha ugu diray Madaxweyne-ku-xigeenka, Han Zheng, si uu u soo dhoweeyo.

    Sidoo kale, markii Madaxweynaha Shiinaha Xi Jinping uu booqasho rasmi ah ku tagay Mareykanka bishii Sebtembar, Trump ayaa tallaabo aan caadi ahayn qaaday, isaga oo shaqsi ahaan garoonka diyaaradaha ugu tegay Xi.

    Shiinaha ayaa la filayaa inuu doonayo inuu muujiyo ixtiraam la mid ah kii Trump sameeyay, isagoo u diraya mas’uul sare oo ka tirsan Guddiga Siyaasadda ee Xisbiga Shuuciga Shiinaha, oo loo yaqaan Politburo.

    Hase yeeshee, uma badna in Xi Jinping laftiisu uu garoonka ku soo dhoweeyo Trump, maadaama uu leeyahay jadwal shaqo oo mashquul ah.

    Cai Qi, oo ah mas’uulka sida weyn u maamula hawlaha xafiiska madaxweynaha Xi, ayaa noqon kara qof ku habboon inuu xilkaas qabto.

    Cai ayaa sidoo kale saaka garoonka diyaaradaha ku soo dhoweeyay Madaxweynaha Ruushka, Vladimir Putin.

    Tallaabadaas waxay Beijing siin kartaa fursad ay ku muujiso inay booqashooyinka hoggaamiyeyaasha Mareykanka iyo Ruushka si isku mid ah u qiimeyso.

    Warar dheeraad ah

  19. Shirkadda shidaalka Abu Dhabi oo faahfaahin ka bixisay weerar lagu qaaday markabkeeda

    Shirkadda Shidaalka Qaranka Abu Dhabi (ADNOC) ayaa saaka sheegtay in hal shaqaale oo ka tirsanaa shaqaalaha markabkeeda la la’yahay, halka 11 kalena ay ku dhaawacmeen weerar Talaadadii lagu qaaday markabkaas oo marayay marin-biyoodka Hormuz.

    Shirkaddu waxay sheegtay in shaqaalihii kale ee markabka laga daadgureeyay.

    ADNOC oo ka hadlaysay shaqaalaha la la’yahay ayaa tiri: “Waxaa socda hawlgallo goobidda iyo samatabbixinta ah, kuwaas oo lala kaashanayo hay’adaha ay khusayso.”

    Wakaaladda wararka ee Reuters ayaa, iyadoo soo xiganaysa ilo ka tirsan amniga maraakiibta, sheegtay in shaqaalaha markab shidaal gaas dabiici ah (LNG) siday ay Talaadadii ka baxeen markabka, kaddib markii uu haleelay walax gantaal u eg.

    Ilaalada Kacaanka Iran iyo ciidamada badda ee dalkaas ayaa Talaadadii sheegay in markab siday gaaska dabiiciga ah iyo laba markab oo shidaal siday ay dab qabsadeen iyagoo marayay marin-biyoodka Hormuz.

    Warar dheeraad ah

  20. Wafdiga nabadda Gaza oo ka digay in xabbad-joojintu qarka u saaran tahay inay burburto

    Guddiga Nabadda Gaza ee uu Mareykanku taageero ayaa Golaha Ammaanka ee Qaramada Midoobay u gudbiyay warbixin walaac leh, isaga oo diblomaasiyiinta uga digay xaalado halis gelinaya xabbad-joojinta Gaza oo muddo sanad ah jirtay.

    Warbixinta ugu dambeysay ee guddiga, oo Talaadadii la soo bandhigay, ayaa ka digtay in haddii aan si degdeg ah loo qaadin tallaabooyin lagu dhaqan-gelinayo heshiiskii xabbad-joojinta ee 2025, xabbad-joojinta Israel iyo Xamaas ay qarka u saaran karto inay burburto.

    “Farqiga u dhexeeya wixii lagu heshiiyay iyo waxa dhab ahaan ka dhacaya goobta ayaa weli ah khatarta ugu weyn ee hortaagan geeddi-socodka,” ayaa lagu yiri warbixinta, nuqul ka mid ah oo ay heshay wakaaladda wararka ee Associated Press.

    Warar dheeraad ah