Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 12 Agoosto 2026Cristiano Ronaldo oo guursaday Georgina Rodríguez 10 sano kadib

   Xiddiga kubadda cagta ee caanka ah Cristiano Ronaldo ayaa guursaday lammaanihiisa muddada dheer, ay wada joogeen ee model-ka ah saamayntana ku leh baraha bulshada, Georgina Rodríguez, kadib xaflad ka dhacday Portugal.

   Weeraryahanka reer Portugal ayaa akoonkiisa Instagram-ka soo dhigay sawir muujinaya laba gacmood oo midkood la rumaysan yahay inay tahay gacantiisa, iyo gacanta xaaskiisa. Labadooduba waxay xirnaayeen faraantiga arooska.

   Warbaahinta Portugal ayaa arooska ku tilmaantay “arooska sanadka”, waxayna sheegtay in lammaanuhu isku guursadeen 11-kii Agoosto magaalada xeebta ku taalla ee Cascais, oo u dhow Lisbon. Waxaa sidoo kale la sheegay in shantooda carruur ah ay ka qaybgaleen xafladda.

   Qoraalka Ronaldo ee Instagram-ka ayaa helay in ka badan saddex milyan oo falcelin ah muddo 30 daqiiqo gudahood ah.

   Lammaanuhu waxay wada socdeen muddo 10 sano ah, kaddib markii ay isku barteen dukaan Gucci ah oo ku yaalla Madrid, halkaas oo Rodríguez ka shaqaynaysay. Xilligaas Ronaldo wuxuu u ciyaarayay kooxda reer Spain ee Real Madrid.

   Waxay ku dhawaaqeen inay is doonteen 11-kii Agoosto ee sannadkii hore. Rodríguez ayaa markaas soo dhigtay sawir ay ku muujinayso faraanti dheeman ah, iyadoo ku qortay afkeeda hooyo ee Isbaanishka: “Haa, waan aqbalay.”

   Ronaldo wuxuu leeyahay shan carruur ah guud ahaan, laba ka mid ahna waxaa dhashay Rodríguez. Waxay sidoo kale gacan ka geysatay korinta saddexdiisa carruur ah ee kale. Qoyska ayaa hadda ku nool magaalada caasimadda u ah Sacuudiga, Riyadh.

   Gabadhooda curudda ah, Alana Martina, waxay dhalatay 2017-kii. Gabadhooda ugu yar, Bella, waxay dhalatay Abriil 2022, iyadoo mataan la ahayd wiil walaalkeed ah oo geeriyooday.

   Ronaldo ayaa xirfaddiisa kubadda cagta ku dhaliyay ku dhowaad 1,000 gool. Wuxuu u ciyaaray kooxo ay ka mid yihiin Sporting Lisbon, Manchester United, Real Madrid, Juventus, Al-Nassr ee Sacuudiga iyo xulka qaranka Portugal.

   Ronaldo, oo hadda ah kabtanka xulka Portugal, ayaa dhawaan ka qaybgalay Koobkiisii Adduunka ee lixaad, kaas oo noqday kii ugu dambeeyay. Tiradaas wuxuu rikoodhka kula wadaagaa Lionel Messi oo u dhashay Argentina.

   Ronaldo oo 41 jir ah ayaa shan jeer ku guuleystay abaalmarinta Ballon d'Or, taasoo ah tirada labaad ee ugu badan marka laga yimaado Messi, oo ku guuleystay siddeed jeer.

   Kooxdiisa hadda ee Al-Nassr, oo uu ku biiray 2022, ayaa sannadkii hore xaqiijisay inuu saxiixay heshiis cusub oo laba sano ah, taasoo ka dhigan inuu kooxda Riyadh ku sii jiri doono ilaa 2027.

   Sannadkii hore, Bloomberg Billionaires Index waxay hantidiisa Ronaldo ku qiimeysay $1.4 bilyan (£1.04 bilyan), taasoo ka dhigtay ciyaaryahankii kubadda cagta ee ugu horreeyay ee noqda bilyaneer.

2. 12 Agoosto 2026Muxuu yahay qorrax madoobaadku? Imisa nooc ayuuse u qaybsamaa?

   Dayax madoobaadka ama qorrax modaabaadku wuxuu noqon karaa dhacdooyinka cireed kuwooda ugu cajiibsan. Waxaa jira sabab wanaagsan oo ah in laan dhan oo dalxiis ah ay soo ifbaxday si loogu adeego kuwa doonaya inay arkaan.

   Qorrax madoobaadka soo socdaa wuxuu noqon doonaa 10 Juun - dayax madoobaad aan caadi ahayn oo si buuxda looga wada arki karo qaybo ka mid ah Kanada, Greenland iyo Ruushka (inta badan Yurub, Bartamaha Aasiya iyo Shiinaha ).

   Laakiin kani waa mid ka mid ah dhowr nooc oo dayax madoobaad ama qoorax madoobaad ah.

   Waxaana ay dhacaan kolka qorraxda, dayaxa iyo dhulka ay si xarriiq toosan ah isugu aadaan.

   "Guud ahaan, waxaa jira laba nooc oo: kuwa Dayaxa iyo kuwa Qorraxda," ayuu qoray Juan Carlos Beamín, oo ah khabiir ku takhasusay cilmiga xiddigiska ee Xarunta Isgaarsiinta Sayniska ee Jaamacadda Madaxa-bannaan ee Chile, buugiisii ugu dambeeyay ee Illustrated Astronomy.

   Laakiin markale wuxuu xusayaa: "Farsamo ahaan waxaa jira nooc saddexaad oo ku lug leh laba xiddigood."

   Waa tan sharaxaad ku saabsan saddexda nooc iyo noocyadooda kala duwan:

   Mararka qaar, markii Dayaxu uu ku wareego dhulka, wuxuu ku kala gooshaa Qorraxda iyo meeraheenna dhexdooda, isagoo xiraya iftiinka qorraxda taas oo keenaysa qorrax madoobaad. Si kale haddii loo dhigo, Dayaxu wuxuu hooskiisa ku tuuray dhulka dushiisa.

   Laakiin waxaa jira saddex nooc oo qorrax madoobaad ah, kuwanna way ku kala duwan yihiin midba midka kale sida - iyo inta - uu dayaxu u daboolo qorraxda.

   Sii akhri

3. 12 Agoosto 2026"Waxaan ahay 23 jir, timahayguna way daadanayaan"

4. 12 Agoosto 2026Trump oo sheegay inuusan Iran ku kalsoonayn isla markana Mareykanku maamuli doono Hormu

   Madaxweynaha Mareykanka Donald Trump ayaa Arbacada maanta ah sheegay inuusan Iran ku kalsoonayn, isagoo ku adkeystay in Mareykanku si buuxda u maamulayo marin-biyoodka Hormuz.

   “Aniga ayaa noqon doona qofka ugu dambeeya ee Iran aamino; marar badan ayay i khiyaameen,” ayuu yiri Trump.

   Horaantii, Taliska Dhexe ee Ciidamada Mareykanka (CENTCOM) ayaa sheegay inuu hor istaagay markab ku sii jeeday deked ku taalla Iran, taasoo keentay inuu markabku awoodi waayo inuu sii wato safarkiisa.

   CENTCOM ayaa qoraal ay ku daabacday barta X ku sheegtay, in markabkaas oo watay calanka Panama uu isku dayayay inuu maro Gacanka Cumaan.

   Dhanka kale, xoghayaha cusub ee Golaha Sare ee Amniga Qaranka Iran, Mohsen Rezaei, ayaa yiri:

   “Marin-biyoodka Hormuz lama furi doono ilaa Mareykanku beddelo mowqifkiisa oo uu aqbalo shuruudaha Iran.”

   Labadii maalmood ee la soo dhaafay, Iran iyo Mareykanka ayaa sii adkeeyay hadalladooda ku saabsan khilaafka u dhexeeya labada dhinac.

   Mohsen Rezaei ayaa Talaadadii sheegay in Marin-biyoodka Hormuz uu sii xirnaan doono ilaa Mareykanku aqbalo shuruudaha Iran ee lagu soo afjarayo dagaalka.

   Shuruudahaas waxaa ka mid ah in la sii daayo hantida Iran ee la xayiray iyo in la joojiyo dagaallada ka socda qaybo kala duwan oo Bariga Dhexe ah, oo ay ku jiraan Lubnaan iyo Gaza.

   Hadalkan ayaa yimid kadib markii Madaxweyne Trump uu Isniintii Iran ka dalbaday inay magdhow ka bixiso dadka lagu dilay dagaallada, weerarrada iyo mudaharaadyada dhacay 50-kii sano ee la soo dhaafay.

   Intii uu khilaafkani socday, hadallada Trump ayaa marba dhinac isu beddelayay; mar wuxuu ku hanjabayay inuu kordhin doono weerarrada, mar kalena wuxuu sheegayay in heshiis uu dhow yahay in la gaaro.

   Wareysi la baahiyay habeenkii Isniinta, Trump wuxuu sheegay in xaaladda hubanti la’aantu ay sii socon karto muddo, isagoo tilmaamay in laga yaabo inuu go’aansado inuu “sugo oo arko waxa dhaca.”

   Sidoo kale akhri

   Maxay ka dhigan tahay in Trump uu ku dhex dhuunto gaariga cuntada uuna ku baxsado diyaarad sir ah?

   Waa kuma Maxamed Baqer Kharazi, wadaadka aan wax xil ah hayn, cidna dhegeysan ee saamaynta badan?

5. 12 Agoosto 2026Muxuu yahay qorrax madoobaadku? Imisa nooc ayuuse u qaybsamaa?

6. 12 Agoosto 2026Waa kuma Cumar Cartan, garsooraha Soomaaliyeed ee maanta dhexdhexaadin doona finalka Super Cup?

   Garsooraha Soomaaliyeed ee Cumar Cabdulqaadir Cartan ayaa kula dardaarmay garsooreyaasha doonaya inay mustaqbalka horumar ka sameeyaan inay "waligood riyada joojin," ka hor inta uusan taariikhda gelin isaga oo noqonaya qofkii ugu horreeyay ee aan Yurub ahayn ee garsoora UEFA Super Cup, oo Arbacada ka dhacaya magaalada Salzburg ee dalka Austria.

   Cumar oo 34 jir ah ayaa ka mid noqday garsooreyaasha ugu caansan kubadda cagta Afrika, isagoo noqday Soomaaligii ugu horreeyay ee garsoora finalka CAF Champions League, sidoo kalena loo magacaabay Garsooraha Ragga ee CAF ee Sanadka.

   Cumar Cabdiqaadir Cartan wuxuu sanadkii 1995-tii uu ku dhashay xaafadda Buulo-xuubeey ee degmada Wadajir ee magaalada Muqdisho.

   Heerkiisa waxbarashada hoose, dhexe iyo sare ayuu ku qaatay isla Muqdisho isagoo heerka kowaad ee jaamacada ku qaatay daraasaadka horumarinta.

   Wuxuu xirfaddiisa garsoorennimo waxa ay ka bilaabatay magaalada Muqdisho ee garoommada xaafadaha ka dib markii uu dhaawac ka soo gaaray lugta uu soo afjaray waayihiisii ​​ciyaaraha.

   Cartan waxa uu sidoo kale dhex dhexaadiye ka noqday tartamo abaabulan oo ka dhacay magaalada, in kasta oo wax badan oo horumarkiisii ​​hore ay ku yimaaddeen intii uu kormeerayay ciyaaraha aan rasmiga ahayn iyo kuwa hab-hoosaadka ah.

   Saamayn muhiim ah waxaa xirfaddiisa hore ku lahaa Cismaan Jaamac Diraac, madaxii hore ee garsoorka Soomaaliya.

   Diraac waxa uu bixiyay hagitaan farsamo iyo taageero shakhsi ah xilli ay kubbadda cagta Soomaaliya ku shaqaynaysay qaab dhismeed kooban oo caalami ah.

   "Waxa uu nagu ahaa aabbe oo kale," Cartan ayaa yiri.

   "Garsoorayaasha kaliya ma hoggaaminin ee wuu na daryeeli jiray, haddii aad Muqdisho joogto oo aadan waxba haysan wuxuu hubin lahaa inaad wax cuntaan, wuxuu idin geyn lahaa maqaayad".

   Si kastaba ha ahaatee, Diraac ayaa la dilay Agoosto 2017.Cartan ayaa ka hadlay, oo yiri.

   "Aad bay u adkeyd".

   "Wuxuu ii diyaarinayey inaan noqdo garsoore caalami ah. Wuxuu ku faani lahaa inuu arko qof Soomaali ah oo heerkan gaaray."

   Cartan waxa uu 2018 noqday garsoore liiska Fifa ku jira, waxana uu si joogto ah u dhex maray ciyaartii Afrika, isaga oo kormeeray ciyaaraha heerka sare ah ee qaaradaha.

   Bishii Janaayo 2024, wuxuu noqday Soomaaligii ugu horreeyay ee garsoore ka noqda ciyaar ka tirsan Afcon, isagoo maamulayay ciyaartii Group E ee Tunisia iyo Namibia.

   Xiriirka Kubadda Cagta Afrika (Caf) ayaa bishii November u aqoonsaday inuu yahay sarkaalka ugu sarreeya ragga, ka hor inta aan loo magacaabin guddiga maamula qaaradda Afrika inuu kormeero lugtii labaad ee finalka Champions League ee u dhaxeysay kooxda Morocco ee AS FAR iyo Mamelodi Sundowns ee Koonfur Afrika bishii hore.

   Bishii April, Madaxweyne Xasan Sheekh Maxamuud ayaa amaman kala dul dhacay, kadib markii Cartan lagu daray 52 garsoore oo ka qeyb galaya Koobka Adduunka.

   "Waxaan bogaadinayaa dadaalka, xirfadda, iyo daacadnimada uu muujiyay garsoore Cumar," ayaa yiri.

   Dhab ahaantii waxay Cartan u ahayd daqiiqad lagu faano - oo uu garanayay inay ahayd guul taariikhi ah.

   "Farxaddayda kaliya ma ahayn," ayuu yiri.

   "Qoyskeyga, dadka Soomaaliyeed, xiriirka iyo garsoorayaasha da'da yar dhamaantood waxay ila wadaageen dareenkaas, waxay u noqotay rajo ah in garsoore Soomaaliyeed uu heerkaas gaaro."

   Sidoo kale akhri

   Garsooraha Soomaaliyeed ee Cumar Cartan oo loo xushay inuu dhexdhexaadiyo kulan dhex mari doona PSG iyo Aston Villa

   FIFA oo ka hadshay diidmada uu Mareykanka u diiday Cumar Cartan inuu galo dalkooda

   Cumar Cartan oo baaqa u diray dhalinyarada Soomaaliyeed iyo waxa xiga ee u qorsheysan

7. 12 Agoosto 2026Dunida oo maanta oo laga dareemi doono qorrax-madoobaad iyo meelaha la filayo inuu ka dhaco

8. 12 Agoosto 2026Natiijada kursiga ay ku tartameysay Ilhaan Cumar

   Sida aan horey idinkugu soo tebinnayba, dalka Mareykanka waxaa si xamaadsad leh uga socda doorashooyinka isreeb-reebka xisbiyada dhexdooda ah ku waas oo lagu kala saarayo cidda xisbi walba uga qaybaleysa doorashada guud ee lagu wado in ay dalkaas ka qabsoonto dabayaaqada sannadkan.

   Goobaha sida weyn loogu loollamayana waxaa ka mid ah gobolka Minnesota, halkaas oo goor dhaweyd lagu soo gabagabeeyey doorashooyin loogu tartamayey kuraas kala duwan.

   Waxaan goor dhoweyn idiin soo gudbinnay in natiijada illaa hadda la shaaciyey ay tibaaxeysaa in tartanka xilka Guddoomiyaha Gobolka Minnesota ee dhanka Xisbiga Dimuqraadiga ay ku soo baxday Amy Klobuchar oo horay u ahayd Senator gobolka ku matasha Aqalka Sare ee Mareykanka.

   Waxaa sidoo kale goor dhoweyn la soo gabagabeeyay doorasho ay ku tartameysay xildhibaanad Ilhaan Cumar oo ka tirsan aqalka Congress-ka ee Maraykanka .

   Ilhaan Cumar ayaa ku guuleysatay doorashada xisbiga Dimuqraadiga ee degmada 5-aad ee Minnesota, sida ay noo xaqiijiyeen weriyaal ka qeyb galay doorashadan.

   Ilhaan, oo ah Dimuqraadiyad ayaa lagu soo warramayaa inay heshay in ka badan 80% codadka la dhiibtay, iyadoo ka adkaatay dhowr musharrax oo la tartamay.

   Musharraxiintii Omar kula tartamay doorashada hordhaca ah ee Dimuqraadiga waxay kala ahaayeen Le, oo horey u ahayd dacwad-ooge federaal ah; Reeves; Abena McKenzie; iyo Nate Schluter.

   “Anaga maba naqaan cid la tartameysay Ilhaan, iyada ayaan u codeynay oo aan guusha la rabnay”, ayuu yiri mid kamid ah Soomaalida maanta codkooda dhiibtay oo aan la hadalnay.

   Ilhaan oo doorashada kadib jeedisay war kooban, ayaa waxay si gaar ah ugu mahad celisay dadkii codkooda dhiibtay ee iyada doortay.

9. 12 Agoosto 2026Maxaa ka ogtahay waddooyinka adduunka ugu halista badan 2026?

10. 12 Agoosto 2026Yaa hogaaminaya tartanka guddoomiyaha gobolka Minnesota ee doorashada is-rebreebka xisbiyada?

    Dalka Mareykanka waxaa si xamaadsad leh uga socda doorashooyinka isreeb-reebka xisbiyada dhexdooda ah, ku waas oo lagu kala saarayo cidda xisbi walba uga qaybaleysa doorashada guud ee lagu wado in ay dalkaas ka qabsoonto dabayaaqada sannadkan.

    Goobaha sida weyn loogu loollamayna waxaa ka mid ah gobolka Minnesota, halkaas oo goor dhaweyd lagu soo gabagabeeyey doorashooyin loogu tartamayey kuraas kala duwan, waxaana natiijada illaa hadda la shaaciyey ay tibaaxeysaa in tartanka xilka Guddoomiyaha Gobolka Minnesota ee dhanka Xisbiga Dimuqraadiga ay ku soo baxday Amy Klo-buchar oo horay u ahayd Senator gobolka ku matasha Aqalka Sare ee Mareykanka.

    Kursigan ayaa waxaa banneeyey Tim Walz oo Ka tanaasulay sii haynta xilka guddoomiyaha Minnesota, ka dib fadeexad musuqmaasuq oo gabolkaas in dhaweydba dul hoganeysey. Waxayna Senator Klo-buchar bisha Nofember tartan kama dambeysa la geli doontaa illaa 7 musharrax oo ka socda xisbiga jamhuuriga.

    Dhanka kale waxaa kursiga Aqalka Senate-ka ee ay ku fadhisey Amy Klobuchar ku guuleysatay Peggy Flana-gan oo ka tirsan garabka Horusocodka ama Progressive-ka ee xisbiga Dimuqraadiga. Waxayna ka adkaatay Angie Craig oo horay u soo martay Aqalka Congress-ka.

11. 12 Agoosto 2026Maxay ka dhigan tahay in Trump uu ku dhex dhuunto gaariga cuntada uuna ku baxsado diyaarad sir ah?

12. 12 Agoosto 2026Qorrax madoobaad la filayo maanta iyo meelaa uu ka dhici doono

    Waxaa Arbacada maanta ah, 12-ka Agoosto la filayaa inuu ka dhaco qaybo kala duwan oo dunida ah qorrax madoobaad. Meelaha qaar ayaa laga arki doonaa madoobaad buuxa, halka meelo kalana laga arki doono madoobaad qayb ah.

    Haddii aadan si toos ah xitaa u arki karin, waxaa jiri doono muuqaallo cajiib ah oo ay suurtagal tahay in laga baahiyo meelo kala duwan oo dunida ah.

    Madoobaadka qorraxda ayaa dhaca marka dayaxu u dhaxeeyo dhulka iyo qorraxda, taas oo xannibaysa qayb ama dhammaan iftiinka qorraxda ee ina soo gaara.

    Noocyo kala duwan ayaa jira oo madoobaadka qorraxda ah. Nooca aad arki doonto wuxuu ku xiran yahay meesha aad ka joogto Dhulka iyo masaafada u dhexeysa Dayaxa iyo Dhulka.

    Madoobaadka qorraxda ee xiga ayaa la filayaa inuu dhico Arbacada, 12-ka Agoosto.

    Madoobaadka buuxa ayaa la filayaa in laga arki doonaa: Waqooyiga Ruushka, Greenland, Iceland, Isbayn iyo Boortaqiiska.

    Madoobaadkan lagama arki doono Turkiga. Madoobaadka qorraxda ee xiga ee laga daawan karo Turkiga wuxuu noqon doonaa madoobaad qayb ahaan ah, kaas oo dhici doona 2-da Agoosto, 2027.

    Sida ay sheegtay NASA, madoobaadka buuxa wuxuu ka bilaaban doonaa duhurnimada meel yar oo fog oo ku taalla waqooyiga Ruushka. Kadibna iyadoo Dhulku wareegayo, madoobaadku wuxuu u gudbi doonaa dhinaca Isbayn, halkaas oo laga arki doono fiidkii wax yar ka hor qorrax-dhaca.

    Muddada madoobaadka buuxu waxay noqon doontaa mid aad u gaaban, wax ka yar laba daqiiqo iyo bar.

    Qaybo ka mid ah waqooyiga Maraykanka, Kanada, waqooyi-galbeed Afrika, iyo meelo badan oo Yurub ah waxay arki doonaan madoobaad qayb ahaan ah, iyadoo meelo qaarkood in ka badan 90% Qorraxda la dabooli doono.

    Dhacdadan waxay sii noqon doontaa mid gaar ah, maadaama qaybo ka mid ah Afrika iyo qaaradda Yurub ay arki doonaan madoobaad ku beegan qorrax-dhac, taas oo macnaheedu yahay in Qorraxdu qayb ahaan madoobaan doonto iyadoo dhacaysa.

    Waxaad sidoo kale akhrisan kartaa:

    Goormuu dhacayaa qorrax madoobaadka, sideese uga gaashaman kartaa?

    Muxuu yahay qorrax madoobaadku? Imisa nooc ayuuse u qaybsamaa?

13. 12 Agoosto 2026Trump: "Diyaaraddii aan raacay waxaa ka khatar badnaaa weerar ka yimaada Iiraan"

    Donald Trump ayaa sheegay in diyaaraddii milatari ee uu Türkiye kaga soo laabtay Maraykanka ay khatar uga badnayd weerar kaga yimaada Iiraan marka loo eego diyaaradda uu caadi ahaan raaco madaxweynaha Maraykanka.

    Trump ayaa wariyeyaasha u sheegay inuu raacay talada hay’adaha ammaanka ee ku aaddan sidii uu uga soo laaban lahaa shirkii NATO, sidaas darteedna uu Maraykanka ugu soo laabtay diyaarad kale, balse uu ku jiray khatar ka weyn.

    “Waxaan u malaynayaa in diyaaraddii aan raacay ay dhab ahaantii khatar badan ku jirtay. Waxaan u malaynayaa in khatartu ay ka weynayd diyaaraddaas, sababtoo ah waxaan aaminsanahay inay u badaneyd in la bartilmaameedsado,” ayuu yiri.

    Sida ay sheegeen warbaahinta Maraykanka, waxaa la ogaaday khatar culus oo ka timid Iiraan oo ahayd inay gantaal ku weerarto diyaaradda Donald Trump. Markii uu Türkiye kasoo laabanayay, si qarsoodi ah ayuu diyaarad u beddelay, waxaana loo wareejiyay diyaarad kale oo ay la socotay gaari xamuul ah oo siday raashin iyo agabka cuntada iyo adeegga diyaaradda. Diyaaraddaas ayuu ugu soo laabtay Maraykanka.

    Madaxweynaha Maraykanka ayaa sidoo kale sheegay inuusan Iiraan ku kalsoonayn “Aniga ayaa ah qofka ugu dambeeya ee ku kalsoonaan kara Iiraan. Mar kasta way been ii sheegeen. Hadda waxaan si buuxda gacanta ugu haynaa Marinka Hormuz. Iyaga gacantooda kuma jiro. Annaga ayaa si buuxda u maamulna. Marinku annagaa leh".

    Waxaad sidoo kale akhrisan kartaa:

    Warar sheegaya in Trump uu ku dhex dhuuntay gaariga cuntada ee gudaha diyaarad sir ah cabsi laga qabay hanjabaadda Iiraan

14. 12 Agoosto 2026Mohsen Rezaei: "Iiraan waxay si degdeg ah uga jawaabi doontaa gardarrada cadowgeeda"

    Mohsen Rezaei, oo dhawaan loo magacaabay xoghayaha Golaha Sare ee Amniga Qaranka Iiraan, isla markaana ah mid ka mid ah labada wakiil ee Hoggaamiyaha Sare ku matala golaha, ayaa farriin uu soo saaray ku sheegay in Jamhuuriyadda Islaamiga ah ee Iiraan ay “si degdeg ah oo go’aan leh uga jawaabi doonto gardarro kasta iyo isku day kasta oo cadowgu ku doonayo inuu ku handado.”

    Qoraalkiisii ugu horreeyay tan iyo markii loo magacaabay xilkiisa cusub, Rezaei wuxuu sheegay in ujeeddadu aysan ahayn “oo keliya in laga gudbo marxalad adag oo khatar ah,” balse ay tahay in la hubiyo in Iiraan ay marxaladdan uga soo baxdo iyadoo amnigeedu ka sii wanaagsan yahay, midnimadeedu ka sii xooggan tahay, awooddeeduna korodhay, isla markaana ay leedahay awood dheeraad ah oo ay ku gaarto horumar iyo koboc.

    Sarreeye Gaas Rezaei ayaa haysta rikoodhka muddada ugu dheer ee uu qof xilka Taliyaha Guud ee Ciidanka Ilaalada Kacaanka Iiraan soo qabtay.

    Sii akhri

    Nafaqo-darrada carruurta Baydhabo oo aad looga dayrinayo

    Faahfaahin ka soo baxaysa weerar lagu dhintay oo Xuutiyiintu ka gaysteen Baabul Mandab

15. 11 Agoosto 2026CENTCOM oo sheegay in ay beegsadeyn Markab Iiraan kusii jeeday

    Taliska Dhexe ee Ciidamada Maraykanka, CENTCOM ayaa bayaan uu ku qoray barta X ku sheegay inuu joojiyay markab ku sii jeeday deked Iiraan ku taalla.

    Bayaanka ayaa lagu sheegay in “horaantii maanta” ay ciidamada CENTCOM curyaamiyeen nidaamka hagista ee markabka Villanova oo sitay calanka Panama, kaas oo isku dayayay inuu “maro Gacanka Cumaan.”

    Sida bayaanka lagu sheegay, markabku wuxuu damacsanaa inuu jebiyo xannibaadda badda ee Maraykanku saaray isaga oo gaaraya dekedaha Iiraan. CENTCOM waxay sheegtay in “kadib markii shaqaalihii rayidka ahaa ee markabku ay iska dhega tireen digniino isdaba joog ah oo ay ciidamada Maraykanku siiyeen,” diyaarad nooca qumaatiga u kaca ah ee ciidamada badda Maraykanka, MH-60, ay markabka ku ridday “laba gantaal oo Hellfire ah oo lagu beegsaday qaybta matoorka markabka.”

    Sida ay CENTCOM sheegtay, ilaa Talaadada, 11-ka Agoosto, 55 markab oo ganacsi ayaa laga weeciyay jidkoodii, halka saddex markab oo aan u hoggaansamin amarada ciidanka

    Sii akhri

    Nafaqo-darrada carruurta Baydhabo oo aad looga dayrinayo

    Faahfaahin ka soo baxaysa weerar lagu dhintay oo Xuutiyiintu ka gaysteen Baabul Mandab

16. 11 Agoosto 2026Muxuu yahay xukunka maqanaha lagu rido, goormase la adeegsadaa?

    Kadib markii Maxkamadda Dambiyada ee Suuriya ay Talaadadii xukun dil ah oo maqanaha lagu riday ku xukuntay madaxweynihii hore ee Suuriya Bashar al-Assad iyo walaalkiis Maher al-Assad, iyada oo lagu eedeeyay dambiyo lagu tilmaamay dambiyo dagaal iyo dambiyo ka dhan ah bani’aadannimada ayaa la isweydiinayaa waxa uu xukunkani ka dhigan yahay iyo sida loo fulin karo.

    Marka hore, waa maxay xukunka maqanaha lagu rido?

    Waa xukun ay maxkamaddu soo saarto iyadoo eedaysanuhu ama dacwaysanuhu aanu joogin dhageysiga dacwadda, isla markaana aanu si shakhsi ah uga soo muuqan maxkamadda. Sharci ahaanshaha dacwadda iyo xukunkuna waxay ku xiran yihiin in la ilaaliyo dammaanadaha maxkamadayn caddaalad ah iyo xuquuqda difaaca ee uu dhigayo sharciga caalamiga ah ee xuquuqda aadanaha.

    Qodobka ugu muhiimsan ayaa ah in maqnaanshaha eedaysanuhu aanu ka dhigayn xukunka mid sharci-darro ah. Heerarka caalamiga ahi waxay oggol yihiin, xaalado gaar ah in dacwad lagu qaado qof maqan, balse waxay ku xiraan dammaanado ay ka mid yihiin in lagu wargeliyo eedaha iyo habraacyada dacwadda, in loo suurtogeliyo inuu is difaaco haddii ay suuragal tahay, iyo in uu jiro fursad wax ku ool ah oo uu racfaan uga qaadan karo xukunka ama dib loogu qaadi karo dacwadda si waafaqsan nidaamka sharci ee dalka.

    Sidee loo fuliyaa xukunka maqanaha lagu rido?

    Sida uu dhigayo sharciga caalamiga ah xukunka maqanaha lagu rido macnaheedu ma aha in ciqaabta isla markiiba la fulin karo. Fulintiisu waxay ku xiran tahay habraacyo sharci oo la xiriira kama dambaysnimada xukunka, suurtogalnimada in la qabto qofka la xukumay, heshiisyada iskaashiga garsoorka ee u dhexeeya dalalka, iyo waajibaadka ka dhasha sharciga caalamiga ah.

    Waxaa jira tallaabooyin kala duwan oo u dhexeeya marka xukunka la soo saaro iyo marka la fuliyo, haddii uu fulinba dhaco. Qodobada xiga ayaa sharxaya waxa dhici kara marka laga hadlayo kiiska Suuriya.

    Sii akhri

    Nafaqo-darrada carruurta Baydhabo oo aad looga dayrinayo

    Faahfaahin ka soo baxaysa weerar lagu dhintay oo Xuutiyiintu ka gaysteen Baabul Mandab

17. 11 Agoosto 2026War deg deg ah, Rezaei: "Heshiiska Cumaan ee Hormuz waxa uu ahaan doonaa mid ka baxsan xannibaadda marinka"

    Xoghayaha cusub ee Golaha Sare ee Amniga Qaranka Iiraan ayaa yiri: “Haddii Iiraan iyo Cumaan ay heshiis ka gaaraan marinka loo maro marin-biyoodka Hormuz, heshiiskaasi wuxuu noqon doonaa arrin ka duwan xannibaadda Marinka Hormuz".

    Mohsen Rezaei ayaa Tehran kula kulmay safiirka Shiinaha, wuxuuna sheegay: “Marinka Hormuz ma furmi doono illaa uu Maraykanku beddelo hab-dhaqankiisa oo uu aqbalo shuruudaha Iiraan".

    Sarreeye Gaas Rezaei ayaa yiri: “Maraykanku waa inuu soo afjaraa dagaalka, Iiraanna uu dib ugu celiyo lacagaha ay ku leedahay ee la xannibay, dagaalkuna waa inuu ka dhammaadaa gobolka oo dhan, oo ay ku jiraan Lubnaan iyo Gaza".

    Waxa uu sidoo kale sheegay in shuruudo kale loo gudbiyay Maraykanka iyada oo loo sii marayo dhexdhexaadiyayaal.

18. 11 Agoosto 2026War deg deg ah, Xogo dheeraad ah oo kasoo baxaya weerarkuu Xuutiyiinta ku qaadayn markab marayey Baabal mandab

    Ilaalada Xeebaha Yemen ayaa sheegay in weerarro loo aaneynayo Xuutiyiinta ay taageerto Iiraan oo lagu qaaday markab xamuul ah oo ku dhow marinka Baab al-Mandab ay ku dhinteen ugu yaraan lix qof.

    Weerarradan ayaa ah kuwii ugu dambeeyay ee taxane hawlgallo dhimasho sababay oo lagu qaaday maraakiib ganacsi oo marayay halka laga galo Badda Cas, tan iyo markii Xuutiyiintu ku dhawaaqeen go’doomin badeed oo ka dhan ah Sacuudi Carabiya.

    Ilaalada Xeebaha Yemen oo hoos tagta dowladda Yemen ee beesha caalamku aqoonsan tahay ayaa sheegtay in afarta ka mid ah dadka dhintay ay ahaayeen shaqaale saarnaa markabka xamuulka.

    Sida lagu sheegay warbixinta, laba ka mid ah ciidamada loo diray inay fuliyaan hawlgallada samatabbixinta iyo daadgureynta dadka saarnaa markabka ayaa sidoo kale ku dhintay weerarka.

19. 11 Agoosto 2026Mas’uuliyiinta gobolka Tigray oo ku eedeeyay dowladda Itoobiya weerarro deegaanka ka dhacay

    Mas’uuliyiinta gobolka Tigray ee Itoobiya ayaa ku eedeeyay dowladda federaalka inay fulisay weerarro diyaaradaha aan duuliyaha lahayn, kuwaas oo la sheegay inay ku dhinteen saddex askari.

    Waxay sheegeen in weerarradii dhacay Isniintii ay ka dhaceen iskuul ku yaalla Merewa, halkaas oo ay ciidamo Tigray ah ku sugnaayeen.

    Guddoomiyaha deegaanka ayaa BBC u sheegay in weerarrada lagu qaaday iskuulka iyo webi ku dhow ay sidoo kale dileen qof rayid ah, halka afar qof oo kale ay ku dhaawacmeen.

    Mas’uuliyiinta Tigray ayaa weerarrada ku tilmaamay “xaalad si weyn u sii cakriraysa”, iyadoo ay sii kordhayaan walaacyada laga qabo in colaaddii hore dib u soo cusboonaato.

    Dowladda Itoobiya weli kama aysan hadlin eedeymahan.

    Maamulka Tigray iyo dowladda uu hoggaamiyo Ra’iisul Wasaare Abiy Axmed ayaa midba midka kale ku eedeynaya inuu ku guuldarreystay hirgelinta heshiiskii nabadeed ee 2022, kaas oo soo afjaray dagaal sokeeye oo muddo socday, isla markaana sababay khasaare ba’an.

20. 11 Agoosto 2026War deg deg ah, Ciidanka Pakistan oo howlgal ku dilay dagaalyahanno hubeysnaa

    Waaxda Xiriirka Dadweynaha ee Ciidanka Pakistan ayaa sheegtay in ciidamada ammaanka ay 10-kii Agoosto 2026 howlgal ku salaysan xog sirdoon ka fuliyay degmada Panjgur ee gobolka Balochistan, halkaas oo ay ku dileen shan dagaalyahan.

    Sida lagu sheegay qoraalka ISPR, howlgalka ayaa qayb ka ahaa hawlgallada socda ee ka dhanka ah argagixisada, kuwaas oo looga golleeyahay in gobolka laga hirgeliyo nabad waarta.

    War-saxaafadeedka ayaa sidoo kale lagu sheegay in ciidamada ammaanka ay howlgalka ku qabteen hub, rasaas iyo walxaha qarxa oo ay ku jiraan qaraxyada IED-yada. Qadar badan oo agab ah ayaa sidoo kale la helay, kaddibna la burburiyay.