د امریکا متحده ایالاتوپوځ وایي، په منځني
ختیځ کې یې پر امریکایي
ځواکونو د ایران د ناڅاپي برید د هڅې په غبرګون کې د هوايي بریدونو لړۍ پیل
کړې ده. د امریکا
د مرکزي قوماندانۍ (سینټکام) په وینا، دا بریدونه د سې شنبې په ورځ په اردن کې پر امریکایي
اډو او د هرمز تنګي په سیمه کې پر بېړیو د ایران د بریدونو ''پیاوړی ځواب'' دی.
دغه تازه
نښتې یوه ورځ وروسته له هغې رامنځته شوې چې جګړه نوره هم پراخه شوه او امریکا او سعودي
عربستان په ښکاره ډول خپل ګډ بریدونه اعلان کړل. په دغو بریدونو کې په عراق کې د ایران
ملاتړي ډلې په نښه شوې وې.
کله چې
امریکا او اسرائیل
د فبرورۍ په میاشت کې پر ایران پوځي بریدونه وکړل، ډونلډ ټرمپ ویلي وو چې جګړه به یوازې
څو اوونۍ دوام وکړي، خو اوس پنځه میاشتې تېرې شوې او د پای کومه نښه نه لیدل کېږي.
دې شخړې په داسې
حال کې بیا زور اخیستی چې په روانه اوونۍ کې څو ورځې نسبي ارامي وه.
د څو ورځو
لپاره دواړو خواوو خپل بریدونه درولي وو، ځکه داسې ښکارېده چې د یوه دیپلوماتیک
حل لپاره خبرې بیا پیل شوې دي. ټرمپ دغه خبرې ''ډېرې دوستانه مذاکرې'' بللې وې، خو تهران
د هر ډول خبرو ترسره کېدل رد کړي وو.
د چهارشنبې
په ورځ، له اعلان شويو
بریدونو څو ساعته وړاندې، ټرمپ ژمنه وکړه چې د امریکایي ځواکونو پر ضد د ایران د تېرې
ورځې د برید د هڅې غچ به واخلي.
د امریکا
ولسمشر په سپینه ماڼۍ کې خبریالانو ته وویل:
''موږ
به پر هغوی ډېر سخت برید وکړو، ځکه اوس زموږ وار دی چې ګوزار ورکړو. هغوی پوهېږي
چې دا برید را روان دی. هغوی له موږ وغوښتل چې دا کار ونه کړو.''
د ایران
د اسلامي انقلاب ساتونکو ځواکونو (سپاه پاسداران) ویلي چې په اردن کې یې یوه امریکایي
هوايي اډه او یو د قوماندې مرکز ''د
امریکايي یرغلګرو ځواکونو د اقداماتو په ځواب کې'' په نښه کړي دي.
سپاه پاسداران دغه رازویلي چې
د دوی سمندري ځواکونو په هرمز تنګي
کې درې د تېلو لېږدونکې بېړۍ په نښه کړې دي، ځکه د دوی په وینا دغو بېړیو خبرداری له
پامه غورځولی او د خلیج له یوې ''ناامنې او غیرقانوني لارې'' تېرېدې.
