Duilgheadas fastaidh a' cur maill air FtMG an Loch Àlainn

Tha Comhairle na Gàidhealtachd ag ràdh gu bheil iad a' leantainn orra le oidhirp gus làn Fhoghlam tro Mheadhan na Gàidhlig a stèidheachadh ann am Bun-sgoil Loch Àlainn, a dh'aindeoin duilgheadas le tidsear fhastadh.

Bha an t-ùghdarras ionadail air iarrtas fhaighinn bho phàrantan bho thùs san t-Samhain 2023.

Às dèidh dhaibh measadh a dhèanamh, dh'aontaich a' chomhairle FtMG a chur air dòigh san sgoil bhon Lùnastal 2025.

Ged a tha a' chomhairle ag ràdh gu bheil triùir sgoilearan eadar P1 is P2 a-nise ann am FtMG ann an Loch Àlainn, thuirt iad nach deach aca air tidsear fhastadh fhathast, a dh'aindeoin is gun deach "sreath de shanasan" a-mach.

Tha aithisg a thèid air beulaibh Comataidh na Gàidhlig an ath-sheachdain, taobh a-muigh ag ràdh gu bheil seo "na dhùbhlan mòr" a thaobh FtMG a thoirt seachad.

Tha an aithisg ag ràdh gu bheil sgioba-stiùiridh Bun-sgoil Àth Tharracail, far an deach FtMG a stèidheachadh roimhe, air a bhith a' cumail taic ris an oidhirp aonad a chur air dòigh ann an Loch Àlainn.

Tha clann Loch Àlainn air a bhith a' faighinn Gàidhlig bho thidsearan-ionaid FtMG a tha ag obair san sgoil pàirt-ùine, a thuilleadh air taic bho sgioba thràth-bhliadhnaichean na comhairle is pàrantan le Gàidhlig, tursan a dh'aonad Gàidhlig Àth Tharracail, is ionnsachadh air-loidhne.

Tha an aithisg ag ràdh gu bheil na ceumanan seo a' sealltainn mar a tha iad a' feuchainn ri FtMG maireannach a chur air dòigh.

Tha a' chomhairle ag ràdh gum bi oifigich is ceannard na sgoile a' coinneachadh ri pàrantan gu cunbhalach gus fios a chumail riutha a thaobh mar a tha a' dol leis an oidhirp tidsear fhastadh.