Naidheachdan 11:00m
Cosgaisean cumhachd
Thuirt a' bhuidheann Cornwall Insight, a tha a' cumail sùil air margaidh a' chumhachd, gu bheil dùil ri àrdachadh an ceathramh cuid san Fhaoilleach ann am prìsean gas 's dealain. Bheireadh àrdachadh ann an cuibhreachadh Ofgem an Alba, Sasainn agus sa Chuimhrigh cosgaisean dhan ìre as motha bho 2023. Bhiodh dachaidh sa chumantas a' cleachdadh gas agus dealain a' pàigheadh faisg air £2,200 sa bhliadhna.
An Atmhorachd
Chaidh an ro-shealladh sin air prìs a' chumhachd fhoillseachadh goirid an dèidh nam figearan oifigeil sa mhadainn an-diugh a dh'innis gun deach ìre na h-atmhorachd suas gu 3.6% san Dàmhair bho 3.5% air a' mhìos ron sin. Thuirt Oifis nan Staitistig Nàiseanta gun do chuir prìs a' chonnaidh ris an àrdachadh sin.
Bochdainn
Thuirt luchd-rannsachaidh aig Oilthigh Shrath Chluaidh gum feum poileasaidh Riaghaltas na h-Alba prìomhachas a thoirt do theaghlaichean ann am fìor bhochdainn. Tha an aithisg ag ràdh gu bheil cunnart ann gur iad clann san t-suidheachadh sin as coltaiche fulang le trioblaidean slàinte corparra agus inntinne. Thuirt Rùnaire a' Cheartais Shòisealta, Shirley-Anne Somerville, gu bheil cur às do bhochdainn cloinne na phrìomh amas aca ach dh'aidich i gu bheil barrachd obrach a dhìth mus tachair sin.
An t-Aonadh Eòrpach
Dh'iarr David Lammy, a bha na rùnaire cèin, air na Làbaraich iad gealltainn aig an ath-thaghadh Breatainn a thilleadh dhan Aonadh Eòrpach. Thuirt e gu bheil Breatainn nas miosa dheth le Brexit agus nach toir dad ach làn bhallrachd san EU fàs agus tèarainteachd dhan dùthaich. Tha luchd-taice Bhrexit a' fàgail air an riaghaltas gu bheil iad a' trèigsinn deamocrasaidh agus buil an referendum ann an 2016. Coinnichidh am Prìomhaire Andy Burnham ri ceannardan an EU sa Bhruiseal Dihaoine.
Caidreachas Poileas Alba
Tha Caidreachas Poileas Alba ag ràdh gu bheil an t-seirbheis ann an èiginn an dèidh ùine de chaomnadh airgid agus gluasad air falbh bho riaghladh ionadail. Tha an caidreachas a' cur iomairt air bhonn agus a' togail fianais aig Holyrood an-diugh ro bhuidseat na h-Alba an ath-sheachdain. Thuirt Rùnaire a' Cheartais, Neil Gray, gun do chuir Riaghaltas na h-Alba an t-suim as motha fhathast, còrr 's £1.7bn, ri seirbheis nam poileas am-bliadhna.
Foghlam Gàidhlig an Cataibh
Tha aithisg aig Comataidh na Gàidhlig aig Comhairle na Gàidhealtachd an-diugh a' moladh Foghlam tro Mheadhan na Gàidhlig a thilleadh a Chataibh. Tha mu 10 bliadhna ann bho dhùin an t-aonad Gàidhlig a bha ann an Drochaid a' Bhanna ach tha dòchas ann gun tèid foghlam Gàidhlig a stèidheachadh ann an Cataibh a-rithist an dèidh iarratas bho phàrantan anns an Luirg.
Mèirle Cripto
Chaidh fear à Dùn Dè a chur dhan phrìosan airson sia bliadhna sna Stàitean Aonaichte airson a phàirt ann am mèirle mhòr ann an airgead cripto. Thuirt luchd-casaid gun robh Tyler Buchanan, a tha 24 bliadhna a dh'aois, ann am buidheann a ghoid còrr 's $11m de dh'airgiod chripto bho chompanaidhean air feadh nan Stàitean Aonaichte.