ॲलर्जीवरील ही गोळी घेतल्याने महिलांची लैंगिक इच्छा वाढते का? डॉक्टरांनी दिला 'हा' इशारा

केनियाच्या फार्मास्युटिकल सोसायटीने महिलांना गुप्तांगांमध्ये सेट्रीझिनची गोळी ठेवू नये, असा इशारा दिला आहे.
फोटो कॅप्शन, केनियाच्या फार्मास्युटिकल सोसायटीने महिलांना गुप्तांगांमध्ये सेट्रीझिनची गोळी ठेवू नये, असा इशारा दिला आहे.
    • Author, वायक्लिफ मुइया
    • Role, बीबीसी न्यूज
  • Published
  • वाचन वेळ: 4 मिनिटे

महिलांच्या आरोग्याशी संबंधित एक सल्ला सध्या सोशल मीडियावर वेगाने व्हायरल होत आहे. मात्र, हा प्रकार धोकादायक असल्याचा इशारा केनियातील आरोग्यतज्ज्ञांनी दिला आहे.

महिलांच्या आरोग्याशी संबंधित व्हायरल होत असलेल्या या पोस्टमध्ये असा दावा करण्यात आला आहे की, ॲलर्जीवरील सेट्रीझिन ही गोळी महिलांच्या गुप्तांगामध्ये ठेवल्याने योनी घट्ट होते आणि लैंगिक संबंधादरम्यान आनंद वाढतो. मात्र, तज्ज्ञांच्या मते या औषधाचा अशा प्रकारे वापर करण्यास कोणतीही मान्यता नाही. तसेच, त्याच्या सुरक्षिततेची चाचणीही झालेली नाही.

केनियाच्या फार्मास्युटिकल सोसायटीने महिलांना त्यांच्या गुप्तांगामध्ये सेट्रीझिनची गोळी न ठेवण्याचा इशारा दिला आहे.

सेट्रीझीन हे ॲलर्जीवरील एक सामान्य औषध आहे. शिंका येणे, नाक वाहणे, डोळ्यांना खाज येणे, अंगावर पित्त उठणे अशा समस्यांपासून आराम मिळवण्यासाठी याचा उपयोग केला जातो. हे औषध तोंडावाटे घेण्यासाठी तयार करण्यात आले आहे.

हा व्हायरल ट्रेंड कसा सुरू झाला?

या आठवड्याच्या सुरुवातीला टिकटॉकवर सेट्रीझिनच्या वापराशी संबंधित अनेक पोस्ट व्हायरल झाल्यानंतर या वादाला सुरुवात झाली.

या पोस्टमध्ये असा दावा करण्यात आला होता की, या औषधामुळे महिलांच्या गुप्तांगातील ओलावा कमी होऊ शकतो. त्यामुळे लैंगिक संबंधादरम्यान अधिक घट्टपणा जाणवतो.

अँटीहिस्टामिन औषधांमुळे काही वेळा शरीरातील ओलावा कमी होऊन कोरडेपणा निर्माण होऊ शकतो. मात्र, यामुळे गुप्तांगांमधील स्नायू मजबूत होत नाही, असं तज्ज्ञांनी स्पष्ट केलं आहे.

केनियाच्या फार्मास्युटिकल सोसायटीने (PSK) म्हटलं, "सेट्रीझिनमुळे घट्टपणा येत नाही. उलट, त्याच्या वापरामुळे घर्षण, अस्वस्थता आणि शरीराच्या नाजूक अंतर्गत भागांना दुखापत होण्याचा धोका वाढू शकतो."

"तोंडावाटे घेण्यासाठी तयार केलेल्या गोळ्या गुप्तांगांमध्ये ठेवणं सुरक्षित नाही. सेट्रीझिनच्या गोळ्या तोंडावाटे घेण्यासाठी तयार करण्यात आल्या आहेत. त्यातील घटकांचा शरीराच्या संवेदनशील भागांवर वापर करण्याच्या दृष्टीने चाचणी करण्यात आलेली नाही," असंही संस्थेनं नमूद केलं.

व्हायरल दाव्यावरून सोशल मीडियावर चर्चांना उधाण

सोशल मीडियावर हा दावा व्हायरल झाल्यानंतर त्यावरून मोठ्या प्रमाणात चर्चेला सुरुवात झाली.

काही सोशल मीडिया युजर्स याचे समर्थन करत आहेत, तर काही जण त्याच्या सुरक्षिततेवर प्रश्नचिन्ह उपस्थित करत आहेत.

स्थानिक प्रसारमाध्यमांनी दिलेल्या वृत्तानुसार, सेट्रीझिनच्या किमतीतही वाढ झाली आहे. विशेषतः केनियाची राजधानी नैरोबी येथील काही औषधांच्या दुकानांमध्ये या औषधाची मागणी वाढल्याचं वृत्त आहे.

केनियातील फार्मासिस्टांचे प्रतिनिधित्व करणाऱ्या पीएसके या संस्थेने या औषधाच्या वापराबाबत इशारा दिला आहे.
फोटो कॅप्शन, केनियातील फार्मासिस्टांचे प्रतिनिधित्व करणाऱ्या पीएसके या संस्थेनं या औषधाच्या वापराबाबत इशारा दिला आहे.

केनियातील औषध विक्रेत्यांचे प्रतिनिधित्व करणाऱ्या पीएसके या संस्थेने गुरुवारी (12 नोव्हेंबर) जारी केलेल्या निवेदनात म्हटलं, "सेट्रीझिन हे ॲलर्जीवरील औषध असून ते तोंडावाटे घेतलं जाते. इतर कोणत्याही कारणासाठी त्याच्या वापराला मान्यता देण्यात आलेली नाही किंवा त्यासंदर्भात चाचण्याही करण्यात आलेल्या नाहीत. विशेषतः प्रायव्हेट पार्टमध्ये त्याचा वापर करण्यासाठी तर अजिबातच नाही."

संस्थेने महिलांना सल्ला देत म्हटलं, "तुम्ही यापूर्वीच अशा प्रकारे या औषधाचा वापर केला असेल, तर तो त्वरित थांबवा. तुम्हाला वेदना, रक्तस्राव, जळजळ, खाज, असामान्य स्राव किंवा ताप येत असल्यास डॉक्टरांचा सल्ला घ्या."

पीएसकेने सोशल मीडिया इन्फ्लुएन्सर्स आणि काँटेंट क्रिएटर्सनादेखील आरोग्यविषयक माहिती शेअर करताना सावधगिरी बाळगण्यास आवाहन केलं आहे.

तपासणी न केलेले दावे लोकांच्या आरोग्यासाठी धोकादायक ठरू शकतात, असंही संस्थेनं म्हटलं आहे.

आरोग्य मंत्रालयानंही व्यक्त केली चिंता

केनियाच्या आरोग्य मंत्रालयाने व्हायरल ट्रेंडबद्दल चिंता व्यक्त केल्यानंतर दुसऱ्याच दिवशी फार्मासिस्ट संघटनांनीही आरोग्याबाबत सावधगिरीचा इशारा दिला.

आरोग्य विभागाचे वरिष्ठ अधिकारी ओमा ओलुगा म्हणाले की, काही सोशल मीडिया वापरकर्ते तज्ज्ञांचा वैद्यकीय सल्ला गांभीर्याने घेत नाहीत आणि संभाव्य परिणामांकडे दुर्लक्ष करत असल्याचे दिसून येत आहे.

यामुळे औषधांच्या खरेदी-विक्रीवर लक्ष ठेवण्यासाठी एक प्रणाली यंत्रणा सुरू करण्याचा विचार अधिकारी करू शकतात, असंही त्यांनी सुचवलं.

यामुळे ज्या औषधांचा गैरवापर होत आहे, त्यांची ओळख पटवण्यास मदत होऊ शकते. मात्र, अशी कोणतीही यंत्रणा सुरू करण्याबाबत अद्याप कोणताही औपचारिक निर्णय घेण्यात आलेला नाही.

औषधाच्या वाढत्या मागणीमुळे चिंता

सेट्रीझिनची मागणी आणि किंमत वाढत असल्याच्या वृत्तांची आपल्याला माहिती असल्याचं पीएसकेने म्हटलं आहे. तसेच, काही औषधांच्या दुकानांमध्ये या औषधाचा तुटवडाही निर्माण झाल्याचं वृत्तही समोर आलं आहे.

या व्हायरल ट्रेंडचा गैरफायदा घेऊ नये, असं आवाहन संस्थेने औषध विक्रेत्यांना केलं आहे.

औषधाची मागणी अशीच वाढत राहिली, तर ज्या लोकांना ॲलर्जीवर उपचार करण्यासाठी खरोखरच सेट्रीझिनची गरज आहे, त्यांना हे औषध मिळणे कठीण होऊ शकते, असा इशाराही संस्थेने दिला आहे.

सेट्रीझिनची मागणी अशीच वाढत राहिली, तर ज्यांना खरोखरच या औषधाची गरज आहे, त्यांना ते मिळणे कठीण होऊ शकते, असा इशारा देण्यात आला आहे.
फोटो कॅप्शन, सेट्रीझिनची मागणी अशीच वाढत राहिली, तर ज्यांना खरोखरच या औषधाची गरज आहे, त्यांना ते मिळणे कठीण होऊ शकते, असा इशारा देण्यात आला आहे.

औषधांचा गैरवापर होण्याची शक्यता असल्यास जाणीवपूर्वक अशी औषधे विकू नयेत, असं आवाहनही पीएसकेने आपल्या सदस्यांना केलं आहे.

औषधाचा चुकीचा वापर झाल्यामुळे आरोग्यावर दुष्परिणाम झाले असतील, तर त्याविषयीची माहितीदेखील आरोग्य अधिकाऱ्यांना देण्याचं आवाहन करण्यात आलं आहे.

सोशल मीडियावर व्हायरल होणाऱ्या तसेच कोणतीही खात्री न केलेल्या उपायांपेक्षा तज्ज्ञांच्या सल्ल्याला अधिक महत्त्व दिलं पाहिजे, असं पीएसकेने जाहीर केलेल्या निवेदनाच्या शेवटी म्हटलं आहे.

तसेच, "एखाद्या औषधाचा वापर ते ज्या कारणासाठी तयार केलं आहे, ते सोडून इतर दुसऱ्याच कारणासाठी करण्यापूर्वी फार्मासिस्टचा सल्ला घ्या, वैद्यकीय सल्ल्यासाठी सोशल मीडियावर अवलंबून राहू नका", असंही आवाहन पीएसके संस्थेनं केलं आहे.

(बीबीसीसाठी कलेक्टिव्ह न्यूजरूमचे प्रकाशन)