अजित पवार मृत्यू प्रकरण : रोहित पवार यांनी देवेंद्र फडणवीस यांच्यावर काय आरोप केले?

फोटो स्रोत, x@RRPSpeaks
अजित पवार यांच्या मृत्यूनंतर त्यांचे पुतणे आणि राष्ट्रवादी काँग्रेस (शरद पवार गट) पक्षाचे आमदार रोहित पवार सातत्यानं पत्रकार परिषद घेत, 'अजित पवार यांचा मृत्यू अपघात होता की घातपात?' असा प्रश्न उपस्थित करत आले आहेत.
मात्र, आज (16 नोव्हेंबर) रोहित पवार यांनी मुंबईत घेतलेल्या पत्रकार परिषदेत महाराष्ट्राचे मुख्यमंत्री देवेंद्र फडणवीस यांचे VSR कंपनीचे मालक व्ही. के. सिंह यांच्याशी संबंध असल्याचे सांगत, काही गंभीर आरोप केले.
"मुख्यमंत्री देवेंद्र फडणवीस यांचे व्ही.के.सिंह यांच्याशी मैत्रीपूर्ण संबंध असून, ते VSR कंपनी आणि व्ही. के. सिंह यांना वाचवण्याचा प्रयत्न करत आहेत," असा आरोप रोहित पवारांनी केला.
या अपघात किंवा घातपातामध्ये देवेंद्र फडणवीस यांचा थेट काहीही संबंध नसल्याचंही रोहित पवारांनी स्पष्ट केलं. मात्र, फडणवीसांना VSR कंपनी आणि व्ही.के.सिंह यांना वाचवण्याचा प्रयत्न केल्याचंही त्यांनी म्हटलं.
दरम्यान, या प्रकरणी भाजपचे मुख्य प्रवक्ते नवनाथ बन यांनी प्रतिक्रिया दिली असून, रोहित पवारांनी प्रसिद्धीसाठी हे आरोप केले असल्याचं सांगत, सर्व आरोप फेटाळून लावले आहेत.
VSR कंपनीकडून रोहित पवारांनी आज (16 नोव्हेंबर) केलेल्या आरोपांवर अद्याप कोणतीही प्रतिक्रिया दिलेली नाहीय. VSR कंपनीने प्रतिक्रिया दिल्यानंतर ती इथे अपडेट करण्यात येईल.
विधान परिषद आमदार प्रसाद लाड यांनी राष्ट्रवादी काँग्रेस (शरद पवार गट) पक्षाचे अध्यक्ष शरद पवार यांना खुले पत्र लिहून पक्षाची अधिकृत भूमिका स्पष्ट करण्याची मागणी केली आहे. रोहित पवार यांनी मांडलेली भूमिका ही पक्षाची अधिकृत भूमिका आहे की वैयक्तिक मत, याबाबत पक्ष नेतृत्वाने स्पष्टपणे भूमिका मांडावी, अशी मागणी त्यांनी केली आहे.
पत्रात प्रसाद लाड यांनी मुख्यमंत्री देवेंद्र फडणवीस यांच्याविरोधात करण्यात आलेल्या आरोपांबाबतही प्रश्न उपस्थित केले आहेत. कोणत्याही घटनेची निष्पक्ष चौकशी होणे आवश्यक असले तरी पुरावे समोर येण्यापूर्वी राज्याच्या मुख्यमंत्र्यांच्या प्रतिमेवर संशय निर्माण करणारे आरोप करणे योग्य आहे का, असा सवाल त्यांनी उपस्थित केला आहे. जर रोहित पवार यांच्या वक्तव्याशी पक्ष सहमत नसेल तर त्याचे स्पष्ट खंडन करावे आणि सहमत असेल तर त्याला अधिकृत पाठिंबा असल्याचे जाहीर करावे, अशी अपेक्षा प्रसाद लाड यांनी व्यक्त केली आहे.
बारामतीच्या खासदार सुप्रिया सुळे यांनी आज यावर प्रतिक्रिया दिली आहे. त्या म्हणाल्या, "रोहित आणि दादांचं नातं प्रेमाचं होतं. त्यामुळे काही प्रश्नांची उत्तरं हवी असतील. काल मुख्यमंत्र्यांनी याबाबत केंद्रीय गृहमंत्री यांना याच्या चौकशीबद्दल विनंती केली आहे. या अपघातातील माहिती लवकरात लवकर बाहेर आणून देशाला आणि राज्याला मिळेल असा शब्द मुख्यमंत्र्यांनी दिला आहे अशा बातम्या आज आल्या आहेत."
काल मुख्यमंत्र्यांनी देशाच्या गृहमंत्र्यांसमोर मागणी केलेली आहे त्यामुळे आपण अहवालाची वाट पाहू, असं सुप्रिया सुळे यांनी सांगितलं. आदरणीय पवार साहेबांनी कधीच कुणावर आरो-प्रत्यारोप केलेले नाहीत. प्रत्येकाची वेगळी शैली असते. काल मुख्यमंत्र्यांनी स्वतः चौकशीची मागणी केली आहे तर आपण अहवालाची वाट पाहायला हवी, असंही त्या म्हणाल्या.
देवेंद्र फडणवीस यांच्यावर काय आरोप केले आहेत?
रोहित पवारांनी या पत्रकार परिषदेत आज (16 नोव्हेंबर) व्हीएसआर कंपनी, कंपनीचे मालक व्ही. के. सिंह आणि इतरही काही जणांशी संबंधित अनेक आरोप केले. त्यात शेवटी त्यांनी मुख्यमंत्री देवेंद्र फडणवीस यांच्यावरही काही आरोप केले आहेत.
अजित पवारांचा मृत्यू झाला की घातपात? असा प्रश्न उपस्थित करत, रोहित पवार सातत्यानं तपासाची मागणी करत आहेत.
त्यात त्यांनी व्हीएसआर कंपनी आणि कंपनीचे मालक व्ही.के.सिंह, तसंच रोहित सिंह यांच्यावरही अनेक आरोप केले आहेत. पण त्यांच्यावर कोणतीही कारवाई होत नसल्यामुळं त्यांना पाठीशी घालणारा कोणीतरी मोठा नेता आहे, असं त्यांनी काही दिवसांपूर्वी सांगितलं होतं.
त्यानंतर रोहित पवारांनी एका मफलरचा फोटो पोस्ट करत महाराष्ट्रातला एक मोठा नेता यांना वाचवण्याचा प्रयत्न करत असल्याचा आरोप केला होता. आज (16 नोव्हेंबर) झालेल्या पत्रकार परिषदेत त्यांनी मफलर परिधान केलेला हा नेता देवेंद्र फडणवीस असल्याचं स्पष्ट करत त्यांना फोटो दाखवला.

फोटो स्रोत, x@RRPSpeaks
"देवेंद्र फडणवीस आणि व्हीएसआर कंपनीचे मालक व्ही.के.सिंग यांचे जवळचे संबंध असून त्यामुळेच त्यांना वाचवण्याचा प्रयत्न केला जात आहे. कदाचित ही कंपनी आणि त्यांचे मालक हे कोणत्या माध्यमातून आर्थिक मदत करत असतील," असा आरोपही रोहित पवारांनी यावेळी पत्रकार परिषदेत केला आहे.
"या प्रकरणात व्ही.के. सिंह यांचा 100 टक्के काहीतरी संबंध आहे. तुम्ही दादांचे मित्र आहात तर अशा लोकांना का भेटता? तुमचे व्ही. के. सिंह यांच्यासोबत असल्याने दादांवर अन्याय होऊ नये," असं रोहित पवार पत्रकारांशी बोलताना म्हणाले आहेत.
दरम्यान, फडणवीसांचा फोटो दाखवण्यापूर्वी रोहित पवारांनी अनेकदा देवेंद्र फडणवीस यांचा दादांच्या अपघात किंवा घातपाताशी कोणताही थेट संबंध असल्याचा आपला आरोप नाही हेही स्पष्ट केलं. केवळ व्हीएसआर कंपनी आणि त्यांच्या मालकांना काहीतरी संबंधांमुळं ते पाठीशी घालत असल्याचं त्यांनी वारंवार म्हटलं.
रोहित पवार यांनी यावेळी 4 एप्रिल 2026 रोजी झालेल्या एका भेटीचाही उल्लेख केला. मुख्यमंत्री देवेंद्र फडणवीस आणि व्ही. के. सिंह यांची पत्रकार रजत शर्मा यांच्या मुलाच्या लग्नात भेट झाल्याचा दावाही केला.
फडणवीसांचा याच्याशी संबंध नसेल तर त्यांनी व्हीएसआर आणि कंपनीच्या मालकांवर कारवाई करावी असं रोहित पवार म्हणाले.
दरम्यान, या प्रकरणी भाजपच्या अनेक नेत्यांनी स्पष्टीकरण देत आरोप फेटाळले असले तरी फडणवीस यांनी अद्याप यावर काहीही प्रतिक्रिया दिलेली नाही. फडणवीसांनी प्रतिक्रिया दिल्यानंतर इथे अपडेट करण्यात येईल.
रोहित पवारांना प्रसिद्धीची हाव - भाजप
दरम्यान रोहित पवारांच्या या आरोपांवर भाजपच्या नेत्यांनी प्रसिद्धीसाठी केलेला प्रकार असल्याचे आरोप केले आहेत.
"मुख्यमंत्री देवेंद्र फडणवीस यांच्यावर आमदार रोहित पवार यांनी केलेले आरोप अत्यंत खालच्या पातळीचे असून, ते केवळ प्रसिद्धीच्या हव्यासापोटी असे वक्तव्य करत आहेत. रोहित पवार यांनी आरोप करण्यापूर्वी स्वतःची राजकीय उंची लक्षात घ्यावी. प्रसिद्धीच्या हव्यासापोटी त्यांनी महाराष्ट्राच्या राजकीय संस्कृतीची प्रतिमा मलिन करू नये," अशा शब्दांत महसूलमंत्री तथा नागपूर व अमरावती जिल्ह्यांचे पालकमंत्री चंद्रशेखर बावनकुळे यांनी रोहित पवार यांच्यावर जोरदार टीका केली.
प्रसार माध्यमांशी बोलताना बावनकुळे म्हणाले की, "संबंधित विमान कंपनीच्या विमानातून राज्यातील जवळपास 90 टक्के नेत्यांनी प्रवास केला असेल. स्वतः रोहित पवार यांनीही अनेकदा या कंपनीच्या विमानातून प्रवास केला असून, त्यासंदर्भातील छायाचित्रे उपलब्ध आहेत. एखाद्या विमान कंपनीच्या विमानातून प्रवास केला म्हणजे त्या कंपनीशी संबंधित व्यक्तींशी राजकीय संबंध आहेत, असा अर्थ होत नाही. अशा प्रकारचे आरोप करणे म्हणजे अत्यंत खालच्या पातळीचे राजकारण आहे."
"केंद्रीय गृहमंत्री अमित शाह यांच्या हस्ते दिवंगत नेते अजित पवार यांच्या पुतळ्याचे अनावरण करण्यात आले. हा कार्यक्रम रोहित पवारांना आवडला नसावा आणि त्या कार्यक्रमाचे महत्त्व कमी करण्यासाठीच त्यांनी जाणीवपूर्वक अशा प्रकारचे आरोप केले असावेत," अशी शक्यताही बावनकुळे यांनी व्यक्त केली.
भाजपचे मुख्य प्रवक्ते नवनाथ बन यांनीही हे आरोप फेटाळले आहेत.
नवनाथ बन म्हणाले की, "आज स्व.अजितदादांच्या पुतळा अनावरणाचा कार्यक्रम होता. त्याचं महत्त्वं कमी व्हावं, म्हणून केलेला हा उपक्रम आहे, दुसरे काहीही नाही. रोहित सिंह आणि त्यांची व्हीएसआर कंपनी 2013 पासून राजकीय पक्षांना आणि राज्य सरकारला विमान सेवा देत आहे. त्यामुळे केवळ मुख्यमंत्री देवेंद्र फडणवीस यांनी नाही, तर अनेक राजकीय नेत्यांनी त्यांच्या विमानाने प्रवास केला आहे. केवळ रोहित सिंह यांच्याशी नाही, तर अनेक वैमानिकांसोबतही सार्याच नेत्यांचे जिव्हाळ्याचे संबंध आहेत."
"कुणाच्या लग्नाला जाणं, ही सामान्य बाब आहे. अनेक वैमानिक आणि सहवैमानिकांसोबत सार्याच नेत्यांचे फोटोही आहेत. एका फोटोवरुन असे आरोप करणे, हे अत्यंत खालच्या स्तराचे राजकारण आहे. रोहित पवारांनी आज जे केले, त्यातून त्यांनी ज्येष्ठ नेते शरद पवार साहेब यांचे संस्कार आणि महाराष्ट्राच्या प्रगल्भ राजकीय संस्कृतीला मातीत घातले आहे."

फोटो स्रोत, x@RRPSpeaks
बन पुढे म्हणाले की, "आमची अजून एक मागणी आहे की, रोहित पवार यांच्या या आरोपांबाबत राष्ट्रवादी काँग्रेस पक्ष (शरद पवार गट) आणि आदरणीय शरद पवार साहेबांनीही आपली भूमिका तातडीने स्पष्ट केली पाहिजे."
फडणवीस बारामतीत काय म्हणाले?
दरम्यान, बारामतीमध्ये आजच (16 नोव्हेंबर) अजित पवार यांच्या पुतळ्याचं अनावरण करण्यात आलं. या कार्यक्रमाला केंद्रीय गृहमंत्री अमित शहा आण मुख्यमंत्री देवेंद्र फडणवीस यांचीही उपस्थिती होती.
यावेळी बोलताना मुख्यमंत्री देवेंद्र फडणवीस यांनी अजित पवारांच्या मृत्यूच्या चौकशीच्या मुद्द्यावर भाष्य केलं होतं.
देवेंद्र फडणवीस म्हणाले, "अजित पवारांच्या मृत्यूनंतर काही चर्चा झाल्या आणि काही प्रश्न उपस्थित झाले. त्यानंतर जे घडलं ते नेमकं काय असे प्रश्न सामान्य लोकांना पडले आहेत. हा अपघात आहे की पाठिमागे काही घडलं आहे, याची स्पष्टता यावी अशी चर्चा महाराष्ट्रात होत आहे. त्यामुळं केंद्रीय गृहमंत्र्यांनी मी विनंती केली आहे."

फोटो स्रोत, @SunetraA_Pawar
"अजित पवारांच्या मृत्यूला 9-10 महिने होत आहेत. या प्रकरणाची एक मोठी चौकशी सुरू आहे. वेगवेगळ्या देशांचे लोकही चौकशी आणि त्यासाठी मदत करत आहेत. पण महाराष्ट्रातील सामान्य व्यक्तीच्या मनातील संभ्रम दूर झाला पाहिजे. त्यासाठी चौकशीचा अहवाल लवकरात लवकर आला पाहिजे. म्हणजे कोणी यात दोषी असेल तर त्याला फासावर लटकवता आलं पाहिजे. आणि जर हा अपघात असेल तर किमान सामान्य माणसाच्या आक्रोशावर फुंकर पडली पाहिजे यासाठी अमित शहांना विनंती केली," असं फडणवीस म्हणाले.
त्यावर स्वतः लक्ष घालून हा अहवाल लवकरात लवकर आणण्यात येईल, अशं आश्वासन अमित शहांनी दिलं असल्याचंही त्यांनी सांगितलं.
पुण्यातील हा पुतळ्याच्या अनावरणाचा कार्यक्रम रोहित पवारांच्या पत्रकार परिषदेच्या पूर्वी झाला होता.
VSR आणि व्ही. के. सिंह यांच्यावर काय आरोप केले?
रोहित पवार यांनी या पत्रकार परिषदेत व्हीएसआर कंपनी आणि कंपनीचे मालक व्ही. के. सिंह तसेच त्यांचा मुलगा रोहित सिंह यांच्याबाबतही अनेक प्रश्न उपस्थित करत आरोप केले.
या कंपनीच्या आर्थिक व्यवहारांवर प्रश्न उपस्थित करत त्यांच्या परदेशातील गुंतवणुकीबाबत आणि मालमत्तांबाबत त्यांनी पत्रकार परिषदेत माहिती दिली.
अजित पवार यांच्या मृत्यूनंतर दोन महिन्यांनी फ्लोरिडामध्ये सिंह यांनी सुमारे 18 कोटींचा बंगला खरेदी केला. तो बंगला खरेदी केला त्या व्यक्तीची गुन्हेगारी पार्श्वभूमी असल्याचा आरोप करत अशा गुन्हेगारी प्रवृत्तीच्या लोकांशी रोहित सिंह यांचे संबंध असल्याचा आरोप रोहित पवारांनी केला आहे.

फोटो स्रोत, x@RRPSpeaks
व्हीएसआरशी संबंधित 27 कंपन्यांमध्ये 868 कोटी रुपयांचे रोख व्यवहार झाले असूनही ईडी यावर कारवाई करत नसल्याचा आरोप त्यांनी केला. तसंच काही चॅट दाखवत सिंह हे विमानातून मोठ्या प्रमाणात सोने वाहून नेण्यासंदर्भात कुणाशी तरी चर्चा करत असल्याचा आरोपही त्यांनी केला.
या सगळ्यांची चौकशी होणं गरजेचं असल्याचं रोहित पवार यांनी म्हटलं आहे.
दरम्यान, रोहित पवारांनी सोमवारी केलेल्या आरोपांवर व्हीएसआर कंपनी किंवा व्ही. के. सिंह आणि रोहित सिंह यांच्याकडूनही काही प्रतिक्रिया समोर आलेली नाही. प्रतिक्रिया आल्यानंतर ती याठिकाणी अपडेट केली जाईल.
सुनेत्रा पवार, पार्थ यांना भावनिक आवाहन
रोहित पवार यांनी यावेळी सुनेत्रा पवार आणि पार्थ पवार यांनाही या प्रकरणावर भूमिका घेण्याचं आवाहन केले. अजित पवार यांच्या मृत्यूबाबत मनात काही शंका असतील तर त्यांनीही पुढे येण्याची गरज आहे, असं रोहित पवार म्हणाले.
"सत्ता येते-जाते, मात्र गेलेला माणूस परत येत नाही," असं म्हणत रोहित पवारांनी भावनिक आवाहन केलं.
"या लढ्याची मला मोठी राजकीय किंमत मोजावी लागू शकते आणि कुटुंबीयांनाही याची चिंता असल्याचं रोहित पवार म्हणाले. पण अजित पवार यांच्या मृत्यूला जबाबदार असणारा कोणीही असला तरी त्याला सोडणार नाही," असं रोहित पवार म्हणाले.
"काकांनाच न्याय मिळवून देऊ शकत नसेल, तर सामान्य माणसाला न्याय कसा मिळणार?" असा सवाल करत रोहित पवार यांनी या प्रकरणाचा निष्पक्ष तपास आणि संबंधित आर्थिक व्यवहारांचे फॉरेन्सिक ऑडिट करण्याची मागणी केली.

फोटो स्रोत, @SunetraA_Pawar
अनेक जुने प्रश्न कायम
रोहित पवार यांनी घेतलेल्या पत्रकार परिषदेमध्ये अजित पवार यांच्या मृत्यूला साडेनऊ महिने उलटूनही या प्रकरणात गुन्हा दाखल झालेला नसल्याच्या मुद्द्यावर जोर देण्यात आला.
या प्रकरणी आतापर्यंत वेगवेगळ्या प्रकारची माहिती तपास यंत्रणांना देऊनही पुढं काही झालं नाही, सीआयडी काहीही काम करत नाही, असा आरोप रोहित पवार यांनी केला आहे.
आतापर्यंतच्या तपासात अनेक प्रश्न अनुत्तरित आहेत. त्यामुळं व्हीएसआर (VSR) कंपनीला कोण वाचवत आहे आणि त्यामागे कोणत्या राजकीय व्यक्तींचा हात आहे? असे प्रश्न पुन्हा एकदा त्यांनी उपस्थित केले.
रोहित पवार यांनी यावेळी त्यांच्या आधीच्या पत्रकार परिषदांमध्ये करण्यात आलेले मुद्देही उपस्थित केले.
अजित पवार यांच्या विमान प्रवासाबाबत ऐनवेळी झालेले बदल, काही नेत्यांच्या भेटीसाठी त्यांना थांबावं लागणं, विमानाचा रनवे बदलला, विमान कमी उंचीवर आलं या मुद्दयांचा तपास यंत्रणा विचार करत नसल्याचं ते म्हणाले.
विमानाचा ब्लॅक बॉक्स जळाला आणि तो पुन्हा मिळवता येणार नसल्याचं स्वीकारण्यात आल्याचा उल्लेख त्यांनी केला. सरकार कोणताही एफआयआर दाखल करत नसल्याच्या मुद्द्यावरूनही त्यांनी गंभीर प्रश्न केले.
(बीबीसीसाठी कलेक्टिव्ह न्यूजरूमचे प्रकाशन.)

























