मुलीच्या लग्नाला 4 लाख पाहुणे येणार असल्याचा दावा करणारे अनंत सिंह किती कोटींचे मालक आहेत?

फोटो स्रोत, ANI
- Author, सीटू तिवारी
- Role, बीबीसी प्रतिनिधी
- Published
- वाचन वेळ: 6 मिनिटे
बिहारमधील मोकामा मतदारसंघाचे आमदार अनंत सिंह यांची मुलगी शिवांगी हिचा विवाह 25 नोव्हेंबरला होणार आहे. हा विवाह अनंत सिंह यांच्या नदवां (बाढ) या मूळ गावी होणार आहे.
नदवां हे गाव पाटणा शहरापासून साधारण 65 किलोमीटर अंतरावर आहे. या विवाहाला सुमारे 4 लाख पाहुणे येतील, असा दावा स्वतः अनंत सिंह यांनी केला आहे. सध्या लग्नाची जय्यत तयारी सुरू आहे.
अनंत सिंह यांनी विवाहाबद्दल सांगितलं, "4 लाख पाहुणे तर सुरुवातीचा आकडा आहे. यापेक्षा जास्त लोक आले तरी त्यांच्याही जेवणाची व्यवस्था केली जाईल. या लग्नाचं निमंत्रण आम्ही भारत आणि पाकिस्तानमधील लोकांनाही पाठवलं आहे."
या विवाहानिमित्त घोड्यांच्या शर्यतीचेही आयोजन करण्यात येणार आहे. या शर्यतीत जिंकणाऱ्याला थार गाडी बक्षीस म्हणून दिली जाणार आहे. अनंत सिंह यांच्या पत्नी नीलम देवी यांनी स्वतः सोशल मीडियावर या शर्यतीची घोषणा केली होती. त्यानंतर अनंत सिंह यांनीही या वृत्ताला दुजोरा दिला होता.
'लग्नासाठी तिकीट नाही, सर्वांनी यावं'
अनंत सिंह आपले जावई ऋषिकेश यांना महागडी गाडी भेट देणार असल्याचीही चर्चा आहे. परंतु, ऋषिकेश यांचे वडील रणविजय कुमार यांनी याबाबत आपल्याला काहीही माहिती नसल्याचं प्रसारमाध्यमांना सांगितलं.
ऋषिकेश हे पाटणा जिल्ह्यातील बिहटा येथील कृष्णा नगरचे रहिवासी आहेत. त्यांच्या कुटुंबीयांनी दिलेल्या माहितीनुसार, ऋषिकेश यांनी अमेरिकेतून एमबीएचं शिक्षण पूर्ण केलं आहे.
मिश्किल वक्तव्यांसाठी प्रसिद्ध असलेल्या अनंत सिंह यांना पत्रकार वारंवार लग्नाला येणाऱ्या पाहुण्यांची यादी विचारत आहेत.
या प्रश्नावर अनंत सिंह पत्रकारांना म्हणताना दिसतात, "इथे सिनेमासारखं तिकीट काढायचं नाही. तुम्ही सर्वजण लग्नाला या."
परंतु, एका मुलाखतीत अनंत सिंह यांना लग्नाच्या खर्चाबद्दल विचारण्यात आलं. त्यावर ते म्हणाले, "माझे मित्र आणि चाहतेच लग्नाची सगळी व्यवस्था करतात. आम्ही स्वतः काहीच करत नाही. कोणी मंडपाचा खर्च करेल, तर कोणी दुसरी एखादी जबाबदारी घेईल. माझे मित्र देशभरात आहेत."
अनंत सिंह यांनी लग्नाच्या खर्चाबद्दलच्या प्रश्नाचं थेट उत्तर दिलं नाही. पण, लग्नासाठी होत असलेला खर्च पाहता अनंत सिंह यांच्याकडे एकूण किती संपत्ती आहे, याची उत्सुकता मात्र वाढली आहे.
निवडणूक आयोगाकडे सादर केलेल्या शपथपत्रानुसार, अनंत सिंह आणि त्यांच्या पत्नी नीलम देवी यांच्याकडे मिळून 100 कोटी रुपयांची स्थावर आणि जंगम मालमत्ता आहे.
'ज्या मुलीचं लग्न, तिचं बँक खातंही नाही'
65 वर्षीय अनंत सिंह 2005 पासून मोकामा मतदारसंघातून सलग आमदार म्हणून निवडून येत आहेत. मात्र, काही काळासाठी त्यांच्या पत्नी नीलम देवी या मतदारसंघाच्या आमदार होत्या.
2025 च्या विधानसभा निवडणुकीवेळी सादर केलेल्या शपथपत्रानुसार, अनंत सिंह यांच्याकडे 26 कोटी रुपयांची जंगम मालमत्ता आहे, तर त्यांच्या पत्नी नीलम देवी यांच्याकडे 13 कोटी रुपयांची जंगम मालमत्ता आहे.
रोख रकमेबद्दल बोलायचं झाल्यास, अनंत सिंह यांच्याकडे 15 लाख रुपये, तर त्यांच्या पत्नी नीलम देवी यांच्याकडे 34 लाख रुपये आहेत. अनंत सिंह यांची पाटणा आणि बाढ येथे 5 बँक खाती आहेत, तर नीलम देवी यांची 12 बँक खाती आहेत.

फोटो स्रोत, Ranjan kumar
अनंत सिंह यांनी आपल्या शपथपत्रात 4 जण आपल्यावर अवलंबून असल्याचं (डिपेंडंट्स) दाखवलं आहे. त्यात त्यांची मुलगी शिवांगी सिंह हिचाही समावेश आहे. शिवांगीचं लग्न होणार असून तिच्या नावानं एकही बँक खातं नाही. मात्र, इतर तिघांच्या नावावर बँक खाती आहेत.
शपथपत्रानुसार, अनंत सिंह यांचे 'दर्प कन्स्ट्रक्शन' या कंपनीत 34.375 टक्के शेअर्स आहेत. त्याचे मूल्य सुमारे 10.18 कोटी रुपये आहे. तर त्यांच्या पत्नी नीलम देवी यांचे 'राजनंदिनी प्रोजेक्ट प्रायव्हेट लिमिटेड' आणि 'एसएसजीसी कन्स्ट्रक्शन प्रायव्हेट लिमिटेड' या कंपन्यांमध्ये शेअर्स आहेत. या शेअर्सचे खरेदी मूल्य 21 लाख 50 हजार रुपये आहे.
नीलम देवी यांनी जीवन विमा पॉलिसींमध्ये 37 लाख रुपयांहून अधिक रकमेची गुंतवणूक केली आहे.
पत्नीवर 8 कोटींचं कर्ज, 2 कोटींची लँड क्रूझर
शपथपत्रानुसार, अनंत सिंह यांनी पत्नी नीलम देवी यांना 8 कोटी 37 लाख रुपयांचं कर्ज दिलं आहे. तर इतर लोकांना 3 कोटी 75 लाख रुपये कर्जाऊ दिले आहेत.
नीलम देवी यांनीही 10 कोटी रुपयांहून अधिक रक्कम इतरांना कर्ज म्हणून दिली आहे. म्हणजेच, या दोघांनी मिळून 22 कोटी रुपयांपेक्षा जास्त रक्कम कर्ज म्हणून दिली आहे.
अनंत सिंह यांच्याकडे 3 कोटी रुपयांपेक्षा जास्त किमतीच्या गाड्या आहेत. त्यात 48 लाख रुपये किमतीच्या टोयोटा फॉर्च्युनरचाही समावेश आहे. ही गाडी त्यांनी 2024 मध्ये खरेदी केली होती.

अनंत सिंह यांच्याकडे 2013 मध्ये खरेदी केलेली महिंद्रा एक्सयूव्ही 500 आणि 2015 मध्ये खरेदी केलेली 2 कोटी 70 लाख रुपये किमतीची लँड क्रूझरही आहे. तर त्यांच्या पत्नी नीलम देवी यांच्याकडे इनोव्हा क्रिस्टा, महिंद्रा थार आणि फॉर्च्युनर सिग्मा या गाड्या आहेत. अनंत सिंह आणि नीलम देवी यांच्याकडील सर्व वाहनांची एकूण किंमत 4 कोटी रुपयांपेक्षा जास्त आहे.
शपथपत्रानुसार, अनंत सिंह यांच्याकडे 150 ग्रॅम सोने आहे. त्याची किंमत सुमारे 15 लाख रुपये आहे. तर त्यांच्या पत्नी नीलम देवी यांच्याकडे सुमारे 700 ग्रॅम सोने आणि 6 किलो चांदी आहे. या दागिन्यांची एकूण किंमत 71 लाख रुपयांपेक्षा जास्त आहे.
अनंत सिंह यांच्याकडे 1 लाख 90 हजार रुपये किमतीचे घोडे, गाय, हत्ती आणि म्हशीही आहेत.
अनंत सिंह यांची 11, तर नीलम यांची 49 कोटींची स्थावर मालमत्ता
अनंत सिंह यांच्याकडे 11 कोटी रुपयांची, तर त्यांच्या पत्नी नीलम देवी यांच्याकडे 49 कोटी रुपयांची स्थावर मालमत्ता आहे.
अनंत सिंह यांच्याकडे 15 लाख रुपये किमतीची शेतजमीन आहे. तर त्यांच्या पत्नी नीलम देवी यांच्याकडील शेतजमिनीची किंमत 6 कोटी रुपयांपेक्षा जास्त आहे. अनंत सिंह यांच्याकडे त्यांच्या नदवां या मूळ गावी बिगरशेती जमीन आहे. तिची किंमत 1 कोटी रुपयांपेक्षा जास्त आहे.

फोटो स्रोत, Seetu
तर नीलम देवी यांच्या नावावर पाटणा येथील पाटलीपुत्र, बंदर बगीचा, बिर्ला मंदिर आणि बोरिंग कॅनॉल रोड परिसरात जमीन आहे. याशिवाय उत्तर प्रदेशमधील जीबी नगर येथेही त्यांची जमीन आहे.
व्यावसायिक मालमत्तेबद्दल बोलायचं झाल्यास, अनंत सिंह यांची फ्रेझर रोडवर 'हसन मंजिल' नावाची इमारत आहे. तिची सध्याची किंमत सुमारे 10 कोटी रुपये आहे. तर नीलम देवी यांच्या नावावर पाटणा येथील पाटलीपुत्र, बंदर बगीचा आणि दक्षिण कृष्णापुरी येथे मालमत्ता आहे. याशिवाय, बाढ येथील बेरहना आणि गुरुग्राम येथे त्यांचं एक कार्यालयही आहे. या मालमत्तांची किंमत 13 कोटी 90 लाख रुपये इतके आहे.
अनंत सिंह यांची त्यांच्या नदवां या मूळ गावी एक निवासी इमारत आहे. तर नीलम देवी यांचा पाटणा येथील बोरिंग रोडवर 5700 चौरस फुटांचा आणि दिल्लीतील जीके परिसरात 2100 चौरस फुटांचा फ्लॅट आहे. या दोन्ही फ्लॅटची एकत्रित किंमत 3 कोटी रुपयांपेक्षा जास्त आहे.
समाजसेवा, व्यवसाय आणि शेती
अनंत सिंह यांनी शपथपत्रात आपला व्यवसाय समाजसेवा, व्यापार आणि शेती असल्याचं नमूद केलं आहे. पत्नी नीलम देवी यांचा व्यवसायही हाच असल्याचं त्यांनी सांगितलं आहे. घरभाड्यातून उत्पन्न मिळत असल्याचा उल्लेख शपथपत्रात करण्यात आला आहे.
शपथपत्रानुसार, अनंत सिंह यांच्यावर 2 कोटी रुपयांचं, तर त्यांच्या पत्नी नीलम देवी यांच्यावर 23 कोटी रुपयांपेक्षा जास्त कर्ज आहे. अनंत सिंह यांनी कार खरेदी करण्यासाठी 2 कोटी रुपयांचं कर्ज घेतलं आहे. तर नीलम देवी यांनी कार खरेदीसाठी कर्ज घेण्याबरोबरच शेतीसाठीही कर्ज घेतलं आहे.
याशिवाय, नीलम देवी यांनी अनंत सिंह यांच्याकडून 8 कोटी रुपये आणि 'राजनंदिनी प्रोजेक्ट प्रायव्हेट लिमिटेड' या कंपनीकडून 12 कोटी रुपयांपेक्षा अधिक रकमेचं कर्ज घेतलं आहे. अनंत सिंह यांनीही याच कंपनीकडून 10 लाख रुपयांचं वैयक्तिक कर्ज घेतलं आहे.
अनंत सिंह यांच्यावर 28 फौजदारी खटले प्रलंबित आहेत. यात हत्या, हत्येची धमकी देणे, गुन्हेगारांना संरक्षण देणे आणि अपहरण यांसारख्या गंभीर गुन्ह्यांच्या प्रकरणांचा समावेश आहे.
अलीकडेच सर्वोच्च न्यायालयाने अनंत सिंह यांना येत्या 1 डिसेंबरपर्यंत शरण येण्याचे निर्देश दिले आहेत. त्यांची मुलगी शिवांगी हिचा विवाह असल्याने न्यायालयाने त्यांना 4 आठवड्यांची मुदत दिली होती. यावर प्रतिक्रिया देताना अनंत सिंह म्हणाले होते की, त्यांचा न्यायालयावर विश्वास आहे आणि ते शरण येतील.
दुलारचंद यादव यांच्या हत्या प्रकरणात सर्वोच्च न्यायालयाने हे निर्देश दिले होते. 2025 मध्ये विधानसभा निवडणुकीच्या प्रचारादरम्यान दुलारचंद यादव यांची हत्या झाली होती.
मोकामा येथील स्थानिक पत्रकार अनुभव कुमार यांनी बीबीसी न्यूजला सांगितलं, "अनंत सिंह आणि नीलम देवी यांना 5 मुलं आहेत. त्यात 3 मुलं आणि 2 मुली आहेत. आता ज्या मुलीचं लग्न होत आहे, ती त्यांची धाकटी मुलगी आहे. याआधी त्यांच्या मोठ्या मुलीचंही थाटामाटात लग्न झालं होतं. तिचं लग्न एका सरकारी अधिकाऱ्याशी झालं होतं. मात्र, त्यावेळी सोशल मीडियाचा एवढा प्रभाव नव्हता. त्यामुळे त्या लग्नाची इतकी चर्चा झाली नव्हती."
आपल्या धाकट्या मुलीच्या लग्नाची सोशल मीडियावर होत असलेली चर्चा पाहून अनंत सिंहही नाराज असल्याचं दिसत आहे. ते अनेकदा पत्रकारांना म्हणताना दिसतात की, मी काही नवीन करत नाहीये.
यापूर्वी मोठ्या मुलीच्या लग्नातही त्यांनी घोड्यांच्या शर्यतीचं आयोजन केलं होतं. त्या शर्यतीत पहिला क्रमांक मिळवणाऱ्याला त्यांनी गाडी बक्षीस म्हणून दिली होती.
(बीबीसीसाठी कलेक्टिव्ह न्यूजरूमचे प्रकाशन)

























