एका सिंहिणीने हरणाच्या पिल्लाला 'शिकारी प्राण्यापासून वाचवण्यासाठी' तोंडात का धरले?

सिंहिणीच्या जबड्यातील हरणाचे जिवंत पिल्लू.. कॅमेऱ्यात कैद झालेला तो दुर्मिळ क्षण.
फोटो कॅप्शन, सिंहिणीच्या जबड्यातील हरणाचे जिवंत पिल्लू.. कॅमेऱ्यात कैद झालेला तो दुर्मिळ क्षण.
Published
वाचन वेळ: 4 मिनिटे

प्राण्यांचं जग जेवढं सुंदर आहे, तितकंच ते अनेक वेळा रहस्यांनी भरलेलं असतं. याचाच प्रत्यय देणारी एक घटना कॅमेऱ्यात कैद झाली आहे.

गुजरातच्या सासन गीरमध्ये वाइल्डलाइफ फोटोग्राफी करत असताना मिहीर पटेल यांच्या कॅमेऱ्यात हे दृश्य टिपले गेले.

"हे अत्यंत दुर्मिळ दृश्य आहे," असं सांगताना मिहीर पटेल यांनी स्पष्ट केलं की, ते गेल्या 7-8 वर्षांपासून वन्यजीवांचे फोटो काढत आहेत. पण असं दृश्य त्यांनी यापूर्वी कधीही प्रत्यक्ष पाहिलं नव्हतं.

एका सिंहिणीच्या जबड्यात हरणाचे एक जिवंत पाडस अडकलेले दिसते. पण आश्चर्याची गोष्ट म्हणजे, त्या सिंहिणीने त्याची शिकार करून त्याला खाल्लं नाही, तर उलट त्या पिल्लाचा जीव वाचवला.

प्राण्यांच्या उपजत शिकारी वृत्तीला छेद देणारे हे दृश्य पाहून वाइल्डलाइफ फोटोग्राफर मिहीर पटेल अवाक् झाले.

या घटनेबद्दल सांगताना ते म्हणाले, "त्या सिंहिणीत कदाचित आईची माया दाटून आली असावी. मला असं वाटलं की म्हणूनच तिने पाडसाची शिकार तर केली नाहीच उलट इतर सिंहांच्या तावडीतूनही त्याला वाचवले."

त्या दिवशी नेमके काय घडले?

व्यवसायाने बायोमेडिकल इंजिनिअर असलेल्या मिहीर पटेल यांना वाइल्डलाइफ फोटोग्राफीचा छंद आहे.

या घटनेची आठवण सांगताना ते म्हणाले, "वन्यजीवांचे फोटो काढण्यासाठी मी वर्षातून 3-4 वेळा सासन गीर आणि गुजरातच्या इतर जंगलांमध्ये जात असतो. 27 ऑक्टोबरला मी सासन गीरमध्ये सफारीसाठी गेलो होतो. त्या वेळी मला मिळालेला सफारी रूट नंबर 13 होता."

"त्या वेळी मी जंगलात फोटो काढण्यात मग्न होतो. तेवढ्यात झाडीतून बाहेर येणाऱ्या एका सिंहिणीकडे माझं लक्ष गेलं. तिने तोंडात एक छोटे पिल्लू पकडलेले होते."

"पहिल्या नजरेत मला वाटलं की, ती स्वतःच्याच बछड्याला घेऊन चालली आहे. पण कॅमेऱ्याची लेन्स 'झूम' करून पाहिलं तेव्हा तिच्या जबड्यात चक्क हरणाचे पाडस असल्याचं स्पष्ट दिसलं," असं त्यांनी सांगितलं.

वाइल्डलाइफ फोटोग्राफर मिहीर पटेल यांच्या कॅमेऱ्यात 27 ऑक्टोबरला कैद झालेला हा अत्यंत दुर्मिळ क्षण
फोटो कॅप्शन, वाइल्डलाइफ फोटोग्राफर मिहीर पटेल यांच्या कॅमेऱ्यात 27 ऑक्टोबरला कैद झालेला हा अत्यंत दुर्मिळ क्षण
Skip podcast promotion and continue reading
BBC News मराठी आत्ताच फॉलो करा WhatsApp कर
बीबीसी न्यूज मराठी आता व्हॉट्सॲपवर

तुमच्या कामाच्या गोष्टी आणि बातम्या आता थेट तुमच्या फोनवर

फॉलो करा

End of podcast promotion

ते पुढे म्हणाले, "त्या सिंहिणीने त्या पाडसाची शिकार केली नव्हती. हरणाचे ते पाडस अगदी जिवंत होते, डोळे मिचकावत होते आणि आवाजही करत होते. हा सगळा प्रकार पाहून मी थक्क झालो."

"त्या क्षणी ती सिंहीण थेट माझ्या दिशेने चालत येत राहिली. तिच्या सोबतीला दुसरा एक सिंहही होता. पण त्या सिंहिणीने त्या पाडसाला त्या दुसऱ्या सिंहाच्या तावडीत जाऊ दिले नाही. साधे जवळही फिरकू दिले नाही."

"माझ्या आणखी एक गोष्ट लक्षात आली. त्या सिंहिणीसोबत सिंहांचा पूर्ण कळप होता. ज्यामध्ये 4 मोठ्या सिंहिणी आणि त्यांची 6-7 महिन्यांची लहान पिल्लेही होती. पण जबड्यात पाडसाला धरून असलेली ती सिंहीण मात्र त्या संपूर्ण कळपापासून वेगळी चालत दूर जात होती," असं मिहीर यांनी स्पष्ट केलं.

"बाकीचे सर्व सिंह आणि सिंहिणी जवळच्या पाणवठ्याकडे पाणी पिण्यासाठी गेले. पण ही सिंहीण मात्र त्यांच्यासोबत गेली नाही. त्या संपूर्ण कळपापासून वेगळे होत ती त्या पाडसाला घेऊन सुरक्षित जागेच्या शोधात निघून गेली."

या पाडसाला जर खाली सोडले तर इतर सिंहिणी किंवा त्यांचे बछडे त्याला क्षणात फस्त करतील हे त्या सिंहिणीने ओळखले असावे. म्हणूनच तिने त्याला जबड्यात सुरक्षित पकडून ठेवले आणि त्या संपूर्ण कळपापासून ती लांब निघून गेली, असं त्यांनी नमूद केलं.

आश्चर्याची गोष्ट म्हणजे, सिंहिणीने त्याची शिकार करून त्याला खाल्लं नाही, तर उलट त्या पिल्लाचा जीव वाचवला.
फोटो कॅप्शन, आश्चर्याची गोष्ट म्हणजे, सिंहिणीने त्याची शिकार करून त्याला खाल्लं नाही, तर उलट त्या पिल्लाचा जीव वाचवला.

मिहीर पुढे सांगतात, "ती सिंहीण त्या पाडसाला अलगद तोंडात पकडून जंगलातील एका सुरक्षित कोपऱ्यात घेऊन गेली."

"पाडसाला जबड्यात धरूनच ती जंगलात बसली असल्याचं मी पाहिलं. पण थोड्याच वेळात ती आतल्या घनदाट जंगलात दिसेनाशी झाली. त्यामुळे पुढील दृश्य मला कॅमेऱ्यात कैद करता आलं नाही, पण एक गोष्ट नक्की तिने त्या पाडसाचा जीव वाचवला होता. त्याची शिकार केली नव्हती."

"नेहमी शिकारी प्राणी आपल्या सावजाला जबड्यात आवळून आणि अत्यंत घट्ट पकडतात. पण हे दृश्य पाहताना त्या सिंहिणीचा त्या पाडसाची शिकार करण्याचा कोणताही हेतू दिसत नव्हता," असं मिहीर यांनी सांगितलं.

"कारण तिने हरणाच्या त्या पिल्लाला अत्यंत हळुवारपणे धरून ठेवले होते. या संपूर्ण घटनेदरम्यान एका क्षणी तिने त्या पिल्लाला एका सेकंदासाठी जमिनीवर ठेवले. त्यानंतर पुन्हा त्याला व्यवस्थित तोंडात उचलून घेऊन ती जंगलाच्या दिशेने चालू लागली," असं त्यांनी सविस्तर सांगितलं.

हा अनुभव आणि हे दृश्य किती अद्वितीय होते हे सांगताना मिहीर पटेल म्हणाले, "गेली 7-8 वर्षे मी जंगलात वाइल्डलाइफ फोटोग्राफी करत आहे. पण असा प्रसंग मी माझ्या आयुष्यात आधी कधीच पाहिला नव्हता."

"हा प्रसंग पाहताना त्या सिंहिणीच्या मनात आईची माया जागी झाल्यासारखे वाटत होते. कदाचित म्हणूनच तिने त्या पाडसाची शिकार तर केली नाहीच, उलट त्याला जंगलात एका सुरक्षित जागी घेऊन गेली असावी," असं मिहीर यांनी नमूद केलं.

(बीबीसीसाठी कलेक्टिव्ह न्यूजरूमचे प्रकाशन)