धोनी आता IPL मध्ये खेळणार नाही; CSK ने दिली 'ही' नवी जबाबदारी

महेंद्र सिंह धोनी
Published
वाचन वेळ: 3 मिनिटे

"एक असा खेळाडू, जो शतकातूनच एकदाच येतो. एक नवी भूमिका आणि एक असं नातं, जे कायम दृढ राहील.

"महेंद्रसिंह धोनी आता चेन्नई सुपर किंग्स या टीमच्या मेंटॉरच्या भूमिकेत असणार आहे.

"असंख्य सामन्यांमध्ये विजय, कठीण प्रसंग आणि कायम हृदयात साठवून ठेवता येतील अशा आठवणींसह एम.एस. धोनी हा कायम क्रिकेट आमच्या या प्रवासाचा अविभाज्य भाग राहिला आहे.

"आम्हाला विजयाच्या शिखरावर नेण्यापासून ते सुपर किंग्सच्या पुढच्या पिढीला मार्गदर्शन करण्यापर्यंत, थाला नेहमीच आम्हाला ओळख मिळवून देणारा अविभाज्य भाग राहील.

आणि चेन्नई हे कायम त्याचे घर राहील."

इंडियन प्रीमियर लीगच्या सुरुवातीपासून चेन्नई सुपर किंग्स (CSK) संघाचा भाग असलेल्या महेंद्रसिंग धोनीच्या वतीनं त्याच्या फ्रँचायजीनं 'X' या सोशल मीडिया प्लॅटफॉर्मवर ही घोषणा केली.

क्रिकेट

सीएसकेच्या मालक असलेल्या रुपा गुरुनाथ यांनी धोनीबद्दल लिहिलं की, "एम.एस. धोनीसारखा खेळाडू शतकातून एकदाच येतो. आम्ही भाग्यवान आहोत आणि त्याचे अत्यंत आभारी आहोत, की तो चेन्नई सुपर किंग्सच्या सुरुवातीपासून आमच्यासोबत आहे आणि त्याने या संघाचा पाया रोवला आहे."

"एम.एस. धोनी चेन्नई सुपर किंग्ससाठी फक्त एक महान खेळाडू नाही, तर त्याहूनही अधिक आहे. त्यानं आम्हाला मैदानावर आणि मैदानाबाहेर जे काही दिलं, ते अमूल्य आहे. त्याचं नेतृत्व, नम्रता, वचनबद्धता आणि लाखो चाहत्यांशी असलेलं त्याचं नातं खरंच खास आहे. गेल्या अनेक वर्षांत, त्याने एक असा वारसा निर्माण केला आहे, ज्यातून आम्हाला आयुष्यभर जपून ठेवता येतील अशा आठवणी मिळाल्या आहेत."

"एम.एस. धोनी मेंटॉर म्हणून चेन्नई सुपर किंग्स परिवाराचा भाग राहील. त्याचा अनुभव आणि कौशल्य आमच्यासाठी, विशेषतः या बदलाच्या काळात, अत्यंत मौल्यवान आहे. संघात अनेक तरुण खेळाडू आहेत आणि त्याचं मार्गदर्शन सीएसकेची पुढची पिढी घडवण्यासाठी मदत करणारं असेल."

अत्यंत यशस्वी IPL प्रवास

सीएसकेच्या वेबसाइटनुसार, चेन्नई सुपर किंग्सचे व्यवस्थापकीय संचालक के. एस. विश्वनाथन म्हणाले की, "एक क्रिकेटपटू म्हणून एम. एस. धोनीने जे काही मिळवले आहे, ते कायमचे प्रत्येक चाहत्याच्या स्मरणात असेल. पण धोनीला खऱ्या अर्थाने विशेष बनवणारी गोष्ट म्हणजे, तो पूर्णपणे चेन्नईचाच एक भाग बनला. त्याने शहराला आपलंसं केलं आणि शहरानंही त्याला आपलसं करून घेतलं."

आपण मागे वळून पाहू, तेव्हा आपल्याला जिंकलेल्या ट्रॉफी तर आठवतीलच, पण त्या आपण कशा मिळवल्या हेदेखील आठवेल; हाच त्याचा खरा वारसा आहे."

क्रिकेट

"पिवळी जर्सी घालून त्याला मैदानावर पाहण्याची आम्हाला उणीव भासेल, पण तो आमच्या खेळाडूंना मार्गदर्शन करत राहील याचा आम्हाला आनंद आहे. हे नातं अधिक घट्ट होत राहील आणि येत्या अनेक वर्षांसाठी या संघाला नवी दिशा देईल."

धोनीच्या नेतृत्वाखाली चेन्नई सुपर किंग्सने पाच आयपीएल विजेतेपदं जिंकली आहेत. कोणत्याही कर्णधारानं जिंकलेल्या विजेतेपदांमध्ये हा संयुक्तपणे सर्वाधिक विक्रम आहे. इतकंच नव्हे, तर त्याच्या कर्णधारपदाखाली संघानं दोन चॅम्पियन्स लीग टी20 विजेतेपदंही जिंकली आहेत. कोणत्याही कर्णधाराने जिंकलेली ही सर्वाधिक विजेतेपदं आहेत.

कर्णधारपदासोबतच, धोनी आयपीएलच्या इतिहासातील सर्वोत्कृष्ट फलंदाजांपैकी एक आहे. 5314 धावांसह तो चेन्नई सुपर किंग्ससाठी दुसरा सर्वाधिक धावा करणारा खेळाडू आहे. तसेच, त्याने चेन्नई सुपर किंग्ससाठी सर्वाधिक 272 सामने खेळले आहेत.

त्याचे असंख्य सामना जिंकून देणारे शेवटच्या चेंडूवरील फटके आणि हेलिकॉप्टर शॉट्स हे सीएसके आणि आयपीएलच्या इतिहासाचा एक अविस्मरणीय भाग बनले आहेत.

जेव्हा धोनीला दुसऱ्या फ्रँचायझीकडून खेळावे लागले

2013 च्या आयपीएल स्पॉट-फिक्सिंग आणि सट्टेबाजीच्या प्रकरणानंतर जुलै 2015 मध्ये चेन्नई सुपर किंग्सवर दोन वर्षांसाठी बंदी घालण्यात आली होती .

यामुळे संघ 2016 आणि 2017 मध्ये आयपीएलमध्ये खेळू शकला नाही. या काळात सीएसकेच्या जागी दोन नवीन संघांचा समावेश करण्यात आला.

एम.एस. धोनी 2016 आणि 2017 मध्ये रायझिंग पुणे सुपरजायंटकडून खेळला.

जुलै 2017 मध्ये, बीसीसीआयने चेन्नई सुपर किंग्सच्या आयपीएलमधील पुनरागमनाची अधिकृत घोषणा केली.

भारताचा सर्वात यशस्वी कर्णधार

कर्णधार म्हणून सर्वाधिक आयपीएल सामने खेळण्याचा आणि सर्वाधिक विजय मिळवण्याचा विक्रम धोनीच्या नावावर आहे. त्याने चेन्नईला पाच आयपीएल चषक आणि दोन चॅम्पियन्स लीग जेतेपदे जिंकून दिली आहेत.

धोनीने भारताला तीन आयसीसी स्पर्धांचा विजेता बनवलेलं आहे. ज्यामध्ये 2007 चा टी-20 विश्वचषक, एकदिवसीय सामन्यांचा विश्वचषक (2011) आणि चॅम्पियन्स ट्रॉफी (2013) अशा महत्त्वाच्या स्पर्धांचा समावेश आहे.

एम.एस.धोनी

याशिवाय, कसोटी क्रिकेटमधील त्याची कामगिरी प्रभावी आहे. त्याने 90 कसोटी सामने खेळले आणि 2014-15 साली कसोटी मालिका मध्यावर असताना अचानक धोनीने निवृत्ती जाहीर केली. त्याआधी त्याने भारताला आयसीसी कसोटी क्रमवारीत अव्वल स्थानावर नेले होते.

माजी भारतीय कर्णधार सुनील गावस्कर आणि रवी शास्त्री अनेकदा भारताने निर्माण केलेला सर्वोत्तम क्रिकेटपटू म्हणून धोनीचं वर्णन करतात. मात्र, यावर वादविवाद होऊ शकतो.

पण आता हे सर्वमान्य आहे की धोनी गावस्कर, सचिन तेंडुलकर आणि कपिल देव यांच्या श्रेणीत येतो.

(बीबीसीसाठी कलेक्टिव्ह न्यूजरूमचे प्रकाशन.)