एशियन गेम्समध्ये भारताची सुवर्णकामगिरी, फायनलमध्ये पाकिस्तानचा 19 धावांनी केला पराभव

जपानमध्ये सुरू असलेल्या एशियन गेम्स स्पर्धेत भारतीय संघानं क्रिकेटमधील सुवर्णपदक नावावर केलं आहे.

सुवर्णपदकासाठीच्या या सामन्यात भारतानं पाकिस्तानसमोर 212 धावांचं आव्हान ठेवलं होतं. हा सामना भारतानं 19 धावांनी जिंकला.

भारतानं नाणेफेक जिंकत प्रथम फलंदाजी निवडली होती. त्यानंतर भारतीय फलंदाजांनी आक्रमक फलंदाजी करत पाकिस्तानच्या गोलंदाजांवर दबाव निर्माण केला. त्यानंतर तळाला फलंदाजी करताना तिलक वर्मा आणि दुबेच्या फटक्यांच्या जोरावर भारतानं 211 चा टप्पा गाठला.

प्रत्युत्तरात पाकिस्तानची सुरुवात फारशी चांगली झाली नाही, पण हसन नवाजच्या फटकेबाजीनं त्यांच्यासाठी काही काळ विजयाच्या आशा पल्लवित झाल्या होत्या.

मात्र, दुसऱ्या बाजुनं हसनला साथ न मिळाल्यानं पाकिस्तानला विजयी कामगिरी पूर्ण करता आली नाही.

भारताची इनिंग

भारतानं डावाची सुरुवात करताना पहिल्या ओव्हरमध्ये संयम दाखवला. अभिषेक आणि वैभव सूर्यवंशी दोघांनीही पहिल्या ओव्हरमध्ये शांत राहण्याचा पवित्रा घेतला.

पण पुढच्याच ओव्हरमध्ये वैभवनं पुढाकार घेत फटकेबाजी करायला सुरुवात केली. त्यानं दोन षटकार खेचले आणि पाठोपाठ अभिषेकनेही फटकेबाजी करत दुसऱ्या ओव्हरमध्ये 24 धावा लुटल्या.

त्यानंतर पुढच्या ओव्हरमध्येही 15 धावा घेतल्या पण वैभव या ओव्हरमध्ये रिव्हर्स स्वीप करताना चुकला आणि सायम अयूबच्या गोलंदाजीवर झेलबाद झाला.

त्यानंतर मात्र अभिषेकनं एकच फटकेबाजी सुरू ठेवली. पाकिस्तानच्या सर्वच गोलंदाजांची त्यानं धुलाई केली. पण दुसऱ्या बाजूला संजू सॅमसनही स्वस्तात बाद झाला. पण विकेटचा अभिषेकला फरक पडत नसल्याचं दिसलं.

त्यानं फटकेबाजी करत 20 चेंडूमध्ये अर्धशतक पूर्ण केलं. अहमद दनियालच्या एका चेंडूवर मात्र तो बाद झाला. त्यानं 28 चेंडूमध्ये 61 धावा केल्या.

त्यानंतर श्रेयस अय्यर आणि इशान किशन यांनी भारताचा डाव सावरला. पण इशान किशन 18 चेंडूंमध्ये 20 धावा करून बाद झाला. मिन्हासनं त्याचा त्रिफळा उडवला. तर अबरारनं कर्णधार श्रेयस अय्यरला बाद केलं.

त्यानंतर तिलक वर्मानं शेवटच्या ओव्हर्मध्ये फटेबाजी करत भारताना धावांपर्यंत पोहोचवलं. तिलक वर्मानं 22 बॉलमध्ये 51 धावा केल्या. तर शिवम दुबेनं 15 चेंडून 27 धावा करत शेवटी धावांचा वेग वाढवला.

पाकिस्तानच्या दनियाल आणि मिन्हासनं प्रत्येकी दोन तर अयूब, अबरार यांनी प्रत्येकी एक विकेट घेतली.

पाकिस्तानचा डाव

भारताच्या 212 धावांच्या प्रत्युत्तरात पाकिस्ताननं सावध सुरुवात केली. पण त्यांना चौथ्या ओव्हरमध्येच पहिला धक्का बसला.

पाकिस्तानचा कर्णधार साहीबजादा फरहान 10 धावा करून बाद झाला. त्यानंतर पुढच्याच ओव्हरमध्ये उस्मान खानही 3 धावांवर बाद झाला.

पाठोपाठ माज सदाकतही 23 धावा काढून परतला.

त्यानंतर सायम अयूब आणि हसन नवाज यांनी पाकिस्तानचा डाव सावरला. सायम अयूबनं 22 चेंडूत 29 धावा केल्या. त्याला दुबेनं बाद केलं.

पण दुसऱ्या बाजून हसन नवाजनं भारतीय गोलंदाजांची धुलाई केली. त्यानं केलेल्या फटकेबाजीमुळं विजयी धावसंख्येच्या जवळ पोहोचण्याची आशा पाकिस्तानला निर्माण झाली होती.

पण मोठं आव्हान असल्यानं त्यांना ते शक्य झालं नाही. परिणामी भारतानं एशियन गेम्सचं आणखी एक सुवर्णपदक पटकावलं.

अक्षर, सुंदर आणि दुबे यांनी प्रत्येकी दोन बळी घेतले.

(बीबीसीसाठी कलेक्टिव्ह न्यूजरूमचे प्रकाशन.)