Anthony Joshua vs Pulev: Anthony Joshua akụpụla Kubrat Pulev ọkwụrụ n'anya

Mkpuchi Na Eme Ozugbo

1. 27 Nọvemba 2020E gbuola 'nuclear scientist' ọkwa ya gbagotere na mba Iran

   E gbuola Mohsen Fakhrizadeh bụ onye bekee kpọrọ nuclear scientist nke ọkwa ya gbagotere, na mba Iran.

   Mohammed Javad Zarif bụ minista mmekọrịta mba Ịran na mba ndị ọzọ katọrọ ogbugbu a ma kwuo na ọ bụ ogbugbu na-eyi egwu.

   Mịnịstrị nchekwa mba ahụ zisara ozi kwuru na "ndị oyi ndụ egwu bu ngwaagha wakporo ụgbọala bu Mohsen Fakhrizadeh, onyeisi nnyocha na nnchọpụta nke ministrị nchekwa na mba ahụ.

   "Ka ndị nchekwa ya na ndị oyi ndụ egwu a kwakọrịtachara, e merụrụ Fakhrizadeh ahụ ma buga ya ụlọọgwụ, mana mbọ niile a gbara ịzọ ya ndụ enweghi isi, mere ka ọ nwụọ."

   N'etiti afọ 2010 ruo 2012, e gbufuru ndị ọrụ "nuclear scientist" anọ na mba Ịran, dịka Ịran na-ebo mba Izrel ebubo na aka ha dị na ya.

2. 27 Nọvemba 2020A tụọla onye omeiwu nta Naịjiria nga

   A tụọla Victor Mela bụ onye nnọchiteanya n’ụlọomeiwu nta nga otu ọnwa maka ịtụ asị n’agbanyeghị na ọ ṅụrụ iyi ikwu eziokwu gbasara ntuliaka afọ 2019.

   E nyere Mela na-anọchite anya Biliri na Balanga dị na Gombe steeti ohere ịkwụ nha ma ọ bụrụ na ọ chọghị ịga nga.

3. 27 Nọvemba 2020Ndị butere coronavirus na Naịjirịa na-akwado iru 67,000

   Ihe ruru mmadụ otu narị na iri isii na itoolu ebutela ọrịa coronavirus na Naịjirịa n’ụbọchị Tọzde.

   Kaduna steeti bụkwa ebe ọnụọgụgụ ndị butere ya kachasị dị elu dịka ọnụọgụgụ ndị butere ọrịa ahụ kemgbe ọnwa Febụwarị karịrị puku iri isii na isii.

4. 27 Nọvemba 2020Ipob akagbuola ọkwa Osote Onyeisi dịka nsogbu di n'etiti ha na Uche Mefor na-abawanye

   Dịka okwu dị n'etiti Onyeisi otu "Indigenous People of Biafra" (Ipob) bụ Nnamdi Kanu na Osote ya bụ Uche Mefor na-abawanye, ogige otu ahụ a kpọrọ "Directorate of State" (DOS) apụtara kwuo na ha akagbuola ọkwa Osote Onyeisi na ya bụ otu.

   N'ime akwụkwọ Maazị Chika Edoziem - bụ onye zara aha ka onyeisi DOS - binyere aka, ha si na ha na-eme nke a makana "onweghi ebe ọbụla a na-eme nwereonwe a na-enwe osote onyeisi".

   Ha gakwara n'ihu kwuo ọtụtụ ihe ha sị Maaazị Mefor mere megide Ipob na onyeisi otu ahụ.

   Ebubo a gunyere ịgba mgba okpuru megide ndị Ipob na-achọ ịbata mba Briten maka ọsọ ndụ nakwa inupuru Nnamdi Kanu isi site na ịgbajọ iwu o tinyere.

   BBC gbara mbọ ịnụta n'ụnụ Maazị Mefor mana ọ saghị ozi eziri n'ekwentị ya.

   Mana Mefor dere n'akara Facebook ya ma kwuo na mgba okpuru niile ndi Ipob na-agba ya agaghị amịta mkpụrụ.

   Mefor kwukwara na ọ bụ onyeisi Ipob na ndị DOS na ebuso ya agha.

   Akwụkwọ ahụ kọwakwara na Ipob wepụrụ onye na-ahazi Mab Aemrịka bụ Obidi Obienu n'ọkwa maka nnupu isi.

5. 27 Nọvemba 2020Etu ụmụ nwaanyị mụrụ nwa ọhụrụ si ata ahụhụ na LUTH

   Nchọpụta BBC mere n'ụlọọgwụ gọọmentị etiti bụ Lagos University Teaching Hospital bụ LUTH gosiri na ndị enweghgi ego n'ata ahụhụ ebe ahụ.

   Ndị isi ụlọọgwụ ahụ na-anara ezinaụlọ ndị ahụ adịghị ihe si 300,000 rue 750,000 iji nye ha ohere be ha ga-ehi ụra ma hapụ ịnye ya ndị mụrụ nwa kwesiri ị nọ ebe ahụ.

   BBC gara ebe ahụ mgbe ihe onyonyo dapụtara na soshal midia gbasara ihe ndị mmadụ na-agabiga n'ebe ahụ.

   Ụfọdụ ndị ku nwa n'aka n'ebe ahụ kwuru na n'ezie na ọ bụ n'ala nkịtị ka ha hiri ụra n'abalị foro ụbọchị ahụ.

   Wasiu Adeyemo bụ onyeisi komiti maka ndụmọdụ ahụike gwara BBC na ndị dọkịnta na ndị nọrsụ na-eleta ndị ahụ adịghị nke pụtara na o nweghi ihe ezinaụlọ ndị ahụ kwesiiri ị na-achọ ebe ahụ.

   Mgbe a jụrụ ya ma o nwere ndị ọrụ ahụike zuru ịleta mmadụ niile nọ ebe ahụ ọ sara sị "ebe a bụ Naịjirịa, anyị enweghi ihe niile"

6. 27 Nọvemba 2020Donald Trump ekwerela na ya ga-apụ na obi gọọmentị Amerịka na Jenụwarị

   Onyeisiala Amerịka bụ Donald Trump ekwerela na ya dị njikere ịhapụ obi gọọmentị Amerịka eji "White House" mara ma ya bụrụ na esuru kpọm na ọ bụ Joe Biden meriri ntuliaka Amerịka nke 2020.

   Trump kwuru nke a n'ịza ajụjụ onye ntaakụkọ jụrụ ya.

   Onye ntaakụkọ jụrụ: "Ya bụrụ na ndị tụrụ vootu kpebiri na Onyeisiala nọ na-eche bụ Joe Biden ga-emeri, ọ bụ na ị gaghị ahapụ White House?"

   Trump zara sị: "Ị ma...A ga m apụ, a ga m apụ dịka i makwa. Mana a na m eche na-enwere ọtụtụ ihe ga-eme site ugbua rue ụbọchị 20 nke Jenụwarị."

   Okwu dịka ụdịrị okwu Trump na-ekwu kemgbe e meriri ya na ntuliaka.

   O kwuola na mpụ ndi na ya bụ ntuliaka mana o weteghi akaebe ga-egosi na okwu ya kwụ ọtọ.

   Maazị Trump gakwara n'ihu kwuo na ọ ga-arị ya ahụ ikwu na-emeriri ya, ma gbajọọ ịza ajụjụ ma ọ ga-azọ ọchịchị ọzọ.

7. 27 Nọvemba 2020Ndị oji egbe egbuola eze obodo n'Ondo steeti

   Ndị oji egbe gburu otu eze obodo n'Ondo steeti dịka ọ na-ala obi ya.

   Dịka ndị ntaakụkọ siri kwuo, Oba Adegoke Adeusi nọ n'ime ụgbọala ala ya oge ndị oji egbe wakporo ha ma gbanye egbe n'ime ugboala ahụ.

   Oba Adeusi merụrụ ezigbote ahụ ma nwụọ ka ebutere ya n'ụlọ "Federal Medical Centre" di n'Owo.

   Ezinaụlọ Ọba Adeusi na-akọwa na ọ bụ ndi eziri ezi kpara ike a dịka onweghi ihe e zuru n'ime ụgbọala ya.

   Eze si nzukọ ndị eze na-ala ogbe mwakpo a mere.

   Otutu ogbugbu na ịtọrị mmadụ emeela n'ụzọ ahụ.

8. 27 Nọvemba 2020Tanka bu mmanụ ụgbọala agbaala ọkụ n'ụzọ Agulu, Anambra steeti

   Otu tanka bu mmanụ ụgbọala agbaala ọkụ n'okporụzọ si Awka gawa Agulu n'Anmabra steeti.

   Nchọpụta nke BBC Igbo mere gosiri na 'brake' ụgbọala ahụ kwụsịrị ịrụ ọrụ nke mere ka ọ kụọ osisi ọkụ latrik bụ 'Transformer' dị nso n'ebe ahụ tupu ha enwuru ọkụ.

   Ọkụ ahụ malitere ịgba mechara gba ọdọ ahịa ndị mmadụ dị n'akụkụ ụzọ.

   O mebikwara ya bụ osisi ọkụ latrik bụ nke na-ebutere ndị obodo ahụ ọkụ ma gbaa ọtụtụ waya ọkụ n'ebe ahụ.

   Otu onye ọkụ gbara ọdọ ahịa ya aha ya bụ Chukwukerue Ezeani kwuru na ngwa ahịa ruru nde naira iri funarịrị ya n'ọkụ ahụ gbara.

9. 27 Nọvemba 2020Nnọnụ na peeji anyị taa

   Kedụ nke na-akpọtụ n'ogbe gị?

   BBC Igbo ga-aza gị ajụjụ ahụ site n'akụkọ ndị anyị ga-ewetara unu taa.

   Jisinu ike sonye anyị.

10. 26 Nọvemba 2020Onweghị etu Biden si nweta vootu nde 80 na ntuliaka a - Donald Trump

    Onyeisiala Amerịka bụ Donald Trump ka na-ekwusi ike na nrụrụaka dị nke ukwuu na ntuliaka ọkwa onyeisiala mba ahụ.

    Joe Biden, onye pati 'Democrats' meriri na ntuliaka ahụ, mana Trump ekwetebeghị na e meriela ya.

    N'uhuruchị ụbọchị Tọzde ka Trump kwuru na ọ bụ nrụrụ aka ka Biden ji nweta vootu nde iri asatọ (80 million) o ji nweta mmeri.

    Ugboro ugboro ka Trump na-ekwu na nrụrụaka buru ibu na ntuliaka nke afọ a, mana onwebeghị ihe akaebe ya na ndị otu ya gosiri iji kwado ebubo a.

    Trump mechara kweta ka ndịọrụ ya gaa n'ihu ka ha na ndọrụ Joe Biden rụkọọ ọrụ maka ịhafe ọchịchị n'ọnwa Jenụwarị afọ 2021, mana ọ kpọbọghị Biden kelee ya dịka ndị isiala Amerịka n'oge gara aga si eme.

11. 26 Nọvemba 2020Gọọmentị Imo steeti akagbuola akwụkwọ ikike ala ndị Rochas nyeburu

    Gọọmentị Imo steeti akagbuola akwụkwọ ikike ala niile bụ nke ha kwuru na ọchịchị Rochas Okorocha nyere ndị mmadụ n’ụzọ adabaghị n’iwu.

    Ha kwuru na ọ bụ ọchịchị Emeka Ihedioha hibere kọmiti lebara okwu a anya, mana ọchịchị Hope Uzodimma nabatara mkpebi ha n’ihi na ọ bụ mkpebi ziri ezi.

12. 26 Nọvemba 2020Jiri otu nkeji gere akụkọ coronavirus dịka ọ dị n'Afrịka ugbua

13. 26 Nọvemba 2020Ozo Big Brother esonyerela otu egwu bọọlụ Juventus

    Ozo, onye so n'egwuregwu Big Brother Naija nke afọ 2020 esonyerela otu egwuregwu bọọlụ Juventus nke mba Itali

    Nwaokorobịa a ezigbo aha ya bụ Ozoemena Chukwu kwupụtara nke a n'akara soshal midia ya dị iche iche.

    Ọzọ kwuru na ahọrọla ya dịka onye nlekọta azụmahịa (Brand Manager) nke ụlọakwụkwọ ebe ndị Juventus na-azụpụta ndị na-agbara ha bọọlụ na Naịjirịa, nke a kpọrọ Juventus Academy na Bekee.

    Kamgbe o sicha n'ụlọ Big Brother Naija pụta, ọnwa Ozo na-etisi nnọọ ike.

    Ụlọọrụ izizi ya na ha nwere nkwekọrịta bụ ụlọọrụ ntaakụkọ egwuregwu bụ Super Sports.

    Ya na ụlọọrụ ekwentị bụ Tecno nwekwara nkwekọrịta azụmahịa.

    Nke ya na Juventus ugbua bụ nke onye ọbụla kpụ n'ọnụ ugbua.

14. 26 Nọvemba 2020Etu m si soro na ndị ọkaibe n'egwuregwu 'Basketball' - Zeke Nnaji

15. 26 Nọvemba 2020Argentina niile ederela jim jim maka olili Diego Maradona

    Puku kwuru puku mmadụ agbakọọla n'obi onyeisiala Argentina iji kwanyere Diego Maradona ugwu ikpeazụ.

    Ụbọchị Tọzde bụ mmalite abalị atọ nke gọọmentị Argentina wepoụtara iji ruo uju maka Maradona, onye nwụrụ n'ụbọchị Wenezde ka ọ dị afọ iri isii (60 years).

    Ọtụtụ na-ebe akwa, ndị ọzọ na-ekpe ekpere, ebe ụfọdụ ndị ọzọ na-efegharị akwa Maradona dịka ha na-agafe n'ebe a dọtara igbe ozu ya.

    E ji ọkọlọtọ mba Argentina kechie igbe ozu ahụ ma were akwa Maradona ji gbaa bọọlụ wụkwasị n'elu ya.

    A ga ekwe ka ndị mmadụ bịa kwanyere Maradona ugwu ikpeazụ ruo na mgbede Tọzde.

    Ndị ezinụlọ Maradona na-eru ụjụ ọnwụ ya gụnyere ụmụ ya ise, na nwunye ya bụ Claudia Vilafane, onye ya na ya kewara n'afọ 2004 dịka ọ gachara afọ iri abụọ ha ji gbaa akwụkwọ.

    Maradona bụ onye ndu ndị otu bọọlụ Argentina buru iko mba ụwa n'afọ 1986.

    Oge Argentina zutere mba England n'agba nke osote ikpeazụ nke asọmpi iko mba ụwa afọ 1986, Maradona nyere goolu site n'iji aka ya kụkpuo bọọlụ na neetị, nke ọ kpọrọ 'Hand of God'.

    Maradona gbakwaara otu 'Napoli' na mba Italy, na otu Barcelona nke mba Spain.

    N'ụbọchị Tọzde, Napoli kwuru na ha ga-akpọzi ama egwuregwu ha aha Maradona.

16. 26 Nọvemba 2020Mgba okpuru ndị isi Ipob na-agba m agaghị amịta mkpụrụ - Uche Mefor

    Osote onyeisi otu 'Indigenous People of Biafra' bụ Uche Mefor ekwuola na ọtụtụ ndị isi otu ahụ na-agba ya mgba okpuru ma na-emetọkwa aha ya.

    Mefor kwuru nke a n'akara 'Facebook' ya n'ụbọchị Tọzde, ma kwuo na mgba okpuru niile ahụ agaghị amịta mkpụrụ ọbụla.

    O kwuru sị: "Ụnụ na-egbu onwe ụnụ oge. Ọtụtụ ihe onyonyo na mgbasaozi dị icheiche na-aga n'ihu ugbua iji metọọ aha m."

    "Ndị isi IPOB ma maka nke a ma gbachikwa nkịtị ka ọ na-aga n'ihu. Ọ bụghị taa ka ọ malitere."

    "Agaghị m agbachi nkịtị ka a na-atụgide m asị n'ọha, bịa na-arịọ m ka a nọrọ n'ime ụlọ kpaa ya."

    "Ikuku ọjọọ a na-eku ugbua nwere ndị o si n'aka."

    Mefor gara n'ihu kwuo na ụfọdụ na-egosi onwe ha dịka ndị ọma nakwa ndị ji ikike ọnwụ na ndụ, mana omume ha akwụghị ọtọ.

    Ọ bụ eziokwu na onweghị onye Mefor kpọrọ aha, kama ọtụtụ na-ekwu na o nwere ike ịbụ Nnamdi Kanu ka ọ na-ekwu maka ya.

    N'ọdị nso a, akụkọ na-ekwu na Mefor na ndị isi Ipob, ọkachasị onyeisi ha bụ Nnamdi Kanu, na-enwe nsogbu.

17. 26 Nọvemba 2020Ihe bụ iwe ndị dọkịta Imo steeti mere ha ji gbaa abụbụ ọrụ

    Ebe akụkọ a si

    • • Onye dere ya, Jessica Nwankwo
      • Ndị mere akụkọ a, BBC Igbo, Lagos

    Ndị dọkịta n’Imo steeti nọ na-abụbụ ọrụ kemgbe ụbọchị Monde maka ọnọdụ ụgwọ ọnwa ha na steeti ahụ.

    Iwe ha dị ka onyeisioche ha bụ Okpara Chidiebere gwara BBC bụ na gọọmentị Imo steeti anaghị akwụlite ha ụgwọ ọnwa ọfụma.

    Okpara kwuru na ha bụ ndị dọkịta degaara gọọmentị akwụkwọ ozi ịgwa ha maka ihe ndị bụ mkpa ha mana o nweghi onye zaghachiri ha.

    Ihe ọzọ o kwuru bụ na ha nyere gọomentị izuụka iri abụọ iji mee ihe mana o nweghi ihe nwere isi nke mere na ha gbara abụbụ ọrụ.

    Ihe ndị ọ gụkọrọ dịka iwe ha gụnyere:

    • Akwụghị ụgwọ ọna ziri ezi
    • Ịgba ndị dọkịta nọọrọ onwe ha nnukwu ego maka ịnwe igwe okwu, igwe television n'ụlọọgwụ ha nakwa ụgwọ ndị ọzọ.
    • Ị napụ naanị otu ụlọakwụkwọ ahụike ha nwere na steeti ahụ ikike ịzụ ndị chọrọ ịbụ dọkịnta.

18. 26 Nọvemba 2020Onyeisioche CAF ga-eme mkpesa maka mmachi FIFA machiri ya

    Onyeisi ngalaba bọolụ n’Afrịka bụ Ahmad Ahmad ekwuola na ọ ga-eme mkpesa gbasara mmachi nke ngalaba bọọlụ n’ụwa niile bụ FIFA machiri ya.

    Ngalaba ahụ machiri Ahmad afọ ise maka ịda iwu ha tinyere site n’afọ 2017 rue afọ 2019.

    Ahmad na-akwado ịzọ ọkwa ya ọzọ na ntuliaka otu CAF na-abịa n'ọnwa Maachị afọ 2021.

19. 26 Nọvemba 2020Atụọla onye ndọrọndọrọ ọchịchị kpọrọ ndị ọkaipe 'ndị iberibe' na mkpọrọ

    Ụlọikpe ukwu na mba Uganda atụọla otu onye sobu azọ ọkwa onyeisila nga makana ọ ji ha mee akaja site n'ịkpọ ha "ndị iberibe".

    Ivan Samuels Ssebadduka gara mkpọrọ afọ atọ maka imegide ụlọikpe, dịka ndị ntaakụkọ na mba ahụ siri kwuo.

    Maazị Ssebadduka dere mkpesa nye Ụlọikpe Ukwu mba ahụ iji kwụsị atumatu mere ka ndị na-azọ ọchịchị onyeisiala na mba ahụ ịnata ikike n'aka ndị mmadụ site n'ibinye aka tupu ha etinye akwụkwọ.

    Ọ chọkwara na ụlọikpe ahụ chabie atụmatụ mmachị ngagharị ngalaba na-ahụ maka ahụike tinyere n'ogige ndọrọndọrọ ọchịchị maka igbochi coronavirus

    O kwuru ajọ okwu a oge ọ na-eme mkpesa ya n'ihu ụlọikpe a.

    Ọkaikpe Ukwu Alfonso Owinyi-Dollo sị na onye ọbụla chọrọ ikwu maka ndị ọkaikpe kwuo nke mere n'eziokwu.

20. 26 Nọvemba 2020Ndị uweojii agbaala ulọ ndina Bobi Wine okirikiri

    Ndị uweojii n'Uganda gbara ụlọ ndina ebe onye na-azọ ọchịchị Robert Kyagulanyi e ji Bobi Wine mara okirikiri.

    Ihe a mere n'obodo Hoima di na ọdịda anyanwụ mba ahụ.

    Bobi Wine dere n'akara Twitter ya na ya jiri ụzọ tere aka ga ya bụ obodo dịka ndị agha gbochiri ya.

    Ọ sị, "ha so anyị gawa ụlọ ndina anyị ma gbaa ya okirikiri."

    Ụlọ ntaakụkọ NTV nke Uganda dekwara n'akara Twitter ha "amabeghị ebumnuche ndị uweojii a.

    Bobi Wine kere foto ndị uweojii no n'ihu ụlọ ndina ahụ.