Umupilote wungirije wa Flydubai yateye umupilote mukuru akoresheje ishoka – umutegetsi wo muri UAE

Umushinjacyaha mukuru wa Emira Zunze Ubumwe z'Abarabu (UAE) yavuze ko umupilote wungirije wagerageje kwigarurira indege ya kompanyi Flydubai yari iri mu rugendo ijya muri Israel, yateye umupilote mukuru (kapiteni w'indege) akoresheje ishoka itaremereye isanzwe ikoreshwa mu ndege nko mu gihe havutse ikibazo cyihutirwa cy'impanuka.

Iyo ndege yari irimo kuva i Dubai yerekeza i Tel Aviv yari itwaye abantu barenga 170, yamanutse mu butumburuke ho metero 5,200 ubwo yari imaze amasaha abiri n'iminota 30 iri mu rugendo, nyuma abagenzi bashobora kurusha imbaraga uwo wari wagabye icyo gitero bashobora kugenzura iyo ndege neza.

Kapiteni Smit Machchhar yavuze ko yari arambaraye hasi yakomeretse ubwo yabonaga ko indege irimo kurohama, nuko yumva agomba kugira icyo akora. Yasobanuye ati: "Nibwiye kugerageza rimwe rya nyuma ngafungura umuryango ndimo imbere", ibyo byatumye abagenzi bashobora kwinjira muri icyo cyumba cy'imbere mu ndege kiba kirimo abapilote.

Nuko abapilote babiri baba bari mu ndege bo kwifashisha bibaye ngombwa bashobora kuyigusha amahoro muri Arabie Saoudite.

Ubusanzwe iyo shoka iba ibitse mu cyumba cy'imbere mu ndege cy'abapilote kugira ngo babe bayifashisha haramutse habaye ikibazo cyihutirwa cyatuma bacyenera kugira ibyo bamena.

Umushinjacyaha mukuru wa UAE yabwiye igitangazamakuru cya leta cy'icyo gihugu ko amaperereza akomeje kugira ngo hamenyekane ibyabaye byose n'impamvu zabiteye.

Minisitiri w'intebe wa Israel Benjamin Netanyahu yavuze ko uwo mupilote wungirije wagabye icyo gitero ari Umunya-Oman.

Ibitangazamakuru byinshi birimo ibiro ntaramakuru Reuters, CNN n'ikinyamakuru the New York Times byatangaje ko uwo mupilote wungirije yitwa Hamam al-Hammami. Abategetsi ntibaremeza iryo zina.

Ubwo yakoraga mu yindi kompanyi y'indege, Oman Air, ibitangazamakuru byo muri Amerika byatangaje ko Al-Hammami yakuwe mu mahugurwa yo gutwara indege kubera impungenge ku bitekerezo bye by'ubuhezanguni, nuko ahabwa akandi kazi muri kompanyi y'igihugu ya Oman yo gutwara abagenzi mu ndege.

Yarangije amasomo y'imyaka itatu yo mu buryo bw'ikoranabuhanga ry'iyakure kuri Kaminuza ya 'Buckinghamshire New University' yo mu Bwongereza, nuko abona impamyabumenyi mu by'imicungire y'indege (aviation management) mu mwaka wa 2023, nkuko iyo Kaminuza yabivuze. Iyo Kaminuza yongeyeho ko ubwo yigaga kuri iryo shuri nta mahugurwa n'amwe yigeze akora yo gutwara indege.

Ubwo yaganiraga n'igitangazamakuru Fox News cyo muri Amerika, Netanyahu yavuze ko nyuma yuko uwo wagabye icyo gitero arushijwe imbaraga, yavuze mu ijwi ryo hejuru abwira abatwaye indege ati: "Nimunyice, nimunyice!"

Minisitiri w'intebe wa Israel yongeyeho ati: "Rero, biraboneka ko yashakaga kwiyahura... Uko bigaragara birashoboka cyane ko yari agiye kumanura iyo ndege."

Yanongeyeho ko uwo wateye "yakorewe icengezamatwara ry'ibitekerezo by'ubuhezanguni byiyitirira idini rya Isilamu".

Ibiro ntaramakuru bya leta ya UAE byatangaje ko icyo gihugu cyatangiye iperereza ku kumenya niba "ibyabaye byari bifitanye isano n'igikorwa icyo ari cyo cyose cy'iterabwoba cyangwa n'intego iyo ari yo yose y'iterabwoba".

Machchhar yajyanywe ku bitaro biri hafi aho muri Arabie Saoudite, nyuma aza kujyanwa n'indege mu murwa mukuru Abu Dhabi wa UAE, aho bitangazwa ko ibipimo by'ubuzima bwe byasubiye ku rugero rusanzwe.

Ku wa kane, ambasade y'Ubuhinde muri UAE yavuze ko uwo mupilote, w'Umuhinde, afite "ubuzima bwiza kandi arimo gukira neza".

Machchhar yagize ati: "Mfite icyizere ko nzakira kandi nzongera kuba umuntu ushoboye kandi nzongera ngire ubuzima bwiza."

Mu kiganiro yagiranye na CNN ku mugoroba wo ku wa gatatu, Netanyahu yavuze ko uwo mupilote watewe, abagenzi hamwe n'abandi bapilote ba kabiri "bashoboye kurinda ko habaho ibyago by'itariki ya 11 y'ukwa 9", abigereranya n'ibitero by'indege zayobejwe byabaye muri Amerika ku itariki nk'iyo mu mwaka wa 2001.