G7 igiye gusohora utugunguru miliyoni 100 tw'ibikomoka kuri peteroli na mazutu nyuma yuko Trump akangishije kureka kubyohereza hanze

Itsinda rya G7 ry'ibihugu bikize ku isi ryemeye gusohora utugunguru miliyoni 100 tw'ibikomoka kuri peteroli hamwe na mazutu kugira ngo habeho kudohora igitutu mu bucuruzi bw'ibikomoka kuri peteroli cyatumye ibiciro bitumbagira.

Iryo tsinda, ririmo n'Amerika, ryavuze ko icyo cyemezo kizabamo no "gusohora ku bwinshi" mazutu mu minsi iri imbere.

Perezida w'Amerika Donald Trump yari yakangishije kubuza iyoherezwa mu mahanga rya mazutu, icyemezo cyajyaga kudohora igitutu ku biciro ku baguzi bo muri Amerika mbere yuko haba amatora yo hagati muri manda y'abagize inteko ishingamategeko azaba mu Gushyingo (11) uyu mwaka, ariko kikazamura ibiciro ahandi.

Mu itangazo rihuriweho byasohoye, ibihugu bigize G7 ubu byemeranyije "kwirinda gukumira iyoherezwa mu mahanga ry'ingufu n'iry'ibicuruzwa by'ingufu" kuri buri gihugu mu bigize iryo tsinda.

G7 igizwe n'Amerika, Ubwongereza, Canada, Ubuyapani, Ubudage, Ubutaliyani n'Ubufaransa, ndetse n'umuryango w'Ubumwe bw'Uburayi (EU/UE) ukaba uhagararirwa mu nama zayo.

Trump yari yaburiye ko azabuza iyoherezwa mu mahanga rya mazutu ivuye muri Amerika niba ibihugu by'i Burayi bitemeye gushyira ku isoko kurushaho mazutu yo mu bubiko bwabyo.

Ku wa gatanu, yatangaje ku mbuga nkoranyambaga ati: "Uburayi bumaze kwemera gusohora ku bwinshi cyane Mazutu bari barahunitse cyane. Icyo gikorwa kiratangira aka kanya."

Minisitiri w'imari w'Amerika Scott Bessent yari yavuze ko abahinzi bo muri Amerika, abashoferi b'amakamyo hamwe n'abacuruzi baho "ntibakwiye gusigara bikoreye umutwaro" mu gihe ibiciro birimo gutumbagira.

Mazutu ikoreshwa cyane mu gutwara ibicuruzwa no mu buhinzi, ibyo bikaba bisobanuye ko izamuka ry'ikiguzi cyayo rituma n'icy'ibicuruzwa by'ibanze mu buzima, nk'ibiribwa, na cyo kizamuka.

Ariko nyuma y'iyo nama y'abategetsi bo muri G7, Perezida w'Ubufaransa Emmanuel Macron yavuze ko iryo tsinda ryemeranyije gusohora ububiko "bugera ku tugunguru miliyoni 100" mu gihe kitarenze amezi ane ku buhuza bw'umuryango mpuzamahanga w'ingufu (IEA).

Ubwongereza bwari buhagarariwe muri iyo nama na Minisitiri w'ububanyi n'amahanga Ed Miliband, wavuze ko izo ngamba "zizagumisha hamwe itangwa ry'ingufu, kubaka ukudahungabana kw'uruhererekane rw'isaranganywa ry'ibicuruzwa no kurinda ingo n'abacuruzi izamuka ry'ibiciro".

Macron yavuze ko icyo gikorwa gihuriweho kizatuma habaho "kugabanya ibiciro by'ibicuruzwa bikomoka kuri peteroli, by'umwihariko mazutu". Ubwo yavugaga ku kuba ibyo bihugu byemeranyije ku kutabuza iyoherezwa mu mahanga ry'ibyo bicuruzwa, Macron yavuze ko "Perezida Trump, by'umwihariko, yabisobanuye neza kuri iyi ngingo".

Ubwo yavugiraga mu biro bye byitwa White House, Trump nyuma yaho yavuze ko kubuza iyoherezwa mu mahanga rya mazutu "ntibyigeze na rimwe rwose biba ku meza" nk'ikintu yashoboraga gukora.

Mu itangazo bahuriyeho, abategetsi bo muri G7 bagize bati: "Tuzashyira mu ngiro ibyo twiyemeje mu gutuma habaho isohora rigizwemo uruhare na IEA ry'utugunguru miliyoni 100 ritangira aka kanya kugeza mu gihe cy'amezi ane, harimo no kwibanda ku gusohora mazutu ku bwinshi mu minsi 20 ibanza bikozwe n'abanyamuryango ba G7 hamwe n'abafatanyabikorwa".

Ibihugu by'abafatanyabikorwa bizasohora ibikomoka kuri peteroli byo mu bubiko bwabyo ntibirasobanuka, ndetse ntiharasobanuka niba bizabikora byihuse mu gihe kingana iki.

Utwo tugunguru miliyoni 100 tuzaba tugizwe na mazutu hamwe n'ibikomoka kuri peteroli bidatunganyije.

Igiciro mpuzamahanga cy'ifatizo cya Brent cy'ibikomoka kuri peteroli cyaragabanutse by'igihe gito kijya munsi y'amadolari 100 y'Amerika ku kagunguru (ni ukuvuga munsi ya 147,000 FRW) ariko cyongera kuzamuka ku wa gatanu nimugoroba kigera ku madolari 102 y'Amerika (angana na 150,000 FRW).

Mbere yuko Amerika na Israel bitera Iran muri Gashyantare (2) uyu mwaka, ako kagunguru kaguraga amadolari agera kuri 73 y'Amerika (angana na 107,000 FRW).