Meya wa Kyiv avuga ko Uburusiya bwarashe iteme rinini rya kabiri ryo muri uwo mujyi

Igitero cy'Uburusiya cyarashe iteme rinini rya kabiri mu murwa mukuru Kyiv wa Ukraine, nkuko bivugwa n'umukuru (meya) w'uwo mujyi Vitali Klitschko, mu gihe Uburusiya bwakajije umurego mu bitero ku bikorwa-remezo by'ingenzi cyane byo muri uwo mujyi.

Klitschko yavuze ko icyo gitero cyo mu gitondo cyo ku wa gatandatu cyangije umuhanda w'iryo teme hamwe n'insinga z'amashanyarazi zo hejuru y'umuhanda ziha umuriro imodoka za bisi, ku iteme rizwi nk'Iteme ry'Amajyaruguru, bituma ingendo zihagarara.

Icyo gitero kibaye nyuma y'ikindi Uburusiya bwagabye ku rindi teme rinini ryo muri uwo mujyi, rizwi nk'Iteme ry'Amajyepfo, ryarashweho kenshi n'indege nto z'intambara zitajyamo umupilote (zizwi nka 'drones') ku wa kane no ku wa gatanu w'iki cyumweru. Mbere, Klitschko yari yaburiye ko ibitero nk'ibyo birimo "gushwanyaguza Kyiv".

Iteme ry'Amajyaruguru n'Iteme ry'Amajyepfo ahuza igice cy'uburasirazuba n'igice cy'uburengerazuba by'umurwa mukuru Kyiv ndetse mbere yo ku wa kane ntiyari bwarasweho, ibyabaye bikaba bica amarenga y'icyiciro gishya mu muvuno w'intambara y'Uburusiya.

Ibitero ku Iteme ry'Amajyepfo byatumye ingendo zihungabana cyane guhera ku wa kane w'iki cyumweru, ingendo za gariyamoshi zinyura munsi y'ubutaka n'iz'imodoka zirinyuraho ziba zihagaritswe.

Abaturage benshi bo muri uwo mujyi – bagera kuri miliyoni hafi eshatu – bacungira ku ngendo za gariyamoshi zinyura munsi y'ubutaka kugira ngo bashobore gukora ingendo muri uwo mujyi.

Mu butumwa yanditse ku rubuga rwa Telegram ku wa gatandatu, Klitschko yagize ati: "Iraswa ry'Iteme ry'Amajyaruguru. Serivisi z'ubutabazi bwihutirwa ziri mu nzira [zerekezayo]."

Yongeyeho ati: "Ingendo ziva ibumoso zigana iburyo bw'iteme ubu zirahagaritswe."

Mbere, ibitero ku Iteme ry'Amajyepfo byatumye akanama gashinzwe umutekano wa Kyiv gaterana ku wa gatanu mu nama yo mu bihe by'amage, bituma nyuma yaho Klitschko aburira ko uwo mujyi wari uri mu "bihe bikomeye cyane" mu gihe Uburusiya burimo kurasa cyane kandi kenshi ku "bikorwa-remezo by'ingenzi cyane, ibikoresho, inyubako" byo muri uwo mujyi hamwe n'ibindi bigo by'ingenzi cyane.

Perezida w'Uburusiya Vladimir Putin yavuze ko Uburusiya burimo gusubiza ibitero bya Ukraine ku bigo by'ingufu by'Uburusiya, nubwo ari Uburusiya bwagabye ibitero nk'ibyo bwa mbere.

Perezida wa Ukraine Volodymyr Zelensky yavuze ko Putin yafashe icyemezo ko "nta mategeko ariho ubu" igihe aba agaba ibitero kuri Ukraine.

Mu kiganiro yagiranye n'ikinyamakuru the Financial Times cyo mu Bwongereza, yagize ati: "Abarusiya bananiwe kutwigarurira. Rero ubu barimo kugaba ibitero byinshi cyane no kwica abantu benshi."

Yongeyeho ati: "Barashaka gusenya amateme yacu... ibigo byacu bibikwamo amakuru y'ikoranabuhanga, murandasi [internet], imiyoboro ya telefone zigendanwa, ibitaro, amashuri y'inshuke, amashuri, za kaminuza – buri kintu cyose. Barashaka ko abantu [abaturage] bahunga imijyi yabo."