የሁቲ አማፂያን በሳዑዲ አረቢያ ሪያድ የሚገኝ የነዳጅ ማከማቻ ማጥቃታቸውን አስታወቁ

የቀጥታ ሽፋን

1. 4 ጥቅምት 2026አሜሪካ በአደራዳሪዎች በኩል አዲስ ምክረ ሃሳብ ማቅረቧን ኢራን አስታወቀች

   የኢራን ፓርላማ አፈጉባኤ የሆኑት ሞሃመድ ባጋር ጋሊባፍ፣ ቴህራን የሆርሙዝ ወሽመጥን በሰባት ቀን ውስጥ ዳግም ለመክፈት የሚያስችል ዕቅድ ካቀረበች በኋላ ዋሽንግተን "በአደራዳሪ በኩል አንዳንድ ሀሳቦችን" እንዳቀረበች ተናገሩ።

   ነገር ግን፣ አሜሪካ "ጊዜን የማባከን እና በአንድ ወገን የሚወሰኑ ፍላጎቶችን የመጫን ዘመን ማብቃቱን" ማወቅ እንዳለባት፣ እንዲሁም የኢራን አቋም "ግልጽ እና የማያሻማ" ሆኖ እንደሚቀጥል ተናግረዋል።

   “የሆርሙዝ ወሽመጥ በኢዝላማባድ የመግባቢያ ሰነድ ስምምነት መሠረት የተቀመጡት ሰባት ቅድመ ሁኔታዎቻችን ሳይሟሉ ዳግም አይከፈትም” ሲሉም አክለዋል።

   ጋሊባፍ ኢራን በአሜሪካ እርምጃዎች “አትደነቅም” ወይንም “አትሸበርም” በማለት “እየተዋጋን እንደራደራለን” ማለታቸው ተሰምቷል።

   “በጦርሜዳ ላይ በሙሉ አቅማችን እንገኛለን፤ አዳዲስ አስገራሚ እርምጃዎችን በመውሰድም እንገጥማቸዋለን። እንዲሁም በወታደራዊው መስክ የበላይነታችንን ለማረጋገጥ እና የኢራን ሕዝብ መብቶችን ለማስከበር የዲፕሎማሲ መንገዶችን እንጠቀማለን” ሲሉ ተናግረዋል።

   ከሁለት ሳምንት በፊት ኢራን የሆርሙዝ ወሽመጥን ዳግም መክፈት ያስችላል ያለችውን ዕቅድ በአደራዳሪዋ ኳታር በኩል አቅርባለች።

   ቅድመ ሁኔታዎቹ በሁሉም ግንባሮች ጦርነትን ማቆም፣ የታገዱ ሃብቶችን መልቀቅ፣ በኢራን ወደቦች ላይ የተጣለውን እገዳ ማንሳት እና በኢራን ውስጣዊ ጉዳይ አለመግባት፣ ከኢራን ባላጋራዎች ጋር ትብብርን ማቋረጥ እና በግዛቷ ምንም ዓይነት ጥቃት እንዳይፈጸም የሚጠይቁ ናቸው።

   የኢራን ውጭ ጉዳይ ሚኒስትር አባስ አራጋቺ በበኩላቸው ቴህራን “ራሷን ለመከላከል ቁርጠኛ የሆነችውን ያህል ዲፕሎማሲያዊ መፍትሄ ለመፈለግም ቁርጠኛ ነች” ብለዋል።

   ታስኒም የዜና ወኪል እንደዘገበው፣ አራግቺ ከውጭ አገር አምባሳደሮች ጋር ባደረጉት ስብሰባ ላይ “በዲፕሎማሲያዊ መንገድ ፍትሃዊ መፍትሄ ላይ ለመድረስ ዝግጁ ነን፤ በተመሳሳይ ጊዜም ለማንኛውም ወታደራዊ ጥቃት የከፋ ምላሽ ለመስጠትተዘጋጅተናል” ብለዋል።

2. 4 ጥቅምት 2026የሁቲ አማፂያን በሳዑዲ አረቢያ ሪያድ የሚገኝ የነዳጅ ማከማቻ ማጥቃታቸውን አስታወቁ

   የሁቲ አማፂያን በሳዑዲ አረቢያ ዋና ከተማ ሪያድ የሚገኘውን የነዳጅ ማከማቻ በተወንጫፊ ሚሳዔል እና ድሮኖች ማጥቃታቸውን አስታወቁ። ሳዑዲ አረቢያ ጥቃቱ ስለመፈጸሙ ወዲያውኑ ማረጋገጫ አልሰጠችም።

   የሁቲ ታጣቂዎች ጥቃቱን የፈጸሙት ሳዑዲ በሰነዓ እና ሌሎች የየመን ግዛቶች ላይ ለፈጸመቻቸው የአየር ድብደባዎች ምላሽ መሆኑን ተናግረዋል።

   ቅዳሜ ዕለት ሮይተርስ ያነጋገራቸው የዐይን እማኞች በሪያድ ከሚገኘው የሳዑዲ ነዳጅ ድርጅት፣ አራምኮ ተቋም ጭስ እና እሳት መመልከታቸውን ተናግረዋል።

   አራምኮ ጥቃቱ ስለመፈጸሙ እና ስለደረሰው ጉዳት ለቀረበለት ጥያቄ ምላሽ አልሰጠም።

   በሳዑዲ አረቢያ እና በሁቲ አማጺያን መካከል ያለው ግጭት እየተካረረ የመጣ ሲሆን፣ ሁቲዎች የሳዑዲ ከተሞች እና መሠረተ ልማቶች ላይ የሚፈጽሙትን ጥቃት አጠናክረው ቀጥለዋል።

   ሁቲዎች ባለፈው ሳምንት በያንቡ የሚገኙትን የሳዑዲ አራምኮ ተቋማት በሮኬቶች እና በድሮኖች ማጥቃታቸውን አስታውቀዋል።

   በወቅቱ ሳዑዲ አረቢያ፣ ሁቲዎች ወደ ታይፍ እና ያንቡ አካባቢ የተኮሷቸውን ስድስት ሮኬቶችን መትታ መጣሏን የገለጸች ቢሆንም፣ በአራምኮ ተቋማት ላይ ስለደረሰ ጉዳት ግን ያለችው ነገር የለም።

3. 3 ጥቅምት 2026በማጭበርበር የተከሰሱት የቀድሞ የአሜሪካ እንደራሴ የ10 ዓመት እስራት ተፈረደባቸው

   የቀድሞ የአሜሪካ የሕዝብ እንደራሴ ሕገ ወጥ ገንዘብን ሕጋዊ ማስመሰልን ጨምሮ በሌሎችም ክሶች የ10 ዓመት እስራት ተፈረደባቸው።

   በፍሎሪካ የሪፐብሊካን ፓርቲ ተወካይ የነበሩት የ61 ዓመቱ ዴቪድ ሪቫራ የውጭ መንግሥት መወከላቸውን ሳይገልጹ እንቅስቃሴ በማድረግም ተከስሰዋል።

   የቬንዝዌላ መንግሥት የሚያስተዳድረው የነዳጅ ፋብሪካ የዴቪድ ወትዋች (ሎቢይንግ) ተቋም የምክር ቤት አባላት ላይ ጫና እንዲያሳድር መቅጠሩ ተገልጿል። የነዳጅ ፋብሪካው የአሜሪካ እና ቬንዝዌላን ግንኙነት የተሻለ ለማድረግ ነበር ተቋሙን የቀጠረው።

   ሰባት ሳምንት ከወሰደ የፍርድ ቤት ሒደት በኋላም ጥፋተኛ ተብለዋል።

   በቬንዝዌላው ተቋም ለሦስት ወራት ያህል በ50 ሚሊዮን ዶላር ተቀጥረው የሠሩ ሲሆን፤ ዐቃቤ ሕግ እንዳለው “በምሥጢራዊ መንገድ የፖለቲካ ንቅናቄ” ሲያደርጉ ነበር።

   የቀድሞው እንደራሴ አጋሮች የአሜሪካ የውጭ ጉዳይ ሚኒስትር ማርኮ ሩቢዮ እና የቴክሳስ እንደራሴ ፒት ሴሽንስ ምንም የሚያውቁት ነገር እንዳልነበር በፍርድ ቤት ቃላቸውን ሰጥተዋል።

   በፍርድ ቤት ውሳኔ መሠረት የፍሎሪዳ ንብረታቸው የሚወረስ ይሆናል።

4. 3 ጥቅምት 2026በፈረንሳይ በቀጠለው ተቃውሞ የጸጥታ አካላት ከተማሪዎች ጋር ተጋጩ

   በፈረንሳይ በቀጠለው እና ከ700 በላይ ትምህርት ቤቶችን ባስተጓጎለው የተማሪዎች ተቃውሞ ፖሊስ ከተቃዋሚዎች ጋር ተጋጨ።

   የሁለተኛ ደረጃ ትምህርት ቤት ተማሪዎች የመምህራንን እጥረት፣ የተጨናነቁ መማሪያ ክፍሎች እና የፈረሱ ሕንፃዎችን በተመለከተ ጥያቄ በማንሳት በተቀሰቀሰ ተቃውሞ መንገዶች በእሳት ነበልባል ተውጠዋል።

   ፖሊስ አስለቃሽ ጭስ ጭምር በመጠቀም አርምጃ እየወሰደ ሲሆን ይህም ተቃውሞውን አባብሶታል ተብሏል።

   የአገር ውስጥ ጉዳይ ሚኒስትሩ ሎረንት ኑኔዝ፣ አርብ ዕለት ብቻ 1 ሺህ 747 ሰዎች በቁጥጥር ሥር መዋላቸውን ተናግረዋል።

   ባለፈው ሳምንት በዋና ከተማዋ ፓሪስ የተጀመረው ተቃውሞው በመላ አገሪቱ ተስፋፍቷል። ሞንትፔሊየር፣ ናንቴስ እና ማርሴይል ያሉ ከተሞችም በተቃውሞው ክፉኛ ተጎድተዋል።

   የፈረንሳይ የፍትሕ ሚኒስትር ጄራልድ ዳርማኒን “ሁኔታው ከሁለተኛ ደረጃ ተማሪዎች ተቃውሞ ወደ ሕዝባዊ ሥርዓት አልበነኝት ተሸጋግሯል” ብለዋል።

   ዳርማኒን እንዳሉት በተቃውሞው በፈረንሳይ ከሚገኙ 3 ሺህ 700 ትምህርት ቤቶች ውስጥ 735ቱ በአንድም ሆነ በሌላ መልኩ ተጎድተዋል።

   የውስጥ ጉዳይ ሚኒስትሩ አርብ ዕለት “በሁከት እና በከተማ ግጭት ውስጥ ነው ያለነው፤ ይህንንም ለማስቆም የተሻሉ አማራጭ መንገዶች እየተጠቀምን ነው” ሲሉ ለአገሪቷ መገናኛ ብዙኃን ተናግረዋል።

   የትምህርት ሚኒስትሩ ኤዱዋርድ ጌፍሬይ በበኩላቸው የተቃውሞ ሰልፉ "ተማሪዎች ባልሆኑ አካላት መጠለፉን" ገልጸዋል።

   ሚኒስትሩ ለፈረንሳይ ቢኤፍኤም ቲቪ እንደተናገሩት መምህራን “ከፊቴ ያሉ ሰዎች ተማሪዎቼ አይደሉም” ሲሉ እንደነገሯቸው ጠቅሰዋል።

   በተከተሰው ግጭት ቢያንስ 65 የሚሆኑ መምህራን መጎዳታቸውንም ሚኒስቴሩ አስታውቋል።

   ተቃውሞው የተቀሰቀሰው ፕሬዚደንት ኢማኑኤል ማክሮን ለቀጣዩ ፕሬዚደንታዊ ምርጫ ስድስት ወር በቀራቸው ወቅት ነው።

5. 3 ጥቅምት 2026ትራምፕ የኢራን ጦርነት ከአሜሪካ የአጋማሽ ዘመን ምርጫ በኋላ እንደሚጠናቀቅ ተናገሩ

   ፕሬዝዳንት ዶናልድ ትራምፕ የኢራን ጦርነት ከአሜሪካ የአጋማሽ ዘመን ምርጫ በኋላ እንደሚጠናቀቅ በድጋሚ ተናገሩ።

   በአልባማ ግዛት የአጋማሽ ዘመን የምርጫ ቅስቀሳ ላይ ባደረጉት ንግግር “ጦርነቱ ከምርጫው በኋላ የሚያልቅ ይሆናል” ብለዋል።

   ትራምፕ ባለፉት ጥቂት ሳምንታት ተመሳሳይ አስተያየት ሲሰጡ ነበር።

   የኢራንን ጦርነት የሚቃወሙ አሜሪካውያን ቁጥር እየጨመረ መጥቷል።

   ትራምፕ በንግግራቸው ኢራን የምጣኔ ሃብት ቀውስ እንደገጠማት እና የዋጋ ንረት 310 በመቶ መድረሱን ጠቅሰዋል።

   “ምጣኔ ሃብታቸው ክፉኛ ላሽቋል። የዋጋ ግሽበት ብቻ ነው ያላቸው። እንዴት እንደሚሆኑ እናያለን” ብለዋል።

   ፕሬዝዳንቱ ከዚህ በፊትም የኢራን ጦርነት ከአሜሪካ የአጋማሽ ዘመን ምርጫ በኋላ እንደሚቋጭ ተናግረዋል።

   በምርጫ ቅስቀሳው ላይ ባሰሙት ንግግር “ጦርነቱ እንዳከተመ የነዳጅ ዋጋ በከፍተኛ መጠን ይቀንሳል” ሲሉ ተደምጠዋል።

   ጦርነቱ “በአንድም ይሁን በሌላ መንገድ በቅርቡ ያልቃል” ብለዋል ፕሬዝዳንት ትራምፕ።

   በሌላ በኩል አክሲዮስ የተባለው የአሜሪካ ሚዲያ እንደዘገበው፤ በትራምፕ ይፋዊ መኖሪያ ካምፕ ዴቪድ ውስጥ በምክትል ፕሬዝዳንት ጄዲ ቫንስ የተመራ ምሥጢራዊ ውይይት ተከናውኗል።

   በውይይቱ ከፍተኛ የአሜሪካ ባለሥልጣናት የተገኙ ሲሆን ስለ ኢራን ጦርነት ተነጋግረዋል። በየመን እየተባባሰ የመጣው የሳዑዲ እና የሁቲዎች ግጭትም በውይይታቸው ተነስቷል።

6. 2 ጥቅምት 2026በየመን ያለው ረሃብ አስከፊ ደረጃ ላይ መድረሱን የዓለም ምግብ ፕሮግራም አስጠነቀቀ

   በየመን ያለው ረሃብ አስከፊ ደረጃ ላይ መድረሱን እና ምግብ ማግኘት የማይችሉ ሰዎች ቁጥር ከዚህ ቀደም ባልታየ ሁኔታ መጨመሩን የተባበሩት መንግሥታት የዓለም ምግብ ፕሮግራም አስጠነቀቀ።

   በአገሪቱ እየተባባሰ የመጣው ግጭት በርካታ ሰዎችን ያፈናቀለ ሲሆን ገበያዎች እንዲስተጓጎሉ እና የሰብዓዊ እርዳታ አቅርቦት እንዲገደብ አድርጓል።

   በየመን ሁቲዎች እና በሳዑዲ አረቢያ መካከል ባገረሸው ጦርነት ከፍተኛ ውጥረት ነግሷል።

   ሁለቱ ወገኖች አአአ በ2022 የተኩስ አቁም ስምምነት ከተፈራረሙ ወዲህ በተቀሰቀሰው ግጭት በአስር ሺዎች የሚቆጠሩ ሰዎች ተፈናቅለዋል።

   እንደ ዓለም አቀፉ የስደተኞች ድርጅት (አይኦኤም) መረጃ ከሆነ አዲስ በተቀሰቀሰው ግጭት ከ149 ሺህ በላይ ሰዎች መኖሪያቸውን ለቅቀው ለመውጣት ተገደዋል። ከእነዚህ መካከል አብዛኞቹ በድጋሚ የተፈናቀሉ ናቸው።

   የዓለም ምግብ ፕሮግራም ምክትል ዳይሬክተር ማቲው ሆሊንግዎርዝ እንዳሉትም መንግሥት በሚቆጣጠራቸው አካባቢዎች በአሳሳቢ ሁኔታ በርካታ ሰዎች የምግብ ፍላጎታቸውን ማሟላት አልቻሉም።

   በአማካይ ከአራት የቤተሰብ አባላት ውስጥ ሦስቱ ምግባቸውን እንደሚዘሉ ምክትል ዳይሬክተሩ ተናግረዋል።

   መንግሥት በሚቆጣጠራቸው የየመን አካባቢዎች ወደ 10 ሚሊዮን የሚጠጋ ሕዝብ እንደሚኖር ይገመታል።

   በአጠቃላይ በየመን 18.3 ሚሊዮን ሰዎች አስከፊ የምግብ ዋስትና ችግር ያለባቸው ሲሆን 2.2 ሚሊዮን የሚሆኑ እድሜያቸው ከአምስት ዓመት በታች የሆኑ ሕፃናት ከባድ የተመጣጠነ የምግብ እጥረት አለባቸው። ከእነዚህ መካከል ግማሽ ሚሊዮን የሚሆኑት ያለባቸው የምግብ እጥረት ሕይወታቸውን አደጋ ላይ የሚጥል እና እጅግ የከፋ ነው።

7. 2 ጥቅምት 2026“ከእኛ በስተቀር ማንም አፍሪካን ታላቅ ማድረግ አይችልም” አፍሪካዊው ቢሊየነር አሊኮ ዳንጎቴ

   ናይጄሪያዊው ቢሊየነር አሊኮ ዳንጎቴ “ከእኛ ከአፍሪካውያን ውጭ ማንም አህጉሯን ታላቅ ማድረግ አይችልም” ሲሉ አፍሪካውያን በውጭ ላይ ጥገኛ ከመሆን ይልቅ የአህጉራቸውን መፃዒ እድል በእጃቸው እንዲያደርጉ አሳሰቡ።

   ቢሊየነሩ ይህን ያሉት በኬንያ ሰሜናዊ የባሕር ዳርቻ በምትገኘው ላሙ የነዳጅ ማጣሪያ ግንባታ ማስጀመራቸውን ተከትሎ ከቢቢሲ ፎከስ ኦን አፍሪካ ጋር ባደረጉት ቃል ምልልስ ነው።

   ዳንጎቴ በዚህ ቃለ ምልልሳቸው የአፍሪካን ችግሮች እና እድሎች እንዲሁም ጥንካሬን የተመለከቱ አጫጭር መልስ የሚሹ ጥያቄዎች ቀርበውላቸዋል።

   በዚህም የአፍሪካ ትልቁ ችግር የሰዎች፣ የምርቶች እና አገልግሎቶች ዝውውር አለመኖር እንደሆነ በመጥቀስ የአፍሪካ የነፃ ንግድ ስምምነት በተግባር መስራቱን ማረጋገጥ አለብን ብለዋል።

   አፍሪካ ወጣት እና ታታሪ ሕዝብ ያላት እንዲሁም የነዳጅ ድፍድፍን ጨምሮ የሌሎች ማዕድናት ባለቤት መሆኗ ለአፍሪካ ትልቅ እድል መሆኑንም ዳንጎቴ አንስተዋል።

   ሆኖም “አፍሪካውያን በገዛ አህጉራችን ኢንቨስት ማድረግ ስለምንፈራ እና የውጭ ሰዎች መጥተው ያንን እንዲያደርጉ ስለምንፈልግ አፍሪካ ያላትን አቅም መጠቀም አልቻለችም” ብለዋል።

   “የውጭ ሰዎች የእኛን አህጉር ታላቅ ማድረግ አይችሉም፣ ከእኛ በስተቀር ማንም መጥቶ አፍሪካን ታላቅ ማድረግ እንደማይችል እኛ አፍሪካውያን መረዳት ይኖርብናል።” ሲሉም አስረድተዋል።

   ቢሊየነር አሊኮ ዳንጎቴ እና የኬንያው ፕሬዝዳንት ዊሊያም ሩቶ በኬንያ ሰሜናዊ የባሕር ዳርቻ ላሙ ውስጥ 16 ቢሊዮን ዶላር የሚያወጣ የነዳጅ ማጣሪያ ግንባታን በይፋ ያስጀመሩት በዚህ ሳምንት ነበር።

   የነዳጅ ማጣሪያው ሲጠናቀቅ በቀን 700 ሺህ በርሜል ድፍድፍ ነዳጅ እንደሚያመርት የሚጠበቅ ሲሆን ይህም በምስራቅ አፍሪካ ትልቁ የኢንደስትሪ ፕሮጀክት ያደርገዋል።

   በግንባታው ማስጀመሪያ ሥነ ሥርዓት ላይ የኢትዮጵያውን ጠቅላይ ሚኒስትር ዐቢይ ጨምሮ የዩጋንዳ፣ የቶጎ እና የቤኒን መሪዎች ተገኝተዋል።

   በናይጄሪያ ካኖ ግዛት የተወለዱት የ67 ዓመቱ ዳንጎቴ፣ 28 ቢሊዮን ዶላር ገደማ የተጣራ ሃብት እንዳላቸው የፎርብስ መጽሔት መረጃ ያመለክታል።

   የሀብታቸው መነሻም በናይጄሪያ የሚያካሂዱት የሲሚንቶ እና የስኳር ንግድ ሲሆን፣ በኋላ ንግዳቸውን እና ምርታቸውን ወደ 16 ሌሎች የአፍሪካ አገሮች አስፋፍተዋል።

8. 2 ጥቅምት 2026ጠ/ሚ ዐቢይ “መንገድ ስተው ከአገራቸው በተቃራኒው ለቆሙ” የሰላም በር ክፍት መሆኑን ተናገሩ

   የኢትዮጵያ ጠቅላይ ሚኒስትር ዐቢይ አሕመድ “መንገድ ስተው ከአገራቸው በተቃራኒው የቆሙ" ወደ ሰላም እንዲመለሱ ጥሪ አቀረቡ።

   ጠቅላይ ሚኒስትሩ ይህን ያሉት ዛሬ ዓርብ መስከረም 22/2019 ዓ.ም. መከበር የጀመረውን የኢሬቻ በዓልን አስመልክቶ በማኅበራዊ ሚዲያ ገጻቸው ባስተላለፉት መልዕክት ነው።

   ዐቢይ ኢትዮጵያ የደኅንነት እና ዲፕሎማሲያዊ ቀውስ ውስጥ በገባችበት ወቅት በጽሑፍ ባስተላለፉት መልዕክት “ ከአገራቸው በተቃራኒ የቆሙ” ያሏቸውን አካላት በስም አልጠቀሱም።

   ጠቅላይ ሚኒስትሩ፤ የኦሮሞ ነጻነት ሠራዊት፣ ህወሓት እና የአማራ ፋኖ ብሔራዊ ንቅናቄን ጨምሮ ሰባት ታጣቂ ቡድኖች "የዐቢይን መንግሥት ለመጣል" ያለመ "ትብብር ለኅልውና" የተባለ ጥምረት መመስረታቸውን ካስታወቁ እና የሰሜን ኢትዮጵያው ጦርነት ካገረሸ በኋላ የሰላም ጥሪ ሲያቀርቡ ይህ የመጀመሪያው ነው።

   በመልዕክታቸው “ኦሮሞ በትግሉ ነጻ ወጥቷል፤ ከዚህ በኋላ በጠብመንጃ አፈሙዝ እና ከጠላት ጋር በመወገን የሚመለስ የኦሮሞ ጥያቄ ፈፅሞ አይኖርም” ያሉት ዐቢይ፣ የኦሮሞ ሕዝብ ቋንቋውን፣ ባህሉን እና እሴቱን ለማሳደግ ያነሳውን ጥያቄ ሙሉ በሙሉ ለመመለስ የተደረገውን ጥረት አንስተዋል።

   ለዚህም “ የሆራ ፊንፊኔ ኢሬቻ ወደ መልካው መመለሱን" እና "የሆራ አርሰዴ ኢሬቻ ደግሞ በቢሾፍቱ ውበት ደምቆ መከበሩን" በምሳሌነት ጠቅሰዋል።

   በመሆኑም የኢትዮጵያ ሕዝብ አንድነቱን እንዲያጠናክር እና ሰላምን፣ እርቅን እና ወንድማማችነትን እንዲያበረታታ ጥሪ አቅርበዋል።

   በሰሜን ኢትዮጵያ ያገረሸውን ጦርነት ተከትሎ የዐቢይ አስተዳደር የደኅንነት እና ዲፕሎማሲያዊ ቀውስ ውስጥ ገብቷል።

   ኢትዮጵያ ትናንት በአስመራ የሚገኘውን ኤምባሲዋን መዝጋቷን እና 10 የኤርትራ ዲፕሎማቶችን በ48 ሰዓታት አገሪቷን ለቅቀው እንዲወጡ አዝዛለች።

   ኤርትራም በምላሹ ከኢትዮጵያ ጋር ያላትን ዲፕሎማሲያዊ ግንኙነት ሙሉ በሙሉ ማቋረጧን አስታውቃለች። ግብፅ በበኩሏ አንድ ዲፕሎማቷ ከኢትዮጵያ እንዲወጡ ከታዘዙ በኋላ ተመሳሳይ እርምጃ ወስዳለች።

   ውጥረቱ ዓለም አቀፍ ማኅበረሰቡን ያሳሰበ ሲሆን የአፍሪካ ኅብረትም ሦስቱ አገራት ሁኔታውን ከሚያባብሱ ድርጊቶች እንዲቆጠቡ አሳስቧል።

9. 2 ጥቅምት 2026በፈረንሳይ በተማሪዎች ተቃውሞ ምክንያት በመቶዎች የሚቆጠሩ ትምህርት ቤቶች ተዘጉ

   በፈረንሳይ በቀጠለው የተማሪዎች ተቃውሞ ምክንያት በመቶዎች የሚቆጠሩ ትምህርት ቤቶች ተዘግተዋል።

   የመምህራን እጥረት፣ የክፍሎች መጨናነቅ እና የትምህርት ቤት ሕንጻዎች ማርጀትን በመቃወም ተማሪዎች አደባባይ ወጥተዋል።

   በያዝነው ሳምንት መባቻ ላይ በፈረንሳይ መዲና ፓሪስ የተጀመረው ተቃውሞ ወደ ሌሎች የአገሪቱ ከተሞችም ተስፋፍቷል።

   የምትህርት ሚኒስትር ኤድዋርድ ጀፍሪ የፈረንሳይ መገናኛ ብዙኃን እንደተናገሩት፤ 65 የትምህርት ቤት ሠራተኞች እና 40 መምህራን ተጎድተዋል።

   ማክሰኞ ዕለት ብቻ 1,949 ሰዎች መታሰራቸውንም ተናግረዋል።

   ጥቁር በጥቁር የለበሱ ተማሪዎች በሁለተኛ ደረጃ ትምህርት ቤቶች ቅጥር ጊቢ አቅራቢያ ተቃውሞ ማሰማት ቀጥለዋል።

   ኤኤፍፒ ያነጋገራት የ16 ዓመቷ ሎላ “ትምህርት ቤቶች በመዘጋታቸው እንዳሸነፍን ነው የሚሰማን” ብላለች።

   ፖሊስ ተማሪዎቹ ላይ የኃይል እርምጃ መውሰዱንም ተማሪዋ ገልጻለች።

   የፈረንሳይ የፍትሕ ሚኒስትር ጄራልድ ዳርማኒን “ሁሉም ተቃዋሚዎች ተማሪዎች መሆናቸውን እርግጠኛ አይደለንም” ብለዋል።

   ከተያዙት 2,000 ሰዎች መካከል ሁለት ሦስተኛው በፖሊስ ቁጥጥር ሥር እንደሚገኙ ገልጸዋል።

   “ከተማሪዎች ተቃውሞ ወደ ሕዝባዊ ነውጥ ተሻግሯል። አውቶብሶች ዒላማ ሲደረጉ እና ትምህርት ቤቶች በእሳት ሲጋዩ ጉዳዩ ከተቃውሞ አልፏል ማለት ነው” ሲሉም አክለዋል።

   ተቃውሞው ከተጀመረ ወዲህ ወደ 100 ትምህርት ቤቶች ጉዳት እንደደረሰባቸው ተገልጿል።

10. 2 ጥቅምት 2026በዩኬ አየር ኃይል በተቃጣው ጥቃት የእንግሊዝ እና ኢራን ጥምር ዜግነት ያለው ግለሰብ መያዙ ተገለጸ

    በራፍ ወታደራዊ አየር ኃይል ጣቢያ ከተፈጠረው ክስተት ጋር በተገናኘ የሽብር ተግባር ለመፈጸም ዝግጅት ሲያደርግ እንደነበር የተጠረጠረ የእንግሊዝ እና የኢራን ጥምር ዜግነት ያለው ግለሰብ መያዙን የእንግሊዝ ፀረ ሽብር ፖሊስ አስታውቋል።

    ዕድሜው 25 ዓመት እንደሆነ የተገለጸው ግለሰቡ የተያዘው በለንደን ዌስትሚንስተር ሲሆን፣ በአካባቢው የሚገኙ ሁለት ንብረቶችም ተፈትሸዋል።

    በግሎስተርሻየር የሚገኘው የአሜሪካ አየር ኃይል የሚጠቀምበት የአየር ማረፊያ አቅራቢያ ባለፈው እሑድ የተያዙት በ20ዎቹ ዕድሜ የሚገኙ አምስቱ የዩናይትድ ኪንግደም ዜግነት ያላቸው ተጠርጣሪዎች በዋስ መለቀቃቸው ታውቋል።

    የፀረ - ሽብር ፖሊስ “የውጭ መንግሥት ተሳትፎን ጨምሮ” ክስተቱን እያጣራ መሆኑን የብሔራዊ ፀረ ሽብር ፖሊስ ከፍተኛ አስተባባሪ ቪኪ ኢቫንስ ተናግረዋል።

    የእንግሊዝ ጠቅላይ ሚኒስትር አንዲ በርንሃም ረቡዕ ዕለት ኢራን በዚህ ክስተት ላይ ሚና እንደነበራት “ጠንካራ ምልክቶች” እንዳሉ ተናግረዋል።

    ሆኖም ለዚህ ተጨማሪ ዝርዝር አልሰጡም፤ ቴህራንም በክስተቱ ላይ ማንኛውም ተሳትፎ እንደሌላት አጥብቃ አስታውቃለች።

    አምስቱ ወንዶች የተያዙት እሑድ ማለዳ ሲሆን፣ “አጠራጣሪ የሆኑ ሦስት ተሽከርካሪዎች” በአሜሪካ አየር ኃይል ወደሚጠቀምበት የአየር ማረፊያ እየተጓዙ መሆናቸው መዘገቡ ትልቅ የጸጥታ ክስተት እንዲፈጠር አድርጓል።

    ግለሰቦቹ መጀመሪያ በፈንጂ ጉዳይ ተጠርጥረው የተያዙ ሲሆን፣ በኋላም የሽብር ተግባር ለመፈጸም ዝግጅት በማድረግ ተጠርጥረዋል። ሰኞ ዕለት በፖሊስ ዋስ እንዲለቀቁተደርጓል። ፖሊስም ይህ ውሳኔ “በምርመራ ሂደት የተወሰደ” መሆኑን ገልጾ ነበር።

    ፖሊስ በአካባቢው በተፈተሹ ተሽከርካሪዎች ውስጥ የተወሰነ መጠን ያለው ነዳጅ ማግኘቱን የገለጸ ሲሆን፣ ነገር ግን ፈንጂ መሣሪያ እንዳልተገኘ አስታውቋል።

11. 2 ጥቅምት 2026ጥቃት ያደረሰው ፓይለት ‘አክራሪ ኢስላሚስት ርዕዮተ ዓለም' የሰረጸበት ነው ሲሉ ኔታንያሁ ተናገሩ

    የእስራኤል ጠቅላይ ሚኒስትር ቤንያሚን ኔታንያሁ፤ ከዱባይ ወደ ቴል አቪቭ እየተጓዘ በነበረው አውሮፕላን ላይ አብራሪውን በስለት የወጋው ፓይለት “አክራሪ ኢስላሚስት ርዕዮተ ዓለም የሰረጸበት” መሆኑን ተናገሩ።

    የፍላይዱባይ አውሮፕላን በረራ በጀመረ በሁለት ሰዓት ውስጥ ከ17,000 በላይ ጫማ (5,200ሜትር) ተምዘግዝጎ ወርዷል።

    ያለፈው ረቡዕ ከፓይለቶቹ አንደኛው በሌላኛው አብራሪ ላይ ጥቃት ማድረሱ ተዘግቧል። ተሳፋሪዎች እና የበረራ ሠራተኞች ጥቃት አድራሹን ፓይለት በቁጥጥራቸው ሥር አውለው አውሮፕላኑ በሰላም ማረፍ እንደቻለም ተገልጿል።

    ኔታንያሁ ለፎክስ ኒውስ እንደተናገሩት፤ የኦማን ዜግነት ያለው ጥቃት አድራሹ “አውሮፕላኑን ሊከሰክስ የሚችልበት” ዕድል ነበር።

    የተባበሩት አረብ ኤምሬቶች ብሔራዊ መገናኛ ብዙኃን እንደዘገቡት፤ ክስተቱ “ከሽብር ድርጊት ጋር የተያያዘ ስለመሆኑ” ምርመራ እየተደረገ ይገኛል።

    አውሮፕላኑ ያረፈው ሳዑዲ አረቢያ ሲሆን የአገሪቱ የአገር ውስጥ ሚኒስቴር እንዳለው፤ ዋና አብራሪው እና ምክትሉ ሕክምና ተደርጎላቸው ወደ ዩኤኢ ተመልሰዋል።

    ኔታንያሁ እንዳሉት ከሆነ፤ ፓይለቱ በተሳፋሪዎች እና የበረራ ሠራተኞች ከተያዘ በኋላ “ግደሉኝ፣ ግደሉኝ” እያለ ስለነበር ራሱን “የማጥፋት” ዓላማ እንዳለው ያሳያል።

12. 2 ጥቅምት 2026ትራምፕ ነዳጅ ወደ ውጭ መላክን እንደሚያግዱ ከዛቱ በኋላ አውሮፓ የነዳጅ ክምችቷን እንድትለቅ ሊጠይቁ ነው

    የአሜሪካው ፕሬዝዳንት ዶናልድ ትራምፕ፣ አሜሪካ ነዳጅ ወደ ውጭ መላክን ልታግድ እያሰበች በመሆኗ የአውሮፓ አገራት ከክምችታቸው የተወሰነውን እንዲለቅቁ ሊጠይቁ እንደሚችሉ ተናግረዋል።

    ይህ የፕሬዝዳንቱ አስተያየት የተሰማው የአሜሪካ የገንዘብ ሚኒስትር ስኮት ቤሴንት፣ አውሮፓ አገራት የነዳጅ አቅርቦታቸውን ወዲያውኑ ለመልቀቅ ዝግጅት እንዲያደርጉ ካሳሰቡ በኋላ ነው።

    ቤሴንት የነዳጅ ዋጋ እየጨመረ በመሆኑ፣ የአሜሪካ አርሶ አደሮች፣ የጭነት መኪና አሽከርካሪዎች እና ንግዶች “ጫናውን ተሸክመው መቅረት የለባቸውም” ብለዋል።

    የኢራን ጦርነት የነዳጅ ዋጋ በከፍተኛ ሁኔታ እንዲጨምር ካደረገ በኋላ አሜሪካ ነዳጅ ወደ ውጭ መላክን ልትገድብ እንደምትችል ዝታለች።

    ሐሙስ ዕለት ዩናይትድ ኪንግደም ማንኛውም ነዳጅን ወደ ውጭ መላክ ላይ እገዳ ቢጣል ምላሽ ለመስጠት የነዳጅ ክምችት ሊለቀቅ ስለሚችልበት ጉዳይ ከአውሮፓ አጋር አገራት ጋር ውይይት አድርጋለች።

    አሜሪካ ለዓለም የናፍጣ ነዳጅ ዋነኛ አቅራቢ ስትሆን፣ በቀን ከ1.2 እስከ 1.5 ሚሊዮን በርሜል ነዳጅ ወደ ውጭ ትልካለች። ባለሙያዎች የአሜሪካ የናፍጣ ነዳጅ ወደ ውጭ መላክ መቆሙ በሌሎች አገራት የነዳጅ ዋጋ ላይ ተጨማሪ ጫና ሊፈጥር እንደሚችል አስጠንቅቀዋል።

    ትራምፕ ቅዳሜ ዕለት የናፍጣ ነዳጅ ወደ ውጭ መላክን ስለመከልከል ሲናገሩ፣ “በደንብ እያጤንነው ነው” ብለዋል።

    ሐሙስ ዕለትም ትራምፕ የአውሮፓ አገራት ከናፍጣ ክምችታቸው የተወሰነውን እንዲለቁ ሊጠይቁ እንደሚችሉ ገልጸዋል።

    የዩናይትድ ኪንግደም የኢነርጂ ሚኒስትር ማርቲን ማክክሊስኪ ሐሙስ ዕለት ከአውሮፓ አቻቸው ጋር በመደዋወል ሊኖር ስለሚችለው የናፍጣ ነዳጅ እገዳ ተወያይተዋል።

    ከውይይቱ ጋር በተያያዘ መረጃ ያለው ምንጭ ለቢቢሲ እንደገለጸው፣ ዩናይትድ ኪንግደም የአውሮፓ ኅብረት አገራትን ጨምሮ ከሌሎች አገራት የተቀናጀ ምላሽ ለመስጠት ዝግጅት ማድረግ አስፈላጊ መስሎ እንደታያት ገልጿል።

    በዓለም አቀፉ የናፍጣ ገበያ ላይ ተጨማሪ ጫና ሊፈጥር በሚችል ሁኔታ፣ ቻይና የአገር ውስጥ አቅርቦትን ቅድሚያ በመስጠቷ በጥቅምት ወር አንዳንድ የነዳጅ ምርቶችን ወደ ውጭ መላክ ማቆሟ ተዘግቧል።

    ትልቅ የናፍጣ ነዳጅ አቅራቢ በሆነችው ሩሲያ የተጣለው የወጪ ንግድ እገዳም በዋጋ ላይ ያለውን ጫና ጨምሯል።

13. 2 ጥቅምት 2026ኦፕንኤአይ ስሱ መረጃን በአግባቡ ያልጠበቁ ሠራተኞችን ማባረሩን አስታወቀ

    ኦፕንኤአይ ሦስት ተመራማሪዎቹ መረጃን በተገቢው መንገድ ባለመያዛቸው እንዳባረራቸው አስታወቀ።

    እነዚህ መረጃዎች ከሰው ሠራሽ አስተውሎት ሞዴሎች ጋር በተያያዘ በውጭ ተቋም ከተሠራ ትንታኔ ጋር የሚያያዙ ናቸው ተብሏል።

    የኦፕንኤአይ ቃል አቀባይ “እነዚህ ሠራተኞች ከተቋሙ አሠራር ውጭ ስሱ መረጃን በተገቢው ሁኔታ አለመያዛቸውን ምርመራችን አረጋግጧል። ፖሊሲያችንን ጥሰዋል፤ ለሥራችን መሠረታዊ የሆነውን እምነትም አፍርሰዋል” ሲሉ ለቢቢሲ ተናግረዋል።

    የቻትጂፒቲ ፈጣሪው ኦፕንኤአይ ያባረራቸውን ሠራተኞች ማንነት ይፋ አላደረገም።

    ቢያንስ ሁለቱ ሠራተኞች ከተቋሙ የኤአይ ደኅንነት ጥበቃ ጋር በተያያዘ ይሠሩ ነበር።

    ሠራተኞቹ የተባረሩት ኤአይ ለሰው ልጆች ደኅንነት አደጋ ጋርጧል የሚለው ስጋት እየተስተጋባ ባለበት ወቅት ነው።

    ኤአይ እየተሠራበት ያለው ፍጥነት መገታት አለበት በሚል የተለያዩ የቴክኖሎጂ ባለሙያዎች እና ፖለቲከኞችም አስተያየታቸውን እየሰጡ ነው።

    የኦፕንኤአይ የሰው ሠራሽ አስተውሎት ሞዴሎች የአውስትራሊያ መንግሥትን ድረ ገጽ ጥሰው መግባታቸውን ተከትሎ ኩባንያው እየተተቸ ነው።

    ከዚህ በፊትም የኤአይ ሞዴሎች የሌላ ኩባንያን የበይነ መረብ ጥበቃ ጥሰው ማለፋቸው ይታወሳል።

14. 1 ጥቅምት 2026የቀድሞው የሱዳን ፕሬዚዳንት አል ባሽር "አስቸኳይ" የውጭ ሕክምና እንደሚያስፈልጋቸው ተዘገበ

    ከሥልጣን የተወገዱት የቀድሞው የሱዳን ፕሬዚዳንት ኦማር አል ባሽር ለሕክምና ኻርቱም ወደ’ሚገኘው ወታደራዊ ሆስፒታል መላካቸውን እና ከአገር ውጭ ሕክምና እንደሚያስፈልጋቸው ጠበቃቸው መናገራቸውን ሮይተርስ ዘገበ።

    የ82 ዓመቱ ባሽር ለወራት ከቆየ ተቃውሞ በኋላ በአገሪቱ ጦር እና በፈጥኖ ደራሽ ኃይሉ (አርኤስኤፍ) ትብብር ከሥልጣን የተወገዱት እአአአ ሚያዝያ 2019 ነበር።

    በኋላ ላይ ግን ወደ ሲቪል አስተዳደር ለመመለስ የሽግግር ሥርዓት በሚደረግበት ወቅት ፈጥኖ ደራሽ ኃይሉ እና የአገሪቱ ጦር ኃይላቸውን ለማዋሃድ በነበራቸው ዕቅድ ላይ መስማማት ባለመቻላቸውን ከሦስት ዓመታት በላይ በእርስ በርስ ጦርነት ውስጥ ይገኛሉ።

    ባሽር ጦርነቱ ከመቀስቀሱ አስቀድሞ ከእስር ቤት ወጥተው ወደ ሆስፒታል ተወስደው የነበረ ሲሆን በኋላ ላይ በሰሜን ሱዳን ወደምትገኘው ሚሮው ከተማ ተወስደው በወታደራዊ ጥበቃ ሥር ቆይተዋል።

    የቀድሞ ፕሬዚዳንቱ አሁን ላይ ለሕክምና ምርመራ ወደ ኻርቱም የተወሰዱ ሲሆን የተሻለ የውጭ አገር ሕክምና እንደሚያስፈልጋቸው የሚያሳዩ ምልክቶች እንደነበሯቸው ጠበቃቸው መሐመድ አልሃሳን አላሚን ለሮይተርስ የዜና ወኪል ተናግረዋል።

    ሮይተርስ እንደዘገበው የባሽር ቤተሰቦችም ዛሬ በሰጡት መግለጫ ባሽር ከሱዳን ውጭ ሕክምና እንደሚያስፈልጋቸው እና “ወሳኝ እና አስቸኳይ እንደሆነ እንዲሁም ብዙ መቆየት እንደማይችሉ” ተናግረዋል። ሆኖም ወደ ውጪ እንዲሄዱ ፈቃድ አላገኙም።

    ባሽር ያጋጠማቸው የጤና ችግር ምን እንደሆነ ግልጽ አይደለም።

    ሮይተርስ የሱዳን ጦርን በጉዳዩ ላይ አስተያየት ቢጠይቅም ምላሽ እንዳላገኘ ገልጿል። በርካታ የሱዳን እስላማዊ ተፅዕኖ ፈጣሪዎች የቀድሞ ፕሬዚዳንቱ ወደ ውጪ ተልከው ሕክምና እንዲያገኙ በማኅበራዊ ሚዲያ እየጠየቁ ነው።

    ሆኖም አል ባሽር በዘር ማጥፋት ወንጀል ተከሰው በዓለም አቀፍ የወንጀል ፍርድ ቤት ስለሚፈለጉ እና በሱዳን ውስጥም ክሶች ስላሉባቸው ከአገር እንዲወጡ ማድረጉ በሱዳን አለመግባባት ሊፈጥር ይችላል።

    በባሽር የሦስት አስርት ዓመታት የሥልጣን ዘመን ሱዳን በአሜሪካ የሽብርተኛ ደጋፊ ዝርዝር ውስጥ ተካትታ ማዕቀብ ተጥሎባታል።

    በሕዝባዊ አመጽ ወቅት ተቃዋሚዎች እርሳቸውን እና ‘እስላሚክ ናሽናል ኮንግረንስ’ ፓርቲያቸውን በሙስና እና በጭቆና ከስሰዋል።

    አልበሽር ከሥልጣን ከተወገዱ በኋላም የተለያዩ ክሶች ቀርቦባቸው በሙስና እና በሕገ ወጥ ገንዘብ ድጋፍ ጥፋተኛ ሆነው ተፈርዶባቸዋል። በጦርነቱ መጀመሪያ ወቅትም እስር ላይ ነበሩ።

15. 1 ጥቅምት 2026ፓኪስታን በአፍጋኒስታን ላይ በርካታ ሰዎች የተገደሉበት የአየር ጥቃቶችን ፈፀመች

    ፓኪስታን በአፍጋኒስታን ላይ በፈፀመችው የአየር ጥቃት ዘጠኝ ሰላማዊ ሰዎች መገደላቸውን እና ሌሎች 11 ሰዎች መቁሰላቸውን የታሊባን መንግሥት አስታወቀ።

    የኢዝላማባድ የኢንፎርሜሽን ሚኒስቴር በበኩሉ ጥቃቱ መፈፀሙን አረጋግጦ፣ 22 ታጣቂዎችን መግደሉን ገልጿል።

    አፍጋኒስታንን የሚመራው ታሊባን ቃል አቀባይ ዛቢሁላህ ሙጃሂድ ግን በጥቃቱ ከፓኪስታን ጋር አዋሳኝ በሆኑት በኩናር እና ሄልማንድ ግዛቶች የሚገኙ መኖሪያ ቤቶች ተመትተዋል ብለዋል። ቃል አቀባዩ በኤክስ ገጻቸው ባጋሩት ጽሑፍ ከሟቾቹ መካከል ሴቶች እና ሕፃናት እንደሚገኙበትም ጠቅሰው፣ ጥቃቱን አውግዘዋል።

    ፓኪስታን በበኩሏ "በደንብ የታቀደው እና ትክክለኛ የሆነ" ባለችው ጥቃት ዒላማ የተደረገው በአፍጋኒስታን ውስጥ ከፍተኛ መጠን ያላቸው የጦር መሳሪያዎች እና ጥይቶች የተከማቹበት “የሽብር ካምፖች” እንደሆኑ ገልጻለች።

    የአገሪቷ የኢንፎርሜሽን ሚኒስቴር ጥቃቱ ዒላማውን እንዳይስት ከፍተኛ ጥንቃቄ ተደርጓል ብሏል።

    የዓይን እማኞች የአየር ጥቃቱ ትናንት ሌሊት 8:00 ሰዓት ጀምሮ ለ30 ደቂቃ መዝለቁን ለቢቢሲ ተናግረዋል።

    "ተኝተን ነበር፤ የመጀመሪያው ቦምብ ሲፈነዳ ከእንቅልፋችን ተነሳን፣ ከሁለተኛው ጥቃት በኋላ ልጆቻችንን ይዘን ከአካባቢው ሸሸን። ሦስተኛው ቦምብ የጎረቤቶቻችን ቤት ላይ አረፈ። አራት እና አምስት የቤተሰብ አባላቶቻቸው ተገደሉ። ሌሎቹ ጉዳት ደርሶባቸው ወደ ሆስፒታል ተወስደዋል።" ብለዋል።

    ፓኪስታን፤ አፍጋኒስታን ድንበር ተሻጋሪ ጥቃቶችን የሚፈፅሙ ቡድኖችን ታስጠልላለች የሚል ክስ ለረጅም ጊዜ ስታሰማ ቆይታለች። የታሊባን መንግሥት ግን ክሱን በተደጋጋሚ ውድቅ አድርጓል።

16. 1 ጥቅምት 2026ካሊፎርኒያ በ32 የአሜሪካ ግዛቶች አሁንም ሕጋዊ የሆነውን ያለ እድሜ ጋብቻ አገደች

    የካሊፎርኒያ አስተዳዳሪ ጋቪን ኒውሶም በግዛታቸው ተግባራዊ እየሆነ ያለውን ያለ እድሜ ጋብቻ የሚከለክል ሕግ ፈረሙ።

    ሕጉ እአአ ከጥር 1 2027 ጀምሮ ተግባራዊ ይሆናል የተባለ ሲሆን ማንኛውም ሰው ትዳር ለመመስረት እድሜው 18 መሙላት አለበት ተብሏል።

    ኒውሶም ሕጉን ሕጻናት እና ታዳጊዎችን ለመከላከል “ለረዥም ጊዜ የዘገየ እርምጃ” ሲኡ ገልጸውታል።

    አስተዳዳሪው ሕጉን ፈርመው ሲያጸድቁ ከአጠገባቸው በ16 ዓመቷ ለ50 ዓመት የሆሊውድ ተዋናይ የተዳረችው ኮርትኒ ስቶደን ነበረች።

    ስቶደን ያለ እድሜ ጋብቻ በካሊፎርኒያ እንዲቀር ስትወተውት ነበር ተብሏል። አዲሱን ሕግ “ድል ነው” ያለችው ስቶደን፣ ያለ እድሜያቸው የሚዳሩ ሴቶች የሚደርስባቸውን ስቃይ ብቻቸውን መሸከም የለባቸውም ስትል ተናግራለች።

    ስቶደን “በሁሉም 50 ግዛቶች ሕጻናት ከካለ እድሜ ጋብቻ መጠበቅ እስኪቻል ድረስ ትግሌን እቀጥላለሁ” ብላለች።

    ከአስር ዓመታት በፊት ይህ አሰራር በሁሉም የአሜሪካ ግዛቶች ይፈቀድ የነበረ ቢሆንም፣ ቁጥራቸው እየጨመረ የመጣ ግዛቶች ሕጎቻቸውን እየቀየሩ ይነው።

    ካሊፎርኒያ እአአ ከ2018 ወዲህ ያለ እድሜ ጋብቻን የከለከለች 18ኛዋ ግዛት ሆናለች።

    በካሊፎርኒያ ግዛት ውስጥ ለጋብቻ የተቀመጠ የዕድሜ ገደብ አልነበረም፤ ይህም ወላጆች ፈቃዳቸውን ከሰጡ እና በጋብቻው መስማማታቸውን ህጻናት እንዲያገቡ ያስችል ነበር።

17. 1 ጥቅምት 2026የመንግሥታቱ ድርጅት የሰሜን ኢትዮጵያ ግጭት በጦርነት የተፈናቀሉትን ጨምሮ ሲቪሎችን ለአደጋ ያጋለጠ ነው አለ

    በኢትዮጵያ የመንግሥታቱ ድርጅት የሰብዓዊ ጉዳዮች ማስተባበሪያ ቢሮ (ኦቻ) የሰሜን ኢትዮጵያው ግጭት የቀደመው ጦርነት ተፈናቃዮችን ጨምሮ ሲቪሎችን ለአደጋ እያጋለጠና ተጨማሪ ነዋሪዎችን እያፈናቀለ ነው አለ።

    ኦቻ ትናንት ረቡዕ ዕለት ባወጣው መግለጫ ሁሉም ተፋላሚ ወገኖች የእርዳታ ሠራተኞችን እና ንብረቶችን ደኅንነት እንዲጠብቁና ለተጋላጭ ወገኖች ያለ ምንም ጣልቃ ገብነት የሕይወት አድን እርዳታ እንዲደርስ እንዲያደርጉ ጠይቋል።

    የታጠቁ ኃይሎች በተለያዩ ጊዜያት በኃይል የያዟቸውን ሁሉንም የረድኤት ድርጅቶች ተሽከርካሪዎች በአስቸኳይ እንዲመልሱም ኦቻ በመግለጫው ጥሪ አቅርቧል።

    የድርጅቱ አስተባባሪ ኦዞኒያ ኦጂሎ (ዶ/ር) በመግለጫቸው በተለይም በቀደመው ግጭት ተፈናቅለው የነበሩ ዜጎች ለተደራራቢ የደህንነት ስጋት መጋለጣቸው እና አዳዲስ መፈናቀሎች መከሰታቸው በሰላማዊ ሰዎች ጥበቃ ላይ ከፍተኛ ስጋት ፈጥሯል ብለዋል።

    ​ኃላፊው አክለውም የሰብዓዊ እርዳታ ማኅበረሰብ በተጎዱ አካባቢዎች ድጋፍ መስጠቱን ቢቀጥልም፣ በተለይ በቅርቡ በሰሜኑ የአገሪቱ ክፍል ከተከሰተው ውጥረት መባባስ ጋር ተያይዞ በእርዳታ ሠራተኞች፣ በንብረቶች፣ በቢሮዎች እንዲሁም በሲቪል መሠረተ ልማቶች ላይ የሚደርሱ ጥቃቶች በእጅጉ እንዳሳሰቧቸው ገልጸዋል። ​

    ኦቻ በመግለጫው በታጣቂ ቡድኖች ቢያንስ 10 የሰብዓዊ እርዳታ ተሽከርካሪዎች መዘረፋቸውን አስታውቆ እስካሁን የተመለሱት ሁለት ብቻ ናቸው ብለዋል። ​

    ​አስተባባሪው የእርዳታ ሠራተኞችና ንብረቶች በዓለም አቀፍ የሰብዓዊ መብት ሕግ መሰረት ከጥቃት የተጠበቁ መሆናቸውንና መቼም ቢሆን ዒላማ መደረግ እንደሌለባቸው አሳስበዋል።

    ኃላፊው አክለውም ሁሉም ወገኖች ዓለም አቀፍ ሕጎችንና መርሆዎችን እንዲያከብሩ፣ የእርዳታ ስራዎችን ከማደናቀፍ እንዲቆጠቡ እንዲሁም ድጋፍ ለሚያስፈልጋቸው ወገኖች ያለምንም እንቅፋት እርዳታ እንዲደርስ ሁኔታዎችን እንዲያመቻቹ ጥሪ አቅርበዋል።

18. 1 ጥቅምት 2026ሩቢዮ ከኢራን ጋር የሚደረገው ድርድር ለውጥ አለማምጣቱን ተከትሎ የልዑካን ቡድኑ ኒው ዮርክን ለቅቆ እንዲወጣ አዘዙ

    የአሜሪካው ውጭ ጉዳይ ሚኒስትር ማርኮ ሩቢዮ፣ የኢራን ልዑካን ቡድን ከታቀደለት ጊዜ ቀድሞ ከአሜሪካ እንዲወጣ ማዘዛቸውን አንድ የአሜሪካ ባለሥልጣን እና የዲፕሎማቲክ ምንጭ ለሲቢኤስ ኒውስ ገለጹ።

    በአሜሪካ የቢቢሲ አጋር የሆነው ሲቢኤስ ሩቢዮ የልዑካን ቡድኑ እንዲወጣ ያዘዙት በሁለቱ አገራት ባለሥልጣናት መካከል ከተደረጉ ቴክኒካዊ ውይይቶች በኋላ ሰኞ ዕለት መሆኑን ምንጮቹን ጠቅሶ ዘግቧል።

    የኢራኑ የውጭ ጉዳይ ሚኒስትር አባስ አራግቺ የሚመሩት ልዑክ፣ የተባበሩት መንግሥታት ጠቅላላ ጉባዔ ላይ ለመካፈል ባለፈው ሳምንት ወደ ኒውዮርክ የሄደ ሲሆን፣ የሆርሙዝ ባህር ወሽመጥን ዳግም ለመክፈት ከአሜሪካ ጋር ቀጥተኛ ያልሆነ ውይይት ሲያደርግ ቆይቷል።

    አራግቺ ከዚህ ቀደም ለሲቢኤስ ኒውስ እንደገለጹት ከአሜሪካ ማክሰኞ ዕለት ለመውጣት አቅደው ነበር።

    ፕሬዝዳንት ማሱድ ፔዜሽኪያን ባለፈው ሳምንት በተባበሩት መንግሥታት ድርጅት ንግግር ካደረጉ በኋላ በሚቀጥለው ቀን ከኒው ዮርክ ቢወጡም፣ የውጭ ጉዳይ ሚኒስትሩ አባስ አራግቺ ግን የሆርሙዝ ወሽመጥን ዳግም ስለመክፈት እና ግጭቱን በዘላቂነት በማስቆም ዙሪያ በሚደረጉ ቀጥተኛ ያልሆኑ ውይይቶች ላይ ለመሳተፍ በዚያው ቆይተው ነበር።

    አሜሪካ በተባበሩት መንግሥታት ድርጅት ውስጥ የተመደቡትንና በግዛቷ ውስጥ የሚገኙትን የኢራን ዲፕሎማቶች በሙሉ ከአገር እንዲወጡ አላደረገችም።

    በመንግሥታቱ ድርጅት የአሜሪካ ተወካይ የውጭ ጉዳይ ሚኒስትር ሩቢዮን ትዕዛዝ ተከትሎ ሰኞ ዕለት ምሽት አራግቺ እና ልዑካን ቡድናቸው ኒው ዮርክን “ወዲያውኑ” ለቅቀው እንዲወጡ ማዘዛቸውን አክሲዮስ ዘግቧል።

    ኢፒ በበኩሉ የአሜሪካ ባለሥልጣናትን ጠቅሶ፣ የልዑካን ቡድኑ “ከተፈቀደለት ጊዜ በላይ ቆይቷል” እንዲሁም “የመንግሥታቱ ድርጀት ጉባዔ አብቅቷል፤ ስለዚህ ወደ አገራቸው መመለስ አለባቸው” መባሉን ዘግቧል።

    የኢራን የልዑካን ቡድን ማክሰኞ ዕለት ከኒው ዮርክ ወደ ዶሃ ጉዞውን ጀምሯል።

    እንደዘገባው ከሆነ፣ ዋይት ሐውስ ሰኞ ጠዋት ከኢራን ጋር በሚደረገው ድርድር ላይ የተወሰነ መሻሻል ይኖራል ብሎ ጠብቃ የነበረ ቢሆንም ነገር ግን ከሰዓት በኋላ ድርድሩ ለውጥ አለመሳየቱን ግልጽ ሆኗል።

    የኳታር አደራዳሪዎች ከሁለቱም አገራት ተወካዮች ጋር የሰላም ስምምነት ላይ ሊደረስበት በሚችሉ ጉዳዮች ላይ በተናጠል እየተወያዩ ናቸው።

    እስራኤል እና አሜሪካ በጋራ በመሆን የካቲት 28 2018 ዓ.ም. በኢራን ላይ ጦርነት የከፈቱ ሲሆን በምላሹም ኢራን ወደ ባህረ ሰላጤው አገራት ድሮኖችን እና ሚሳዔሎችን አስወንጭፋለች።

    በመካከለኛው ምሥራቅ ኢራን ጦርነት ከተቀሰቀሰ ጊዜ ጀምሮ የዓለም አንድ አምስተኛ የነዳጅ የሚጓጓዝበት የሆርሙዝ ወሽመጥ በመዘጋቱ የዓለም ነዳጅ ዋጋ ላይ ከፍተኛ ጭማሪ ተስተውሏል።

19. 30 መስከረም 2026ብሔራዊ መረጃና ደኅንነት በአዲስ አበባና አካባቢው ላልተወሰነ ጊዜ ድሮን ለማብረር ፈቃድ እንደማይሰጥ አስታወቀ

    ብሔራዊ መረጃ እና ደኅንነት በአዲስ አበባ እና አካባቢው ከዛሬ ጀምሮ ላልተወሰነ ጊዜ ማንኛውንም ድሮን ለማብረር ፈቃድ እንደማይሰጥ አስታወቀ።

    ዛሬ መስከረም 20/2019 ዓ. ም. በማኅበራዊ ድረ ገጹ ባወጣው መግለጫ የተሰጠውን ማሳሰቢያ በመጣስ “የሚነሱ እንዲሁም በየትኛውም አካባቢ እና ከፍታ የሚበሩ ድሮኖችን በመለየት፣ በመጥለፍ እና ወደ አስፈላጊው ቦታ በማሳረፍ እንዲሁም የአብራሪዎቹን ትክክለኛ መገኛ ቦታ በመለየት እና በቁጥጥር ሥር በማዋል ሕጋዊ እርምጃ ይወሰዳል” ብሏል።

    “እንደ ወትሮው ሁሉ በአዲስ አበባ እና አካባቢው የሚንቀሳቀሱ ድሮኖችን እና ሌሎች ተመሳሳይ በራሪ አካላትን የሚቆጣጠር የተቀናጀ የፀረ ድሮን ቴክኖሎጂ በመጠቀም ክትትል እና ቁጥጥር እየተደረገ ይገኛል” ሲልም አክሏል።

    ብሔራዊ መረጃ እና ደኅንነት ማሳሰቢያውን የሰጠው የሰሜን ኢትዮጵያው ጦርነት ዳግም ባገረሸበት ወቅት ነው።

    የፌደራል ሠራዊት እና የትግራይ ኃይሎች ከባለፈው ሳምንት አንስቶ ውጊያ እያካሄዱ ይገኛሉ።

    ብሔራዊ መረጃ እና ደኅንነት ባወጣው መግለጫ፤ ከዚህ ቀደም በሥራ ምክንያት ድሮኖች መጠቀም የሚፈልጉ አካላት “የበረራውን ዓላማ፣ የሚበርበትን ቦታ፣ የድሮኑን ዓይነት እና የሞዴል ቁጥር በመጥቀስ” ፈቃድ ጠይቀው ይሰጣቸው እንደነበር ጠቅሷል።

    አያይዞም “የመሪዎችን፣ የቁልፍ መሠረተ ልማቶችን እና ብሔራዊ ኩነቶችን ደኅንነት ከሚመለከታቸው አካላት ጋር በመሆን የማስጠበቅ ኃላፊነቱን ለመወጣት ላልተወሰነ ጊዜ ፍቃድ መስጠቱን እና የበረራ ክልከላውን ተግባራዊ ማድረጉን” አብራርቷል።

    ከቅርብ ጊዜ ወዲህ በስፋት ጥቅም ላይ እየዋሉ የመጡ ድሮኖች እና “መሰል ቴክኖሎጂ ወለድ መሣሪያዎች” የሚፈጥሯቸውን የብሔራዊ ደኅንነት ስጋቶችን ለመከላከል የሚያስችሉ “የረቀቁ ቴክኖሎጂዎች መታጠቁን” በመግለጫው አመልክቷል።

    አክሎም ማሳሰቢውያውን “ከባለድርሻ አካላት ጋር በመቀናጀት ለማስፈጸም በቂ ዝግጅት እንዳለው” አትቷል።

20. 30 መስከረም 2026ጠ/ሚ ዐቢይ አሕመድ በተገኙበት ለላሙ የነዳጅ ማጣሪያ ፋብሪካ መሠረተ ድንጋይ ተቀመጠ

    በሰሜን ኬንያ የወደብ ከተማ ላሙ ለሚገነባው የነዳጅ ማጣሪያ ዛሬ ረቡዕ መሠረተ ድንጋይ የማኖር ሥነ ሥርዓት ተከናውኗል።

    የአፍሪካ ቁጥር አንድ ባለ ሃብት የሆኑት ናይጄርያዊው ቢልየነር አሊኮ ዳንጎቴ የሚያስገነቡት የነዳጅ ማጣሪያ 16 ቢሊዮን ዶላር ያወጣል።

    ጠቅላይ ሚኒስትር ዐቢይ አሕመድ እንዲሁም የኬንያው ፕሬዝዳንት ዊልያም ሩቶ መሠረተ ድንጋይ በማኖር ሥነ ሥርዓቱ ላይ ተገኝተዋል።

    የፋብሪካው ግንባታ ሲጠናቀቅ በቀን 700,000 በርሜል ድፍድፍ ነዳጅ ማጣራት ይችላል። በዚህም የፋብሪካው የኢንዱስትሪ አቅም በምሥራቅ አፍሪካ ቀዳሚው ይሆናል።

    ጠቅላይ ሚኒስትር ዐቢይ በማኅበራዊ ሚዲያቸው ባሰፈሩት ጽሑፍ ለላሙ ነዳጅ ማጣሪያ መሠረተ ድንጋይ መጣሉ “የአፍሪካን የኢንዱስትሪ አቅም በማሳደግ አንድ እርምጃ ነው” ብለዋል።

    “በምሥራቅ አፍሪካ ዕድል የሚፈጥር፣ ለትልቅ የምጣኔ ሃብት እና ኢንዱስትሪ ሉዓላዊነት መሠረት የሚጥል” እንደሆነም ገልጸዋል።

    ባለ ሃብቶች አፍሪካ ላይ እምነት ጥለው ኢንቨስት እንዲያደርጉ ጥሪ ያቀረቡት ጠቅላይ ሚኒስትሩ “የአፍሪካ የወደፊት ዓለም በጋራ የምንገነባው ነው” ብለዋል።

    የፋብሪካው የመሠረት ድንጋይ ከመጣሉ በፊት የተወሰኑ የአካባቢው ነዋሪዎች አደባባይ ወጥተው ፋብሪካው ለሚገነባበት መሬት ተጨማሪ ካሳ እንዲሰጣቸው ጠይቀዋል።

    ዳንጎቴ ግን ተቃውሞውን አጣጥለው የፋብሪካው ግንባታ በተያዘው ዕቅድ መሠረት እንደሚከናወን ለቢቢሲ ተናግረዋል።

    የፋብሪካው ግንባታ በአውሮፓውያኑ 2030 እንደሚጠናቀቅ ተገልጿል።

    ከጠቅላይ ሚኒስትር ዐቢይ በተጨማሪ የኡጋንዳ፣ ቶጎ እና ቤኒን መሪዎች ተገኝተዋል።

    ዳንጎቴ ለቀጣናው መንግሥታት በአጠቃላይ በፋብሪካው የ30% ድርሻን ይፋ ማድረጋቸውን ሮይተርስ የዜና ወኪል ዘግቧል።

    የፋብሪካው ግንባታ ሲጀመር ዳንጎቴ ባደረጉት ንግግር “አፍሪካውያን አፍሪካን ለመገንባት ተሰባስበዋል። ዛሬ እየጀመርን ያለነው ነዳጅ ማጣሪያ ብቻ አይደለም፤ አፍሪካ ብሩህ ተስፋ እንዲኖራት የኢንዱስትሪ ግንባታ አዲስ ምዕራፍ እየከፈትን ነው” ብለዋል።

    በናይጄርያ ያላቸውን የነዳጅ ማጣሪያ ‘ሌኪ’ እንደ ምሳሌ በመጥቀስ “በላሙም እንደሚደገም” ገልጸዋል።