قازقستان میں دوبارہ لاک ڈاؤن نافذ، پنجاب میں 646 نئے متاثرین، 13 ہلاکتیں

لائیو کوریج

1. 1 جولائی 2020روس میں لگاتار چھٹے روز بھی سات ہزار سے کم نئے مریض

   روس میں لگاتار چھٹے روز سات ہزار سے کم کورونا وائرس کے نئے مریض سامنے آئے ہیں۔

   ماسکو میں کورونا وائرس ہیڈکوارٹر کے مطابق گذشتہ 24 گھنٹوں کے دوران ملک میں 6556 نئے مریض سامنے آئے جبکہ 216 اموات بھی ہوئیں۔

   اب تک ملک میں کل چھ لاکھ 54 ہزار سے زائد افراد اس وائرس سے متاثر ہوئے ہیں جبکہ 9536 اموات بھی ہوئی ہیں۔

   ماسکو شہر اور ماسکو خطہ اب تک اس وائرس سے سب سے زیادہ متاثرہ ہے جہاں گذشتہ روز بھی بالترتیب 611 اور 306 نئے مریض سامنے آئے تھے۔ اس کے بعد سینٹ پیٹرسبرا میں 262 افراد میں اس وائرس کی تشخیص ہوئی۔

   اب تک ملک میں 422931 افراد صحتیاب بھی ہوئے ہیں۔

2. 1 جولائی 2020انڈیا: کووڈ 19 سے ہلاک ہونے والوں کی لاشوں کو ’گڑھوں میں اچھالنے‘ پر حکام کی معذرت

   جنوبی انڈین ریاست کرناٹک میں کووڈ 19 سے ہلاک ہونے والے افراد کی لاشوں کو گڑھوں میں پھینکنے کی ویڈیو سوشل میڈیا پر وائرل ہونے کے بعد ریاستی حکام نے معافی مانگ لی ہے۔

   سوشل میڈیا پر وائرل ہونے والی ایک ویڈیو میں حفاظتی لباس پہنے اہلکاروں کو کالے تھیلوں میں لپٹی لاشوں کو گہرے گڑھوں میں پھینکتے دیکھا جا سکتا ہے۔

   ریاست کے بیلاری ضلع کے حکام نے اس بات کی تصدیق کی ہے اور ان افراد کے خاندان سے معذرت کی ہے۔

   یہ لاشیں ان آٹھ افراد کی تھیں جو کووڈ 19 سے ہلاک ہوئے تھے۔ کرناٹک میں اب تک کووڈ 19 سے 246 اموات ہوئی ہیں۔

3. 1 جولائی 2020روسی صدر سے ملنے کے لیے ایک انوکھی شرط کیا ہے؟

   روسی صدر ولادیمیر پوتن کی کورونا وائرس سے حفاضت کے لیے ایک خاص ڈس انفیکشن سرنگ قائم کی گئی ہے۔

   روسی صدر سے ملنے آنے والے ہر شخص کو اس میں سے گررنا پڑتا ہے۔ مزید تفصیلات فرقان الہی کی اس ویڈیو میں۔۔

4. 1 جولائی 2020کورونا وائرس: یورپ کی تازہ صورتحال

   بدھ کو یورپ میں کورونا کے حوالے سے اہم پیشرفت ہوئی ہیں کیونکہ چند ممالک نے لاک ڈاؤن کے اگلے مرحلے میں اپنی سرحدیں کھول دی ہیں۔

   اس کے علاوہ یورپ میں ہونے والی اہم پیشرفت میں درج ذیل شامل ہیں

   • یورپی یونین نے 15 ممالک کے شہریوں کو یورپ میں داخلے کی اجازت دے دی ہے۔ محفوظ سفری فہرست کے ممالک میں یورپی بلاک کے ممالک سمیت کینیڈا، جاپان اور نیوزی لینڈ شامل ہیں جبکہ اس فہرست میں ان ممالک کو خارج کیا گیا ہے جہاں کورونا کے متاثرین کی تعداد میں اضافہ دیکھنے میں آرہا ہے۔ ان ممالک میں روس، برازیل اور امریکہ شامل ہیں۔
   • یونان سے بین الاقوامی پروازوں کا آغاز کر دیا گیا ہے۔ مقامی میڈیا کے مطابق یونان میں کل 104 پروازوں کے آمد و رفت متوقع ہے تاہم برطانیہ اور سویڈن سے مسافروں کو 15 جولائی تک ملک میں آنے کی اجازت نہیں ہے۔
   • پرتگال اور سپین کے درمیان سرحد کو بھی کھول دیا گیا ہے۔ تاہم پرتگال لسبن میں کورونا کے بڑھتے کیسز کو روکنے کے لیے دوبارہ لاک ڈاؤن لگا رہا ہے۔ اور اس نے سویڈن کی حکومت سے کہا ہے کہ وہ زائرین کی بڑی تعداد میں آمد کو روکنے کے لیے فی الوقت اپنی سرحد بند رکھے۔
   • یکم جولائی سے آسٹریا اور نیدرلینڈز میں قحبہ خانوں کو کھلنے کی اجازت مل گئی ہے۔ تاہم کورونا کی وبا کے باعث دنیا بھر میں سیکس ورکرز بہت متاثر ہوئے ہیں۔

5. 1 جولائی 2020کووڈ 19 سے صحتیاب ہونے میں آپ کو کتنا وقت لگتا ہے؟

   دنیا میں اب تک لاکھوں افراد کووڈ 19 سے مکمل صحت یاب ہوچکے ہیں لیکن صحت یابی کا دورانیہ مختلف لوگوں میں مختلف ہوسکتا ہے۔

   کم علامات والے متاثرین ایک ہفتے میں صحت یاب ہوسکتے ہیں جبکہ ماہرین کے مطابق سنگین معاملات میں یہ دورانیہ ایک سال سے زیادہ بھی ہو سکتا ہے۔

6. 1 جولائی 2020پشاور کے لیڈی ریڈنگ ہسپتال میں کورونا کے مریضوں کے لیے مزید اقدامات

   پاکستان کے صوبہ خیبر پختونخوا کے دارالحکومت پشاور کے لیڈی ریڈنگ ہسپتال (ایل آر ایچ) کے ڈین کی طرف سے کورونا کمپلیکس میں بیڈز کی تعداد 500 تک بڑھانے کے احکامات جاری کیے گئے ہیں۔

   ایل ایچ آر کے ڈین پروفیسر عبداللطیف خان کا کہنا تھا کہ یہ صوبے کا سب سے بڑا ہسپتال ہے اور اس کی بڑی زمہ داری ہے اس لیے مریضوں کو ہر ممکن سہولیات دے رہے ہیں جس کے اچھے نتائج سامنے آرہے ہیں۔

   ایل ایچ آر میں اب تک کورونا کے 250 مریض صحتیاب ہو چکے ہیں جن کی عمریں 50 سے 80 سال کے درمیان تھیں۔

   ایل آر ایچ کے کورونا کمپلیکس میں اس وقت 58 مریض زیر علاج ہیں۔

7. 1 جولائی 2020بریکنگ, کورونا وائرس: پنجاب میں761 نئے متاثرین، کل تعداد 76,262 ہوگئی

   پاکستان کے صوبہ پنجاب میں گذشتہ 24 گھنٹوں کے دوران 761 نئے متاثرین میں کورونا وائرس کی تصدیق کی گئی ہے جس کے بعد صوبے میں کورونا کے متاثرین کی مجموعی تعداد 76262 ہو گئی ہے۔

   صوبائی محکمہ پرائمری اینڈ سیکنڈری ہیلتھ کیئر کے ترجمان کے مطابق گذشتہ 24 گھنٹوں میں کورونا وائرس کے باعث مزید 35 اموات ہوئی ہے جس کے بعد صوبے میں ہلاکتوں کی کل تعداد 1762 ہو چکی ہے۔

   محکمہ پرائمری اینڈ سکینڈری ہیلتھ کیئر کے ترجمان کے مطابق پنجاب میں کورونا وائرس سے صحت یاب ہونے والوں کی تعداد 27,488 ہو چکی ہے۔

   صوبے میں اب تک کل 501,509 ٹیسٹ کیے جا چکے ہیں۔

8. 1 جولائی 2020ٹوکیو میں ڈزنی لینڈ پارک کو چار ماہ بعد عوام کے لیے کھول دیا گیا

   جاپان کے دارالحکومت ٹوکیو میں ڈزنی لینڈ تھیم پارک کو چار ماہ بعد عوام کے لیے کھول دیا گیا ہے۔

   ٹوکیوڈزنی سی سمیت یہ پارک ایشیا میں آخری ڈزنی تھیم پارک ہے جسے بدھ کے روز عوام کے لیے دوبارہ کھولا گیا ہے۔

   تاہم پارک کمپنی کا کہنا ہے کہ وہ یہاں آنے والے مہمانوں کو متحرک انداز میں سماجی فاصلہ اختیار کرنے کی تلقین کر رہے ہیں اور اس کے ریسزورٹ میں محدود اوقات میں جانے کی اجازت دے رہے ہیں۔

   چین میں جہاں سے اس کورونا کی وبا کا آغاز ہوا تھا شنگھائی ڈزنی لینڈ پارک کو مئ میں عوام کے لیے کھولا گیا جبکہ ہانگ کانگ میں جون کے آخر میں اس تھیم پارک کو کھولا گیا تھا۔

9. 1 جولائی 2020انڈیا میں کورونا کے سب سے زیادہ متاثرین جون میں سامنے آئے

   انڈیا میں کورونا کے متاثرین اور ہلاکتوں میں سب سے زیادہ اضافہ جون کے ماہ کے دوران دیکھنے میں آیا ہے۔

   ٹائمز آف انڈیا اخبار کے مطابق گذشتہ ماہ کے دوران انڈیا میں چار لاکھ سے زائد کورونا متاثرین کی تصدیق کی گئی جبکہ 12 ہزار سے زائد اموات ہوئی۔

   انڈیا کے وزارت صحت کے مطابق ملک میں اب تک کورونا کے متاثرین کی کل تعداد 586092 ہے جبکہ اس وائرس کے باعث اب تک 17400 اموات ہو چکی ہیں۔

   ان اعداد و شمار کے جائزے کے بعد ملک میں کورونا کے متاثرین کی تعداد میں تقریباً 70 فیصد اضافہ صرف جون کے ماہ میں دیکھنے میں آیا ہے۔

   ماہرین نے پہلے ہی خبردار کیا تھا کہ ملک میں وبا کا عروج مون سون کے آغاز کے وقت آئے گا جو عموماً جولائی اور اگست کے مہینے ہیں۔

10. 1 جولائی 2020سکاٹ لینڈ کے پائلٹ نے ویتنام کے ہسپتال میں وینٹیلیٹر پر 68 دن کیسے گزارے؟

    ’اگر میں دنیا کے کسی بھی اور ملک میں ہوتا تو شاید اب تک میں مر چکا ہوتا۔ شاید وہ 30 دن بعد وینٹیلیٹر کا سوئچ آف کر دیتے۔‘

    یہ کہنا ہے سکاٹ لینڈ سے تعلق رکھنے والے 42 سالہ پائلٹ سٹیفن کیمرون کا جنھوں نے کورونا سے متاثر ہونے کے بعد لگاتار 68 دن وینٹیلیٹر پر گزارے۔

    ان کی حیرت انگیز کہانی کے بارے میں جانیے اس تحریر میں۔

11. 1 جولائی 2020میلبرن میں تین لاکھ افراد سے لاک ڈاؤن کی پیروی کرنے کی درخواست

    آسٹریلیا کی ریاست وکٹوریا میں مزید 73 افراد میں کورونا وائرس کی تشخیص ہوئی ہے اور وبا نے میلبرن شہر کو اپنی لپیٹ میں لے لیا ہے۔

    دو ہفتوں سے یہاں روزانہ کی بنیاد پر 10 سے زائد نئے مریض سامنے آ رہے ہیں جس کے بعد ریاست کی جانب سے شہر کے 36 علاقوں میں لاک ڈاؤن وہاں کے مقامی وقت کے مطابق آج رات 12 بجے کے بعد سے نافذ کرنے کا فیصلہ کیا گیا ہے۔

    پچاس لاکھ افراد کے آبادی والے شہر میں اس لاک ڈاؤن سے تین لاکھ سے زائد افراد متاثر ہوں گے اور یہ لاک ڈاؤن چار ہفتے تک نافذ کیا جا رہا ہے۔

    آج میڈیا سے بات کرتے ہوئے ریاست کے پریمیئر ڈینیئل اینڈریوز نے کہا کہ وسیع پیمانے پر کی جانے والی ٹیسٹنگ کے بعد انھیں خوشی ہے کہ انفیکشن ریٹ میں ’تسلسل‘ آیا ہے۔

    تاہم انھوں نے خبردار کیا اگر عوام نے غیرذمہ داری کا ثبوت دیا تو پوری ریاست میں لاک ڈاؤن کیا جا سکتا ہے۔

    انھوں نے کہا کہ ’جن علاقوں میں لاک ڈاؤن کا اطلاق ہو رہا ہے ان تمام خاندانوں سے درخواست ہے کہ اگر ہم اگلے چار ہفتوں کے دوران ساتھ مل کر کام کریں ہم اس صورتحال پر دوبارہ قابو پا سکتے ہیں۔‘

    آسٹریلیا میں اب تک 7700 افراد اس وائرس سے متاثر ہوئے ہیں جبکہ 104 اموات بھی ہوئی ہیں۔

12. 1 جولائی 2020کیا چمگادڑ کورونا وائرس پھیلاتے ہیں؟

    کیا چمگادڑ صرف بدنام ہیں یا وہ واقعی کورونا وائرس پھیلانے کا سبب بنتے ہیں۔

    مزید جانیے اس معلوماتی ویڈیو میں۔

13. 1 جولائی 2020امریکہ نے دنیا بھر میں ریمڈیسیور کی تقریباً تمام خوراکیں خرید لیں

    امریکی صدر ڈانلڈ ٹرمپ کی انتظامیہ کے مطابق انھوں نے دوا ریمڈیسیور کی دنیا بھر میں تقریباً تمام خوراکیں خرید لی ہیں۔ یہ دوا امریکہ میں حکام کی جانب سے تصدیق شدہ وہ پہلی دوا ہے جس کے ذریعے کووڈ 19 کے مریضوں کا علاج کیا جا سکتا ہے اور یہ کمپنی جیلیئڈ سائنسز کی جانب سے تیار کی جاتی ہے۔

    اس دوا کے ذریعے اس وائرس سے بیمار افراد کو جلد صحتیاب ہونے میں مدد ملتی ہے۔

    محکمہ صحت اور انسانی سروسز کی جانب سے جاری کردہ بیان کے مطابق ٹرمپ نے جیلیئڈ کے ساتھ ایک ’بہترین‘ معاہدہ کیا جس کے تحت دوا کی پانچ لاکھ خوراکیں خریدی گئی ہیں جو جیلیئڈ کی جولائی میں پیداوار کا 100 فیصد ہے جبکہ جبکہ اگست اور ستمبر میں 90 فیصد ہے۔

    ریمڈیسیور کے ایک کورس میں اوسطاً چھ اعشاریہ دو پانچ خوراکیں مریض کو دی جاتی ہیں۔

14. 1 جولائی 2020’اپنی من پسند دواؤں کا استعمال نہ کریں‘

    کورونا وائرس کی وبا پھیلنے کے بعد ہر ایک کی نظر طبی تحقیق کی جانب ہے کہ کب اس بیماری کا علاج دریافت ہوگا۔ لیکن جب بھی مثبت نتائج کے بعد کسی نئی دوائی کا نام سامنے آتا ہے تو پاکستان میں اس کی قلت یا پھر قیمت میں فوری اضافہ ہو جاتا ہے۔

    خود سے اپنی من پسند کی ادویات کو بازار سے لے کر کھانے کے کیا نقصانات ہیں، یہ بتا رہی ہیں ڈاکٹر تمکنت منصور اس وی لاگ میں۔۔۔

15. 1 جولائی 2020بریکنگ, پاکستان میں گذشتہ 24 گھنٹوں کے دوران 4133 نئے مریض، 91 اموات

    پاکستان میں گذشتہ 24 گھنٹوں کے دوران 4133 افراد متاثر ہوئے ہیں جبکہ 91 اموات بھی ہوئی ہیں۔

    گذشتہ روز ملک میں 22418 ٹیسٹ کیے گئے یعنی گذشتہ روز ملک میں انفیکشن ریٹ 18 اعشاریہ چار فیصد رہا۔

    ملک میں اب تک کل دو لاکھ 13 ہزار سے زائد مریض سامنے آ چکے ہیں جبکہ 4395 افراد اس وائرس کے باعث ہلاک بھی ہوئے ہیں۔

    اب تک ملک میں کل 100802 افراد اس وائرس سے صحتیاب ہوئے ہیں۔

16. 1 جولائی 2020جمہوریہ چیک میں کورونا وائرس کی ’علامتی الوداعی‘ پارٹی

    عالمی ادارہ صحت نے رواں ہفتے خبردار کیا تھا کہ عالمی وبا ابھی ختم ہونے میں بہت وقت لگے گا تاہم یورپی ملک جمہوریہ چیک میں ایک پارٹی منعقد ہوئی جس کے ذریعے کورونا وائرس کو ’علامتی طور پر الوداع‘ کہا گیا۔

    منگل کے روز ہزاروں مہمان پراگ کے چارلس برج پر ایک 500 میٹر لمبے ٹیبل کے گرد جمع ہوئے اور گھر سے بنا کر لائے گئے کھانے پینے کی اشیا بانٹیں۔

    اس دوران سماجی فاصلے کا خیال نہیں رکھا گیا، جبکہ مہمانوں کو اپنے ساتھ کھڑے افراد کے ساتھ کھانا کھانے کا کہا گیا۔ یہ ایسی باتیں ہیں جو ان ممالک کے لوگوں کے لیے نئی ہیں جو اس وقت بھی لاک ڈاؤن میں ہیں۔

    جمہوریہ چیک میں اب تک 12 ہزار سے زائد افراد اس وائرس سے متاثر ہوئے ہیں۔ یہ 1 کروڑ آبادی والا ملک ہے جہاں 350 افراد ہلاک بھی ہوئے ہیں۔

    اس تقریب کے منتظمین کا کہنا تھا کہ اس کا انعقاد اس لیے ممکن ہو سکا کیونکہ ملک میں سیاح نہ ہونے کے برابر ہیں۔

    تصاویر میں دیکھا جا سکتا ہے کہ لوگ کتنے قریب بیٹھے ہیں اور مقامی موسیقاروں کی سے محظوظ ہو رہے ہیں۔

17. 1 جولائی 2020مزید آٹھ امریکی ریاستوں کے شہریوں پر نیویارک آمد پر قرنطینہ کی شرط لگا دی گئی

    نیویارک کے گورنر نے کہا ہے کہ مزید آٹھ ریاستوں کے شہریوں کو نیویارک آمد پر 14 دن قرنطینہ میں رہنا ہوگا۔ ایک وقت میں وائرس سے بُری طرح متاثر نیویارک میں اب کورونا وائرس کی روک تھام کے لیے سخت اقدامات کیے جا رہے ہیں۔

    ان آٹھ ریاستوں میں کیلیفورنیا، جارجیا، آئیووا، آئیڈہو، نیواڈا، ٹینیسی اور دیگر ریاستیں شامل ہیں۔ فلوریڈا، ایریزونا، ٹیکساس اور جنوبی کیرولائنا پہلے سے اس فہرست میں شامل ہیں۔

    امریکی ذرائع ابلاغ کے مطابق اس حکم سے تقریباً آدھی امریکی آبادی متاثر ہوگی۔

    منگل کے روز نیویارک میں کورونا کے مزید 28 متاثرین اور 13 اموات سامنے آئی تھیں۔

18. 1 جولائی 2020کیا آپ صحت یابی کے بعد دوبارہ کووڈ 19 کا شکار ہو سکتے ہیں؟

    کیا آپ کو صحت یاب ہونے کے بعد دوبارہ بھی کورونا وائرس نشانہ بنا سکتا ہے؟ کچھ مریض دوسروں کے مقابلے میں زیادہ بیمار کیوں ہیں؟ کیا یہ مرض ہر سردی میں واپس آئے گا؟ کیا ویکسین کارگر ثابت ہو گی؟ کیا امیونٹی پاسپورٹ کی مدد سے ہم میں سے کچھ لوگ کام پر واپس جا سکتے ہیں؟ اس وائرس سے نمٹنے کے لیے کن طویل المدتی اقدامات کی ضرورت ہے؟

    دنیا میں کووڈ-19 کا شکار ہونے والے افراد کی تعداد جہاں روز بروز بڑھ رہی ہے وہیں یہ سوالات بھی تواتر سے پوچھے جانے لگے ہیں۔

    ان تمام سوالات میں جو ایک چیز مشترک ہے وہ ہے امیون سسٹم یا مدافعتی نظام اور ہم اس بارے میں بہت کم جانتے ہیں۔

    مزید جانیے بی بی سی کے نامہ نگار برائے صحت و سائنس، جیمز گیلیگہر کی اس تحریر میں۔

19. 1 جولائی 2020اٹلی کے ایک گاؤں میں کورونا کے ’40 فیصد متاثرین میں علامات ظاہر نہیں ہوئیں‘

    ایک نئی تحقیق کے مطابق اٹلی کے ایک گاؤں میں کورونا وائرس سے متاثرہ جن لوگوں کو قرنطینہ کیا گیا تھا ان میں سے 40 فیصد میں مرض کی علامات ظاہر نہیں ہوئی تھیں۔

    اٹلی اور برطانوی ماہرین کی اس تحقیق سے ثابت ہوا ہے کہ ’بڑے پیمانے پر ٹیسٹنگ اور مقامی سطح پر لاک ڈاؤن کی مدد سے کورونا وائرس کے پھیلاؤ کو روکا جاسکتا ہے۔‘

    اس گاؤں کی آبادی صرف 3200 افراد پر مشتمل تھی اور یہاں ملک میں 21 فروری کو پہلی ہلاکت کے بعد دو ہفتوں کے لیے لاک ڈاؤن کیا گیا تھا۔ اس پورے گاؤں میں ٹیسٹنگ کی گئی تھی۔

    نتائج سے معلوم ہوا کہ گاؤں کی 2.6 فیصد آبادی یعنی 73 لوگوں میں کورونا وائرس موجود تھا۔ دو ہفتوں کے لاک ڈاؤن کے بعد صرف 29 افراد میں کورونا کی تشخیص ہوئی۔ دونوں مرتبہ تقریباً 40 فیصد کیسز میں علامات ظاہر نہیں ہوئیں۔

    تاہم وائرس کے پھیلاؤ کو روکنے کے لیے تمام افراد کو قرنطینہ منتقل کر دیا گیا تھا۔

    تحقیق کی سربراہ پروفیسر انڈریا کرسینٹی کے مطابق خاموشی سے پھیلنے والے اس وائرس کو قابو کیا جاسکتا ہے۔

    وہ کہتی ہیں کہ ’تمام شہریوں کی ٹیسٹنگ، یہ جانے بغیر کہ ان میں علامات ہیں یا نہیں، سے وبا کو روکا جاسکتا ہے۔‘

20. 1 جولائی 2020کیا امیر ممالک کووڈ 19 کی ویکسین کی ’ذخیرہ اندوزی‘ کر سکتے ہیں؟

    فارماسوٹیکل طاقت کے دو مراکز: امریکہ اور چین کی علیحدہ ویکسین تیاری کی کوشش ایک پریشان کن صورتحال کی طرف اشارہ کر رہی ہے۔

    یورپین ممالک کا خیال ہے کہ اس وائرس کے لیے تیار ہونے والی ویکسین پر تمام ممالک کی ملکیت کا حق تسلیم کیا جانا چائیے۔ یورپی ممالک کے اس خیال کی تائید کرنے والے ممالک کو تشویش ہے کہ اس وقت ویکسین کی تیاری کے لیے ایک مقابلہ نظر آ رہا ہے۔

    ایسے میں یہ سوال ضرور ابھرتا ہے کہ کیا امیر ممالک کورونا وائرس ویکسین کی ذخیرہ اندوزی کر سکتے ہیں۔؟

    مزید جانیے بی بی سی ورلڈ سروس کے فیرنانڈو ڈیوارٹ کی اس تحریر میں۔