ትራምፕ ምቍራጽ ተዅሲ ኢራንን እስራኤልን ግብራዊ ምዃኑ ኣፍሊጡ

ቀጥታዊ ሸፈነ

1. 28 ሚያዝያ 2026ኣስመራ፡ ባርዕ ሓዊ ኣብ ሰብ ጉድኣት ኣውሪዱ

   

   ምንጪ ስእሊ, MoI/Yohannes Mebrahtu

   ኣብ ርእሰከተማ ኣስመራ ብዝተወልዐ ባርዕ ሓዊ ክልተ ሰባት ከምዝሞቱ መንግስታዊ ማዕከናት ዜና ሓቢረን።

   ሓደ ወዲ 36 ከምኡ'ውን ጓል 21 ዓመት ኣብቲ ብሰንበት 26 ሚያዝያ ዘጋጠመ ባርዕ ሞይቶም ኣለዉ።

   ካብቲ ባርዕ ዝደሓኑ ሓንቲ ኣደን ኣርባዕተ ቆልዑን ብዝወረዶም ጉድኣት ኣብ ሆስፒታል ተዓቚቦም ከምዘለዉ'ውን እቲ ጸብጻብ ይጠቅስ።

   ጠንቂ ናይቲ ኣብ "ምምሕዳር ከባቢ ሓሊበት" ዘጋጠመ ባርዕ እንታይ ምዃኑ ንምርግጋጽ መርመራ ይካየድ ከምዘሎ ሓላፊ ምክልኻል ገበን 6ይ መደበር ፖሊስ ኣቶ ክብርኣብ ገብረክርስቶስ ሓቢሩ።

   "እቲ ሓደጋ ዝተኸስተ ከባቢ ሰዓት 12:30 ድሕሪ ቀትሪ ኮይኑ፡ እቲ ባርዕ ንምቁጽጻር ኣሃዱ መጥፋእቲ ሓዊ ምስ ነበርቲ እቲ ከባቢ ብምዃን ብዝገበርዎ ርብርብ፡ ኣብ ውሽጢ 30 ደቓይቕ ኣብ ትሕቲ ቁጽጽር ክኣቱ ተኻኢሉ እዩ።

   "እንተኾነ ግን፡ ብሰንኪ እቲ ዝተፈጥረ ጽዑቕ ትኪ፡ ሓንቲ ኣደን ኣርባዕተ ቆልዑን ብምዕፋኖም ህጹጽ ሕክምናዊ ረድኤት ንምርካብ ናብ ሆስፒታል ኦሮታ ተወሲዶም ኣለዉ። እቶም ግዳያት ኣብዚ እዋን እዚ ኣድላዪ ክንክን ይግበረሎም ከምዘሎ ተፈሊጡ ኣሎ" ይብል እቲ ኣብ ጋዜጣ ሓዳስ ኤርትራ ዝወጸ ሓበሬታ።

   ሕብረተሰብ ምስ ሓዊ ዝተሓሓዝ ግቡእ ጥንቃቐ ክገብር ዝተማሕጸኑ ሰብመዚ መጥፋእቲ ሓዊ፡ "ተቓጻሊ ባህሪያት ዘለዎ ንብረት ኣብ ውሽጢ መንበሪ ኣባይቲ ካብ ምኽዛን ክቑጠብ ጻውዒት ኣቕሪቦም ኣለዉ።"

   ኣብ ኤርትራ ባርዕ ሓዊ መንበሪ ሳሕቲ ዘጋጥም'ኳ እንተኾነ ኣብ ቀረባ ዓመታት ግን ሓሓሊፉ ክርአ ጸኒሑ'ዩ።

   ተወሳኺ ሓበሬታ ንምርካብ ናብ 6ይ መደበር ፖሊስ ዝገበርናዮ ፈተነ ኣይሰመረን።

2. 28 ሚያዝያ 2026ጥርጡር መጥቃዕቲ ድራር ዋይት ሃውስ ብፈተነ ቅትለት ተኸሲሱ

   

   ምንጪ ስእሊ, Inc via Getty Image

   ብረት ሒዙ ናብቲ ኣብ ዋሽንግተን ዝተኻየደ እንግዶት ድራር ጋዜጠኛታት ዋይት ሃውስ ክኣቱ ዝፈተነ ጥርጡር ብፈተነ ቅትለት ተኸሲሱ።

   እቲ ኣብ ልዕሊ ፕረዚደንት ዶናልድ ትራምፕ ቅትለት ክፍጽም ፈቲኑ ዝብል ወግዓዊ ክሲ ተመስሪትሉ ዘሎ ኮል ቶማስ ኣለን፡ ምስ ብረት ዝተሓሓዝ ተወሳኺ ክልተ ክስታት'ውን ቀሪቦምሉ ኣለዉ።

   እቲ ወዲ 31 ዓመት፡ ሓደ 'ሰሚ-ኦቶማቲክ'፡ ሓጺር ብረት፡ ከምኡ'ውን ሰለስተ ካራታት ሒዙ'ዩ ናብቲ ትራምፕ ዝተረኽበሉ እንግዶት ክኣቱ ኣብ ዝፈተነሉ ብኣባለት ፍሉይ ሓለዋ ፕረዚደንት (ሲክረት ሰርቪስ) ተታሒዙ።

   ኣብቲ ፍጻመ ብጥይት ዝቖሰለ ሓደ ካብቶም ሓለውቲ፡ ኣብ ድሓን ኩነታት ከምዘሎ ይፍለጥ።

   እቲ ነባሪ ካሊፎርንያ ዝኾነ ጥርጡር በቲ ቀሪብሉ ዘሎ ክስታት ገበነኛ ኮይኑ እንተተረኺቡ ንሕልፈት ክፍረድ ይኽእል'ዩ።

   ብሰንኪ እቲ ዝተፈጥረ ኩነታት፡ እቲ ፕረዚደንት ናብ ባዕሉ፡ ደገፍቱን ተቓወምቱን፡ ከምኡ'ውን ናብ ጋዜጠኛታት ዘነጻጸረ ዋዛታት ክወርውረሉ ዝተሓሰበ ዓቢ ናይ ዳእላ ምሸት ክስረዝ ከምዝተገደደ ይዝከር።

3. 28 ሚያዝያ 2026ኣመሪካ “ሽፍትነት ባሕሪ” ትፍጽም ኣላ - ኢራን

   

   ምንጪ ስእሊ, Reuters

   ኣመሪካ ኣብ ዝሓለፈ ሰሙን ኣብ ህንዳዊ ውቅያኖስ ንሓንቲ ናይ ኢራን መርከብ ነዳዲ ኣብ ትሕቲ ቍጽጽር ኣእትያ።

   ወሃቢ ቃል ምኒስትሪ ጉዳያት ወጻኢ ኢራን እስማዒል ባጋይ ኣብ ትዊተር ኣብ ዝዘርግሖ መልእኽቲ፡ ነቲ ናይ ኣመሪካ ስጕምቲ “ሽፍትነት ኣብ ባሕሪ” ክብል ገሊጽዎ።

   "እንቋዕ ናብ ሽፍትነት ባሕሪ ብደሓን መጻእኩም። ሕጂ ወግዓዊ መንግስታዊ ፍቓድ ዘለዎ፡ ባንዴራኡ ብግልጺ ዘንበልብል፡ ገበኑ ድማ 'ምኽባር ሕጊ' ብዝብል ስም እዩ ዝፍጸም ዘሎ" ክብል እቲ ወሃቢ ቃል ነቲ ናይ ኣመሪካ ስጕምቲ ኮኒኑ።

   ብተወሳኺ እቲ ስጕምቲ “ዓለምለኻዊ ሕግን መትከላት ዓለማዊ ናጻ ንግድን ዝጥሕስ” ምዃኑ ገሊጹ።

   እቲ ወሃቢ ቃል ነዚ ዝብል ዘሎ፡ ዋና ኣኽባሪ ሕጊ ኣመሪካ ጂኒን ፌሪስ ፒሮ፡ እታ መርከብ ኣብ ቍጽጽር ክትኣቱ ትእዛዝ ከምዝተዋህበ ድሕሪ ምግላጻ’ዩ።

4. 28 ሚያዝያ 2026ኣብ ድራር ዋይት ሃውስ ተዅሲ ዝኸፈተ ጥርጡር ብፈተነ-ቅትለት ተኸሲሱ

   

   ምንጪ ስእሊ, LinkedIn / Cole Tomas Allen

   ዋይት ሃውስ ብቐዳም ምሸት ንጋዜጠኛታት ኣብ ዘዳለዎ እንግዶት ድራር፡ ኣብቲ ሆቴል ተዅሲ ብምኽፋቱ ዝተታሕዘ ኮል ቶማስ ኣለን ኣብ ልዕሊ ፕረዚደንት ኣመሪካ ዶናልድ ትራምፕ ፈተነ-ቅትለት ብምፍጻም ተኸሲሱ።

   እቲ እቲ ወዲ 31 ዓመት ኮል፡ ኣብ ውሽጢ ሆቴል ዋሽንግተን ሂልተን ብወከልቲ ጸጥታ ድሕሪ ምትሓዙ፡ ዕላማኡ ንሰበስልጣን ምምሕዳር ትራምፕ ንምቕንጻል ምዃኑ ተዛሪቡ ከም ዝነበረ ጸብጻብ ሲቢኤስ የመልክት።

   ነቲ ናይ ጸጥታ መፈተሺ ነቝጣ ክሓልፍ እንከሎ፡ ሓውሲ ኣውቶማቲክ ሽጉጥ፣ ሻትጋንን ሰለስተ ካራን ሒዙ ከምዝነበረ ኣኽበርቲ ሕጊ ገሊጾም።

   ኣብቲ ዝተፈጸ መጥቃዕቲ ሓደ ወኪል ሚስጢራዊ ኣገልግሎት ብጥይት ተሃሪሙ ነይሩ፤ ግን ብኸቢድ ኣይተጎድአን።

   ኮል ቶማስ ገበነኛ ኰይኑ እንተተረኺቡ ንዕድመ ልክዕ ማእሰርቲ ክፍረድ ተኽእሎ ኣሎ።

5. 28 ሚያዝያ 2026ካብ ስደት ናብ ጥርሑ ቤት፡ ሚልዮናት ሱዳናውያን ዝጽበዮም ዘሎ እንታይ እዩ?

6. 28 ሚያዝያ 2026ብድሆ ሩስያ ኣብ ማሊ፡ ካብ ዋግነር ናብ ኮርፕስ ኣፍሪቃ

7. 28 ሚያዝያ 2026ኣብ ዛዕባ ምሕዳስ ዝምድና ኤርትራ-ኣመሪካ እንታይ ይበሃል ኣሎ?

8. 28 ሚያዝያ 2026ልዕሊ 100 ስደተኛታት ካብ ሓደጋ ባሕሪ ድሒኖም

9. 27 ሚያዝያ 2026ፒተርስበርግ፡ ምስ ፕረዚደንት ቭላድሚር ፑቲን ዝተራኸበ ልኡኽ ኢራን

   

   ምንጪ ስእሊ, EPA/Shutterstock

   ብሚኒስተር ጉዳያት ወጻኢ ኢራን ዝምራሕ ልኡኽ ኣብ ሩስያ ምብጻሕ የካይድ ኣሎ።

   ኣብ ምዕራባዊት ከተማ ፒተርስበርግ ዝርከብ ዓባስ ኣራግቺ ምስ ፕረዚደንት ቭላድሚር ፑቲን ብምርኻብ ብዛዕባ ኩነታት ሃገሩ ተዘራሪቡ።

   ኣብቲ ርክብ ሚኒስተር ጉዳያት ወጻኢ ሩስያ ሰርገይ ላቭሮብ፡ ተሓጋጋዚ ፕረዚደንት ፑቲን ዝኾነ ዩሪ ኡሻኮቭን ሓላፊ ወተሃደራዊ ስለያ ሩስያ ኢጎር ኮስቲዩኮቭን ተሳቲፎም ነይሮም።

   ኣብ ማእከላይ ምብራቕ ሰላም ንክሰፍን ሩስያ ዝክኣላ ከምእትገብርን፡ "ሰናይ ድልየት ወይ ንክልቲኦም ወገናት ቅቡል ዝኾነ ናይ ምሽምጋል ኣገልግሎት" ንምሃብ ቅርብቲ ምዃናን ፑቲን ነቲ ኢራናዊ ጉጅለ ከምዝገለጸሉ ኣፈኛ ክረምሊን ድሚትሪ ፐስኮቭ ሓቢሩ።

   "ኣብ መወዳእታ ሰላም፡ ዘላቒ ሰላም ንክሰፍን፡ ከምኡ'ውን ናብ ተጻብኦታት ንዘይምምላስ ዝክኣለና ኩሉ ከንገብር ቅሩባት ኢና" ይብል ፐስኮቭ።

   እቲ ኢራናዊ ሚኒስተር ብወገኑ ንጋዜጠኛታት ኣብ ዝሃቦ መብርሂ፡ ኣመሪካ ተወሳኺ ልዝብ ክግበር ሓቲታ ከምዘላ ተዛሪቡ።

   ሃገሩ "ኣንጻር ልዕለ ሓያላን ዝኾነት ሃገር [ኣመሪካ] ገጢማ ትርከብ" ዝበለ ኣራግቺ፡ ኣመጥቃዕቲ ኣመሪካውያን "ሓንቲ ካብ ዕላማታቶም'ውን ከዕውቱ ኣይክኣሉን" ኢሉ።

   "ከምኡ ስለዝኾነ ድማ'ዮም፡ ዘተ ክግበር ጠሊቦም ዘለዉ፡ ንሕና'ውን ንግምግሞ ኣለና" ብምባል ድማ፡ ኢራን "ከም ሩስያ ዝበላ ዓበይቲ መሓዙትን መሻርኽትን" ከምዘለዋ ተነይቱ።

10. 27 ሚያዝያ 2026ማሊ፡ ሩስያውያን ዕጡቓት ካብ ሰሜን እታ ሃገር ኣንሳሒቦም

    

    ምንጪ ስእሊ, AFP via Getty Images

    ኣብ ጐኒ ሰራዊት ማሊ ተሰሊፎም ክዋግኡ ዝጸንሑ ሓይልታት ሩስያ ካብ ሰሜን እታ ሃገር ከምዝወጹ ኣፍሊጦም።

    ናይ ሩስያ 'ኮር ኣፍሪቃ' ብማሕበራዊ መራኸቢታት ኣብ ዝሃቦ ሓበሬታ፡ ካብቲ ከተማ ኪዳል ትርከበሉ ከባቢታት ከምዝወጹ ኣረጋጊጹ።

    ነታ ከተማ ተቖጻጺሩ ዘሎ ግንባር ሓርነት ኣዛዋድ (FLA) ብሰንበት ከምዝበሎ፡ ኣብ መንጎኦምን ሞስኮን ብዝተበጽሐ ስምምዕ'ዮም እቶም ሩስያውያን ዕጡቓት ብሰላም ክወጹ ክኢሎም ዘለዉ።

    ብቐዳም ኣብ ዝተፈላለየ ቦታታት ኣብ ርእሰከተማ ባማኮ ድምጺ ተዂሲን ነትጒን ተሰሚዑ ነይሩ'ዩ።

    ሚኒስተሰር ምክልኻል እታ ሃገር ሳድዮ ካማራ እውን ኣብቲ ጥቓ ርእሰ-ከተማ ባማኮ ኣብ ዝርከብ መንበሪ ገዝኡ ብዝተፈጸመ ነብሰ-ቅለታዊ መጥቃዕቲ ተቐቲሉ ከምዘሎ ይፍለጥ።

    ብጀነራል ኣሲሚ ጎይታ ዝምራሕ ወተሃደራዊ መንግስቲ ኣብ 2020 ከምኡ'ውን ኣብ 2021 ብዝተፈጸመ ዕልዋ መንግስቲ ስልጣን ዝተቖጻጸረ ኮይኑ፡ ነቲ ካብ እስላማውያን ዝርከብዎም ዕጡቓት ተቓወምቲ ዝነቅል ጸጥታዊ ዘይምርግጋእ ከህድእ'ዩ ቃል ኣትዩ ነይሩ።

11. 27 ሚያዝያ 2026ጀርመን፡ ዝተረኽበ ሽክና ርእሲ ናይታ ጓል 32 ዓመት ኤርትራዊት ምዃኑ ተረጋጊጹ

12. 27 ሚያዝያ 2026ናታንያሁ ኣብ ልዕሊ ሕዝቦላህ ሓያል መጥቃዕቲ ክካየድ ኣዚዙ

    

    ምንጪ ስእሊ, Reuters

    ቀዳማይ ምኒስተር እስራኤል በንያሚን ናታንያሁ፡ እቲ ስምምዕ ምቍራጽ ተዅሲ ንሰለስተ ሰሙን ካብ ዝናዋሕ ድሕሪ ክልተ መዓልታት፡ ሰራዊቱ ኣብ ልዕሊ ሕዝቦላህ "ሓያል መጥቃዕቲ" ክኸፍት ኣዚዙ።

    እዚ ትእዛዝ`ዚ ዝመጽአ፡ ቀዳም ኣብ ደቡባዊ ሊባኖስ ብዝተፈጸመ ደብዳብ ሽድሽተ ሰባት ድሕሪ ምቕታሎምን ክልተኦም ወገናት ብተደጋጋሚ ነቲ ስምምዕ ብምጥሓስ ክካሰሱ ድሕሪ ምጽናሖምን እዩ።

    ምኒስትሪ ጥዕና ሊባኖስ፡ እስራኤል ኣብ ናባቲየን ቢንት ጀበይልን ብዘካየደቶ መጥቃዕቲ ሽዱሽተ ሰባት ከም ዝተቐተሉን 17 ድማከም ዝቘሰሉን ገሊጹ።

    ሰራዊት እስራኤል ብወገኑ፡ ኣጽዋር ጽዒኖም ይንቀሳቐሱ ነይሮም ዝበሎም ሰለስተ ኣባላት ሕዝቦላህን ካልኦት ሰለስተ ዕጡቓትን ከም ዝቐተለ ኣፍሊጡ።

    ሕዝቦላህ፡ እስራኤል ኣብ ዮህሞር ኣል-ሻቂፍ ንዝፈጸመቶ መጥቃዕቲ ሕነ ንምፍዳይ፡ ንሓንቲ ወተሃደራዊት መኪና እስራኤል ከም ዝሃረመ ሓቢሩ ኣሎ።

    ንናጽነት ሜድያ ዝጣበቕ ትካል፡ እስራኤል ኣብልዕሊ ጋዜጠኛታት እተካይዶ መጥቃዕቲ "ተቐባልነት የብሉን" ክብል ኰኒኑዎ።

    ኣብዚ ቀረባ እዋን ኣማል ካሊል ዝተባህለት ጋዜጠኛ ክትቅተል ከላ፡ ሰበስልጣን ሊባኖስ ድማ ጋዜጠኛታት ብደይመደይ ዒላማ ይግበሩ ከም ዘለዉ ይኸሱ።

    ሰራዊት እስራኤል ግን ንጋዜጠኛታት ዒላማ ከም ዘይገብር እዩ ዝገልጽ።

13. 27 ሚያዝያ 2026ማሊ፡ ምኒስተር ምክልኻል ተቐቲሉ፣ ኪዳል ኣብ ኢድ ዕጡቓት ወዲቓ

    

    ምንጪ ስእሊ, Reuters

    ኣብ ማሊ፡ ብጅሃዳውያን ዕጡቓትን ተገንጸልቲ ሓይልታትን ብዝተወደበ ማዕበል መጥቃዕትን፡ ምኒስተር ምክልኻል እታ ሃገር ሳድዮ ካማራ ተቐቲሉ።

    እቲ ምኒስተር ዝተቐትለ፡ ኣብቲ ጥቓ ርእሰ-ከተማ ባማኮ ዝርከብ መንበሪኡ ብዝተፈጸመ ነብሰ-ቅለታዊ መጥቃዕቲ እዩ።

    መንግስታዊ ተለቪዥን ከም ዘረጋገጾ፡ ካማራ ምስቶም መጥቃዕቲ ዝፈጸሙ ዕጡቓት ኣብ ምክልኻል ከሎ ብዝበጽሖ መውጋእቲ ኣብ ሆስፒታል ህይወቱ ሓሊፋ።

    ኣብቲ መጥቃዕቲ ሰለስተ ኣባላት ስድራኡ እውን ተቐቲሎም እዮም።

    መሪሕነት እታ ሃገር፡ ጀነራል ኣሲሚ ጎይታ፡ ድሕሪ እቲ ኣብ ልዕሊ መንበሪ ገዛኡ ዝተፈጸመ መጥቃዕቲ ናብ ውሑስ ቦታ ከም ዝተሰጋገረ ተፈሊጡ ኣሎ።

    ዓወት ተገንጸልቲ ሓይልታትን ምስሓብ ሩስያውያን ዕጡቓትን ኣብ ሰሜናዊ ክፋል እታ ሃገር፡ ተገንጸልቲ ሓይልታት ኣዛዋድ (FLA) ንኸተማ ኪዳል ከም ዝተቘጻጸሩዋ ገሊጾም።

    ብመሰረት ጸብጻብ እቲ ጕጅለ፡ እቶም ብመንግስቲ ማሊ ተቘጺሮም ዝነበሩ ሩስያውያን ወተሃደራት (Africa Corps) ድሕሪ ናይ ክልተ መዓልታት ኲናት፡ ካብታ ከተማ ብሰላም ንኽወጽኡ ምስቶም ዕጡቓት ስምምዕ ብምግባር ለቒቖማ ወጺኦም ኣለዉ።

    ኵነታት ጸጥታን ዞባዊ ግብረ-መልስን ናይዚ መጥቃዕቲ፡ ኣብዚ ዝሓለፈ ዓመታት ኣብ ማሊ ዝተፈጸመ ዝዓበየ ዝተወሃሃደ መጥቃዕቲ ጅሃዳውያን ምዃኑ ተንተንቲ ይገልጹ።

    መንግስቲ ማሊ ኣብ መላእ ሃገር ናይ ድሕነት መጠንቀቕታ ኣዊጁ፡ ኣብ ባማኮን ካልኦት ከባቢታትን ድማ ናይ እዋን እቶ-እቶ ኣዋጅ ኣንቢሩ ኣሎ።

    ዋና ጸሓፊ ሕቡራት ሃገራት ኣንቶንዮ ጉተረዝን ምዕራብ ኣፍሪቃዊ ዞባዊ ውድብን ነቲ መጥቃዕቲ ብትሪ ኰኒኖሞ ኣለዉ። ፕረዚደንት ቡርኪና ፋሶ ካፕተን ኢብራሂም ትራኦሬ እውን ነቲ ተግባር "ጭካነ ዝመልኦ" ክብል ብምግላጽ ደገፉ ንህዝቢ ማሊ ገሊጹ።

    ማሊ ካብ 2020 ጀሚሩ ብወተሃደራዊ ጕጅለ ትመሓደር እኳ እንተ ሃለወት፡ ክሳዕ ሕጂ ግን ነቲ ካብ ኣልቓዒዳን ዳዕሽን ዝምንጩ መጥቃዕቲ ክትገትኦ ኣይከኣለትን። ብዙሕ ክፋል ሰሜንን ምብራቕን እታ ሃገር ድማ ካብ ቍጽጽር መንግስቲ ወጻኢ ኰይኑ ይርከብ።

14. 27 ሚያዝያ 2026ሊባኖስ፡ ኣብ መንጎ ተኣፋፊ ስምምዕ ብዝተፈጸመ መጥቃዕቲ እስራኤል 14 ሰባት ተቐቲሎም

    

    ምንጪ ስእሊ, Abbas Fakih / AFP via Getty Images

    ኣብ ሊባኖስ፡ ሰንበት ብዝተፈጸመ ደብዳብ ነፈርቲ እስራኤል፡ ክልተ ህጻናትን ክልተ ደቀንስትዮን ዝርከባኦም 14 ሰባት ከም ዝተቐተሉን 37 ድማ ከም ዝቘሰሉን ምኒስትሪ ጥዕና እታ ሃገር ኣፍሊጡ።

    ሰራዊት እስራኤል ቅድሚ እቲ መጥቃዕቲ ኣብ ደቡባዊ ሊባኖስ ንዝርከባ ዓድታት ናይ ምውጻእ መጠንቀቕታ ሂቡ ዝነበረ ኰይኑ፡ እቲ ስርሒት ድማ ንወተሃደራቱ ስግኣት ዝዀኑ ድፋዓት ሕዝቦላህ ንምጥቃዕ ዝዓለመ ምዃኑ ገሊጹ።

    ሕዝቦላህ ብወገኑ ብዘካየዶ መጥቃዕቲ ድሮን፡ ሓደ ወዲ 19 ዓመት እስራኤላዊ ወተሃደር ክቕተል እንከሎ፡ ሽዱሽተ ድማ ቈሲሎም። እስራኤል ግን ካልኦት ሰለስተ ድሮናት ዶብ ቅድሚ ምስጋረን ከም ዘፍሸለተን ሓቢራ።

    እዚ ሓድሽ ወተሃደራዊ ምስሕሓብ ዝካየድ ዘሎ፡ ክልተአን ሃገራት ካብ 16 ምያዝያ ጀሚሩ ኣብ ስምምዕ ምቍራጽ ተዅሲ ኣብ ዝርከባሉን እቲ ስምምዕ ድማ ዝሓለፈ ሓሙስ ንተወሳኺ ሰለስተ ሰሙን ኣብ ዝተናወሓሉን እዋን እዩ።

    ቀዳማይ ምኒስተር በንያሚን ናታንያሁ፡ ሕዝቦላህ ነቲ ስምምዕ የፍርሶ ከም ዘሎ ብምጥቃስ፡ እስራኤል ርእሳ ንምክልኻልን ስግኣታት ንምፍሻልን "ናይምንቅስቓስ ናጽነት" ከምዘለዋ ኣስሚሩሉ።

    ኣብቲ ዲፕሎማስያዊ ሸነኽ ድማ ምኒስተር ወጻኢ ጉዳያት ኢራን ዓባስ ኣራግቺ ምስ ዋሽንግተን ክካየድ ብዛዕባ ዝሕሰብ ዘሎ ዘተ ሰላም ንምምይያጥ ኣብ ፓኪስታን ዑደት ድሕሪ ምግባር፡ ምስ ቭላድሚር ፑቲን ንምርኻብ ናብ ሞስኮ ከም ዘምርሕ ይጥቀስ።

    ፕረዚደንት ዶናልድ ትራምፕ ምስ ኢራን ዝካየድ ዘተ ዕድል ንምሃብ፡ ነቲ ተዅሲ ደው ናይ ምባል ግዜ እኳ እንተ ኣናውሖ፡ እቲ ናብ ኢስላማባድ ክግበር ዝነበሮ ዑደት ፍሉያት ልኡኻት ግን ከም ዝተሰረዘ ተፈሊጡ ኣሎ።

    እዚ ኵነታት ነቲ ተኣፋፊ ሰላም እቲ ዞባ ኣብ ትሕቲ ዓቢ ጸቕጢ የውድቘ ኣሎ።

15. 27 ሚያዝያ 2026ኣብ ድራር ዋይት ሃውስ ዝተጠጅአ ሽርሒ፡ ተዅሲ ዝኸፈተ ጥርጡር ተፈሊጡ

16. 27 ሚያዝያ 2026ኤርትራዊ ሰመረ ገብረእግዚኣብሄር ድሕሪ ነዊሕ ማእሰርቲ ካብ ቀይዲ ኢሚግሬሽን ኣሜሪካ ወጺኡ

17. 27 ሚያዝያ 2026ካብ ካርቱም ክሳብ መቐለ፡ ሓደ ሃገር ብዙሓት ሓይልታት

18. 27 ሚያዝያ 2026ኣትሌት ትእግስት ኣሰፋ ኣብ ማራቶን ለንደን ክብረወሰን ብምምሕያሽ ተዓዊታ

19. 26 ሚያዝያ 2026ኣብ እንግዶት ድራር ንትራምፕ ዒላማ ዝገበረ ተዅሲ፡ ኣብታ ቦታ ካብ ዝነበረ ጋዜጠኛ ቢቢሲ

20. 26 ሚያዝያ 2026ብኪነታዊ ብልሒ ብዝተዳለዉ ምስልታት ክሳብ ክንደይ ትታለሉ? እነሆ ፈትኑ. . .