‘దేశాన్ని నలుగురు హైజాక్ చేశారు.. శిక్షపడేలా చేస్తాం’.. జ్ఞానేశ్ కుమార్ రాజీనామా డిమాండ్‌తో దిల్లీలో మూడో రోజూ ప్రతిపక్షాల నిరసనలు

ప్రధాన ఎన్నికల కమిషనర్ జ్ఞానేశ్ కుమార్ రాజీనామా డిమాండ్ చేస్తూ ప్రతిపక్ష ఎంపీలు చేపట్టిన నిరసనలు అక్టోబర్ 8న మూడో రోజునా కొనసాగాయి.

దిల్లీలో ఆందోళన చేపట్టడానికి ముందు ప్రతిపక్ష ఇండియా కూటమి నేతలకు కాంగ్రెస్ అధ్యక్షుడు మల్లికార్జున ఖర్గే తన నివాసంలో ఆతిథ్యం ఇచ్చారు.

అనంతరం ప్రతిపక్ష ఎంపీలు రాహుల్ గాంధీ, ప్రియాంక గాంధీ వాడ్రా, మల్లికార్జున ఖర్గే మూడు బస్సుల్లో రాజ్‌ఘాట్‌లోని గాంధీ మెమోరియల్‌కి బయలుదేరారు.

శాంతియుతంగా నిరసన చేపడతామని ప్రతిపక్షాలు పేర్కొన్నాయి.

గురువారం సమావేశానికి సమాజ్‌వాదీ పార్టీ, శివసేన (యూబీటీ), ఎన్‌సీపీ-ఎస్‌పీ పార్టీలకు చెందిన ఎంపీలు కూడా హాజరయ్యారు.

"300 మంది రాజ్య సభ, లోక్ సభ ఎంపీలు శాంతియుతంగా నిరసన చేపట్టాలని భావించారు. గత రెండు రోజులు నిరసన చేసేందుకు మాకు అనమతివ్వలేదు. మొదటిరోజు ఎన్నికల సంఘం కార్యాలయం ఎదుట మమ్మల్ని అడ్డుకున్నారు. ఆ తర్వాత మేము జంతర్ మంతర్ వెళ్తాం అని చెప్పాం. అక్కడికీ వెళ్లనివ్వలేదు. మా వాళ్లనీ కొట్టారు" అని రాజ్‌ఘాట్‌కి వెళ్లే ముందు రాహుల్ గాంధీ ఆరోపించారు.

"నేరపూరిత కుట్రలతో నరేంద్ర మోదీ, అమిత్ షా, మోహన్ భాగవత్, జ్ఞానేశ్ కుమార్ భారత దేశాన్ని హైజాక్ చేశారు. రాజ్యాంగాన్ని విచ్ఛిన్నం చేశారు. ఓట్లు దొంగలించారు. త్వరలోనే వీరికి శిక్షపడేలా చేస్తాం" అని రాహుల్ గాంధీ అన్నారు.

ప్రతిపక్షాల డిమాండ్లు ఇవే...

జ్ఞానేశ్ కుమార్ రాజీనామా చేయాలనేది ప్రతిపక్షాల ప్రధాన డిమాండ్.

ఓటరు జాబితాపై చేపట్టిన స్పెషల్ ఇంటెన్సివ్ రివిజన్ (సర్)లో జరిగిన అక్రమాలపై ఎన్నికల కమిషన్‌ను అవి ప్రశ్నిస్తున్నాయి.

ఎన్నికల ప్రక్రియ, ఓటరు జాబితాలో పారదర్శకతపై తమ ఆందోళనలు, లేవనెత్తిన ప్రశ్నలకు సమాధానం చెప్పాలని రాహుల్ సహా ప్రతిపక్ష పార్టీలు డిమాండ్ చేస్తున్నాయి.

నిరసనల నేపథ్యంలో పోలీసు ఆంక్షలు...

గురువారం రాజ్‌ఘాట్ వద్ద నిరసనల నేపథ్యంలో సెక్షన్ 163 (భారతీయ న్యాయ సంహిత) కింద దిల్లీ పోలీసులు ఆంక్షలు విధించారు.

రాజ్‌ఘాట్ సహా పరిసర ప్రాంతాల్లో భారీ సంఖ్యలో పోలీసులు, పారా మిలటరీ బలగాలను మోహరించి, భద్రతను కట్టుదిట్టం చేశారు.

అక్టోబర్ 8 లేదా 9న రాష్ట్రపతి ద్రౌపది ముర్ముని కలిసేందుకు ప్రతిపక్షాలు అనుమతి కోరినట్లు కాంగ్రెస్ జనరల్ సెక్రటరీ కేసీ వేణుగోపాల్ తెలిపారు.

జ్ఞానేశ్ కుమార్ రాజీనామా చేసేంత వరకు తమ నిరసనలు కొనసాగిస్తామని ప్రతిపక్షాలు తెలిపాయి.

మరోవైపు ప్రతిపక్షాల ఆరోపణలను ఎన్నికల కమిషన్ (ఈసీ), భారతీయ జనతా పార్టీ కొట్టిపారేస్తున్నాయి. సర్ ప్రక్రియ ఎన్నికల జాబితాను అప్డేట్ చేయడం కోసమే అని ఈసీ చెబుతోంది.

నిరసనల నేపథ్యంలో గత రెండు రోజులు ప్రతిపక్ష ఎంపీలు, పోలీసుల మధ్య తీవ్ర వాతావరణం నెలకొంది.

అక్టోబర్ 6న ప్రతిపక్ష ఎంపీలు ఎన్నికల కమిషన్‌ వైపుగా మార్చ్ చేపట్టారు. అనంతరం రాహుల్ గాంధీ సహా పలువురు ఎంపీలు ఆకాశవాణి భవన్ వద్ద కూర్చొని ధర్నాకు దిగారు.

అక్టోబర్ 7న, ప్రతిపక్ష నేతలు జంతర్ మంతర్ వైపుగా బయలుదేరారు. కానీ, పోలీసులు వారిని అడ్డుకొని, పలువురిని అదుపులోకి తీసుకున్నారు.

అక్టోబర్ 6న నిరసనలకు సంబంధించి రాహుల్, ప్రియాంక సహా పలువురు నేతలపై దిల్లీ పోలీసులు ఎఫ్ఐఆర్ నమోదు చేశారు. పోలీసు అధికారులపై దాడి, ప్రభుత్వ విధులకు ఆటంకం కలిగించారనే ఆరోపణలతో వారిపై కేసు నమోదైంది.

ప్రతిపక్షాల తీరును తప్పుబడుతూ 42 మంది జడ్జ్‌ల బహిరంగ లేఖ

మరోవైపు ఎన్నికల సంఘాన్ని బలహీనపరిచేందుకు ప్రయత్నాలు జరుగుతున్నాయని ఆరోపిస్తూ 42 మంది మాజీ జడ్జీలు ఓ బహిరంగ లేఖ రాశారు.

"కచ్చితమైన ఆధారాలు లేకుండా 'ఓటు చోరీ' దొరిగిందనే ఆరోపణలు సరికాదు.

పదేపదే రాజ్యాంగ వ్యవస్థలను 'దొంగలని' నిందించడం ద్వారా ప్రజాస్వామ్యంపై ప్రజలు విశ్వాసం కోల్పోయాలా చేస్తున్నారు" అని ఆ లేఖపై సంతకం చేసిన జడ్జ్‌లు పేర్కొన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)