భారత్ రక్షణ సమాచారం పాకిస్తాన్ నిఘా సంస్థలకు అందుతోందా?

భారత దేశ భద్రతకు సంబంధించిన సున్నితమైన సమాచారాన్ని పాకిస్తాన్ నిఘా సంస్థలకు చేరవేస్తున్నారనే అనుమానాలు, ఆరోపణలపై ఆంధ్ర ప్రదేశ్ కౌంటర్ ఇంటెలిజెన్స్ విస్తృత దర్యాప్తు చేపట్టింది.

'ఆపరేషన్ ఫైర్‌వాల్-2026' పేరుతో నిర్వహించిన ఈ దర్యాప్తులో భాగంగా 18 మంది అనుమానితుల పాత్రను పరిశీలించింది. వీరిలో 13 మంది నౌకాదళ సిబ్బంది ఉన్నట్లు ఏపీ కౌంటర్ ఇంటెలిజెన్స్ అధికారులు తెలిపారు.

ఈ వ్యవహారంలో ప్రాథమికంగా ప్రమేయం ఉన్నట్లు గుర్తించిన ఇద్దరిని పోలీసులు అరెస్ట్ చేసినట్లు పీటీఐ వార్తా సంస్థ తెలిపింది. మిగిలిన అనుమానితుల పాత్రపై దర్యాప్తు కొనసాగుతోంది.

ఏఎన్ఐ, పీటీఐ వార్తా సంస్థల కథనం ప్రకారం రక్షణ సంస్థలు, వ్యూహాత్మక ప్రాంతాలకు సంబంధించిన సున్నితమైన సమాచారాన్ని పాకిస్తాన్ నిఘా సంస్థలకు చేరవేస్తున్నారనే సమాచారం అందడంతో విజయవాడలోని కౌంటర్ ఇంటెలిజెన్స్ పోలీస్ స్టేషన్‌లో 2026 సెప్టెంబర్ 2న క్రైమ్ నంబర్ 01/2026 కింద కేసు నమోదు చేశారు.

భారతీయ న్యాయ సంహిత (బీఎన్ఎస్) - 2023 సెక్షన్లు 61(2), 147, 148ను సెక్షన్ 3(5)తో కలిపి... చట్టవిరుద్ధ కార్యకలాపాల నిరోధక చట్టం-1967లోని 17, 18 సెక్షన్లు, అధికార రహస్యాల చట్టం-1923లోని సెక్షన్ల కింద కేసు నమోదు చేశారు.

‘‘ఈ కేసు దర్యాప్తులో భాగంగా అక్టోబర్ 1న 'ఆపరేషన్ ఫైర్‌వాల్-2026' నిర్వహించారు.

దీని కోసం 12 కౌంటర్ ఇంటెలిజెన్స్ దర్యాప్తు బృందాలను ఏర్పాటు చేశారు. ఆంధ్ర ప్రదేశ్‌తో పాటు కేరళ, మహారాష్ట్ర, కర్ణాటక, గుజరాత్, గోవా, దిల్లీ, తమిళనాడు, ఛత్తీస్‌గఢ్, బిహార్‌లలో ఈ బృందాలు దర్యాప్తు చేపట్టాయి.

సంబంధిత రాష్ట్రాల యాంటీ టెర్రరిస్ట్ స్క్వాడ్‌లు, నౌకాదళ అధికారులు, స్థానిక పోలీసులతో సమన్వయం చేసుకుని అనుమానితుల పాత్రను పరిశీలించారు. ఈ క్రమంలో కొన్ని ఎలక్ట్రానిక్ పరికరాలను స్వాధీనం చేసుకున్నారు’’ అని ఏపీ కౌంటర్ ఇంటెలిజెన్స్ పోలీస్ విభాగం తెలిపింది.

విశాఖలో గూడచర్యం... విజయవాడలో కేసు నమోదు

విశాఖపట్నం కేంద్రంగా నేవీ సిబ్బంది, పాక్‌ ఇంటెలిజెన్స్‌ ఏజెంట్ల మధ్య రహస్య సంబంధాలు ఉన్నట్లు దర్యాప్తులో గుర్తించామని ఏపీ కౌంటర్‌ ఇంటెలిజెన్స్‌ తెలిపింది.

ఈ వ్యవహారంపై విజయవాడ కౌంటర్‌ ఇంటెలిజెన్స్‌ పోలీస్‌ స్టేషన్‌లో మూడు కేసులు నమోదు చేశారు. బీఎన్‌ఎస్‌లోని సెక్షన్లు 61(2), 147, 148 రెడ్‌విత్‌ 3(5), యూఏపీఏలోని 17, 18, అధికారిక రహస్యాల చట్టంలోని సెక్షన్‌ 3 కింద కేసులు నమోదు చేసినట్లు పోలీసులు తెలిపారు.

దేశ భద్రతకు సంబంధించిన అంశం కావడంతో సంబంధిత సంస్థల సమన్వయంతో దర్యాప్తు చేపట్టారు. ఇందులో భాగంగానే అక్టోబర్‌ 1న 'ఆపరేషన్‌ ఫైర్‌వాల్‌ - 2026' నిర్వహించారు.

విశాఖలో కాంట్రాక్ట్ డ్రైవర్ అరెస్టు

విశాఖపట్నంలో నౌకాదళ అధికారుల వద్ద కాంట్రాక్ట్ ఉద్యోగిగా పనిచేస్తున్న ఒకరిని అరెస్ట్ చేశారు. అయితే, ఆ వ్యక్తి ఎవరు, ఎక్కడి వారు, కుటుంబ నేపథ్యం లాంటి వివరాలేవీ పోలీసులు వెల్లడించలేదు.

నౌకాదళం, రక్షణ సంస్థలకు సంబంధించిన సున్నితమైన, రహస్య సమాచారాన్ని పాకిస్తాన్‌కు చెందిన నిఘా సంస్థలకు చేరవేసినట్లు ఆయనపై ఆరోపణలు ఉన్నాయి. ఇందుకు డబ్బు స్వీకరించినట్లు కూడా దర్యాప్తులో గుర్తించారు.

కోయంబత్తూరులో నేవీ ఉద్యోగి అరెస్టు

మరో నిందితుడిని తమిళనాడులోని కోయంబత్తూరులో అరెస్టు చేసినట్టు పీటీఐ వార్తా సంస్థ పేర్కొంది.

ఆయన నౌకాదళానికి సంబంధించిన సున్నితమైన సమాచారాన్ని పాకిస్తాన్ నిఘా ఆపరేటివ్‌లకు చేరవేసినట్లు ఆరోపణలు ఉన్నాయి. కోయంబత్తూరులో స్థానిక న్యాయస్థానం నుంచి ట్రాన్సిట్ వారెంట్ తీసుకుని ఆయనను విజయవాడకు తరలించారు. అనంతరం కోర్టులో హాజరుపరచగా... ఇద్దరికీ అక్టోబర్ 14 వరకు జ్యుడీషియల్ రిమాండ్ విధించారు.

కోయంబత్తూరులో అరెస్ట్ చేసిన వ్యక్తి విశాఖపట్నం నేవల్ బేస్‌కు చెందిన ఉద్యోగి కాగా, కాంట్రాక్ట్ ఉద్యోగి నౌకాదళ అధికారుల దగ్గర పనిచేసేవారు. మిగిలిన అనుమానితులపై దర్యాప్తు కొనసాగుతోందని పీటీఐ కథనాన్ని ఉటంకిస్తూ ఎకనమిక్ టైమ్స్ వెబ్ సైట్ పేర్కొంది.

సోషల్ మీడియా ద్వారా 'హనీట్రాప్'

ఏఎన్ఐ వార్తా సంస్థ కథనం ప్రకారం... నకిలీ సోషల్ మీడియా ప్రొఫైల్స్, హనీట్రాప్ ప్రయత్నాలు దర్యాప్తులో వెలుగులోకి వచ్చాయి.

పాకిస్తాన్ నిఘా సంస్థలతో సంబంధం ఉన్నట్లు అనుమానిస్తున్న కొందరు మహిళలు ఫేస్‌బుక్, ఇన్‌స్టాగ్రామ్ వంటి ప్లాట్‌ఫామ్‌ల ద్వారా భారతీయులను పరిచయం చేసుకున్నట్లు దర్యాప్తులో గుర్తించారు.

వాట్సాప్ చాటింగ్, వాయిస్ కాల్స్, వీడియో కాల్స్ ద్వారా పరిచయాలు పెంచుకున్నట్లు దర్యాప్తులో గుర్తించారు. అశ్లీల చిత్రాలు, లైంగిక ప్రలోభాలు, డబ్బు ఆశ చూపించడం ద్వారా రక్షణ సమాచారాన్ని సేకరించేందుకు ప్రయత్నించినట్లు వెల్లడించారు.

వీడియో కాల్స్ సమయంలో నౌకాదళ స్థావరాలు, నౌకలు, జలాంతర్గాముల్లోని సున్నితమైన ప్రాంతాలను చూపించాలని కోరినట్లు దర్యాప్తులో గుర్తించారు.

'జోషితా పాల్', 'అన్వీ మెహతా' పేర్లతో..

దర్యాప్తులో 'జోషితా పాల్', 'అన్వీ మెహతా' పేర్లతో ఉన్న సోషల్ మీడియా ఐడీలను కూడా అధికారులు గుర్తించారు.

ఏఎన్‌ఐ కథనం ప్రకారం.. 'జోషితా పాల్' పేరుతో ఉన్న వ్యక్తి ముంబయిలోని ఓ నౌకా నిర్మాణ సంస్థలో ఉద్యోగినిగా పరిచయం చేసుకుని ఫేస్‌బుక్ ద్వారా పరిచయం పెంచుకున్నట్లు దర్యాప్తు అధికారులు తెలిపారు. ఆ తర్వాత వాట్సాప్‌లో సంభాషణలు కొనసాగించినట్లు పేర్కొన్నారు.

నౌకలు, జలాంతర్గాముల కదలికలు, వాటి సంఖ్య, ఫొటోలు, కమాండింగ్ అధికారుల వివరాలు ఇవ్వాలని కోరినట్లు ఏపీ కౌంటర్ ఇంటెలిజెన్స్ ప్రకటనను ఏఎన్ఐ తన కథనంలో పేర్కొంది.

అలాగే 'అన్వీ మెహతా' పేరుతో ఉన్న మరో ఐడీ.. దిల్లీలో పనిచేసే సైకాలజిస్ట్‌గా పరిచయం చేసుకుని వాయిస్, వీడియో కాల్స్ ద్వారా నౌకాదళ సిబ్బందితో పరిచయం పెంచుకునేందుకు ప్రయత్నించినట్లు పోలీసు అధికారులు తెలిపారు.

జోషితా పాల్', 'అన్వీ మెహతా' అనే వ్యక్తులకు సంబంధించిన ఇతర వివరాలను అధికారులు వెల్లడించలేదు.

ఓటీపీలు... క్రిప్టో చెల్లింపులు?

భారతీయ మొబైల్ నంబర్లను, వాట్సాప్ యాక్టివేషన్‌కు అవసరమైన ఓటీపీలను పాకిస్తాన్ నిఘా ఆపరేటివ్‌లకు అందించినట్లు దర్యాప్తులో గుర్తించామని ఏపీ కౌంటర్ ఇంటెలిజెన్స్ తెలిపింది.

ఈ ఓటీపీలను ఉపయోగించి పాకిస్తాన్‌లో వాట్సాప్ ఖాతాలను యాక్టివేట్ చేసి.. వాటి ద్వారా మరింత మందిని సంప్రదించినట్లు అనుమానిస్తున్నారు.

క్రిప్టో కరెన్సీ, మధ్యవర్తుల ద్వారా చెల్లింపులు జరిగాయా అనే అంశాన్ని కూడా దర్యాప్తు అధికారులు పరిశీలిస్తున్నారు.

విదేశీ క్రిప్టో కరెన్సీ బదిలీలు, స్థానిక మధ్యవర్తుల ద్వారా ఆర్థిక లావాదేవీలు జరిగినట్లు దర్యాప్తులో గుర్తించారని ఏఎన్‌ఐ కథనం పేర్కొంది.

కొనసాగుతున్న దర్యాప్తు

ఈ కేసులో మొత్తం 18 మంది అనుమానితుల పాత్రను పరిశీలించగా... ఇద్దరిని అరెస్టు చేశారు. మిగిలినవారి పాత్రపై దర్యాప్తు కొనసాగుతోంది.

నౌకాదళం, రక్షణ సంస్థలకు సంబంధించిన ఏ సమాచారం బయటకు వెళ్లింది? ఎవరెవరితో సంబంధాలు ఉన్నాయి? ఆర్థిక లావాదేవీలు ఎలా జరిగాయి? అనే అంశాలను అధికారులు పరిశీలిస్తున్నారు.

దర్యాప్తు సున్నితమైనది కావడంతో మరిన్ని వివరాలను తగిన సమయంలో వెల్లడిస్తామని ఏపీ కౌంటర్ ఇంటెలిజెన్స్ తెలిపింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)