మోదీ మాట వినే ప్రజలు బంగారం కొనడం తగ్గించారా.. అసలు పసిడి ధరలు పడిపోవడానికి కారణమేంటి?

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, పండుగలు, పెళ్లిళ్ల సమయంలో భారత మహిళలు బంగారం ఎక్కువగా వేసుకుంటారు.
    • రచయిత, చందన్ కమార్ జజ్వాడే
    • హోదా, బీబీసీ ప్రతినిధి
  • ప్రచురణ
  • చదివే సమయం: 6 నిమిషాలు

ప్రజలు బంగారం కొనుగోలు తగ్గించారని, తన మాట విన్నారని దీనివల్ల వాళ్లకు చాలా ప్రయోజనం కలిగిందని ప్రధాని మోదీ అన్నారు. శనివారం(నవంబర్ 21) లక్నోలో జరిగిన ఒక కార్యక్రమంలో ప్రధాని ఈ వ్యాఖ్యలు చేశారు.

"ఒక సంవత్సరం క్రితం నేను దేశ ప్రజలకు ఒక విజ్ఞప్తి చేశాను. అవసరం లేకపోతే ఒక ఏడాది పాటు దయచేసి బంగారం కొనొద్దని చెప్పాను.

లాల్ బహదూర్ శాస్త్రి ఒకసారి దేశ ప్రజలను ఒక పూట భోజనం మానేయాలని కోరితే ప్రజలు ఆయన మాట విన్నారు. అదే విధంగా దేశ ప్రజలు నా మాటను కూడా విన్నారని చెప్పడానికి సంతోషిస్తున్నాను.

దేశ ప్రజలు నా విజ్ఞప్తిని పాటించారు. బంగారం ధరలు పడిపోయాయి. ఇప్పుడు మోదీ...మీ మాట విన్నాను. నా డబ్బు ఆదా అయింది' అని చెబుతున్నారు" అని ఆయన అన్నారు.

కొన్ని వారాలుగా బంగారం ధరలు క్రమంగా తగ్గుతూ వస్తున్నాయి.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

భారత్‌లో ఈ ఏడాది ప్రారంభంలో పది గ్రాముల 24క్యారెట్ల బంగారం ధర లక్షా80వేలకు చేరగా ఇప్పుడది లక్షా 25 వేలకు పడిపోయింది.

ఈ లెక్కన చూస్తే బంగారం ధరల్లో భారీ తగ్గుదల కనిపిస్తోంది.

అయితే ప్రధాని మోదీ విజ్ఞప్తి చేసిన తర్వాత నిజంగానే భారత్‌లో ప్రజలు బంగారం కొనడం ఆపేశారా?

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, బంగారం కొనొద్దని ఆరు నెలల క్రితం ప్రజలకు ప్రధాని విజ్ఞప్తి చేశారు.

బంగారం కొనడంపై ప్రధాని మోదీ అప్పుడేంచెప్పారు?

బంగారం కొనొద్దని ప్రధాని మోదీ విజ్ఞప్తి చేసింది నిజానికి ఏడాది క్రితం కాదు. 2026 మే 10న తెలంగాణ పర్యటన సందర్భంగా ఆయన ఈ మాటలు చెప్పారు.

సికింద్రాబాద్‌లో జరిగిన ఒక కార్యక్రమంలో మాట్లాడిన మోదీ విదేశీ మారకద్రవ్యాన్ని ఆదా చేయాలని ప్రజలకు విజ్ఞప్తి చేశారు.

"బంగారం కొనుగోలుకు సంబంధించి మరో అంశం ఉంది. దీని కోసం విదేశీ మారక ద్రవ్యం పెద్ద మొత్తంలో ఖర్చవుతుంది. ఒకప్పుడు దేశం సంక్షోభంలో ఉన్నప్పుడు ప్రజలు దేశ ప్రయోజనాల కోసం తమ బంగారాన్ని విరాళంగా ఇచ్చేవారు. ఇప్పుడు అలా విరాళాలు ఇవ్వాల్సిన అవసరం లేదు. కానీ దేశ ప్రయోజనాలను దృష్టిలో పెట్టుకుని ఏడాది పాటు ఇంట్లో ఏదైనా శుభకార్యం జరిగినా బంగారు ఆభరణాలు కొనకూడదని మనం నిర్ణయించుకోవాలి" అని ఆయన అన్నారు.

"విదేశీ మారక ద్రవ్యాన్ని ఆదా చేయాలనే దేశభక్తి మనకు ఒక సవాలుగా నిలుస్తోంది. ఆ సవాలును స్వీకరించి విదేశీ మారక ద్రవ్యాన్ని ఆదా చేయాలి. బంగారం కొనకూడదు" అని ఆయన చెప్పారు.

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, ఇటీవలి కాలంలో బంగారం ధరలు వరుసగా తగ్గుతున్నాయి.

బంగారం ధరలు ఎందుకు తగ్గుతున్నాయి?

"బంగారం కూడా ఒక రకమైన కరెన్సీ వంటిదే. పెట్టుబడుల భవిష్యత్తును అంచనా వేసుకుని ప్రజలు అందులో డబ్బు పెట్టుబడి పెడతారు" అని చార్టర్డ్ అకౌంటెంట్స్ ఆఫ్ ఇండియా (ఐసీఏఐ) మాజీ అధ్యక్షుడు, ఆర్థిక వ్యవహారాల నిపుణులు వేద్ జైన్ బీబీసీతో చెప్పారు.

అమెరికాలో వడ్డీ రేట్లు తగ్గినప్పుడు మంచి రాబడి వస్తుందని నమ్మి ప్రజలు బంగారంలో పెట్టుబడి పెడతారు. దీనికితోడు బంగారం ధర ఇప్పటికే గరిష్ట స్థాయికి చేరుకుంది. అందుకే ఇప్పుడు ధర పడిపోయింది. ప్రస్తుతం అమెరికాలో వడ్డీ రేట్లు పెరుగుతాయని ప్రజలు భావిస్తున్నారు. అందుకే వారు డాలర్లలో పెట్టుబడి పెట్టాలని భావిస్తున్నారు.

అంతర్జాతీయ మార్కెట్‌లో బంగారం ధర తగ్గింది. అమెరికాలో ఒక ఔన్స్ (సుమారు 31 గ్రాములు) బంగారం ధర దాదాపు 5,500 డాలర్ల నుంచి ప్రస్తుతం 3,500 డాలర్లకు పడిపోయింది. మిడిల్ ఈస్ట్ పరిస్థితులు కారణంగా చమురు ధరలపై పడిన ప్రభావం క్రమంగా తగ్గి పరిస్థితులు స్థిరపడుతున్నాయి. ఆ యుద్ధం కారణంగా ఒత్తిడికి గురైన భారత రూపాయి ఇప్పుడు బలపడుతోంది.

దీని వల్ల డాలర్‌తో పోలిస్తే రూపాయి విలువ కొద్దిగా మెరుగుపడింది. ఈ ప్రభావం బంగారం ధరలపై కూడా పడింది'' అని వేద్ జైన్ చెప్పారు.

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, బంగారం ధరలపై అంతర్జాతీయ పరిస్థితులు ప్రభావం చూపుతాయి.

‘అప్పుడూ ఇప్పుడూ ఊహాగానాలే’

"ఊహాగానాల కారణంగానే బంగారం ధరలు పెరిగాయి. 2024 డిసెంబర్‌లో ఒక ఔన్స్ బంగారం ధర సుమారు 2,500డాలర్లగా ఉంది. జనవరి 2026నాటికి ఇది 5,500డాలర్లను దాటింది" అని దిల్లీకి చెందిన థింక్ ట్యాంక్ గ్లోబల్ ట్రేడ్ రీసెర్చ్ ఇనీషియేటివ్ (జీటీఆర్ఐ) అధిపతి అజయ్ శ్రీవాస్తవ అన్నారు.

"దీని వెనుక డాలర్ బలహీనపడుతుందనే భయం, మధ్యప్రాచ్యంలో ఉద్రిక్తతలు పెరుగుతాయనే భయం, డోనల్డ్ ట్రంప్ విధానాలు వంటి అనేక కారణాలు ఉన్నాయి. ఆ సమయంలో ఇరాన్ యుద్ధం ఇంకా ప్రారంభం కాలేదు. కానీ చైనా, జపాన్‌ల ఆర్థిక నిర్ణయాలు డాలర్‌పై ప్రభావం చూపాయి. దీంతో పెట్టుబడిదారులు అమెరికా డాలర్‌కు దూరం జరిగి బంగారంపై పెట్టుబడులు పెట్టడం ప్రారంభించారు" అని ఆయన తెలిపారు.

"ఆ సమయంలో రిజర్వ్ బ్యాంక్ ఆఫ్ ఇండియాతో సహా ప్రపంచవ్యాప్తంగా పలు దేశాల కేంద్ర బ్యాంకులు బంగారంలో పెట్టుబడులు పెట్టాయి" అని అజయ్ శ్రీవాస్తవ అంటున్నారు.

"ఇప్పుడు బంగారం ధరలు మళ్లీ పడిపోవడానికి ఊహాగానాలు కూడా ఒక కారణం. అమెరికాలో వడ్డీ రేట్లు పెరిగే అవకాశముందని పెట్టుబడిదారులు భావిస్తున్నారు. వాళ్లు తమ బంగారాన్ని అమ్మి ఆ డబ్బును అమెరికా ట్రెజరీ బాండ్లలో పెట్టుబడిగా పెట్టాలని చూస్తున్నారు.

ఇటీవలి వారాల్లో ఏఐ కంపెనీల షేర్ల ధరలు తగ్గడం కూడా బంగారం ధరలు తగ్గడానికి మరో కారణం. అలాగే ఇరాన్ యుద్ధం లేదా మిడిల్ ఈస్ట్ పరిస్థితులపై ఉన్న ఆందోళనలు కూడా తగ్గాయి" అని అజయ్ శ్రీవాస్తవ చెప్పారు.

భారత్‌లో బంగారం ధరలు పెరగడానికి మరో ప్రధాన కారణం 2026 మేలో ప్రభుత్వం విధించిన 15 శాతం టారిఫ్ కూడా. దీని వల్ల దేశంలో బంగారం ధరలు గణనీయంగా పెరిగాయి.

అంతర్జాతీయ మార్కెట్‌లో 2024 డిసెంబర్ నుంచి 2026 జనవరి మధ్య బంగారం ధరలు 111 శాతం పెరిగాయి. రూపాయి విలువ తగ్గడం, టారిఫ్‌ల కారణంగా భారత్‌లో ఈ పెరుగుదల 132 శాతంగా నమోదైంది.

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, భారత్‌లో ప్రజలు బంగారాన్ని పెట్టుబడిలా భావించడం కంటే ఆభరణాల్లా కొనడానికి ఆసక్తి చూపుతారు.

భారతీయులు బంగారం కొనడం తగ్గించారా...?

బంగారం కొనకూడదన్న తన విజ్ఞప్తి తర్వాత ప్రజలు పసిడిని తక్కువగా కొన్నారని ప్రధాని మోదీ అన్నారు.

అయితే ధనత్రయోదశి ఒక్కరోజున భారత్‌లోని ప్రజలు కొనుగోలు చేసిన బంగారం, వెండి యూరప్ మొత్తం మూడు నెలల్లో కొనేదాంతో సమానమని ఇటీవల బీజేపీ ఎంపీ సుధాన్షు త్రివేది చెప్పారు.

"పెరుగుతున్న ధరల కారణంగా ప్రజలకు ఆభరణాలు అందుబాటులోకి రాకపోవడంతో భారత్‌లో బంగారం డిమాండ్ తగ్గింది. ఆభరణాలు, బంగారు కడ్డీలు, నాణేల మొత్తం డిమాండ్ 2022లో 774 టన్నులు, 2023లో 761 టన్నులు, 2024లో 803 టన్నులుగా ఉంది. అయితే 2025లో ఇది 11 శాతం తగ్గి 711 టన్నులకు పడిపోయింది" అని అజయ్ శ్రీవాస్తవ చెప్పారు.

అంటే పెరుగుతున్న ధరల కారణంగా ప్రధాని మోదీ విజ్ఞప్తి చేయడానికంటే ముందే ప్రజలు కొనుగోళ్లను తగ్గించుకున్నారు లేదా ఖరీదైన బంగారాన్ని కొనడం వారికి సాధ్యంకాలేదు.

"2025సంవత్సరంలో బంగారు ఆభరణాల డిమాండ్‌ 24 శాతం తగ్గింది. 2026లో కూడా ఇది కొనసాగింది. మొదటి తొమ్మిది నెలల్లో అంటే 2026 సెప్టెంబర్ వరకు ఆభరణాల డిమాండ్ 18 శాతం పడిపోయింది" అని అజయ్ శ్రీవాస్తవ చెప్పారు.

పండుగల సమయంలో జరిగిన కొనుగోళ్ల లెక్కలను ఇందులో చేర్చనప్పటికీ గత ఏడాదితో పోలిస్తే తగ్గుదల తక్కువగా ఉంది.

పండుగల కొనుగోళ్లను కూడా కలిపితే బంగారు ఆభరణాల కొనుగోళ్ల గణాంకాలు సహజంగానే పెరుగుతాయి. ఎందుకంటే భారత్‌లో ధనత్రయోదశి, దీపావళి సమయంలో ప్రజలు బంగారం, వెండి పెద్ద మొత్తంలో కొనుగోలు చేస్తారు.

అలాగే రాబోయే వారాల్లో పెళ్లిళ్ల సీజన్ కారణంగా భారత్‌లో బంగారు ఆభరణాల కొనుగోళ్లు పెరిగే అవకాశం ఉంది. 2024 డిసెంబర్‌తో పోలిస్తే ప్రస్తుతం బంగారం ధరలు సుమారు 34 శాతం ఎక్కువగానే ఉన్నాయి.

"భారత్‌లో ప్రజలు బంగారం కొనడాన్ని తగ్గించుకోలేదు. బంగారంపై ప్రజల ప్రేమ ఇప్పటికీ అలాగే ఉంది.

బంగారం ధర తగ్గే కొద్దీ దాని కొనుగోలు పరిమాణం పెరుగుతుంది. ధర ఎక్కువగా ఉన్నప్పుడు కూడా ప్రజలు బంగారం కొంటారు. కానీ తక్కువ బరువున్న ఆభరణాలు లేదా తక్కువ పరిమాణంలో బంగారాన్ని కొనుగోలు చేస్తారు'' అని వేద్‌ జైన్ చెప్పారు.

బంగారం, మోదీ, సికింద్రాబాద్, విదేశీ మారక ద్రవ్యం, భారత్, అమెరికా, డాలర్
ఫొటో క్యాప్షన్, ధరలు పెరగడం వల్లే బంగారం కొనుగోళ్లు పడిపోయాయని నిపుణులంటున్నారు.

‘డాలర్, రూపాయి విలువ సమానం చేస్తానన్న హామీ సంగతేంటి?

"ఈ దేశంలో ఏదైనా ఘనతను తన ఖాతాలో వేసుకోవడంలో ఆయన అందరికంటే ముందుంటారు.. ఇదంతా మార్కెట్‌లో జరిగే పరిణామం. మార్కెట్ పనిచేసే విధానం. మీ వద్ద డాలర్లు మిగలడం లేదనే కారణంతోనే కదా మీరు బంగారం కొనొద్దని విజ్ఞప్తి చేశారు" అని మోదీ వ్యాఖ్యలపై కాంగ్రెస్ నేత భూపేంద్ర గుప్తా స్పందించారు.

"మోదీ... బంగారం ధరలు అంతర్జాతీయంగా నిర్ణయమవుతాయి. ఒక దేశాన్ని బట్టి వాటి ధరలుండవు. మరి మీ విజ్ఞప్తి తర్వాత ప్రపంచమంతా బంగారం కొనడం ఆపేసిందా?" అని కాంగ్రెస్ నేత, యూత్ కాంగ్రెస్ మాజీ అధ్యక్షుడు శ్రీనివాస్ బీవీ 'ఎక్స్'లో పోస్ట్ చేశారు.

"బంగారం కొనని వాళ్లు ఇప్పుడు సంబరాలు చేసుకుంటున్నారు. కొందరైతే మోదీకి ధన్యవాదాలు కూడా చెబుతున్నారు. బంగారంలో పెట్టుబడి దీర్ఘకాలికమైనది. ఈరోజు ధర తగ్గితే రేపు దాని ధర పెరుగుతుంది. అంతకంటే ఎక్కువ కూడా ధరలు పెరగొచ్చు" అని జాకీ యాదవ్ అనే యూజర్ రాశారు.

"మోదీ... మీరు డాలర్, రూపాయిలను సమానం చేస్తానని చెప్పిన మాట సంగతేంటి?'' అని జ్యోత్స్నా యాదవ్ అనే యూజర్ ప్రశ్నించారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)