కళ్లలోకి కళ్లు పెట్టి చూసిన ఆ తిమింగలం కొన్ని రోజుల్లోనే కన్నుమూసింది.. కానీ దాని మరణం ఒక చరిత్ర సృష్టించింది

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, చిన్న తిమింగలం కంటిని దగ్గరగా తీసిన ఫోటో
    • రచయిత, కేథరిన్ లాథమ్
  • ప్రచురణ
  • చదివే సమయం: 8 నిమిషాలు

హంప్‌బ్యాక్ జాతికి చెందిన ఒక చిన్న తిమింగలం కంటిని ఫొటోగ్రాఫర్ రేచల్ మూర్ అత్యంత దగ్గరగా ఫొటో తీశారు. ఆ ఫొటోలో ఆ తిమింగలం కన్ను ఎంతో అందంగా కనిపిస్తోంది. స్వీట్ గర్ల్ అనే ఆ తిమింగలం కొన్ని రోజుల తర్వాత ఓ పడవ ఢీకొనడంతో చనిపోయింది. కానీ దాని కథ అక్కడితో ముగియలేదు.

ఇది ఒక అసాధారణమైన ఫోటో. ఒక ఫొటోగ్రాఫర్, ఆసక్తిగా చూస్తున్న ఒక చిన్న తిమింగలం ఒకరి కళ్లలోకి మరొకరు చూసుకుంటున్నట్టుగా ఆ ఫోటోలో ఉంది.

ఫ్రెంచ్ పాలినేషియాలో తిమింగళాల సీజన్ సమయంలో ఫొటోగ్రాఫర్ రేచల్ మూర్ 2024లో ఈ చిత్రాన్ని తీశారు. ఆమె తొలిసారి ఈ ఫొటోను సోషల్ మీడియాలో షేర్ చేసిన వెంటనే అది వైరల్ అయింది.

ఆ తర్వాత విషాదకర సంఘటన జరిగింది. మూర్ ఆ తిమింగలానికి 'స్వీట్ గర్ల్' అని పేరు పెట్టారు. వేగంగా వెళ్తున్న ఓ ఓడను ఢీకొనడంతో అది చనిపోయింది. దాని మరణంపై ప్రపంచవ్యాప్తంగా సానుభూతి వ్యక్తమయింది. అంతేకాదు తిమింగలాలకు మరింత రక్షణ కల్పించే చర్యలు తీసుకోవడానికి కారణమైంది.

హెచ్చరిక: ఈ కథనంలో కలవరపరిచే వివరాలున్నాయి.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

మూరియా అనే అగ్నిపర్వత ద్వీపం చుట్టూ ఉన్న ఆహ్లాదరకరమైన సముద్ర జలాల్లో 2024 అక్టోబర్‌లో మూర్ డైవింగ్ చేస్తున్నారు. అగ్నిపర్వతం కారణంగా ఏర్పడ్డ ఎత్తుపల్లాలతో ఈ తీర ప్రాంతం ఉంటుంది.

వేసవికాలంలో హంప్‌బ్యాక్ తిమింగలాలు సంభోగం చేయడానికి, పిల్లలకు జన్మనివ్వడానికి, వాటిని పెంచడానికి ఇక్కడకు వస్తాయి.

స్వీట్ గర్ల్‌తో రెండు రోజుల పాటు కలిసి గడిపే అవకాశం ఫొటోగ్రాఫర్‌కు లభించింది.

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, చిన్న తిమింగలంతో రాచెల్ మూర్ రెండు రోజులు గడిపారు.

‘నాకు దగ్గరగా వచ్చి నన్ను గమనించేది’

మొదటి రోజు జరిగిన విషయాన్ని మూర్ గుర్తుచేసుకున్నారు.

నేను నీళ్లలోకి దిగగానే వెంటనే ఆ తిమింగలం నా దగ్గరకు వచ్చింది. అది కూడా చాలా వేగంగా వచ్చింది. సముద్రంలో అంత పెద్ద జీవిని చూసి భయపడి నేను దాని నుంచి దూరంగా ఈదుతూ దాదాపు గంటసేపు గడిపాను. వన్యప్రాణుల ఫొటోగ్రాఫర్‌గా నేను పూర్తిగా విఫలమయ్యాను. కానీ అది నా జీవితంలో ఇదో మరపురాని అనుభవం'' అని మూర్ అన్నారు.

"తిమింగలాలు సాధారణంగా చాలా ప్రశాంతంగా ఉంటాయి. మనుషులకు హాని చేయాలనే ఉద్దేశం వాటికి ఉండదు. కానీ అవి చాలా పెద్ద జీవులు. వాటి రెక్కలు, తోకల పరిమాణం, బరువు కారణంగా వాటికి అపారమైన శక్తి ఉంటుంది. వాటికి తెలియకుండానే ప్రమాదవశాత్తు ఒక వ్యక్తిని గాయపరచగలవు. అందుకే వాటితో కలిసి నీళ్లలోకి దిగినప్పుడు ఎప్పుడూ ప్రమాదం పొంచి ఉంటుంది" అని ఆమె చెప్పారు.

చివరకు మూర్ భయం తగ్గించుకుని ఆ తిమింగలం తన దగ్గరకు రావడానికి అనుమతించారు.

"కొంతసేపటి తర్వాత ఒక విషయం గమనించాను. ప్రతిసారీ అది నా దగ్గరకు వచ్చినప్పుడు తన ఛాతీ వైపు ఉండే రెక్కలను శరీరానికి దగ్గరగా ముడుచుకునేది. నేను ఎక్కడ ఉన్నానో ఎప్పుడూ గమనిస్తూ ఉండేది. చాలా నియంత్రణతో, జాగ్రత్తగా ప్రవర్తించేది. కొన్ని సందర్భాల్లో మేమిద్దరం ఒకరినొకరు తాకకుండా ఉండగలిగినంత దగ్గరగా ఉన్నాం" అని ఆమె చెప్పారు.

స్వీట్ గర్ల్‌తో దాదాపు 10 నిమిషాల పాటు కళ్లలోకి కళ్లు పెట్టి చూస్తూ మూర్ గడిపారు. కానీ ఒక్క ఫొటో కూడా తీయలేదు.

మరుసటి రోజు మూర్ మళ్లీ అక్కడికి వెళ్లారు. రెండోసారి కూడా ఆ తిమింగలాన్ని చూసే అదృష్టం ఆమెకు దక్కింది.

"మేము దగ్గరగా ఉన్నప్పుడు స్వీట్ గర్ల్ మృదువైన శబ్దాలు చేసింది" అని ఆమె చెప్పారు.

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, మూర్ దగ్గరకు వచ్చినప్పుడు తిమింగలం చిన్న చిన్న శబ్దాలు చేసేది.

తిమింగలం కంటిపై వెలుతురు పడిన ఫోటో

ఈసారి మూర్ తన కెమెరాను పైకెత్తి తిమింగలం కంటిపై ఫోకస్ చేశారు. ఆ చిన్న తిమింగలం మనిషిని చూడటానికి తన శరీరాన్ని ఒక పక్కకు తిప్పింది. మొదట ఒక కంటితో, ఆ తర్వాత మరో కంటితో మూర్‌ను చూసింది.

"ఆ సమయంలోనే దాని కంటిపై వెలుతురు పడుతున్న ఈ చిత్రాన్ని నేను తీశాను" అని మూర్ చెప్పారు.

ఈ ఘటన జరిగిన కొద్దిసేపటికే తుపాను వచ్చింది. అలలు ఎగసిపడటం ప్రారంభించాయి. "ఆ తర్వాత అది మా నుంచి దూరంగా తాహితీ వైపు వెళ్లిపోయింది" అని మూర్ తెలిపారు.

ఇది జరిగిన నాలుగు రోజుల తర్వాత వేగంగా వెళ్తున్న ప్రయాణికుల ఫెర్రీ బలంగా ఢీకొట్టడంతో స్వీట్ గర్ల్ తీరానికి దగ్గరగా తీవ్ర గాయాలతో కనిపించిందని మూర్‌కు సమాచారం అందింది.

"దాని కింది దవడ పూర్తిగా విరిగిపోయింది. పై దవడ చీలిపోయింది. శ్వాస తీసుకునే రంధ్రం కూడా దెబ్బతింది" అది నెమ్మదిగా నీటిలో మునిగి చనిపోతోంది" అని మూర్ చెప్పారు.

స్వీట్ గర్ల్ గంటల తరబడి నరకయాతన అనుభవించింది. దాని రక్తానికి ఆకర్షితమైన టైగర్ షార్కులు దానిపై దాడి చేశాయి. చివరకు గాయాల తీవ్రతను తట్టుకోలేక అది మరణించింది.

"ఆ విషయం తెలిసిన తర్వాత నా హృదయం అంతులేని ఆవేదనతో నిండిపోయింది. నిజం చెప్పాలంటే ఆ రోజు సముద్రమే దాని మరణానికి దుఃఖిస్తున్నట్లు అనిపించింది" అని మూర్ అన్నారు.

సీ షెపర్డ్ అనే స్వచ్ఛంద సంస్థ ఆ తిమింగలం బాధను చూపించే హృదయవిదారకమైన వీడియోను పంచుకుంది. అందులో ఆ చిన్న తిమింగలం బాధతో అరుస్తున్న శబ్దాలు వినిపిస్తున్నాయి.

"దాని మరణం గురించి తెలిసిన వెంటనే ఈ ఫొటోను మరింత పెద్ద ప్రయోజనం కోసం ఉపయోగించాలని నాకు అనిపించింది. ఈ సమస్యపై అందరి దృష్టిని ఆకర్షించి మార్పు కోసం ప్రయత్నించాలని నిర్ణయించుకున్నాను" అని మూర్ చెప్పారు.

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, నౌక ఢీకొనడంతో తిమింగలం చనిపోయింది.

రోడ్డు ప్రమాద బాధితుల్లా సముద్రంలో తిమింగలాలు

ఇలా మరణించింది స్వీట్ గర్ల్ ఒక్కటే కాదు. ప్రపంచవ్యాప్తంగా ఏటా 20 వేలకుపైగా తిమింగళాలు నౌకలు ఢీకొనడం వల్ల చనిపోతున్నాయని నివేదికలు చెబుతున్నాయి. అయితే వాస్తవ సంఖ్య దీనికంటే చాలా ఎక్కువగా ఉండవచ్చని వన్యప్రాణుల సంరక్షణ సంస్థ ఇంటర్నేషనల్ ఫండ్ ఫర్ యానిమల్ వెల్ఫేర్ (ఐఎఫ్ఏడబ్ల్యు) శాస్త్రీయ సలహాదారు రస్సెల్ లీపర్ చెబుతున్నారు.

"నౌకలు ఢీకొనడం వల్ల ఎన్ని తిమింగలాలు చనిపోతున్నాయనే దానిపై కచ్చితమైన లెక్కలు మన దగ్గర లేవు. ఎందుకంటే చాలా ఘటనలు ఎవరికీ తెలియకుండానే జరిగిపోతాయి. వాటి గురించి ఎలాంటి నివేదికలుండవు" అని లీపర్ చెప్పారు.

ఒక పెద్ద నౌక తిమింగలాన్ని ఢీకొన్నా ఆ విషయం నౌకలోని సిబ్బందికి తెలియకపోవచ్చని ఆయన వివరించారు.

ఎవరైనా ఆ ఘటనను ప్రత్యక్షంగా చూసినప్పుడు లేదా తిమింగలం మృతదేహం ఒడ్డుకు కొట్టుకొచ్చినప్పుడు మాత్రమే ఇలాంటి ఘటనలు నమోదు అవుతాయి.

"నౌకలు ఢీకొట్టే ప్రమాద ఘటనల్లో ఇవి చిన్న భాగం మాత్రమే" అని ఆయన చెప్పారు.

తిమింగలాలకు ఎదురవుతున్న నాలుగు ప్రధాన ప్రమాదాల్లో నౌకలు ఢీకొనడం కూడా ఒకటని లీపర్ చెప్పారు. మిగతా మూడు ముప్పులు వలల్లో చిక్కుకోవడం, తాళ్లలో ఇరుక్కోవడం, సముద్ర అడుగున శబ్ద కాలుష్యం.

శబ్ద కాలుష్యం సాధారణంగా తిమింగలాల్లో దీర్ఘకాలిక ఒత్తిడికి కారణమవుతుందని రస్సెల్ లీపర్ చెప్పారు. అదే సమయంలో వలల్లో చిక్కుకోవడం, నౌకలు ఢీకొనడం వంటి వాటివల్ల మరణిస్తుంటాయి.

"ఈ ఘటనల్లో తిమింగలాలకు తీవ్రమైన గాయాలు కావచ్చు. కొన్ని సందర్భాల్లో అవి వెంటనే చనిపోతాయి. మరికొన్ని సందర్భాల్లో గాయాల కారణంగా కొన్ని వారాలు లేదా నెలల తర్వాత మరణిస్తాయి" అని ఆయన చెప్పారు.

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, నౌక ఢీకొట్టిన జీవులు సముద్రం అడుగు భాగానికి వెళ్లిపోతాయి.

తిమింగలాన్ని నౌక ఢీకొట్టిన సంగతి కూడా తెలియదు

తిమింగలం మృతదేహం సముద్ర తీరం మీదకు కొట్టుకొచ్చినప్పుడు దానికి గాయాలైనట్టు స్పష్టమైన ఆధారాలు కనిపించకపోవచ్చని లీపర్ చెబుతున్నారు.

అయితే తిమింగలం మృతదేహానికి పోస్టుమార్టం నిర్వహించినప్పుడు మాత్రమే నౌక ఢీకొట్టడం వల్ల ఏర్పడిన గాయాలు బయటపడతాయి.

"దాని శరీరంలోని అంతర్గత అవయవాలన్నీ నలిగిపోతాయి. ఎముకలు విరిగిపోతాయి. ఇలా బయటకు కనిపించని తీవ్రమైన దెబ్బలు తగులుతాయి" అని ఆయన వివరించారు.

ఇది బయటకు కనిపించని పెద్ద సమస్య అని బ్రిటిష్ అంటార్కిటిక్ సర్వే పరిశోధకురాలు జెన్నిఫర్ జాక్సన్ చెప్పారు.

"మనం కార్లలో ప్రయాణిస్తున్నప్పుడు రోడ్లపై వాహనాలు ఢీకొని చనిపోయిన జంతువులను చూడగలుగుతాం. కానీ సముద్రంలో అలా చూడలేం. మనం ఢీకొట్టిన జీవులు సముద్రం అడుగు భాగానికి వెళ్లిపోతాయి" అని ఆమె చెప్పారు.

తీవ్రంగా గాయపడిన తిమింగలాలు విరిగిన పక్కటెముకలు, అంతర్గత గాయాలతో ఈదుతూ ఉంటాయని ఆమె చెప్పారు. కొన్నిసార్లు అవి నెమ్మదిగా తీవ్రమైన బాధతో మరణిస్తాయి. ఇదంతా ఎవరూ చూడరు.

"ఒకవేళ ఆ జంతువు వెంటనే చనిపోకపోయినా, నౌకలు ఢీకొనడం వల్ల కలిగే దీర్ఘకాలిక ప్రభావాలు చాలా తీవ్రంగా ఉంటాయి" అని ఆమె అన్నారు.

నౌకల రాకపోకలు ఎక్కువగా ఉండటంతో పాటు తిమింగలాలు కూడా అధిక సంఖ్యలో ఉండే ప్రాంతాల్లో ఈ ప్రమాదాలు ఎక్కువగా ఉంటాయి.

హంప్‌బ్యాక్, బ్లూ వేల్, ఫిన్ వేల్, స్పెర్మ్ వేల్ అనే నాలుగు రకాల తిమింగలాల జాతులపై చేసిన ఓ అధ్యయనంలో జాక్సన్, ఆమె సహచరులు వాటి సాంద్రతను పరిశీలించారు. ఆ వివరాలను నౌకల రాకపోకల సాంద్రతతో పోల్చి చూశారు.

ప్రపంచవ్యాప్తంగా నౌకల రాకపోకలు ఎక్కువగా ఉండే ప్రాంతాల్లో 92 శాతం ప్రాంతాలు తిమింగలాలు నివసించే చోట ఉన్నాయని వారు గుర్తించారు.

"ప్రపంచవ్యాప్తంగా ఇలాంటి ప్రమాదకర ప్రాంతాల్లో ఏడు శాతం కంటే తక్కువ ప్రాంతాలకే ఏదో ఒక రూపంలో రక్షణ కల్పించారు లేదా నియంత్రణలు అమలు చేస్తున్నారు" అని జాక్సన్ చెప్పారు.

అయితే సముద్ర ఉపరితలంలో అదనంగా కేవలం 2.6 శాతం ప్రాంతానికి రక్షణ కల్పించినా నౌకలు ఢీకొనే ప్రమాదం అత్యధికంగా ఉన్న అన్ని ప్రాంతాలనూ కవర్ చేయవచ్చని ఆమె చెప్పారు.

Whale
ఫొటో క్యాప్షన్, నౌకల వేగం తగ్గిస్తే తిమింగలాలకు ప్రమాదం తగ్గుతుంది.

వేగాన్ని తగ్గిస్తే శబ్దాన్ని విని ప్రమాదం బారిన పడకుండా తప్పించుకునే అవకాశం

"ప్రమాదాన్ని తగ్గించడానికి ఉత్తమమైన మార్గం నౌకలు, తిమింగలాలు ఒకదానికొకటి దూరంగా ఉండేలా చూడటమే" అని లీపర్ అంటున్నారు.

అలా చేయడం సాధ్యం కాని ప్రాంతాల్లో నౌకల వేగాన్ని తగ్గించడం వల్ల ప్రమాదాలు గణనీయంగా తగ్గుతాయని చెప్పారు.

"నౌక ఎంత వేగంగా వెళ్తే ప్రమాదం అంత ఎక్కువగా ఉంటుంది. నౌకల వేగాన్ని 10 నాట్స్ లేదా అంతకంటే తక్కువకు తగ్గిస్తే ఢీకొనే ప్రమాదం గణనీయంగా తగ్గుతుందని మేం భావిస్తున్నాం" అని ఆయన చెప్పారు.

దీనికి శాస్త్రీయ ఆధారాలు కూడా ఉన్నాయి.

న్యూజీలాండ్‌లోని హౌరాకి గల్ఫ్‌ ప్రాంతంలో నౌకల వేగాన్ని 25 శాతం తగ్గించి గంటకు దాదాపు 10 నాట్స్‌కు పరిమితం చేశారు. దీంతో రెండేళ్లలో బ్రైడ్స్ తిమింగలాలు నౌకల వల్ల ప్రాణాంతక ప్రమాదాలను ఎదుర్కోవడం దాదాపు సగానికి తగ్గింది.

"ఇది బహుశా ఈ విషయంలో సాధించిన అతిపెద్ద విజయాల్లో ఒకటి" అని లీపర్ చెప్పారు.

1996 నుంచి 2014 మధ్య హౌరాకి గల్ఫ్‌లో నౌకలు ఢీకొనడం వల్ల ప్రతి సంవత్సరం సగటున రెండు బ్రైడ్స్ తిమింగలాలు చనిపోయినట్టు అంచనా.

అయితే స్వచ్ఛందంగా నౌకల వేగ పరిమితిని అమలు చేసిన తర్వాత నౌకలు ఢీకొనడం వల్ల ఒక్క తిమింగలం కూడా చనిపోయినట్టు సమాచారం లేదు.

నౌకల వేగాన్ని ఇలా తగ్గించడం వల్ల నౌకలు వస్తున్న శబ్దాన్ని తిమింగలాలు ముందుగానే వినగలుగుతాయని లీపర్ చెప్పారు. దీంతో తప్పించుకోవడానికి వాటికి ఎక్కువ సమయం లభిస్తుంది. ఒకవేళ నౌక ఢీకొన్నా తిమింగలం మరణించే ప్రమాదం తగ్గుతుంది.

"నౌకలు ఎక్కువగా తిరిగే ప్రాంతాల్లో జీవించే తిమింగలాలు, నౌకలకు చాలా దగ్గరగా వెళ్లడం అలవాటు చేసుకుంటాయి. అందువల్ల చివరి క్షణంలో మాత్రమే అవి స్పందిస్తాయి. అలాంటి పరిస్థితుల్లో నౌక వేగం చాలా కీలక పాత్ర పోషిస్తుంది" అని ఆయన చెప్పారు.

అయితే ఇది సంక్లిష్టమైన సమస్య అని లీపర్ అంటున్నారు.

రవాణా, నౌకలు, ప్రకృతి, మహాసముద్రం, తిమింగలం
ఫొటో క్యాప్షన్, ‘స్వీట్ గర్ల్’ మరణం తర్వాత నౌకల వేగానికి సంబంధించిన నిబంధనల్లో మార్పు వచ్చింది.

తిమింగలాల రక్షణ కోసం జాగ్రత్తలు

ప్రపంచవ్యాప్తంగా రవాణా అయ్యే వస్తువుల్లో 80 శాతానికి పైగా నౌకల ద్వారానే రవాణా అవుతాయి. నౌకల వేగాన్ని తగ్గిస్తే, వాటి ప్రయాణ సమయం పెరుగుతుంది. సరుకులు గమ్యస్థానాలకు చేరుకోవడానికి కూడా ఎక్కువ సమయం పడుతుంది.

"సరుకులను నిర్ణీత సమయంలో చేరవేయడం, నౌకల నిర్వహణకు సంబంధించిన పరిమితులే ప్రధాన అడ్డంకులు" అని ఆయన చెప్పారు.

అయితే నౌకల వేగాన్ని తగ్గించడం వల్ల మరికొన్ని ప్రయోజనాలు కూడా ఉన్నాయని ఆయన తెలిపారు.

నౌకల వేగం తగ్గిస్తే, వాటి నుంచి వెలువడే కాలుష్య వాయువుల ఉద్గారాలు తగ్గుతాయి. అలాగే సముద్రంలో శబ్ద కాలుష్యం కూడా తగ్గుతుంది.

ఇటీవలి సంవత్సరాల్లో నౌకాయాన రంగంలో మార్పులు తీసుకురావాలనే నిజమైన ఆసక్తి కనిపిస్తోందని లీపర్ చెప్పారు.

"కొన్ని కంపెనీలు మా దగ్గరకు వచ్చి, 'మేమేం చేయాలో చెప్పండి. మీరు చెప్పినట్టు చేస్తాం' అని అడుగుతున్నాయి" అని ఆయన తెలిపారు.

స్వీట్ గర్ల్ విషాద మరణం ప్రజల్లో తీవ్ర ఆగ్రహాన్ని కలిగించింది. ప్రపంచవ్యాప్తంగా అందరి దృష్టిని ఆకర్షించింది.

ఆ తర్వాత కొద్దికాలానికే స్వీట్ గర్ల్ ఫొటోతో మూర్ ఒక ఆన్‌లైన్ పిటిషన్ ప్రారంభించారు. తిమింగలాలు వలస వచ్చే సమయంలో పడవల వేగాన్ని పరిమితం చేయాలని ఫ్రెంచ్ పాలినేషియా ప్రభుత్వాన్ని ఆమె కోరారు.

"భూమిపై పాఠశాలలు, నిర్మాణ పనులు జరిగే ప్రాంతాల దగ్గర మనుషుల రక్షణ కోసం వాహనాల వేగాన్ని తగ్గించే జోన్లు ఏర్పాటు చేస్తాం. మరి ప్రమాదకర ప్రాంతాల్లో తిమింగలాలకోసం కూడా అలాంటి నిబంధనలు ఎందుకు ఉండకూడదు?" అని మూర్ ప్రశ్నించారు.

"ఫెర్రీలు తమ ప్రయాణ మార్గం మొత్తం వేగాన్ని తగ్గించాలని మేము అడగలేదు. తాహితీ, మూరియా ద్వీపాల మధ్య చాలామంది స్థానికులు ప్రతిరోజూ పని కోసం లేదా చదువుల కోసం ప్రయాణిస్తుంటారు. తిమింగలాలు ఎక్కువగా గుమిగూడే, విశ్రాంతి తీసుకునే ప్రాంతాల్లో మాత్రమే నౌకల వేగాన్ని తగ్గించాలని మేము కోరాం" అని ఆమె చెప్పారు.

ఈ ప్రచారానికి మద్దతు తెలుపుతూ దాదాపు 50 వేల మంది సంతకాలు చేశారు.

దీంతో 2025లో నౌకల వేగ నియంత్రణకు కొత్త నిబంధనలు ప్రవేశపెట్టారు. తిమింగలాలు వలస వచ్చే కాలంలో ద్వీపాలకు ఒక నాటికల్ మైలు పరిధిలో 40 అడుగులు కంటే ఎక్కువ పొడవున్న పెద్ద నౌకలు తమ వేగాన్ని 10 నుంచి 12 నాట్స్‌ వేగంతో మాత్రమే ప్రయాణించాలని ఈ నిబంధనలు చెబుతున్నాయి.

"ఒక ఏడాది పాటు చేసిన ప్రయత్నాల తర్వాత ప్రభుత్వం కఠినమైన వేగ నియంత్రణ నిబంధనలు ఆమోదించింది" అని మూర్ చెప్పారు.

"ఇది విధానపరంగా సాధించిన గొప్ప విజయం. ఫొటోలు, కథలు కూడా వాస్తవ ప్రపంచంలో మార్పు తీసుకురాగలవని ఇది నిరూపించింది" అని ఆమె అన్నారు.

2025లో ఈ ఫొటోకు గాను ఐక్యరాజ్యసమితి ప్రపంచ మహాసముద్ర దినోత్సవ ఫొటోగ్రఫీ పోటీలో మూర్ విజేతగా నిలిచారు.

"ఈ జీవుల అందం, తెలివితేటలు, వాటి ప్రత్యేక స్వభావాన్ని చూపిస్తే వాటిని రక్షించాలనే ఆసక్తి, శ్రద్ధ ప్రజల్లో మరింత పెరుగుతుందని నేను గ్రహించాను" అని మూర్ చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)