‘అందుకే హిప్పో కడుపు నుంచి టోపీ తీయలేకపోయాం’

ఫొటో సోర్స్, Cincinnati Zoo & Botanical Garden
- రచయిత, సరీన్ హబేషియన్
- హోదా, బీబీసీ ప్రతినిధి
- ప్రచురణ
- చదివే సమయం: 3 నిమిషాలు
ఒహియోలోని సిన్సినాటి జూలో కిందపడిన టోపీని మింగి చికిత్స పొందుతున్న హిప్పోపొటమస్ ఫియోనా మరణానికి కారణం, దాని పేగుల్లో ఇరుక్కుపోయిన టోపీని బయటకు తీయడం అసాధ్యంగా మారడమేనని జూ యాజమాన్యం తెలిపింది.
దాదాపు రెండు వారాల కిందట హిప్పో ఉన్నచోటుకు వచ్చిపడిన ఒక టోపీని అది మింగేసింది. అప్పటి నుంచి పశువైద్యులు ఫియోనాను కాపాడేందుకు ప్రయత్నించారు.
అయితే, 1,088 కిలోల బరువున్న ఆ జంతువు శరీర నిర్మాణం కారణంగా దాన్ని కడుపులో చిక్కుకుపోయిన టోపిని బయటకు తీయడం సాధ్యం కాలేదు. దీంతో గురువారం ఫియోనా మరణించింది.
జంతువులకు చేసే శవపరీక్ష (నెక్రాప్సీ)లో టోపీ ఎక్కడ ఉందో గుర్తించారు. అది కడుపులోని చివరి భాగం నుంచి 25 అడుగుల దూరంలో, పేగుల చివరి భాగానికి 50 అడుగుల దూరంలో ఉన్నట్లు జూ శుక్రవారం వెల్లడించింది.
2017లో నెలలు నిండకముందే జన్మించిన ఫియోనా.. ఆ తర్వాత సోషల్ మీడియాలో స్టార్గా మారింది. హిప్పో కోలుకోవాలని ప్రపంచవ్యాప్తంగా జంతు ప్రేమికులు ఆకాంక్షించారు. ఎండోస్కోపీ పరీక్షల ద్వారా కూడా టోపీని చేరుకోలేకపోయామని సిన్సినాటి జూ జంతు ఆరోగ్య విభాగం డైరెక్టర్ డాక్టర్ మైక్ వెన్నింగర్ ఒక ప్రకటనలో తెలిపారు.
" ఫియోనా శరీర నిర్మాణం కారణంగా ల్యాపరోస్కోపీ ద్వారా టోపీని తొలగించడం అసాధ్యమైంది. సహాయక చికిత్స తప్ప మరో మార్గం లేదు. అయితే, ఆ చికిత్సతోనూ ఫలితం ఉండేది కాదని శవపరీక్షలో నిర్ధరణ అయింది" అని వెన్నింగర్ చెప్పారు.


ఫొటో సోర్స్, Cincinnati Zoo
అసలేం జరిగింది?
ఫియోనా పేరున్న హిప్పోపొటామస్ జీవిస్తున్న ప్రాంతంలోకి ఓ సందర్శకుడు పొరపాటున ఉన్ని టోపీని విసిరేయడంతో ఈ ఘటన జరిగిందని జూ ప్రతినిధి మిషెల్ కర్లీ అంతకుముందు తెలిపారు.
సందర్శకుడు టోపీని గాలిలోకి విసరగా, అది పైకప్పుకు ఉన్న ఫ్యాన్కు తగిలింది. ఫ్యాన్ వేగంగా తిరగడంతో టోపీ ఎగిరి ఓ చిన్న సందు గుండా ఫియోనాను సంరక్షిస్తున్న ప్రాంతంలోకి వెళ్లి పడిందని ఆమె వివరించారు.
ఈ టోపిని ఫియోనా మింగేసింది. మొదట్లో ఫియోనాలో ఎలాంటి అనారోగ్య లక్షణాలు కనిపించలేదు. అయితే, కొన్నిరోజుల తర్వాత ఆహారం తీసుకోవడం తగ్గించింది. టోపీ జీర్ణవ్యవస్థ నుంచి బయటకు వెళ్లేలా ఫియోనాకు ఆహారం తినిపించడానికి జూ సిబ్బంది ప్రయత్నించారు. కానీ, ఆ ప్రయత్నాలు ఫలించలేదు.
ఫియోనా మరణం తర్వాత మిగతా హిప్పోలు బీబీ, టక్కర్, ఫ్రిట్జ్లు సాధారణంగానే ఆహారం తీసుకుంటున్నాయని, వాటి ప్రవర్తనలో ఎలాంటి మార్పు కనిపించడం లేదని జూ జంతు సంరక్షణ విభాగం డైరెక్టర్ క్రిస్టినా గోర్షుక్ శుక్రవారం తెలిపారు.
"వాటి మనసులో ఏముందో చెప్పడం కష్టం. కానీ అవి మామూలుగానే కనిపిస్తున్నాయి" అని ఆమె అన్నారు.
"మా ప్రాంతం నుంచి, ఇతర ప్రాంతాల నుంచి కూడా ఎంతో ప్రేమాభిమానాలు అందాయి" అని సిన్సినాటి జూ డైరెక్టర్ డేవ్ జెనికే చెప్పారు.
"గత రాత్రి ఫియోనా గౌరవార్థం స్టేడియాలు, వంతెనలు, భవనాలను ఊదా రంగు కాంతులతో అలంకరించడం చూసి ఎంతో భావోద్వేగానికి గురయ్యాం" అని ఆయన తెలిపారు.
అమెరికా సెనేట్ కూడా శుక్రవారం ఫియోనా గౌరవార్థం ఒక తీర్మానాన్ని ఆమోదించింది.
సిన్సినాటి జూలో 2017లో నెలలు నిండకముందే జన్మించినప్పుడు ఫియోనా తొలిసారి వార్తల్లో నిలిచింది. అప్పట్లో హిప్పో ప్రాణాలతో ఉండేందుకు తీవ్రంగా పోరాడింది. పుట్టినప్పుడు దాని బరువు కేవలం 13 కిలోలు మాత్రమే. ఆ జాతి జంతువుల్లో అప్పటివరకు నమోదైన అత్యల్ప జనన బరువులో ఇది దాదాపు సగం మాత్రమేనని జూ తెలిపింది.
"ప్రపంచవ్యాప్తంగా మాకు అందుతున్న మద్దతు చూస్తుంటే, ఫియోనా ప్రాణాలతో ఉండాలని అందరూ కలిసి ఆకాంక్షించిన రోజులు గుర్తుకొస్తున్నాయి. అప్పట్లో అది బతికింది. దాదాపు పదేళ్ల పాటు మాకు చిరునవ్వులు పంచింది" అని జెనికే చెప్పారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)






























