టాక్సిక్: యశ్‌కు మరో కేజీఎఫ్ పడిందా?

    • రచయిత, జీఆర్ మ‌హ‌ర్షి
    • హోదా, బీబీసీ కోసం
  • ప్రచురణ
  • చదివే సమయం: 3 నిమిషాలు

కేజీఎఫ్ త‌ర్వాత చాలా గ్యాప్‌తో య‌శ్ హీరోగా టాక్సిక్ థియేట‌ర్‌లోకి వ‌చ్చింది. ఎ ఫెయిరీటేల్ ఫ‌ర్ గ్రోన్ అఫ్స్ దీనికి ట్యాగ్‌లైన్‌. య‌శ్‌కు జోడీగా కియారా అద్వానీ , రుక్మిణీ వ‌సంత్ న‌టించారు. గీతూ మోహ‌న్‌దాస్ ద‌ర్శ‌క‌త్వం వ‌హించిన టాక్సిక్ పైన భారీ అంచ‌నాలున్నాయి. మ‌రి అందుకుందా?

క‌థ ఏమంటే రాయ(య‌శ్), గంగ (న‌య‌న‌తార‌) అక్కాత‌మ్ముళ్లు. అనాథ‌లుగా క‌ష్టాల మ‌ధ్య పెరుగుతారు. 1947 నాటికి పోర్చుగీస్ పాల‌న‌లో ఉన్న గోవాలో రాయ మాఫియా డాన్‌గా ఎదుగుతాడు.

స‌ర్క‌స్‌లో ప‌నిచేసే నాదియా (కియారా)తో రాయకి ప‌రిచ‌యం ఏర్ప‌డుతుంది. ఇది ఇష్టం లేని మ‌రో డాన్ కూతురు, వాళ్ల‌ని విడ‌దీయ‌డానికి ప్ర‌య‌త్నిస్తుంది.

ఈ నేప‌థ్యంలో గంగ‌కి ఏం జ‌రిగింది? నాదియా కొడుకు త‌ర్వాత రాయ్ జీవితంలో ఎలా ప్ర‌వేశించాడు? ఇది మిగ‌తా క‌థ‌.

రిచ్ ప్రొడ‌క్ష‌న్ వాల్యూస్, భారీ యాక్ష‌న్ స‌న్నివేశాల‌తో నిర్మించిన టాక్సిక్‌లో ఉండాల్సింది లేదు. అది క‌థ‌, స్క్రీన్ ప్లే. దాంతో ఎమోష‌న్ మిస్స‌యింది. ఒక ద‌శ‌లో ఎవ‌రు ఎవ‌రిని చంపుకుంటున్నారో కూడా అర్థంకాదు.

య‌శ్‌ స్టైలిష్ న‌ట‌న‌, బిల్డ‌ప్‌ల‌తో మొద‌టి గంట గ‌డుస్తుంది. కియారా అద్వానీ త‌న‌ని తాను పేల్చుకోవ‌డంతో ప్రారంభ‌మ‌య్యే సినిమాపై ప్రేక్ష‌కుల్లో భారీ అంచ‌నాలు ఏర్ప‌డుతాయి.

త‌ర్వాత ర‌క‌ర‌కాల స‌న్నివేశాలు వ‌స్తూ వుంటాయి. డైలాగ్‌ల కంటే గ‌న్ సౌండ్స్ ఎక్కువ వినిపిస్తూ వుంటాయి. న‌య‌న‌తార లాంటి మంచి న‌టి ఉన్నా, ఆమె పాత్ర‌కి ఒక ఆర్క్ లేదు. మంచి ఎమోష‌న‌ల్ సీన్స్ వుంటాయ‌ని ఆశిస్తాం. కానీ ఆమె కూడా తుపాకి లేదా సిగ‌రెట్ కాలుస్తూ వుంటుంది.

ఇంకో లోపం ఏమంటే విల‌న్ అంటూ ఎవ‌రూ రిజిస్ట‌ర్ కాక‌పోవడంతో అస‌లు హీరోకి ఎవ‌రితో వైర‌మో అర్థంకాదు. ఎవ‌రెవ‌రో ర‌క‌ర‌కాల ఆయుధాల‌తో వ‌స్తూ వుంటారు. హీరో వాళ్ల‌ని కాల్చ‌డం, క‌త్తికో కండ‌గా న‌ర‌క‌డం చేస్తూ వుంటాడు. డ‌మ్మీ తుపాకుల‌కి, ఎర్ర రంగు (ర‌క్తం)కి సుమారుగా బ‌డ్జెట్ అయి వుంటుందంటే అతిశ‌యోక్తి కాదు.

Skip ఎక్కువమంది చదివినవి and continue reading
ఎక్కువమంది చదివినవి

End of ఎక్కువమంది చదివినవి

సినిమాలో ఎమోష‌న్స్‌కి మూల క‌థ‌లో అవ‌కాశం వున్నా ద‌ర్శ‌కురాలు ఆ దారిని ఎంచుకోక కేవ‌లం య‌శ్‌ స్టైలిష్ బిల్డ‌ప్ మీదే ఆధార‌ప‌డ్డారు. అనాథ‌లైన అక్కాత‌మ్ముడి ఎమోష‌న్ గాలికి వ‌దిలేసిన డైరెక్ట‌ర్‌, సెకెండాఫ్‌లో మాత్రం తండ్రీకొడుకుల ఎమోష‌న్‌పై దృష్టి సారించారు.

అప్ప‌టికి స‌మ‌యం మించిపోయింది. రెండు గంట‌ల స్లో క‌థ‌నాన్ని భ‌రించిన ప్రేక్ష‌కులు అల‌సిపోయారు. ఇంకో ప్ర‌త్యేక‌త ఏమంటే అడ‌ల్ట్ సీన్స్ చాలా చోట్ల‌ వున్నాయి. డైలాగ్‌లు కూడా కొన్నిచోట్ల శ్రుతిమించాయి. ఉదాహ‌ర‌ణ‌కి మ‌గ‌వాడి తెలివి అంతా న‌డుం కింద వుంటుంది.

Skip content and continue reading

End of content

కేజిీఎఫ్‌లో ఎంత హింస ఉన్నా , స్క్రీన్ ప్లే వేగం అంత‌ర్లీనంగా ఎమోష‌న్ నిల‌బెట్టాయి. ఆ రేంజ్‌లో ఆశించిన వాళ్ల‌కి టాక్సిక్ నిరాశ మిగిల్చింది. మూడు గంట‌ల 15 నిముషాల నిడివి స‌హ‌నానికి ప‌రీక్ష పెడుతుంది.

ఊర‌ట క‌లిగించేది ఏమంటే య‌శ్‌ న‌ట‌న చాలా చోట్ల బాగుంది. ముఖ్యంగా క్లైమాక్స్‌లో. న‌య‌న‌తార , కియారా , రుక్మిణి ఉన్నంత‌లో స్క్రీన్ ప్ర‌జెన్స్ బాగుంది. కెమెరా, బీజీఎం ఓకే. ఎడిట‌ర్ మాత్రం ప్రేక్ష‌కుణ్ని దెబ్బ‌కొట్టాడు.

ఫెయిరీ టేల్ మాట నిజ‌మే. ఈ సినిమాలో క‌న‌ప‌డే పాత్ర‌లు నిజ జీవితంలో ఎక్క‌డా త‌గ‌ల‌రు. అంద‌రూ గ్ర‌హాంత‌రవాసుల్లా వుంటారు. సినిమాలో ఒక డైలాగ్ వుంది. ఏం జ‌రుగుతుందో ఎవ‌రికైనా అర్థ‌మ‌వుతుందా? ప్రేక్ష‌కుల అభిప్రాయం కూడా చాలా సీన్స్‌లో ఇదే.

ప్ల‌స్ పాయింట్స్:

1.య‌శ్‌ న‌ట‌న‌

2.భారీ యాక్ష‌న్ సీన్స్‌

మైన‌స్ పాయింట్స్:

1.నిడివి

2.ఎమోష‌న్ మిస్స‌వ‌డం

3.దారీతెన్నూ లేని క‌థా, క‌థ‌నాలు

4.విప‌రీత‌మైన హింస‌

ఫైన‌ల్‌గా సినిమాలో హింస ప్రేక్ష‌కుడికీ వ‌ర్తిస్తుంది.

(అభిపాయాలు సమీక్షకుడి వ్యక్తిగతం)

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)