నాడీ కణాలను కాంతితో నియంత్రించే సాంకేతికతకు నోబెల్ పురస్కారం

ఆప్టోజెనెటిక్స్ రంగంలో చేసిన కృషికి గాను అమెరికన్ సైకియాట్రిస్ట్, న్యూరాలజిస్ట్ కార్ల్ డీసెరోత్, ఆయన జర్మన్ సహచరులు పీటర్ హెగెమాన్, జార్జ్ నాగెల్‌లకు ఈ ఏడాది ఫిజియాలజీ లేదా మెడిసిన్ విభాగంలో నోబెల్ పురస్కారం లభించింది.

మానవ మెదడు ఎలా పనిచేస్తుందో శాస్త్రవేత్తలు మరింత మెరుగ్గా అర్థం చేసుకోవడానికి వీరి పరిశోధన దోహదపడింది.

క్లినికల్ మెడిసిన్‌లో, దృష్టి లోపం ఉన్నవారిలో చూపును తిరిగి రప్పించే ప్రయత్నాలలో పరిశోధకులు ఈ విధానాన్ని ఉపయోగిస్తున్నారు.

న్యూరోసైన్స్‌లో కొత్త శకానికి పునాది వేశారని ఈ ముగ్గురిని నోబెల్ కమిటీ ప్రశంసించింది.

నాడీ, మానసిక రుగ్మతలకు సంబంధించిన నిర్దిష్ట జ్ఞాపకాలు, భావోద్వేగాలు, ప్రవర్తనల వెనుక ఉన్న న్యూరల్ సర్క్యూట్లను ఆవిష్కరించి, న్యూరోసైన్స్‌లో కొత్త యుగానికి పునాది వేసిన ఈ ముగ్గురిని నోబెల్ కమిటీ ప్రశంసించింది.

నోబెల్ కమిటీ విడుదల చేసిన ప్రకటన ప్రకారం, హెగెమాన్, నాగెల్ కలిసి ప్రత్యేక లక్షణాలున్న 'చానెల్‌రోడాప్సిన్' అనే ప్రోటీన్‌ను కనుగొన్నారు.

ఆ ప్రోటీన్‌ను ఏ కణంలో ప్రవేశపెట్టినా.. ఆ కణాలు కాంతికి స్పందించేలా మారుతున్నాయని వారు గుర్తించారు.

ఈ చానెల్‌రోడాప్సిన్‌ జన్యువును కార్ల్‌ డీసెరోత్ ఎలుకల నాడీ కణాల్లోకి ప్రవేశపెట్టారు. ఆ కణాలపై నీలి రంగు కాంతిని ప్రసరింపజేయడం ద్వారా నాడీ సంకేతాన్ని ప్రేరేపించగలిగారు.

ఆ తర్వాత, నాడీ కణాలను నియంత్రించే ఈ కాంతి ఆధారిత స్విచ్‌ను సజీవంగా ఉన్న ఎలుకల మెదడులో కూడా పనిచేసేలా చేశారు.

కాంతితో నాడీ సంకేతాలను నియంత్రించే ఈ పద్ధతినే 'ఆప్టోజెనెటిక్స్' అని పిలుస్తున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)