తిరుపతి: శ్రీ సిటీలో వాటర్ బాయిలర్ పేలి అయిదుగురు కార్మికులు మృతి, మృతుల కుటుంబాలకు రూ. 50 లక్షల పరిహారం అందిస్తామన్న కలెక్టర్

తిరుపతి జిల్లా శ్రీసిటీలోని టిల్ హెల్త్ కేర్ ఇండస్ట్రీస్‌లో శనివారం ఉదయం వాటర్ బాయిలర్ పేలింది.

ఈ ప్రమాదంలో అయిదుగురు కార్మికులు మృతి చెందారని తిరుపతి జిల్లా కలెక్టర్ వెంకటేశ్వర్ మీడియాకు వెల్లడించారు.

బాయిలర్ దగ్గర పని చేస్తున్న ముగ్గురు, పేలుడు వల్ల శిథిలాలు తగిలి సమీపంలో పని చేస్తున్న మరో ఇద్దరు వ్యక్తులు మృతి చెందినట్లు జిల్లా కలెక్టర్ వెల్లడించారు.

చనిపోయిన వారిలో స్థానికులు ఇద్దరున్నారని ఆయన వెల్లడించారు.

మిగిలిన ముగ్గురిలో ఒకరు పశ్చిమబెంగాల్‌కు చెందిన వారనీ, మిగిలిన ఇద్దరు తమిళనాడుకు చెందిన వారని కలెక్టర్ వెంకటేశ్వర్ చెప్పారు.

ఈ ప్రమాదంలో మరో 10 మంది కార్మికులు తీవ్రంగా గాయపడ్డారు.

వారిని చికిత్స కోసం శ్రీ సిటీ ఆస్పత్రికి తరలించారు.

తీవ్రంగా గాయపడిన వారిని చెన్నై కి తరలించారు.

ఈ ఘటనపై ఏపీ మంత్రి నారా లోకేశ్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు సంతాపం తెలిపారు.

బాధిత కుటుంబాలకు అవసరమైన అన్ని రకాల సహాయాన్ని అందించాలని అధికారులను ఆదేశించారు.

పేలుడుకు గల కారణాలు ఇంకా తెలియాల్సి ఉంది. మృతి చెందిన కార్మికుల వివరాలు కూడా అధికారికంగా వెల్లడి కావాల్సి ఉంది.

మృతుల కుటుంబాలకు 50 లక్షల రూపాయల పరిహారం అందిస్తామని తిరుపతి కలెక్టర్ చెప్పారు. కుటుంబంలో ఉన్నతవిద్య చదివేవారు ఎవరైనా ఉంటే వారికి అయ్యే ఖర్చులన్నీ భరిస్తామని, ఉద్యోగార్హత ఉన్నవారికి శ్రీసిటిలో ఉద్యోగం కల్పిస్తామని తెలిపారు.

బాయిలర్ ఇన్‌స్పెక్టర్‌ను ఇప్పటికే సస్పెండ్ చేశామని కలెక్టర్ వెల్లడించారు. టిల్ హెల్త్ కేర్ ఇండస్ట్రీస్‌‌పై కేసు నమోదు చేశామని, అలాగే సంఘటనకు ఎవరి నిర్లక్ష్యం కారణమో తెలుసుకోవడానికి ఒక కమిటీని వేస్తున్నామని వెంకటేశ్వర్ తెలిపారు.

శ్రీసిటిలో మిగిలిన పరిశ్రమలలో సేఫ్టీ ఆడిట్ చేయించాల్సిందిగా యాజమాన్యాన్ని కోరామని తెలిపారు.

శ్రీ సిటీ ప్రత్యేక ఆర్థిక మండలిలోని టిల్ హెల్త్ కేర్ పరిశ్రమలో శనివారం ఉదయం సంభవించిన భారీ పేలుడు ఘటనపై తిరుపతి ఎంపీ డాక్టర్ మద్దిల గురుమూర్తి తీవ్ర దిగ్భ్రాంతి, విచారం వ్యక్తం చేశారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)