హైదరాబాద్: కాంగ్రెస్ బీఎల్ఏ ఓట్లు తొలగించేందుకు ప్రయత్నించారంటూ బీజేపీ బీఎల్ఏ పై కేసు నమోదు

తప్పుడు ఫామ్-7 పత్రాలు సమర్పించారనే ఆరోపణలపై హైదరాబాద్ పోలీసులు ఓ బూత్ స్థాయి ఏజెంట్‌పై కేసు నమోదు చేశారు.

ముషీరాబాద్ నియోజవర్గ ఓటరు నమోదు అధికారి(ఈఆర్వో), జీహెచ్ఎంసీ డిప్యూటీ కమిషనర్ ప్రవీణ్ కుమార్ రెడ్డి లు అక్టోబరు 5న పోలీసులకు ఫిర్యాదు చేశారు.

ఈ ఫిర్యాదు మేరకు బీఎల్ఏ ఎస్.బాలచందర్‌పై ఎఫ్ఐఆర్ నమోదు చేసినట్లుగా చిక్కడపల్లి ఇన్‌స్పెక్టర్ ఎల్.మధుబాబు బీబీసీతో చెప్పారు.

‘‘మాకు వచ్చిన ఫిర్యాదు ఆధారంగా కేసు నమోదు చేసి దర్యాప్తు చేస్తున్నాం’’ అని వివరించారు.

ఈ తరహా కేసు నమోదు చేయడం అరుదైన విషయంగా ఎన్నికల సంఘం అధికారులు చెబుతున్నారు.

31 మందికి ఓట్లు తొలగించే ప్రయత్నం

ముషీరాబాద్ నియోజకవర్గంలోని బాగ్‌లింగంపల్లి పరిధిలో పోలింగ్ స్టేషన్ నంబర్ 210లో పరిధిలో ఇది జరిగింది.

‘‘సెప్టెంబరు 28న బీఎల్ఏ బాలచందర్ 31 ఓట్లను తొలగించాలంటూ ప్రీ ప్రింటెడ్ ఫామ్-7 దరఖాస్తులను బీఎల్‌ఓకు తీసుకువచ్చి ఇచ్చేందుకు ప్రయత్నించారు.

వాటిని అప్రూవ్ చేయాల్సిందిగా బీఎల్ఓ, బీఎల్ఓ సూపర్ వైజర్‌పై బాలచందర్ ఒత్తిడి చేశారు. వాటిని తీసుకునేందుకు బీఎల్ఓ నిరాకరించారు. పోలింగ్ కేంద్రం ఆవరణలోనే ఆ దరఖాస్తులను బాలచందర్ వదిలేసి వెళ్లారు'' అని పోలీసులకు ఇచ్చిన ఫిర్యాదులో ఈఆర్‌ఓ పేర్కొన్నారు.

బాలచందర్ బీజేపీ తరఫున బూత్ లెవల్ ఏజెంట్‌గా పని చేస్తున్నట్లు అధికారులు గుర్తించారు.

ఆయన సమర్పించిన ప్రీ ప్రింటెడ్ దరఖాస్తుల్లో కాంగ్రెస్ బూత్ లెవల్ ఏజెంటు షఫియుద్దీన్, ఆయన కుటుంబసభ్యులు, బంధువులకు సంబంధించిన 31 మంది పేర్లు ఉన్నట్లుగా ఎన్నికల అధికారుల విచారణలో తేలింది.

ఇవన్నీ కూడా ముస్లింలకు చెందిన ఓట్లుగా అధికారుల విచారణలో బయటపడింది.

''ఆ ఓటర్లంందరూ పోలింగ్ కేంద్రం పరిధిలో ఉన్నారని తెలిసి కూడా ఉద్దేశపూర్వకంగా సదరు బీఎల్ఏ ప్రీ ప్రింటెడ్ ఫామ్-7 దరఖాస్తులు తీసుకువచ్చి సమర్పించారు. ఇలా ఇచ్చిన దరఖాస్తుల్లో కాంగ్రెస్ బీఎల్ఏ, ఆయన కుటుంబసభ్యుల ఓట్లు ఉన్నట్లుగా గుర్తించాం.'' అని బీబీసీతో హైదరాబాద్ జిల్లా ఎన్నికల అధికారి, జీహెచ్ఎంసీ కమిషనర్ ఆర్.వి. కర్ణన్ చెప్పారు.

ఎన్నికల సంఘం సూచనల మేరకు పోలీసులకు బాలచందర్‌పై ఫిర్యాదు చేశారని చెప్పారు.

బీఎల్ఏ బాలచందర్‌ పై అక్టోబరు 6న చిక్కడపల్లి పోలీసులు ఎఫ్ఐఆర్ నమోదు చేశారు.

ప్రజాప్రాతినిధ్య చట్టం – 1950లోని సెక్షన్ 31తోపాటు బీఎన్ఎస్ సెక్షన్ 217, 318(2) కింద కేసు పెట్టి దర్యాప్తు చేస్తున్నట్లు బీబీసీతో చిక్కడపల్లి పోలీసుస్టేషన్ ఇన్‌స్పెక్టర్ మధుబాబు చెప్పారు.

ఈ విషయంపై బాలచందర్‌తో ఫోన్‌లో మాట్లాడేందుకు ప్రయత్నించగా ఆయన అందుబాటులోకి రాలేదు.

అక్టోబరు 1న టీపీసీసీ తరఫున ఫిర్యాదు

ముషీరాబాద్ నియోజకవర్గంలోని పోలింగ్ కేంద్రం నంబరు 210లో ప్రీ ప్రింటెడ్ ఫామ్ 7 దరఖాస్తులు తీసుకువచ్చారనే ఆరోపణలపై తెలంగాణ ప్రదేశ్ కాంగ్రెస్ కమిటీ ఎలక్షన్ కమిషన్ కోఆర్డినేషన్ కమిటీ చైర్మన్ పులిపాటి రాజేశ్ కుమార్, సభ్యులు వాజిద్ హుస్సేన్ అక్టోబరు 1న ఎన్నికల సంఘం తెలంగాణ సీఈవో సి.సుదర్శన్ రెడ్డికి ఫిర్యాదు చేశారు.

‘‘ఈ విషయంపై తక్షణ విచారణ, రికార్డులను భద్రపరచడం, క్రిమినల్ చర్యలు చేపట్టాలి'' అని కోరారు.

ఈ దరఖాస్తులు సమర్పించిన వ్యక్తి బీజేపీ బీఎల్ఏ ఎస్.బాలచందర్ అలియాస్ బాలుగా కాంగ్రెస్ నేతలు ఫిర్యాదు చేశారు.

ఆ తర్వాత గోషామహల్, బహదూర్ పురా నియోజకవర్గాల్లోనూ తప్పుడు ఫామ్-7 దరఖాస్తులు సమర్పించేందుకు ప్రయత్నాలు జరిగాయని కాంగ్రెస్ ఆరోపించింది.

ఈ నేపథ్యంలో ఫామ్ – 6, 6ఎ, 7, 8 కింద తప్పుడు దరఖాస్తులు సమర్పిస్తే, అలాంటి వారిపై కఠిన చర్యలు తీసుకోవాలని హైదరాబాద్ జిల్లా ఎన్నికల అధికారి, జీహెచ్ఎంసీ కమిషనర్‌తోపాటు తెలంగాణలోని అన్ని జిల్లాల కలెక్టర్లు/ఎన్నికల అధికారులకు సుదర్శన్ రెడ్డి అక్టోబరు 5న లేఖ రాశారు.

''ఫామ్-7 పేరుతో పెద్దసంఖ్యలో దరఖాస్తులను ఈఆర్‌ఓలకు సమర్పిస్తున్నట్లుగా ఎన్నికల సంఘం దృష్టికి వచ్చింది. అలాంటి దరఖాస్తులు అర్హమైనవి కావని తెలుస్తోంది. అలా పెద్దసంఖ్యలో అర్హత లేకుండా సమర్పించే దరఖాస్తుదారులను గుర్తించి ప్రజాప్రాతినిధ్య చట్టం సెక్షన్ 31కింద చర్యలు తీసుకోవాలి'' అని ఆదేశించారు.

సీఈవో ఆదేశాలు జారీ చేసిన మరుసటిరోజే చిక్కడపల్లి పోలీసుస్టేషన్‌లో పోలీసులు కేసు నమోదు చేశారు.

మరోవైపు, బీజేపీ బీఎల్ఏ ఓట్ల తొలగింపునకు ప్రయత్నించారనే ఆరోపణలను బీజేపీ రాష్ట్ర అధ్యక్షుడు రాంచందర్‌రావు మీడియాతో మాట్లాడుతూ ఖండించారు.

విచారణ జరుగుతోంది: ఆర్.వి. కర్ణన్

గోషామహల్, బహదూర్‌పురా నియోజకవర్గాల్లోనూ ప్రీ ప్రింటెడ్ ఫామ్-7 దరఖాస్తులు సమర్పించే ప్రయత్నాలు జరిగినట్లుగా కాంగ్రెస్ నేతలు ఆరోపిస్తున్నారు.

ఈ విషయంపై ఆర్.వి. కర్ణన్ బీబీసీతో మాట్లాడారు.

''గోషామహల్ నియోజకవర్గంలో సంతకం లేకుండా రావడంతో అక్కడ బీఎల్‌ఓ వాటిని స్వీకరించలేదు. ఇలా ప్రీ ప్రింటెడ్ లేదా బల్క్‌గా ఇస్తున్న దరఖాస్తులపై విచారణ చేస్తున్నాం'' అని బీబీసీతో చెప్పారు కర్ణన్.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)