ఆస్ట్రేలియాపై బంగ్లాదేశ్ చరిత్రాత్మక టెస్ట్ విజయం, 9 వికెట్ల తేడాతో గెలుపు

ఆస్ట్రేలియా-బంగ్లాదేశ్ టెస్ట్ సిరీస్‌లో భాగంగా డార్విన్‌లో జరిగిన తొలి టెస్టులో ఆస్ట్రేలియాపై బంగ్లాదేశ్ ఘన విజయం సాధించింది.

ఆట నాలుగో రోజే ఆస్ట్రేలియాను 9 వికెట్ల తేడాతో ఓడించి టెస్ట్ క్రికెట్ చరిత్రలో అతిపెద్ద విజయాల్లో ఒకటిగా చెప్పదగిన గెలుపును బంగ్లాదేశ్ సాధించింది.

తొలి ఇన్నింగ్స్‌లో బ్యాటింగ్‌కు దిగిన ఆస్ట్రేలియాజట్టు బంగ్లా బౌలర్ మహమూద్ (6-55) దెబ్బకు విలవిల్లాడి 198 పరుగులకు ఆలౌటైంది.

స్మిత్ ఒక్కడే 71 పరుగులు చేశాడు. తదుపరి బ్యాటింగ్‌కు దిగిన బంగ్లాదేశ్ 426 పరుగులు చేసి 228 పరుగుల ఆధిక్యంలో నిలిచింది.

ఈ ఇన్నింగ్స్‌లో బంగ్లా బ్యాటర్ తాంజిద్ 101 పరుగులతో సెంచరీ చేశాడు. మిరాజ్ 65 పరుగులు చేశాడు. హేజిల్ వుడ్ 89 పరుగులు ఇచ్చి 6 వికెట్లు తీశాడు.

తదుపరి రెండో ఇన్నింగ్స్‌లో ఆస్ట్రేలియా 284 పరుగులు మాత్రమే చేయడంతో బంగ్లా ముందు 57 పరుగుల లక్ష్యం నిలిచింది. ఈ లక్ష్యాన్ని కేవలం ఒక వికెట్ మాత్రమే కోల్పోయి ఛేదించడంతో బంగ్లాజట్టు చారిత్రక విజయం సాధించింది.

బంగ్లా 26 ఏళ్ల టెస్ట్ క్రికెట్ చరిత్రలో...

ఆతిథ్య ఆస్ట్రేలియాను 284 పరుగులకు ఆలౌట్ చేసిన తర్వాత, బంగ్లాదేశ్‌కు మ్యాచ్ గెలవడానికి 57 పరుగులు అవసరమయ్యాయి. కానీ ఎటువంటి తొట్రుపాటు లేకుండా బంగ్లాదేశ్ ఈ లాంఛనాన్ని మోమినుల్ (30 నాటౌట్) బ్యూ వెబ్‌స్టర్ బౌలింగ్‌లో ఫోర్ కొట్టడం ద్వారా పూర్తి చేశాడు.

దీంతో ఆస్ట్రేలియా గడ్డపై బంగ్లాదేశ్ మొట్టమొదటి టెస్ట్ విజయాన్ని నమోదు చేసింది.

ఈ విజయంతో బంగ్లాదేశ్ ఆటగాళ్లు, సిబ్బంది సంబరాల్లో మునిగిపోయారు. తమ 26 ఏళ్ల టెస్ట్ క్రికెట్ చరిత్రలో ఆస్ట్రేలియా గడ్డపై సాధించిన ఈ విజయాన్ని తమ అత్యుత్తమ విజయంగా భావిస్తూ సంబరాలు చేసుకున్నారు.

టెస్ట్ ర్యాంకింగ్స్‌లో ఆస్ట్రేలియా అగ్రస్థానంలో ఉంది. మరోవైపు బంగ్లాదేశ్ 2003లో ఇక్కడ 2-0తో ఓడిపోయిన తర్వాత, ఆస్ట్రేలియాలో మళ్లీ టెస్ట్ సిరీస్ ఆడలేదు.

ఆస్ట్రేలియాతో ఈ తొలి టెస్టులో బంగ్లాదేశ్ జట్టు మొదటి నుంచీ పూర్తి ఆధిపత్యం ప్రదర్శించింది. అయితే నాలుగో రోజు ఆటలో స్పిన్నర్ మెహిదీ హసన్ మిరాజ్ 66 పరుగులిచ్చి 5 వికెట్లు తీసి ఆస్ట్రేలియాను దెబ్బతీశాడు. దీంతో రెండో ఇన్నింగ్స్‌లో ఆస్ట్రేలియా 284 పరుగులకే పరిమితమైంది. బంగ్లాదేశ్‌కు 57 పరుగుల స్వల్ప లక్ష్యం ఎదురైంది.

రెండో ఇన్నింగ్స్‌లో ఆస్ట్రేలియా ఆల్‌రౌండర్ కామెరాన్ గ్రీన్ 104 పరుగులతో ఒంటరి పోరాటం చేశాడు. అయితే హసన్ మహమూద్ బౌలింగ్‌లో గ్రీన్ అవుటయ్యాక ఆస్ట్రేలియా పూర్తిగా చేతులెత్తేసింది.

మొదటి ఇన్నింగ్స్‌లో 6 వికెట్లు, రెండో ఇన్నింగ్స్‌లో 3 వికెట్లు తీసిన బంగ్లా పేసర్ మహమూద్‌కు 'ప్లేయర్ ఆఫ్ ది మ్యాచ్' అవార్డు దక్కింది.

"ఏ ఫార్మాట్‌లోనైనా బంగ్లాదేశ్‌కు ఇప్పటివరకు ఇదే అతిపెద్ద విజయం" అని కెప్టెన్ నజ్ముల్ హొస్సేన్ శాంటో అన్నాడు.

"భవిష్యత్తులోనే మేం ఇలాంటి ప్రత్యేకమైన విజయాలు మరెన్నో సాధించాలని అనుకుంటున్నాం. నాకు చాలా సంతోషంగా ఉంది. మా ఆటగాళ్లు ఆడిన తీరుపై ఎంతో గర్వంగా ఉంది. దీనికోసం మేం చాలా కష్టపడ్డాం" అని నజ్ముల్ హర్షం వ్యక్తం చేశాడు.

టెస్ట్ క్రికెట్ చరిత్రలో ఆస్ట్రేలియా ఎదుర్కొన్న అత్యంత అవమానకరమైన ఓటముల్లో ఇదొకటి అని ఏబీసీ రేడియోతో వ్యాఖ్యాత జిమ్ మ్యాక్స్‌వెల్ అన్నారు.

బంగ్లాదేశ్ అన్ని విభాగాల్లోనూ తమ కంటే మెరుగ్గా ఆడిందని ఆస్ట్రేలియా ప్లేయర్ కమిన్స్ ప్రశంసించారు.

"మా సన్నద్ధతలో ఎలాంటి లోపం లేదు. ఓటమికి మేం ఎలాంటి సాకులు చెప్పదలుచుకోలేదు'' అని కమిన్స్ వ్యాఖ్యానించారు.

టెస్టుల్లో బంగ్లాదేశ్ చేతిలో ఆస్ట్రేలియా గతంలో ఒక్కసారి మాత్రమే ఓడిపోయింది. 2017లో మీర్పూర్‌లో ఆస్ట్రేలియాకు ఈ ఓటమి ఎదురైంది.

రెండు టెస్టుల సిరీస్‌లో ఇది మొదటి మ్యాచ్. రెండో టెస్ట్ ఆగస్టు 22న ప్రారంభమవుతుంది..

బంగ్లాదేశ్ ప్రధాని అభినందనలు

టెస్ట్ ర్యాంకింగ్స్‌లో తొమ్మిదో స్థానంలో ఉన్న బంగ్లాదేశ్ జట్టు కొద్దిరోజుల క్రితమే డార్విన్‌లో జరిగిన వార్మప్ మ్యాచ్‌లో క్రికెట్ ఆస్ట్రేలియా ఎలెవన్ చేతిలో 54 పరుగులకే ఆలౌట్ అయింది. అలాంటి స్థితి నుంచి తాజాగా ఘన విజయాన్ని సాధించింది బంగ్లాదేశ్.

జూన్‌లో హరారేలో జరిగిన ఏకైక టెస్టులో.. టెస్టు ర్యాంకింగ్స్‌లో అత్యంత దిగువన ఉన్న జింబాబ్వే చేతిలో బంగ్లాదేశ్ ఘోరంగా ఓడిపోయింది.

ఆస్ట్రేలియాపై సాధించిన ఈ చారిత్రక విజయం తర్వాత బంగ్లాదేశ్ ప్రధాని తారిఖ్ రెహమాన్ ఆటగాళ్లతో వీడియో కాల్‌లో మాట్లాడి అభినందనలు తెలిపారు.

"మీకు స్వదేశంలో ఘన స్వాగతం పలకడానికి మేమంతా ఆసక్తిగా ఎదురుచూస్తున్నాం" అని ఆయన సోషల్ మీడియాలో పేర్కొన్నారు.

ప్రధాన ఫాస్ట్ బౌలర్లు నాహిద్ రాణా, షోరిఫుల్ ఇస్లామ్ గాయాల వల్ల జట్టుకు దూరం అయినప్పటికీ.. బంగ్లాదేశ్ పూర్తి స్థాయి బలమున్న ఆస్ట్రేలియా జట్టును ఓడించింది.

తమ జట్టు పేస్ బౌలర్ల ఆలోచనా విధానంలో వచ్చిన మార్పే ఈ అద్భుత విజయానికి కారణమని శాంటో చెప్పాడు.

"ఐదేళ్ల క్రితం పేస్ బౌలర్లు టెస్టులు ఆడటానికి ఇష్టపడేవారు కాదు" అని శాంటో అన్నాడు.

"కానీ ఇప్పుడు మేం ఎన్నో టెస్టులు ఆడుతున్నాం. వారు కూడా టెస్ట్ ఫార్మాట్‌కు ప్రాధాన్యం ఇస్తున్నారు. వారు ఆడాలనుకుంటున్నారు, ప్రతిభ చూపించాలనుకుంటున్నారు. ప్రపంచ స్థాయి బౌలర్లుగా ఎదగాలనుకుంటున్నారు. ప్రస్తుతం వారి ఆలోచనా విధానం అలా ఉంది. ముష్ఫికర్ రహీమ్, మోమినుల్ హక్ వంటి సీనియర్లు మరింత ఎక్కువగా టెస్ట్ క్రికెట్ ఆడేలా వారిని ప్రోత్సహించారు" అని శాంటో వివరించాడు

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)