ராகுல், பிரியங்காவை போராட்டக் களத்திற்கே செல்ல விடாத காவல்துறை - என்ன நடந்தது? புகைப்பட தொகுப்பு

டெல்லியில் தேர்தல் ஆணையம் மற்றும் தலைமைத் தேர்தல் ஆணையர் ஞானேஷ் குமாருக்கு எதிராக போராட ஜந்தர்மந்தர் செல்லும் வழியிலேயே மக்களவை எதிர்க்கட்சித் தலைவர் ராகுல் காந்தி ராகுல் காந்தி தடுத்து நிறுத்தப்பட்டார். காவல் நிலையத்திற்கு அழைத்துச் செல்லப்பட்ட அவர் பின்னர் சிறிது நேரத்தில் விடுவிக்கப்பட்டார்.

ஜந்தர் மந்தருக்குச் செல்ல முயன்றபோது காவல்துறையினரால் தடுத்து நிறுத்தப்பட்டு காவலில் வைக்கப்பட்டதாக அங்கிருந்த பிபிசி செய்தியாளர் தில்நவாஸ் பாஷா தெரிவித்தார்.

காவலில் வைக்கப்பட்ட பிறகு ராகுல் காந்தி பேசுகையில், "நரேந்திர மோதி, அமித் ஷா, மோகன் பகவத் மற்றும் ஞானேஷ் குமார் ஆகியோர் என்ன செய்தாலும், நாங்கள் அவர்களை விடமாட்டோம். அவர்கள் நால்வரையும் சட்டத்தின் முன் நிறுத்துவோம் என்று நான் உறுதியளிக்கிறேன்," என்றார்.

தடுத்து வைக்கப்பட்டிருந்த ராகுல் காந்தி உள்ளிட்ட எதிர்க்கட்சித் தலைவர்களை காவல்துறையினர் இரவு சுமார் 8.30 மணியளவில் விடுவித்தனர். பாரகம்பா காவல் நிலையத்திலிருந்து ராகுல் காந்தி வெளியேறியதை பார்க்க முடிந்தது.

காவல்துறையினர் மோசமாக நடந்துகொண்டதாகப் பிரியங்கா காந்தி குற்றம் சாட்டினார்.

அவர் கூறுகையில், "தேர்தல் ஆணையரைச் சந்திக்கச் செல்லும் எம்.பி.க்களிடம் அவர்கள் எப்படி நடந்துகொள்கிறார்கள்? எம்.பி.க்களான எங்களையே அவர்கள் அடிக்கிறார்கள். காவல்துறையினர் என் உடலில் பல இடங்களில் கீறினர். எங்களைத் தள்ளிவிட்டு கீழே விழச் செய்தனர். இப்போது நாங்கள் இங்கிருந்து நகரப் போவதில்லை. நான் இங்கிருந்து நகர மாட்டேன்," என்று கூறினார்.

மறுபுறம், பாஜக செய்தித் தொடர்பாளர் சம்பித் பாத்ரா, காங்கிரஸ் மற்றும் ராகுல் காந்தியின் குற்றச்சாட்டுகளை விமர்சித்தார்.

"சிறப்பு தீவிரத் திருத்தப் பணியை எதிர்ப்பதன் மூலம், வாக்காளர் பட்டியலில் 2.8 கோடி உயிரிழந்தவர்களின் பெயர்களைத் தொடர்ந்து இடம்பெறச் செய்ய காங்கிரஸ் விரும்புகிறதா? ராகுல் காந்தியும் சோனியா காந்தியும் 'வாக்குத் திருட்டு' மூலம்தான் நாடாளுமன்ற உறுப்பினர்களாகத் தேர்ந்தெடுக்கப்பட்டார்களா? எஸ்.ஐ.ஆர் சட்டவிரோதமானது என்றால், கர்நாடகா, கேரளா, தமிழ்நாடு மற்றும் இமாச்சலப் பிரதேசத்தில் உள்ள காங்கிரஸ் அரசுகளும் சட்டவிரோதமானவையா?" என்று அவர் கேள்வி எழுப்பினார்.

- இது, பிபிசிக்காக கலெக்டிவ் நியூஸ்ரூம் வெளியீடு