தமிழ்நாட்டில் '9 ஆண்டுகளில் இல்லாத வெப்பம்' - அடுத்த கோடையில் இளநீர் தட்டுப்பாடு ஏற்படுமா?

தமிழ்நாட்டில் இந்த ஆண்டு தென்மேற்கு பருவமழைக் காலத்தில் கடந்த ஒன்பது ஆண்டுகளில் இல்லாத அளவுக்கு வெப்பநிலை பதிவாகியுள்ள நிலையில், இந்த வெப்பம் குளிர்காலத்தையும் தாண்டி தொடரலாம் என மண்டல வானிலை முன்னறிவிப்பு மையத்தின் தலைவர் வி.ஆர். துரை பிபிசி தமிழிடம் தெரிவித்துள்ளார். இதனால், ஏற்கெனவே உற்பத்தி பாதிக்கப்பட்டுள்ள இளநீருக்கு அடுத்த கோடையில் தட்டுப்பாடு ஏற்பட்டு விலை அதிகரிக்குமா என்ற கேள்வியும் எழுந்துள்ளது.

"குளிர்காலத்திலும் சராசரி வெப்பநிலை ஒன்று முதல் இரண்டு டிகிரி செல்சியஸ் வரை அதிகமாக இருக்கும். இந்த ஆண்டு தென்மேற்கு பருவமழைக் கால வெப்பநிலை ஏற்கெனவே 2024ஆம் ஆண்டைத் தாண்டிவிட்டது. இந்தப் போக்கு தொடர்ந்தால், இந்த ஆண்டும் அதிக வெப்பமான ஆண்டாக இருக்கலாம். ஆனால் நாம் காத்திருந்து பார்க்க வேண்டும்," என்று துரை தெரிவித்தார்.

உலக வானிலை அமைப்பின் தரவுகளின்படி 2024ஆம் ஆண்டு உலக அளவில் அதிக வெப்பமான ஆண்டாக இருந்த நிலையில், இந்த ஆண்டு தென்மேற்கு பருவமழைக் காலத்திலேயே அந்த ஆண்டின் வெப்பநிலையை தமிழ்நாடு தாண்டி இருப்பதாக துரை தெரிவித்தார்.

கடந்த 2024ஆம் ஆண்டு தென்மேற்கு பருவமழைக் காலத்தில் அதிகபட்ச சராசரி வெப்பநிலை 33.07 டிகிரி செல்சியஸாக இருந்தது. ஆனால், இந்த ஆண்டு அதிகபட்ச சராசரி வெப்பநிலை 34.25 டிகிரி செல்சியஸாக பதிவாகியுள்ளது என்று துரை கூறினார்.

அதேபோல், 2024ஆம் ஆண்டு சராசரி குறைந்தபட்ச வெப்பநிலை 23.89 டிகிரி செல்சியஸாக இருந்த நிலையில், இந்த ஆண்டு அது 24.64 டிகிரி செல்சியஸாக அதிகரித்துள்ளதாகவும் அவர் தெரிவித்தார்.

மண்டல வானிலை ஆய்வு மைய அறிக்கை சொல்வது என்ன?

தமிழ்நாட்டில் இந்த ஆண்டு ஜூன் முதல் செப்டம்பர் வரையிலான தென்மேற்கு பருவமழைக் காலத்தில் சராசரி வெப்பநிலை 29.45 டிகிரி செல்சியஸாக இருந்ததாக மண்டல வானிலை ஆய்வு மையத்தின் ஆய்வு தெரிவிக்கிறது.

வெப்பம் அதிகமாக இருந்ததாக கூறப்படும் வருடங்களான 2018 முதல் 2025 வரையிலான காலகட்டத்தில் பதிவான சராசரியுடன் ஒப்பிடும்போது இது 1.21 டிகிரி செல்சியஸ் அதிகம் என்று மண்டல வானிலை முன்னறிவிப்பு மையம் தெரிவித்துள்ளது.

இந்தக் காலகட்டத்தில் அதிகபட்ச சராசரி வெப்பநிலை 34.25 டிகிரி செல்சியஸாக இருந்ததாகவும், இது 2018 முதல் 2025 வரையிலான சராசரியை விட 1.40 டிகிரி செல்சியஸ் அதிகம் என்றும் அந்த ஆய்வு தெரிவிக்கிறது.

சராசரி குறைந்தபட்ச வெப்பநிலை 24.64 டிகிரி செல்சியஸாக இருந்ததாகவும், இது அந்தக் காலகட்டத்தின் சராசரியைவிட 1.02 டிகிரி செல்சியஸ் அதிகம் என்றும் மண்டல வானிலை முன்னறிவிப்பு மையம் கூறுகிறது.

குறிப்பாக ஜூலை முதல் செப்டம்பர் வரையிலான காலகட்டத்தில் வெப்பநிலை அதிகரிப்பு வலுவாக இருந்ததாகவும் அந்த ஆய்வு தெரிவிக்கிறது.

ஜூன் மாதத்தில் பரவலாக மழை பெய்ததால் வெப்பநிலை ஓரளவு கட்டுப்படுத்தப்பட்ட நிலையில், ஜூலை, ஆகஸ்ட் மற்றும் செப்டம்பர் ஆகிய மூன்று மாதங்களும் 2018 முதல் 2025 வரையிலான அதே மாதங்களுடன் ஒப்பிடும்போது இந்த ஆண்டு அதிக வெப்பமான மாதங்களாக இருந்ததாகவும் ஆய்வு கூறுகிறது.

வேலூர், புதுச்சேரி, பாளையங்கோட்டை, சென்னை மீனம்பாக்கம், கொடைக்கானல், திருத்தணி உள்ளிட்ட பல வானிலை நிலையங்களிலும் இயல்பைவிட அதிகமான சராசரி வெப்பநிலை பதிவாகியுள்ளது.

அதாவது, குறிப்பிட்ட சில பகுதிகளில் மட்டும் வெப்பம் அதிகரிக்காமல், தமிழ்நாடு முழுவதும் உள்ள வானிலை நிலையங்களிலும் இந்த வெப்பநிலை அதிகரிப்பு பதிவாகியுள்ளதாக மண்டல வானிலை முன்னறிவிப்பு மையம் தெரிவித்துள்ளது.

'சில நாட்கள் மட்டும் வெப்பம் அதிகமாக இருக்கவில்லை'

இந்த ஆண்டு பதிவான வெப்பநிலை குறித்து துரை பேசும்போது, இது ஆங்காங்கே சில நாட்களில் மட்டும் பதிவான அதிக வெப்பநிலை அல்ல என்று தெரிவித்தார்.

"தமிழ்நாட்டில் இந்தப் பருவத்தில் பதிவான சராசரி வெப்பநிலை, முந்தைய ஆண்டுகளுடன் ஒப்பிடும்போது குறிப்பிடத்தக்க அளவில் அதிகரித்துள்ளது," என்று அவர் தெரிவித்தார்.

இந்த ஆண்டு தென்மேற்கு பருவமழைக் காலத்தின் சராசரி வெப்பநிலை, இதற்கு முன்பு அதிகமாக இருந்த 2023ஆம் ஆண்டைவிட 0.72 டிகிரி செல்சியஸ் அதிகம் என்றும் துரை கூறினார்.

உலக அளவில் பதிவான அதிக வெப்பமான மூன்று ஆண்டுகளாக 2023, 2024, 2025 இருந்த நிலையில், ஆண்டுக்கு ஆண்டு வெப்பநிலை அதிகரிக்கும் போக்கு காணப்படுவதாகவும் அவர் தெரிவித்தார்.

2020ஆம் ஆண்டுக்குப் பிறகு வெப்பநிலை அதிகரிப்பு மேலும் தீவிரமடைந்துள்ளதாகவும் துரை கூறினார்.

உலக வெப்பமயமாதல் தமிழ்நாட்டில் வெப்பநிலை அதிகரிப்பதற்கான முக்கிய காரணியாக இருந்தாலும், இந்த ஆண்டு வலுவான எல் நினோவும் வெப்பநிலை அதிகரிப்புக்கு பங்களித்ததாக துரை தெரிவித்தார்.

வெப்பம் மட்டுமல்ல, மழைப்பற்றாக்குறையும் பாதிப்பு

எல் நினோவின் தாக்கத்தால் இந்தியாவில் அதிக வெப்பநிலை மட்டுமின்றி மழைப்பற்றாக்குறையும் ஏற்பட்டதாக துரை தெரிவித்தார்.

இதன் தாக்கம் விவசாயம் உள்ளிட்ட பல்வேறு துறைகளிலும் உணரப்பட்டுள்ளதாக அவர் கூறினார்.

இந்த நிலையில், வெப்பநிலை அதிகரிப்பு மற்றும் தண்ணீர் பற்றாக்குறையால் தேங்காய் விவசாயமும் கடுமையாக பாதிக்கப்பட்டுள்ளதாக விவசாயிகள் தெரிவிக்கின்றனர்.

'40 முதல் 50% மரங்களில் இளநீர் காய்ப்பு பாதிப்பு'

தமிழ்நாடு விவசாயிகள் சங்கம், அரசியல் சார்பற்ற அமைப்பு மற்றும் ஊழல் ஒழிப்பு சங்கத்தின் மாநிலச் செயலாளர் கந்தசாமி, சுமார் 40 முதல் 50 சதவீத தேங்காய் மரங்களில் இளநீர் காய்ப்பு பாதிக்கப்பட்டுள்ளதாக பிபிசி தமிழிடம் தெரிவித்தார்.

"வெப்பநிலை அதிகரிப்பும் தண்ணீர் பற்றாக்குறையும் விவசாயிகளுக்கு பெரும் இழப்பை ஏற்படுத்தியுள்ளன. சுமார் 40 முதல் 50 சதவீத மரங்களில் இளநீர் காய்ப்பு பாதிக்கப்பட்டுள்ளது. தண்ணீர் இல்லாததால் குரும்பைகள் உதிர்ந்து காய்ப்பது பாதிக்கப்பட்டது," என்று கந்தசாமி தெரிவித்தார்.

இதன் காரணமாக இளநீர் விலை அதிகரித்துள்ளதாகவும் அவர் கூறினார்.

பொதுவாக குளிர்காலத்தில் வெப்பநிலை குறைவதால் இளநீருக்கான தேவை குறையும் என்றும், அதனால் விலையும் குறையும் என்றும் கந்தசாமி தெரிவித்தார்.

ஆனால் இந்த ஆண்டு வெப்பநிலை தொடர்ந்து அதிகமாக இருப்பதால் இளநீருக்கான தேவை குறையவில்லை என்றும், அதேநேரத்தில் உற்பத்தி குறைந்துள்ளதால் விலையும் அதிகரித்துள்ளதாகவும் அவர் கூறினார்.

"இளநீர் இல்லாத தேங்காய் மரங்களைப் பார்ப்பது இதுவே முதல் முறை"

ஈரோடு மாவட்டம் குமாரபாளையத்தைச் சேர்ந்த தேங்காய் விவசாயி ஜீவானந்தம், தனது அனுபவத்திலும் இந்த மாற்றம் தெளிவாகத் தெரிகிறது என்று பிபிசி தமிழிடம் தெரிவித்தார்.

"சில தேங்காய் மரங்களில் இளநீர் இல்லாமல் இருப்பதை நான் பார்ப்பது இதுவே முதல் முறை. பவானிசாகர் அணையிலிருந்து அண்மையில் 15 நாட்களுக்கு தண்ணீர் திறக்கப்பட்டது. ஆனால் அது குடிநீர் தேவைக்காக மட்டுமே இருந்தது. தேங்காய் மரங்களை எங்களால் காப்பாற்ற முடியவில்லை," என்று ஜீவானந்தம் தெரிவித்தார்.

உற்பத்தி குறைந்ததால் மற்ற மாநிலங்களுக்கு அனுப்புவதற்குக்கூட போதுமான இளநீர் கிடைக்கவில்லை என்றும் அவர் கூறினார்.

மழை இல்லாத நிலை தொடரும் வரை இளநீர் விலை அதிகமாகவே இருக்கும் என்றும் ஜீவானந்தம் தெரிவித்தார்.

"இதே நிலை அடுத்த ஆண்டு வரை தொடர்ந்தால், கோடை காலத்தில் தேவை அதிகமாகவும் உற்பத்தி குறைவாகவும் இருக்கும் என்பதால் இளநீர் விலை மிக அதிகமாக உயரலாம்," என்று அவர் கூறினார்.

'சூப்பர் எல் நினோவால் இளநீர் காய்ப்பு பாதிப்பு'

"சூப்பர் எல் நினோ காரணமாக ஏற்பட்ட கடுமையான வறட்சி மற்றும் தென்மேற்கு பருவமழை தோல்வியால் இளநீர் காய்ப்பு பாதிக்கப்பட்டதாக" தமிழ்நாடு வேளாண்மைப் பல்கலைக் கழகத்தின் தென்னை ஆராய்ச்சி நிலையத் தலைவர் பத்மபிரியா பிபிசி தமிழிடம் தெரிவித்தார்.

"சூப்பர் எல் நினோ காரணமாக கடுமையான வறட்சியும் தென்மேற்கு பருவமழை தோல்வியும் ஏற்பட்டுள்ளன. இதனால் இளநீர் காய்ப்பு பாதிக்கப்பட்டுள்ளது," என்று பத்மபிரியா தெரிவித்தார்.

மழைப்பற்றாக்குறை ஏற்படும் வாய்ப்பை முன்கூட்டியே கணித்ததன் காரணமாக, தென்னை நாற்றுகளின் உற்பத்தியையும் சுமார் 40 முதல் 50 சதவீதம் வரை குறைத்ததாகவும் அவர் கூறினார்.

அதேநேரம், வடகிழக்கு பருவமழை போதுமான அளவு பெய்யும் என்ற நம்பிக்கை இருப்பதாகவும் அவர் தெரிவித்தார்.

"வடகிழக்கு பருவமழை காலத்தில் போதுமான மழை பெய்ய வேண்டும் என்று நாங்கள் எதிர்பார்க்கிறோம். போதுமான மழை கிடைத்தால் விவசாயிகளுக்கு ஓரளவு நிவாரணம் கிடைக்கும். தற்போது விவசாயிகள் வடகிழக்கு பருவமழை பெய்யும் என்ற நம்பிக்கையுடன் எங்களிடம் இருந்து தென்னை நாற்றுகளை வாங்குகின்றனர்," என்று பத்மபிரியா தெரிவித்தார்.

இதனால், இந்த ஆண்டு அதிகரித்துள்ள வெப்பநிலை அடுத்த சில மாதங்களிலும் தொடருமா, வடகிழக்கு பருவமழை போதுமானதாக இருக்குமா என்பதுதான் விவசாயிகளுக்கு முக்கியமான கேள்வியாக உள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு