Nin kaadi-heystiisa ay dhaqaatiirtu ka saareen dhagax miisaankiisu yahay 3.1kg

Dhaqaatiirta dalka Sri Lanka ayaa ka saaray kaadi-haysta nin dhagax miisaankiisu yahay 3.1kg; waxayna aaminsan yihiin inuu noqon karo dhagaxii ugu weynaa ee noociisa ah ee abid la diiwaangeliyo.

Qalliinka ayaa lagu sameeyay toddobaadkii hore isbitaal ku yaalla magaalada Trincomalee ee bariga dalka Sri Lanka.

Bukaanka oo 55 jir ah ayaa la dhigay isbitaalka ka dib markii uu ku dhacay istiroog (stroke). Hase yeeshee, intii lagu guda jiray daaweynta, markii ay dhaqaatiirtu dareemeen inuu dhibaato kala kulmayo kaadida, waxay ogaadeen inuu kaadi-haystiisa ku jiro dhagax.

Intii lagu guda jiray qalliinka, dhaqaatiirtu waxay ka saareen dhagax kaadi-haysta ku jiray oo miisaankiisu la mid yahay kan ilmo cusub oo waqtigiisii ​​dhammaystay, cabbirkiisuna uu la ekaa ukunta geela.

Dr. Prahalahan Balakrishnan, oo hoggaaminayay qalliinka, ayaa u sheegay BBC Sinhala: "Marka loo eego xogta jirta, kani waa dhagaxii ugu weynaa ee kaadi-haysta laga saaro qalliin ahaan ee abid la diiwaangeliyo."

Wuxuu intaas ku daray in bukaanku uu ku jiro "xaalad caafimaad oo aad u wanaagsan."

Dhaqaatiirtu waxay sheegeen in bukaanku uu weli isbitaalka ku jiro, isla markaana uu helayo daaweyn loogu talagalay dhibaatooyinkiisa kale ee caafimaad.

Dr. Balakrishnan ayaa intaas ku daray in dhagaxu uu laga yaabo inuu ku jiray kaadi-haysta bukaanka muddo u dhaxaysa shan ilaa toban sano.

Dhagxaanta kaadi-haysta ayaa samaysma marka macdanta ku jirta kaadida ay adkaato oo isu beddesho burooyin adag.

Dhagxaantan ayaa badanaa samaysma marka aanay kaadi-haystadu si buuxda u madhnayn; xaaladdan oo kale, waxaa haraysa kaadi aad u cufan, taas oo markii dambe isu beddeli karta dhagxaan yaryar.

Dhagxaanta yaryar ee kaadi-haysta, kuwaas oo la cabbir ah xabbad ciid ah, ayaa laga yaabaa inay jirka ka baxaan iyagoo iska soo baxaya. Hase yeeshee, dhagxaanta ka weyn 1 sentimitir ayaa badanaa xira socodka kaadida, waxayna u baahdaan faragelin caafimaad. Dhagaxa kaadi-haysta ee ka weyn 4 sentimitir ayaa loo yaqaannaa dhagax weyn.

Sida laga soo xigtay Guinness World Records, dhagaxii ugu weynaa ee kaadi-haysta ee la diiwaangeliyo ayaa laga saaray bukaan ku sugnaa Brazil sannadkii 2003-dii. Dhagaxu wuxuu miisaankiisu ahaa 1.9 kiiloogaraam (4.2 rodol), dhererkiisuna wuxuu ahaa 17.9 sentimitir (7 inji).

Dhagaxii kaadi-haysta ee laga saaray Sri Lanka toddobaadkii hore ayaa dhererkiisu ahaa qiyaastii 17 sentimitir.