U Rwanda rwashimye 'umurava n'ukudatezuka ku mateka' kwa Dafroza Gauthier wapfuye ku myaka 72

    • Umwanditsi, Didier Bikorimana
    • Igikorwa, BBC Gahuzamiryango
  • Yatangajwe
  • Igihe co gusoma: iminota 2

Leta y'u Rwanda yihanganishije umuryango w'Umunyarwandakazi ufite n'ubwenegihugu bw'Ubufaransa Dafroza Mukarumongi Gauthier wapfiriye mu Bufaransa ku wa gatandatu ku myaka 72, wagize uruhare rukomeye mu bikorwa byo kugeza mu bucamanza abacyekwaho uruhare muri jenoside yabaye mu Rwanda mu 1994 baba mu Bufaransa n'ahandi i Burayi nko mu Bubiligi.

Itangazo ryasohowe n'ibiro by'umuvugizi wa leta y'u Rwanda mu ijoro ryo ku wa gatandatu rishima "ubwitange yagaragaje mu gushakisha ibimenyetso no gushyikiriza ubutabera" abacyekwaho kugira uruhare muri jenoside yabaye mu Rwanda.

Rigira riti: "Umurava n'ukudatezuka ku gusigasira amateka, guharanira ukuri n'ubutabera, ni umurage adusigiye utazibagirana."

Dafroza, wavukiye i Butare mu majyepfo y'u Rwanda, yafatanyije n'umugabo we w'Umufaransa Alain Gauthier mu gushinga mu Bufaransa umuryango 'Collectif des Parties Civiles pour le Rwanda' mu mwaka wa 2001, wakomeje gutegura ibirego ku bacyekwaho uruhare muri jenoside, kuyihakana no kuyipfobya.

Leta y'u Rwanda yongeyeho iti: "Mu izina rya Guverinoma y'u Rwanda, twihanganishije kandi dukomeje umugabo we Alain Gauthier akaba n'umusangirangendo muri uru rugamba, umuryango we n'inshuti, ndetse n'abantu bose ibikorwa bye byiza byabereye icyitegererezo."

Umuryango IBUKA uharanira inyungu z'abarokotse jenoside na wo washimye ibikorwa bye, unavuga ko yazize uburwayi. Mu butumwa watangaje ku mbuga nkoranyambaga wavuze ko wifatanyije "n'umuryango we, inshuti n'Abanyarwanda bose muri ibi bihe by'akababaro", wongeraho uti: "Ruhukira mu mahoro, Dafroza Gauthier."

Mu mwaka wa 2017, ibikorwa bye n'iby'umugabo we byabahesheje bombi Impeta y'Ubucuti – Igihango, bambitswe i Kigali na Perezida w'u Rwanda Paul Kagame.

Gusa abatavuga rumwe n'ubutegetsi bw'u Rwanda bagiye bagaragaza impungenge ku kutabogama kw'imanza za jenoside zo mu Bufaransa – Dafroza yagizemo uruhare, bakazishinja kwivangwamo na politike mu muhate wo kuzahura umubano hagati y'ibihugu byombi wari warazambye nyuma ya jenoside yabaye mu Rwanda. Ubufaransa n'u Rwanda ibyo barabihakana.