Umukuru w'amagereza muri leta ya Tennessee yeguye nyuma yuko igihano cy'urupfu cya Christa Pike kinaniranye

Umukuru w'amagereza muri leta ya Tennessee muri Amerika yeguye nyuma y'inanirana ku wa gatatu ry'igihano cy'urupfu cy'imfungwa Christa Pike yari itegereje kwicwa.

Guverineri Bill Lee wa leta ya Tennessee yatangaje iyo mpinduka ku wa gatandatu, ubwo yatangazaga iyo nkuru mu itangazo ahuriyeho n'uwo wari komiseri w'amagereza muri iyo leta, Frank Strada.

Strada yavuze ko ukwegura kwe kuri "mu nyungu nziza cyane" z'iyo leta, ndetse yavuze ko iperereza ririmo kuba ku byabaye "rirakwiye rwose kandi riracyenewe".

Pike, wakatiwe igihano cy'urupfu mu mwaka wa 1996 kubera kwica Colleen Slemmer, yarokotse inshinge ebyiri ndetse ubu arembeye mu bitaro byo muri Tennessee, mu gihe abanyamategeko be bashaka ko icyo gihano yakatiwe kigabanywa.

Lee yagize ati: "Komiseri Strada yakoranye ubunyangamugayo, kandi ndashima ubushake bwe bwo gushyira imbere inyungu z'Abanya-Tennessee muri iki gihe kigoye."

Lee yategetse ko hakorwa isuzuma ryigenga ku iyicwa ryageragejwe rya Pike ndetse yahagaritse ibihano byose byo kwicwa byari biteganyijwe kuba muri iyo leta muri uyu mwaka.

Abanyamategeko ba Pike bavuze ko ukwo kwegura "gufite ishingiro" ariko bavuze ko "nta kintu na kimwe gukora mu gufasha Christa ubu".

Itangazo itsinda ry'abanyamategeko ba Pike ryasohoye rigira riti: "Ibyamubayeho ku wa gatatu bigaragaza ko habayeho kunanirwa mu mikorere ya sisitemu [y'urwego] kurenze kure umuntu umwe uwo ari we wese."

"Twizeye ko ubusabe bwa Guverineri bwuko haba isuzuma ryuzuye, ryigenga buzagaragaza ibibazo byimbitse biri mu rwego rwose rwa Tennessee rujyanye n'igihano cy'urupfu."

Inyandiko zo mu rukiko zivuga ko Pike arimo kuvurirwa mu bitaro byo mu mujyi wa Nashville, umurwa mukuru wa leta ya Tennessee, aho abaganga barimo kugerageza gukura mu mubiri we imiti yakoreshejwe ubwo icyo gihano cyo kumwica cyashyirwaga mu ngiro.

Ku wa gatatu yatewe doze ebyiri z'umuti wica wa 'pentobarbital' ariko yakomeje kuba muzima. Nuko ajyanwa ku bitaro mu modoka y'imbangukiragutabara. Abanyamategeko be bavuze ko ubwo yaterwaga izo doze ebyiri, "yumvikanye arimo kurira, aniha, ndetse ahumeka cyane mu gihe cyose icyo gikorwa cyamaze".

Kugeza mu ijoro ryo ku wa kane yari yataye ubwenge, ahumekera mu muheha bamushyizemo ndetse ari ku mashini yo kumufasha guhumeka.

Urwego rw'amagereza rwashyigikiye uburyo bwakoreshejwe, ruvuga ko "ubwo buryo ntibwemera ko hari uburyo bw'inyongera bukoreshwa burenze ibyakozwe".

Abategetsi ntibaravuga niba bazagerageza kongera kwica Pike. Nta n'igisobanuro batanze ku ho byapfiriye muri icyo gikorwa. Abanyamategeko be ku wa gatanu batanze icyifuzo cyihutirwa cyo kubungabunga "ibimenyetso byose" bijyanye n'icyo gihano cye cyo kwicwa cyananiranye.