Rwanda: Abunganira Victoire Ingabire basabye urukiko rukuru gutesha agaciro ibyo aregwa

Abanyamategeko bunganira umunyapolitiki utavuga rumwe n'ubutegetsi bw'u Rwanda Victoire Ingabire basabye urukiko rukuru gutesha agaciro ibirego by'ubushinjacyaha, bavuga ko bimwe muri byo byashaje, ibindi bikaba byaratanzwe mu buryo bunyuranyije n'amategeko.

Banenze ubuhamya bwatanzwe n'abatangabuhamya b'ubushinjacyaha bamwe byavuzwe ko bashobora kuba barashyizweho igitutu, abandi bagashinja Ingabire kubera ko hari ibyo bapfuye mu mikoranire.

Ingabire aburana ahakana ibyaha byose aregwa.

Mu mategeko, itsinda ryunganira Ingabire rivuga ko ibirego by'ubushinjacyaha bigaragaza inenge nyinshi zishingiye ku mategeko.

Nk'icyaha cyo gutegura imyigaragambyo no gushaka gukoresha inama zitemewe, ngo bigomba guteshwa agaciro kuko ikirego cyatanzwe byaramaze gusaza.

Aba banyamategeko bavuga ko ibyaha bivugwa ko byakozwe mu mwaka wa 2021 kandi ko kugeza mu mwaka wa 2025 nta gikorwa cy'ikurikiranacyaha cyari cyarabayeho. Kuri bo, bivuze ko ibyaha byombi byashaje.

Ku cyaha cy'umugambi wo kugirira nabi ubutegetsi hakoreshejwe intwaro, abunganira Ingabire bavuze ko ubushinjacyaha bwifashishije ibivugwa mu rubanza rw'abaregwa kuba abayoboke b'umutwe wa P5 bashinjwa kugaba ibitero ku butaka bw'u Rwanda.

Ku bushinjacyaha, ishyaka FDU-Inkingi ryayoborwaga na Victoire Ingabire akiri ku mugabane w'u Burayi riri mu mashyaka agize ihuriro rya P5.

Bityo ko umukuru waryo agomba kuryozwa ibyaha iri huriro ryahamijwe.

Abunganira Ingabire ariko basanga iki na cyo kigomba guteshwa agaciro kuko Ingabire atarezwe mu rubanza rwa P5 kandi itegeko rikavuga ko ibyavuye mu rubanza runaka bidashobora kugira ingaruka ku muntu utararubayemo umuburanyi.

Ibimenyetso by'amajwi byatanzwe n'uwitwa Boniface Nzabandora uvuga ko yari umuyoboke wa DALFA-Umurinzi na byo byanenzwe n'uruhande rw'uregwa.

Abunganira Ingabire bavuga ko amajwi uyu yemeza ko yafatiwe mu mahugurwa agamije guhirika ubutegetsi yafashwe mu buryo butemewe n'amategeko.

Ubwo yireguraga, Ingabire yavuze ko uyu Nzabandora yahoze ari n'umuntu bakoranaga bya hafi ariko akaza kumusezerera, ibitarashimishije uyu waje kuba umutangabuhamya.

Abunganira Ingabire bavuga ko bishoboka ko uyu yashinje Ingabire byo kumwihimuraho, bityo ko ubuhamya bwe bwashidikanywaho.

Havuzwe ubuhamya bw'uwitwa Munyabugingo na we ushinja Ingabire. Abunganira Ingabire bavuga ko hari ukwivuguruza kugaragara mu nyandiko yakoreshejwe n'uyu mutangabuhamya. Urwego rw'ubugenzacyaha rukavuga ko yafatiwe ku mupaka agiye mu mitwe yitwaje intwaro, ubundi ko yijyanye ku biro by'ubugenzacyaha gutanga amakuru.

Abunganira Ingabire basanga izi mvugo zivuguruzanya zituma byacyekwa ko uwatanze ubuhamya yabikoze yashyizweho igitutu.

Ibi byabaye nk'ibizamura impaka mu rukiko, ubushinjacyaha busaba ko uregwa yatanga ibimenyetso by'uko haba harabayeho igitutu mu ibazwa rya Munyabugingo.

Bavuga ku bimenyetso bishingiye ku majwi y'ikiganiro cyabaye hagati ya Ingabire n'uwitwa Cassien Ntamuhanga, abanyamategeko bo ku ruhande rw'uregwa bavuze ko iki kimenyetso kidakwiye guhabwa agaciro kuko cyarenze imbibi z'ibyemerwa n'amategeko.

Kuri bo ngo cyari ikiganiro gisanzwe cyagombaga kuba hagati y'abantu babiri kandi ko uburenganzira bwo kucyumviriza bwarenze igihe cyari cyemerewe.