Kagame: 'Nta kintu na kimwe u Rwanda rwigeze rwemerera u Burundi rutakoze mu kuzahura umubano w'ibihugu byombi'

Perezida Paul Kagame yahakanye ibyavuzwe na Perezida w'u Burundi ko u Rwanda rwagiranye amasezerano n'icyo gihugu ku bantu bafitanye isano n'imvururu zo mu 2015 nyuma ntiyubahirizwa.

Yagize ati: ''Ntakintu na kimwe u Rwanda rwigeze rwemerera u Burundi rutakoze mu kuzahura umubano w'ibihugu byombi

"Nta masezerano twiyemeje tutujuje , ntayo na Perezida w'u Burundi, ntayo n'undi muntu uwo ari we wese… Ariko wenda, ushobora gusanga ijoro rimwe yararose maze akibwira ko byabaye."

Perezida Ndayishimiye aherutse gutangariza BBC Gahuza ko u Rwanda ari rwo rwarenze ku byo rwumvikanye n'u Burundi ku mubano hagati y'ibihugu byombi..

Yavuze ko igihe aheruka kuvugana na Perezida Ndayishimiye ari igihe bavuganaga ku bijanye n'abarwanyi ba FDLR.

Ikibazo cy'amakimbirane muri Congo

Ku kibazo cy'amakimbirane ya Congo, Perezida Kagame yabajijwe ikoreshwa ry'ibihano mu bikorwa byo gukemura amakimbirane mu burasirazuba bwa RDC, avuga ko byongereye ibibazo biriho aho gukemura inkomoko yabyo.

Perezida w'uRwanda yagize ati:"Twebwe[Rwanda] dukunda amahoro ku buryo twiteguye kuyaharanira. Kandi iyo ni yo ntego yacu y'ingenzi. Turashaka amahoro, kandi turifuza gukorana n'abandi kugira ngo tugire amahoro."

Perezida Kagame avuga ko u Rwanda rukomeje guharanira amahoro ariko ko ''rwiteguye gufata ingamba rubona ko ari ngombwa mu kwicungira umutekano, bitewe n'iterabwoba riterwa n'umutwe wa FDLR mu burasirazuba bwa Repubulika ya Demokarasi ya Congo (DRC).''

Yagize ati:"Ikibazo cy'u Rwanda gihora ari umutwe wa FDLR muri Congo. Nabivuga inshuro ijana."

Yanavuze ku bihano u Rwanda rwafatiwe n'amahanga aho arushinja gufasha abarwanyi ba M23 bo muri Congo aho yagize ati: "Aho gufatira ibihano FDLR cyangwa abo bakorana na bo, cyangwa kubashyigikira, bafatiye ibihano ababarwanya. Njye sinumva icyo ari cyo."

Perezida Kagame avuga ko u Rwanda rutahwemye kugaragaza impungenge zerekeye kuba umutwe wa FDLR ukorera mu burasirazuba bwa Repubulika ya Demokrasi ya Congo kuva mu myaka mirongo itatu ishize.

Anenga abashinja u Rwanda gukoresha icyo kibazo nk'urwitwazo, ababwira ko bakwiye kugikemura bakareba niba koko u Rwanda rwari rukigikoresha nk'urwitwazo.

Congo n'umuryango mpuzamahanga bashinja u Rwanda gutera inkunga abarwanyi ba M23 barwanya ubutegetsi bwa Kinshasa bakoresheje ibigwanisho, bamaze kw'igarurira igice kinini cy'uburengerazuba bwa Kongo

Inzoga zitujuje ubuzirangenge

Perezida Paul Kagame yagarutse no ku kibazo cy'inzoga zitujuje ubuziranenge zateje ibibazo by'ubuzima n'impfu.

Yavuze ko, kurwanya ibinyobwa bidasanzwe bigomba kubanza gufatwa nk'ikibazo cy'ubuzima rusange, aho kuba impaka zo kurengera inganda n'imirimo.

Yagize ati: ''Igihugu kigomba kubanza gukemura impfu n'ingaruka ziterwa n'ibinyobwa bidasukuye mbere yo gutekereza ku nyungu z'ubucuruzi."

Yongeyeho ko "mbere y'uko tuvuga ku nganda n'abakozi, tugomba kubanza kuvuga ku buzima bw'aba bantu."

Perezida Kagame yavuze ko abantu n'ibigo by'ubucuruzi bikora cyangwa bikwirakwiza ibinyobwa bisembuye byica abaguzi bagomba kubiryozwa, mu gihe abashinzwe kubahiriza amabwiriza y'ubuziranenge na bo bagomba kubazwa ibyo bakoze.

Yagize ati: "Ni yo mpamvu inzego n'abayobozi bashinzwe kugenzura imikoreshereze y'imari n'umutungo by'igihugu.

"Ni ukugira ngo ibikorwa n'ibicuruzwa bitagira ingaruka ku bantu."

Ibi bije nyuma yaho ibikorwa bya leta byo guhashya izo nzoga zivugwa ko zitujuje ubuziranenge byakajije umurego kuva mu bihe bya vuba aha bishize, aho inganda zirenga 100 zakoraga izo nzoga zamaze gufungwa, n'abantu babarirwa muri za mirongo batabwa muri yombi.

Mu nzoga zahagaritswe harimo n'izo inganda zo muri Tanzania na Kenya.

Ibigo bigenzura ubuziranenge byo muri ibyo bihugu byahakanye ibivugwa n'abategetsi mu Rwanda, bishimangira ko inzoga zabyo zujuje ubuziranenge bwo muri ibyo bihugu n'ubwo ku rwego rw'Afurika y'uburasirazuba.