ለሩሲያ በመሰለል የተጠረጠረ የአሜሪካ ወታደር ዩናይትድ ኪንግደም ውስጥ ተያዘ

በኢንስዎርዝ፣ ግሎስተርሻየር በሚገኘው የኢምጂን ባራክስ የጦር ካምፕ መግቢያ
ታትሟል
የንባብ ጊዜ: 2 ደቂቃ

ለሩሲያ በመሰለል የተጠረጠረ አንድ የአሜሪካ ሠራዊት አባል በቁጥጥር ሥር መዋሉን የብሪታንያ የፀረ ሽብር ፖሊስ አስታወቀ።

የ41 ዓመቱ ከፍተኛ ወታደራዊ አባል የተያዘው ማክሰኞ ዕለት በግሎስተር አቅራቢያ መሆኑ ተገልጿል።

የለንደን የፀረ ሽብር ፖሊስ እንደሚያስረዳው፣ ግለሰቡ በቁጥጥር ስር የዋለው በአውሮፓውያኑ 2023 በወጣው የብሔራዊ ደህንነት ሕግ አንቀጽ አንድ እና ሦስት መሠረት ነው።

በፖሊስ የተጠቀሰው የዚህ ሕግ አንቀጽ አንድ፣ ጥበቃ የሚደረግለትን መረጃ ከማግኘት ወይም ይፋ ከማድረግ ጋር የተያያዘ ነው። ሌላኛው አንቀጽ ሦስት ደግሞ የውጭ አገር የስለላ ተቋምን ማገዝን ይመለከታል።

ምርመራውን የቀጠለው ፖሊስ ግሎስተርሻየር ውስጥ በሚገኙ በሁለት ስፍራዎች ላይ ፍተሻ እያካሄደ መሆኑ ተነግሯል።

ወታደሩ በኢንስዎርዝ፣ ግሎስተርሻየር በሚገኘው የኢምጂን ባራክስ የጦር ካምፕ ውስጥ ሰፍሮ እንደነበር ቢቢሲ ተገንዝቧል። ይህ ካምፕ ለኔቶ ስትራቴጂያዊ የኦፕሬሽን ማዕከል የሆነው የተባባሪ ፈጣን ምላሽ ሰጪ ዘብ ዋና መሥሪያ ቤት ሆኖ ያገለግላል።

የፀረ ሽብር ፖሊስ የአሜሪካዊው ወታደር በቁጥጥር ሥር መዋሉ አሁን እየተካሄዱ ካሉ ሌሎች ምርመራዎች ጋር እንደማይገናኝ ገልጿል።

የአሜሪካ ፌዴራል የምርመራ ቢሮ (ኤፍቢአይ) ዳይሬክተር ካሽ ፓቴል ባወጡት መግለጫ፣ "ይህ ወሳኝ እስር ለአሜሪካ እና ለአጋሮቻችን እጅግ አሳሳቢ ከሆነው የስለላ ውንጀላ ጋር የተያያዘ ነው" ብለዋል።

"ምርመራው እየቀጠለ ባለበት በዚህ ወቅት ግልጽ መልዕክት ማስተላለፍ እፈልጋለሁ፤ ይህ ኤፍቢአይ ለአሜሪካ የገባውን ቃለ መሃላ ለሚያፈርስ እንዲሁም የእኛንም ሆነ የአጋሮቻችንን ብሔራዊ ደህንነት አደጋ ላይ የሚጥል ድርጊት ለሚፈጽም ማንኛውም ሰው ላይ ትዕግሥት የለውም" ሲሉም አክለዋል።

የለንደን የፀረ ሽብር ፖሊስ ምክትል ረዳት ኮሚሽነር ቪኪ ኢቫንስ እስሩን "ወሳኝ" ሲሉ ገልጸውታል። "የቀረቡት ክሶች ከባድ ናቸው፤ ምርመራችንም በደንብ መካሄድ እንደቀጠለ ነው" ብለዋል።

ስሙ ያልተጠቀሰው የአሜሪካ ወታደር በአሁኑ ሰዓት በለንደን ፖሊስ ጣቢያ እስር ላይ ነው።

ግለሰቡ በቁጥጥር ሥር የዋለው በ2023 በወጣው የብሔራዊ ደህንነት አዋጅ መሠረት ስለሆነ፣ ፖሊስ ክስ ሳይመሠርት እስከ 14 ቀናት አቆይቶ መመርመር ይፈቀድለታል።

የአሜሪካ ጦር የፀረ ስለላ ዕዝ አዛዥ ብርጋዴር ጄኔራል ሾን ስቲንቾን በበኩላቸው፣ "ሚስጥራዊ መረጃዎች በአደራ የተሰጡት የአንድ ከፍተኛ ወታደር የቀረቡት ውንጀላዎች፣ ከውስጥ የሚመጩ ስጋቶች እውነተኛ እና ያልተቋረጡ መሆናቸውን የሚያስታውስ ነው" ብለዋል።

"አጠራጣሪ ነገር እንደተመለከተ የሚያስብ ማንኛውም ሰው አቅራቢያ ለሚገኝ የፀረ ስለላ ቢሮ ጥቆማ እንዲሰጥ አበረታታለሁ" ሲሉም ጥሪ አቅርበዋል።