"አዲስ መጽሐፍ ሳወጣ ሁሌም 'ባልነበብስ' ስል እፈራለሁ"- ሕይወት እምሻው

ደራሲ ሕይወት እምሻው
የምስሉ መግለጫ, ሕይወት እምሻው
ታትሟል
የንባብ ጊዜ: 7 ደቂቃ

ሕይወት እምሻው አጫጭር ልብ ወለዶችን ብቻ የምትጽፍ ደራሲ አይደለችም። ስላቅ አዘል ወጎች አሏት። ታሪኳን ከምትኖርበት ማኅበረሰብ እና ከተማ ትቀዳለች። በዚህ ውስጥ የዘመን አሻራን ለማሳየት በብርቱ ትተጋለች።

ላለፉት 11 ዓመታት በሥነ ጽሑፍ ዓለም ውስጥ ያለማቋረጥ ትፈስሳለች። ድርሰቶቿ ያልተጠበቁ አቅጣጫዎችን በመያዝ በእያንዳንዱ መጽሐፍዋ አዳዲስ መንገዶችን የአጻጻፍ ይትብሃሎችን ለማሳየት ይሞክራሉ።

ስድስት የአጫጭር ልቦለድና የወግ ስብስቦች ያበረከተችው ደራሲ ሕይወት እምሻው ከቤተ መጻሕፍትና ከመጽሐፍ መደብሮች ባሻገር የሚዘልቅ ታማኝ የአንባቢዎች ማኅበረሰብ ፈጥራለች።

በፌስቡክ ከ135 ሺህ በላይ ተከታዮችን እና በቲክቶክ በሺዎች የሚቆጠሩ ተከታዮችን አፍርታለች።

አምስት ጊዜ በድጋሚ የታተመው የመጀመሪያ መጽሐፍዋ ባርቾ ደግሞ ወደ እንግሊዘኛ ተመልሶ ለንባብ ሊበቃ መሆኑን ከቢቢሲ ጋር ባደረገችው ቃለ ምልልስ ወቅት ተናግራለች።

በብዙዎች ዘንድ የተከበረች፣ በአንዳንዶች ዘንድ አነጋጋሪ የሆነች፣ በማንም ዘንድ ግን ችላ ያልተባለች፣ በዘመናዊ የአማርኛ ሥነ ጽሑፍ ውስጥ ልዩ ስፍራ ያላት ደራሲ ናት።

ለሕይወት እምሻው መጻፍ መድረሻ ሳይሆን የማያቋርጥ ለውጥ ያለበት የሕይወት ጉዞ ነው።

በምትጽፈው እያንዳንዱ ገጽ ውስጥ ችላ መባልን አትፈልግም። በጽሑፎቿ ውስጥ ያለው አንድ ግብዣ አንብበዋት እንዲያስቡ፣ እንዲከራከሩ ወይንም እንዲተቿት ማድረግ ነው።

ለእሷ ሥነ ጽሑፍ የሚነበብ ብቻ ሳይሆን የሚያነቃ፣ የሚያናግር እና የሚዘክር ነው።

የሕይወት እምሻው የመጀመርያ መጽሐፍ 'ባርቾ' ከአምስት ጊዜ በላይ ታትሞ ለንባብ በቅቷል
የምስሉ መግለጫ, የሕይወት እምሻው የመጀመርያ መጽሐፍ 'ባርቾ' ከአምስት ጊዜ በላይ ታትሞ ለንባብ በቅቷል

'ባልነበብስ ስል እፈራለሁ'

Skip podcast promotion and continue reading
BBC News Amharic የቢቢሲ አማርኛ ዩቲዩብ ቻናላችንን ይቀላቀሉ!
የቢቢሲ አማርኛ ዩቲዩብ ቻናል

ዜና፣ ትንታኔ እና ታሪኮችን በምሥል እና በድምጽ ለማግኘት

ይህንን በመጫን ሰብስክራይብ ያድርጉ

End of podcast promotion

ባለፉት 11 ዓመታት ውስጥ ስድስት የአጭር ልብወለድ እና የወግ መጻሕፍትን ለአንባቢ አቅርባለች። በዓመት ሁለት መጻሕፍት አሳትማ ታውቃለች።

በአንድ መጽሐፍ ውስጥ 47፣ አሁን ደግሞ በአዲሱ መጽሐፏ ውስጥ 90 ታሪኮችን አካትታ ለአንባቢ አቅርባለች።

በብዛት ታሪኮችን ለመጻፍ የረዳት ምን እንደሆነ ስትጠየቅ መጻፍን የምመለከተው "እንደ ሕይወቴ አካል ነው" ትላለች።

ልክ እንደምኖረው ነው የምጽፈው የምትለው ሕይወት፣ ድርሰት ለእኔ "ቅድመ ዝግጅት፣ ሃሳብ ማሰላሰል፣ መብሰልሰል" ብዙም የማይፈልግ "በጣም ቅርብ የሆነ ነገር ነው" ትላለች።

ሕይወት ሁለተኛ መጽሐፏ ከወጣ በኋላ "በፍቅፋቂ" እና "በማታ ማታ" መካከል የአራት ዓመት ክፍተት ነበር።

እነዚያን ያልጻፈችባቸው ዓመታት "ድርቀት የነበረባቸው ጊዜያት" ስትል ታስታውሳለች።

ከዚያ በኋላ ግን ከሦስት መቶ እና አራት መቶ በላይ ታሪኮች የጻፍኩበት ጊዜ ነው የምትለው ሕይወት፣ በተከታታይ መጽሐፎቿን ለአንባቢ በማድረስ አሁን ሰባተኛ መጽሐፏ "ቀብር እና ማስካራ" ላይ ደርሳለች።

ሕይወት ብዙ ታሪኮችን ብትጽፍም በአንድ መጽሐፍ ጠርዞ ለአንባቢ ለማቅረብ በሚደረግ መረጣ ወቅት ትቸገራለች።

"በተለይ ብዛት ሲኖረው የካርታ ጨዋታ በለው። እነዚህ ቀይ ናቸው፤ እነዚህ ጥቁር ናቸው፤ እነዚህ አረንጓዴ እያሉ መለየት ያስፈልጋል፤ ረዥም ጊዜ የሚፈጅብኝ መጽሐፍ ሳዘጋጅ መጽሐፉ አንድ ዓይነት ቀለም ያስፈልገዋል የሚለው ነው. . . አንድ ዓይነት ቀለም ኖሯቸው የተለያዩ አንዲሆኑ ትፈልጋለህ። ቀለም ኖሯቸው የተለያየ የሚያስተሳስራቸው ጣዕም ትፈልጋህ እርሱ ነው ጊዜ የሚፈጀው።"

ሕይወት ሰባተኛ መጽሐፏን ለሕትመት ስታዘጋጅ ከ220 በላይ ታሪኮችን በቅድሚያ መምረጧን ጠቅሳ ከዚያ ውስጥ በብዙ ምክንያት መረጣውን እንደገደበች ትናገራለች።

ገፁ እንዳይበዛ፣ የርዕሰ ጉዳይ ድግግሞሽ እንዳይኖር፣ ጣዕሙ መረር እና ጣፈጥ ያለውን ለማዛነቅ ረዥም ጊዜ እንደሚወስድባት ገልጻለች።

"ይነበብልኝ ይሆን ብዬ ሁሌ ነው የምፈራው" የምትለው ሕይወት፣ አሁን ሰባተኛው መጽሐፏ ገና ከመውጣቱ፣ "ቢጠሉትስ፣ ባይወደድስ፣ ሰው ባያገኘውስ፣ ባይሸጥስ፣ ያገኘው ሰው በጣም ጠልቶት መጥፎ ነገር ቢያወራስ ብለህ ብዙ ነገር ታስባለህ" ስትል ልምዷን ጠቅሳለች።

"ብዙ መጽሐፍ መጻፍ ከዚያ ፍርሃት የሚያድን አይመስለኝም" የምትለው ሕይወት፣ ሁል ጊዜም አዲስ መጽሐፍ ሳወጣ "ይጨንቀኛል" ብላለች።።

እኔ ከመሸጡ ይልቅ ስለ መነበቡ ነው የማስበው የምትለው ሕይወት፣ ምናልባት ያ የሆነው በመጽሐፍ ሽያጭ ኑሮዬን ስለማልገፋ ሊሆን ይችላል ስትል ልምዷን ታጋራለች።

ነገር ግን መነበቡን የሚሸጠው ቅጂ ብዛት ስለሚናገር "ዋናው ነገር የሚያስጨንቀኝ ብዙ ሰው እጅ ይገባል ወይ፤ ሰው ወዶታል ወይ፤ ባይወደው ራሱ መነጋገሪያ እንዲሆን እፈልጋለሁ" ትላለች።

አንድ ደራሲ ሰዎች መጽሐፉን አንብበው ምንም ነገር ቢሰማቸው "ዝም ባይባል ነው የሚፈልገው" ካለች በኋላ፣ መጽሐፉ ገበያ ላይ ውሎ አንባቢያን ሳይነጋገሩበት ሲቀሩ በጣም ይጨንቃል ትላለች።

"መነጋገሪያ መሆን። መውደድ ብቻ ሳይሆን መጥላትም ምላሽም በመሆኑ እኔ ሳልሆን በመጽሐፉ የተነሱ ሃሳቦች ርዕሰ ጉዳይ እንዲሆን ነው የምፈልገው።"

የእርቃን ሩብ ጉዳይ መጽሐፍ ሽፋን ገጽ

የሕይወት ሰባት መጻሕፍት ትስስር

የአጭር ልብወለድ እና የወጎች ፀሐፊዋ ሕይወት ከመጀመርያዋ መጽሐፍ 'ባርቾ' እስከ አሁኑ 'ቀብር እና ማስካራ' ድረስ ገጸባሕሪዎቹን የሳለችበት፣ ነገረ ጉዳዩን ያደራችበት መንገድ ሆን ተብሎ የተደረገ መሆኑን ትጠቅሳለች።

በየመጻሕፍቱ የሚገኙት ገጸ ባሕሪያት በስም ሳይሆን በምግባር፣ በኖሩበት ሁኔታ፣ በዕድሜያቸው እና ባሳለፉት የሕይወት ታሪክ ከመጽሐፍ መጽሐፍ እያደጉ እየጎለመሱ፣ እያፈቀሩ፣ እያገቡ፣ እየወለዱ እየፈቱ የሚሄዱ ናቸው።

"ባርቾ ላይ አብዛኞቹ የልጅነት ታሪክ ናቸው። ባርቾ ላይ በ80ዎቹ ልጅ የነበሩ ከቤተሰብ ውጭ ያለውን ዓለም እያዩ፣ እየተገነዘቡ፣ እየተረዱ የመጡ ዓላማቸውን ሕይወታቸውን እያሰፉ የመጡ ልጆችን ነው የምናገኘው።"

ፍቅፋቂ ላይ ደግሞ የመጀመርያ ፍቅር ሲይዛቸው፣ ወደ ዩኒቨርስቲ ሲገቡ ከጉርምስና ጋር የሚነሱ ጥያቄዎች፣ ድንግልና፣ ፍቅረኛ መያዝ፣ ስለ ቤተሰብህ አዳዲስ ነገሮችን የሚረዱበት፣ ከጓደኞች እና ከፍቅረኛ ጋር ያለ መስተጋብር ላይ የሚያተኩር ነው።

መጽሐፉ በ2010 ዓ.ም. የወጣ ሲሆን ከዚያ በተጨማሪ የወቅቱን የፖለቲካ ትኩሳት በሚገባ የሚያሳዩ ታሪኮችንም ይዟል። ነገሮች የተንገራገጩበት ጊዜ በመሆኑ በዚያ ዐውድ እነዚያ ሰዎች ሲኖሩ የሚያሳይ ነው።

ማታ ማታ ላይ የምናገኛቸው በ30ዎቹ መጀመርያ ላይ ያሉ ወንዶች እና ሴቶችን ነው።

"ብዙዎቹን ገጸባሕሪያት ተከትለህ ብትሄድ፣ ብዙዎቹ አግብተው ወልደው ነው የምናገኛቸው። የትዳር ግሳንግስ ውስጥ ገብተው፣ ውጣ ውረዱን ሲያልፉ ሲዳክሩ ነው የምናገኛቸው። የዘገዩትም ባለማግባታቸው ሲቆጩ ወይንም ሲደሰቱ ይታያሉ" ትላለች።

ለእርቃን ሩብ ጉዳይ ላይ ደግሞ ጨርቃቸውን ጥለው "ከዚህ ቀደም በገነባሁት ታሪክ ውስጥ ግማሹ የልጅነት ጠባሳውን እያስታወሰ፣ ግማሹ አሁን በሕይወቱ ውስጥ የደረሰበትን እያስታወሰ፣ እዚያም ላይ የአገሪቱ የዕለት ተዕለት ፖለቲካ በመደበኛ ዜጎች ሕይወት ላይ ያለውን ተጽዕኖ እንመለከታለን" ስትል ታብራራለች።

የቡና ቁርስ ግን የፍቅር ታሪክ አይደለም። ከእርቃን ሩብ ጉዳይ የተረፉ ታሪኮች ናቸው። ለዚያም ነው የቡና ቁርስ የተሰኙት። በጣዕም ለየት ያሉ፣ ወጣ ያሉ ትረካ ቴክኒኮችን የሞከረችበት መጽሐፍ መሆኑን ትናገራለች።

ዥዋዥዌ ላይ ደግሞ እነዚያ ሰዎች ምን ላይ ደረሱ የአሁኑ ኢትዮጵያ አንዴት አደረገቻቸው የሚለው ይታያል።

የሕይወት ሦስት መጻሕፍት

ዘመንን የሚከትቡት የሕይወት አጫጭር ልብወለዶች

ጥበብ ውስጥ ያለ ሰው ብዙ ጊዜ በትዝታ ነው የሚኖረው ትላለች ሕይወት። "ኑሯችን ሕይወታችን የምንተነፍሰው ሁሉ ከትዝታ ጋር በጣም የተገናኘ ነው። የምንጽፈው ከሐዘንም ይመንጭ ከደስታ ባሕር ይቀዳ ከኖርነው ሕይወት ነው። የኖርነው ደግሞ የሚመዘገበው በብዙ መልኩ ነው" ትለለች።

መጽሐፍ ውስጥ ዘመን እና ሰው ይገኛሉ፣ ሙዚቃ ውስጥ ሕይወት እና እውነት ይመሽጋሉ። ትዝታው የሚገመደው ደግሞ በምንኖርበት ከተማ፣ ከምንኖርበት ማኅበረሰብ ጋር ነው።

የሕይወት ገጸባሕርያት የሚኖሩት፣ የሚያፈቅሩት፣ የሚጠሉት የሚያዝኑት በተቀዱበት አዲስ አበባ ውስጥ ነው።

"ስለዚህ ለእኔ ስር ነቀል እና በጣም ፈጣን የሆነ የከተማ ገጽታ ለውጥ ሲኖር በጣም አስደንጋጭ ነው።"

የድርሰቴ ገጸባሕርያትም ከሌላ ቦታ የሚመጡ አይደሉም የምትለው ሕይወት፣ ይህንን የከተማ ገጽታ ለውጥ የሚያሳዩ ቅሬታውን የሚያስተጋቡ እንደሚሆኑ ትገልጻለች።

"በአብዛኛው በቅሬታ ውስጥ የሚመላለሱ ናቸው። ካገኙት ይልቅ ያጡት ነገር የሚበልጥ ሰዎች ናቸው" በዚያ ውስጥ ያለውን ነገር እንደደራሲ የሰዎችን ብሶት ሳይ የገባኝን ያህል ጽፌያለሁ።"

ሕይወት በድርሰቶቿ የዘመን መልኮችን ታሳያለች። ዥዋዥዌ መጽሐፍ ላይ ከርዕሱ ስር "የዘመን ማስታወሻ ታሪኮች" ይላል።

የፈጠራ ሥራዎቿ ሆነ ተብለው "ዘመንን እንዲያስታውሱ እና እንዲዘግቡ አድርጌ ነው የምጽፈው" የምትለው ሕይወት፣ ወጣት አንባቢያን መጽሐፏን ሲያነቡ ያልኖሩበትን ዘመን ለመረዳት እንደሚያግዛቸው ታስረዳለች።

ስለዚህ የሕይወት ልብወለዶች ውስጥ የከተሙት ገጸባሕሪያት የያዙት የግለሰቦች ታሪክ ብቻ ሳይሆን የአገር ታሪክ፣ በግለሰብ ሕይወት ውስጥ የሚዘገብ የከተሜ ሕይወትን ነው።

የቡና ቁርስ

የሕይወትን ሥራዎች ለእንግሊዘኛ አንባቢዎች

ስብሰብ ስራዎች ደስ ይለኛል የምትለው ሕይወት፣ "በእኔ እና በአርታኢያን ዐይን ምርጥ የሚባሉትን መርጬ አንድ መጽሐፍ ቢታተም ደስ ይለኛል" ስትል ዕቅዷን ተናግራለች።

የመጀመርያ መጽሐፏ ባርቾ ግን በእንግሊዘኛ ተተርጉሞ ለሕትመት ተዘጋጅቷል። በወራት ውስጥ እንደሚታተምም ገልጻ "ከዚህ በኋላ ግን የትርጉም ሥራ የማሰራ ከሆነ ከሁሉም መጽሐፎቼ የተውጣጡ ታሪክን እና በተለይ ደግሞ አዲስ አበባን ለዓለም አንባቢ የሚያስተላልፉ ታሪኮችን ለማሳየት እሞክራለሁ" ብላለች።

ሰባተኛ መጽሐፏ 471 ገጽ ያለው፣ 90 ታሪኮች የያዘ ነው። ከእርቃን ሩብ ጉዳይ ጀምሮ አዳዲስ ነገሮችን እየሞከርኩ ነው የምትለው ሕይወት፣ አማርኛ ሥነ ጽሑፍ ውስጥ ለመጀመርያ ጊዜ ተሞክረው የማያውቁ ቴክኒኮችን፣ ቢሞከሩም ደግሞ እኔ በራሴ መልኩ ብሞክራቸው ብዬ ያመጣኋቸው ነገሮች አሉ ስትል ተናግራለች።

ቀብር እና ማስካራ ብዙ ታሪኮችን አካትቶ በመያዝ በኢትዮጵያ የመጀመርያው የአጭር ልብወለድ ስብስብ መጽሐፍ መሆኑን ስታውቅ የመጽሐፉ መታሰቢያነት ለአዳም ረታ ማድረጓት ጠቅሳለች።

"ለድርሰት ሕይወቴ ከፍተኛ አስተዋጽኦ ያደረገ። ዐይኖቼን የገለጠ፤ አማርኛ ጉልበት ያለው ቋንቋ መሆኑ ያሳየኝ እርሱ ነው። የይቻላል መንፈስን የሰጠን ደራሲ ነው።"

ሕይወት የምትታወቀው በፖለቲካ እና ማኅበራዊ ስላቅ፣ በትዳር እና ፍቅር ታሪኮች ቢሆንም በአዲሱ መጽሐፏ ግን የኑሮ ውጣ ውረድ የዘመነኛ አዲስ አበቤዎች የሕይወት ውጣ ውረድ እና የመኖር ትግል በደንብ አድርጎ የከተቡ ታሪኮች መያዙን ጠቅሳለች።

ከድርሰት ውጪ ያለው ሕይወቴ ሕጻናት ላይ ያተኩራል የምትለው ሕይወት በጦርነት እና በግጭት ውስጥ የሚያልፉ ኢትዮጵያውያን በተለይ ደግሞ ሕጻናትን በመምረጥ "ታሪካቸውን ለመናገር እያሰብን ነው። ብንችል ጽፈን እናስቀምጠዋለን። በጣም ከተሳካልን ደግሞ መጽሐፍ ይሆናል ብዬ አስባለሁ" ስትል ዕቅዷን ተናግራለች።

ዥዋዥዌ

"ደራሲው እጁን ካልሰጠ ኤአይ አይተካውም"

ደራሲ ሕይወት እምሻው ሰው ሠራሽ አስተውሎት (ኤአይ) የደራሲያንን ሚና ሙሉ በሙሉ ይተካል ብላ እንደማታምን ትናገራለች።

ሆኖም የሥነ ጽሑፍና የኪነ ጥበብ ባለሙያዎች ፈጠራቸውን ትተው በቴክኖሎጂው ላይ ብቻ ከተደገፉ፣ በቀላሉ ሊተካቸው እንደሚችል ታስጠነቅቃለች።

በድርሰት እና በደራሲ ሕይወት ውስጥ እንደ ችግር ታየው እንደሆን የተጠየቀችው ሕይወት "ከፈለግን እናደርገዋለን፤ ከፈለግን አናደርገውም ብዬ ነው የማስበው። ለእኔ የምርጫ ጉዳይ ነው" ትላለች።

አንድ ነገር ስለቆየ እና ከእርሱ የሚበልጥ ነገር ስለመጣ፣ በፍጥነት የሚሰራ ወይንም የሚያማልል አዲስ ነገር ስለመጣ የድሮው ይጠፋል ማለት አይደለም የምትለው ሕይወት፣ አዳዲስ ቴክኖሎጂዎች በታሪክ ውስጥ ሲመጡ ያስከተሉትን ስጋት በማስታወስ ዛሬ በኤአይ ዙሪያ የሚነሱ ፍርሃቶች አዲስ እንዳልሆኑ ትገልጻለች።

ቢራ ሲገባ ጠላ ይጠፋል፣ ፎቶግራፍ ሲፈጠርም የሰዓሊያን ዘመን ያበቃል የሚሉ ግምቶች እንደነበሩ በማስታወስ፣ አዲስና ፈጣን ቴክኖሎጂ መምጣቱ ብቻ ነባር ጥበብን እንደማያጠፋ ትገልጻለች።

የሥነ ጽሑፍን ባህሪ ከኤአይ አቅም ጋር ስታነጻጽርም "ጄመናይን ብትጠይቀው እንደ አዳም ረታ ሊጽፍልህ ይችላል። . . . እንደ አዳም ረታ ግን ሊያስብ አይችልም። ምክንያቱም የእርሱን ሕይወት አልኖረም። ድርሰት ከመኖር እና ከሕይወት ነው የሚቀዳው። እኔ ያለፍኩትን ያላፈ ኤአይ እንዴት የእኔን ቴክኒክ ኮፒ ሊያደርግ ይችላል" ስትል ትጠይቃለች።

የሰው ሠራሽ አስተውሎት ደራሲው የሚጽፍበትን ስልት ሊያሳይ ቢችልም "እውነት እና ነፍስ ግን የለውም" በማለት ብዙ የሚያሳስብ አይደለም ብላለች።

በተመሳሳይ ደራሲዋ ኤአይን እንደ ጠላት ሳይሆን እንደ ሥራ አጋር መመልከት እንደሚገባ ትመክራለች። አንድ ጸሐፊ አንድን ርዕስ ለማጥናት ወይም የዓለም ድርሰቶችን አካሄድ ለመረዳት ኤአይን እንደ መረጃና መነሳሻ ምንጭ ሊጠቀምበት እንደሚችል ትጠቁማለች።

ከዶስቶየቭስኪ እስከ ዘመናዊ ደራሲዎች የተጠቀሙባቸውን የአጻጻፍ ቴክኒኮች ለመመርመርም ጠቃሚ መሣሪያ ሊሆን እንደሚችል ትናገራለች።

"እንደ አጋር ማየት ያለብን የሚመስለኝ ግን አዳዲስ ቴክኒክ ንገረኝ በማለት . . . አዳዲስ ነገር ለማወቅ ይጠቅማል። እንደውም ግብዓት ይሆናል ካወቅንበት።"

"እጅ ሰጥተህ ደግሞ ጻፍልኝ ካልከው ደግሞ ነፍስ የሌለው ነገር ይተካሃል።"